ᠤᠬᠠᠭᠠᠷᠠᠵᠤ ᠠᠮᠢᠳᠤᠷᠠᠬᠤ ᠬᠣᠷᠸ᠎ᠠ
        ᠊᠊᠊᠊᠊᠊᠊ ᠳᠠᠩᠴᠢ ᠡᠷᠲᠡ ᠬᠠᠯᠢᠭᠰᠠᠨ ᠡᠵᠢ ᠶᠢᠨ ᠢᠶᠡᠨ ᠠᠷᠢᠭᠤᠨ ᠰᠦᠨᠡᠰᠦᠨ ᠳᠦ ᠮᠦᠷᠭᠦᠶᠦ
　　　　ᠡᠨᠡ ᠬᠣᠷᠸ᠎ᠠ ᠳᠤ ᠡᠵᠢ ᠲᠠᠢ ᠰᠠᠶᠢᠬᠠᠨ᠂ ᠠᠯᠠᠭ ᠦᠷᠡᠰ ᠦᠨ ᠢᠶᠡᠨ ᠲᠦᠯᠦᠭᠡ ᠵᠠᠵᠢᠨ ᠤ ᠦᠰᠦ ᠪᠡᠨ ᠪᠤᠭᠤᠷᠤᠯᠳᠠᠲᠠᠯ᠎ᠠ ᠨᠠᠰᠤ ᠪᠠᠷ ᠢᠶᠠᠨ ᠵᠢᠳᠭᠥᠵᠥ᠂ ᠵᠤᠪᠠᠯ ᠵᠦᠳᠡᠭᠦᠷᠢ ᠶᠢ ᠬᠠᠨᠲᠠᠯ᠎ᠠ ᠪᠠᠨ ᠠᠮᠰᠠᠭᠰᠠᠨ ᠨᠠᠰᠤᠲᠠᠢ ᠡᠵᠢ ᠲᠠᠢ ᠪᠠᠨ ᠵᠢᠷᠭᠠᠵᠤ ᠠᠮᠢᠳᠤᠷᠠᠬᠤ ᠨᠡᠩ ᠰᠠᠶᠢᠬᠠᠨ᠃
　　　　ᠵᠤᠯᠠᠢ ᠵᠤᠯᠠᠢ ᠶᠢ ᠨᠢ ᠭᠢᠰᠬᠢᠭᠦᠯᠵᠦ ᠠᠬ᠎ᠠ ᠡᠭᠡᠴᠢ ᠳᠡᠭᠦᠦ ᠳᠣᠯᠣᠭᠤᠯᠠ ᠶᠢ ᠡᠨᠡ ᠶᠢᠷᠲᠢᠨᠴᠦ ᠳᠦ ᠲᠦᠷᠦᠭᠦᠯᠡᠭᠡᠳ ᠵᠠᠮ ᠵᠠᠮ ᠢᠶᠠᠷ ᠨᠢ ᠬᠦᠲᠦᠯᠵᠦ ᠵᠢᠷᠭᠠᠯ ᠢ ᠲᠠ ᠢᠪᠡᠭᠡᠨ ᠡᠳ᠋ᠯᠡᠭᠦᠯᠦᠭᠰᠡᠨ ᠪᠢᠯᠡ᠃ ᠳᠦᠴᠢ ᠶᠢᠨ ᠳᠠᠪᠠᠭ᠎ᠠ ᠶᠢ ᠳᠥᠩᠭᠡᠵᠦ ᠳᠠᠪᠠᠭᠠᠳ ᠠᠪᠤ ᠶᠢ ᠮᠢᠨᠢ ᠲᠠ ᠠᠯᠳᠠᠭᠰᠠᠨ ᠴᠤ ᠥᠨᠳᠡᠭᠡᠨ ᠳᠣᠯᠣᠭᠠᠨ ᠭᠠᠯᠠᠭᠤ ᠮᠢᠨᠢ ᠭᠡᠵᠦ ᠨᠢᠷᠤᠭᠤ  ᠵᠣᠭᠰᠣᠭᠠᠳ ᠠᠮᠢᠳᠤᠷᠠᠯ ᠤᠨ ᠲᠡᠭᠷᠢ ᠶᠢ ᠲᠤᠯᠤᠭᠰᠠᠨ ᠠᠯᠤᠩᠭᠣᠸ᠎ᠠ ᠡᠬᠡ ᠰᠢᠭ ᠮᠣᠩᠭᠣᠯ ᠡᠬᠡ ᠶᠢᠨ ᠬᠠᠲᠠᠭᠤ ᠰᠢᠨᠳᠠᠰᠤ ᠲᠠ ᠪᠠᠶᠢᠵᠤ ᠪᠢᠯᠡ᠃ ᠠᠪᠤ ᠦᠭᠡᠢ ᠬᠡᠦᠬᠡᠳ ᠴᠤ ᠠᠳᠠᠯᠢᠬᠠᠨ ᠬᠦᠮᠦᠨ ᠦ ᠵᠡᠷᠭᠡ ᠳᠦ ᠬᠥᠷᠳᠡᠭ ᠭᠡᠵᠦ ᠡᠵᠡᠨ ᠪᠣᠭᠳᠠ ᠴᠢᠩᠬᠢᠰ ᠲᠡᠮᠦᠵᠢᠨ ᠦ ᠥᠯᠢᠭᠡᠷ ᠡᠴᠡ ᠣᠯᠠᠨ ᠣᠯᠠᠨ ᠶᠠᠷᠢᠳᠠᠭ ᠴᠢᠨᠢ ᠲᠣᠯᠲᠣ ᠵᠢᠷᠦᠬᠡᠨ᠎ᠡ ᠬᠠᠳᠠᠩᠰᠢᠵᠤ ᠴᠢᠬᠢᠨ ᠰᠣᠨᠣᠷ ᠢ ᠮᠢᠨᠢ ᠳᠡᠯᠡᠳᠦᠭᠰᠡᠭᠡᠷ ᠪᠦᠯᠦᠭᠡ᠃
　　　　ᠠᠷᠭ᠎ᠠ ᠦᠭᠡᠢ ᠨᠢᠯᠬ᠎ᠠ ᠥᠶ᠎ᠡ ᠳᠤ ᠪᠠᠨ ᠠᠷᠠᠳ ᠤᠨ ᠪᠠᠭᠰᠢ ᠶᠢᠨ ᠠᠯᠪᠠ ᠲᠠᠢ ᠠᠪᠤ ᠶᠢᠨ ᠢᠶᠡᠨ ᠪᠣᠰᠣᠳ ᠲᠠᠢ ᠨᠢᠭᠤᠷ ᠤᠯᠠᠶᠢᠯᠴᠠᠯ ᠦᠭᠡᠢ᠂ ᠬᠥᠮᠥᠨ ᠳᠦ ᠬᠠᠷᠢᠶᠠᠭᠳᠠᠴᠢᠬᠠᠭᠠᠳ ᠢᠨᠢᠶᠡᠪᠬᠢᠯᠡᠨ ᠪᠣᠰᠣᠭᠠᠳ ᠶᠠᠪᠤᠴᠢᠬᠠᠳᠠᠭ ᠤᠬᠠᠭᠠᠨᠲᠤ ᠨᠣᠮᠣᠬᠠᠨ ᠠᠷᠠᠨᠰᠢᠨ ᠢ ᠨᠢ ᠳᠣᠷᠣᠢ ᠥᠬᠡᠨᠴᠡ ᠪᠠᠷ ᠠᠨᠳᠠᠭᠤᠷᠠᠴᠢᠬᠠᠭᠠᠳ ᠪᠢ᠄ ︽ ᠠᠪᠤ ᠶᠢ ᠮᠢᠨᠢ ᠳᠣᠣᠷᠠᠰᠢᠶᠠᠭᠰᠠᠨ ᠬᠣᠷᠣᠰᠣᠯ ᠢᠶᠠᠨ ᠥᠰᠴᠦ ᠲᠣᠮᠣᠭᠠᠵᠢᠭᠰᠠᠨ ᠬᠣᠶᠢᠨ᠎ᠠ ᠵᠠᠪᠠᠯ ᠠᠪᠤᠨ᠎ᠠ︾ ᠬᠡᠮᠡᠨ ᠤᠬᠠᠭᠠᠨ ᠳᠤ ᠪᠠᠨ ᠬᠠᠲᠠᠭᠤ ᠰᠡᠶᠢᠯᠦᠭᠡᠳ ᠬᠥᠮᠥᠨ ᠦ ᠬᠠᠵᠠᠭᠠᠢ ᠶᠢ ᠬᠠᠷᠠᠨ ᠶᠠᠳᠠᠭᠠᠳ ᠬᠡᠷᠡᠭᠦᠯ ᠵᠣᠳᠣᠭᠠᠨ ᠬᠢᠵᠦ ᠲᠠᠨ ᠢ ᠪᠡᠨ ᠬᠡᠴᠢᠨᠡᠨ ᠵᠣᠪᠠᠭᠠᠯ᠎ᠠ ᠁
　　　　ᠥᠨᠡᠨ ᠢ ᠬᠡᠯᠡᠬᠦ ᠳᠦ ᠠᠪᠤ ᠮᠢᠨᠢ ᠲᠡᠶᠢᠮᠦ ᠡᠷᠲᠡ ᠶᠠᠪᠤᠴᠢᠬᠠᠮᠠᠷ ᠯᠠ ᠦᠭᠡᠢ ᠪᠠᠶᠢᠭᠰᠠᠨ᠃ ᠳᠡᠭᠡᠷ᠎ᠡ ᠵᠠᠭᠤᠨ ᠤ ᠨᠠᠶᠠᠭᠠᠳ ᠣᠨ ᠤ ᠦᠶ᠎ᠡ ᠶᠢᠨ ᠠᠷᠠᠳ ᠤᠨ ᠪᠠᠭᠰᠢ ᠶᠢᠨ ᠬᠡᠳᠦᠬᠡᠨ ᠵᠣᠭᠣᠰ ᠤᠨ ᠴᠠᠯᠢᠩ ᠢᠶᠠᠷ ᠪᠠᠯᠴᠢᠷ ᠪᠠᠭ᠎ᠠ ᠳᠣᠯᠣᠭᠠᠨ ᠬᠡᠦᠬᠡᠳ ᠢ ᠦᠰᠬᠡᠨ ᠬᠦᠮᠦᠵᠢᠭᠦᠯᠬᠦ ᠨᠢ ᠬᠢᠯᠪᠡᠷ ᠪᠢᠰᠢ ᠬᠣᠶᠢᠨ᠎ᠠ ︽ ᠠᠭᠤᠰᠬᠢᠨ ᠰᠦᠷᠢᠶ᠎ᠡ︾ ᠶᠢ ᠡᠳᠡᠭᠡᠷᠡᠭᠦᠯᠵᠦ ᠴᠢᠳᠠᠭ᠎ᠠ ᠦᠭᠡᠢ ᠠᠵᠢᠯ ᠤᠨ ᠪᠠᠶᠢᠷᠢ ᠳᠤ ᠪᠠᠨ ᠳᠦᠴᠢᠨ ᠨᠠᠢᠮᠠᠲᠠᠶᠢᠬᠠᠨ ᠨᠢᠳᠦ ᠪᠡᠨ ᠠᠨᠢᠭᠰᠠᠨ ᠢ ᠶᠠᠭᠠᠬᠢᠯᠲᠠᠢ ᠪᠢᠯᠡ᠃ ︽ ᠦᠶ᠎ᠡ ᠴᠠᠭᠠᠨ ᠳᠤ ᠦᠷ᠎ᠡ ᠦᠭᠡᠢ᠂ ᠦᠨᠦᠴᠢᠨ ᠬᠡᠦᠬᠡᠳ ᠡᠯᠢᠭᠡ ᠦᠭᠡᠢ︾ ᠬᠡᠮᠡᠨ ᠰᠤᠷᠤᠯᠭ᠎ᠠ ᠶᠢᠨ ᠨᠠᠶᠢᠵᠢᠰ ᠲᠠᠭᠠᠨ ᠳᠣᠷᠣᠮᠵᠢᠯᠠᠭᠤᠯᠤᠭᠠᠳ ᠵᠣᠳᠣᠵᠤ ᠴᠣᠬᠢᠨ ᠰᠢᠷᠬᠠᠲᠤᠭᠤᠯᠤᠭᠠᠳ ᠭᠡᠷ ᠦᠨ ᠬᠢᠨᠢ ᠲᠣᠮᠣᠴᠤᠤᠯ ᠳᠤ ᠡᠷᠢᠭᠳᠡᠵᠦ᠄ ︽ ᠠᠪᠤ ᠦᠭᠡᠢ ᠬᠡᠦᠬᠡᠳ ᠠᠮᠠᠷᠬᠠᠨ ᠮᠠᠭᠤ ᠶᠢ ᠰᠤᠷᠳᠠᠭ ᠶᠤᠮ᠂ ᠬᠦᠦ ᠪᠡᠨ ᠰᠠᠶᠢᠨ ᠰᠤᠷᠭ᠎ᠠ ᠁︾ ᠭᠡᠵᠦ ᠬᠠᠷᠢᠶᠠᠯᠭᠠᠭᠠᠳ ᠨᠢᠳᠦᠨ ᠳᠦ ᠪᠡᠨ ᠵᠠᠶᠢᠷ ᠲᠠᠢ ᠬᠣᠴᠣᠷᠳᠠᠭ ᠲᠠᠨ ᠢ ᠪᠡᠨ ᠬᠡᠴᠢᠨᠡᠨ ᠰᠦᠷᠡᠬᠡᠢ ᠲᠠᠮᠤᠯᠠᠵᠤ ᠶᠠᠪᠤᠯ᠎ᠠ ᠁
　　　　ᠡᠷᠢᠶᠡᠨ ᠲᠠᠢ ᠪᠠᠷᠠᠭᠠᠨ ᠲᠠᠢ ᠠᠮᠢᠳᠤᠷᠠᠯ ᠤᠨ ᠲᠣᠭᠯᠠᠮ ᠶᠢᠨ ᠬᠠᠲᠠᠭᠤ ᠶᠢ ᠳᠠᠭᠠᠭᠠᠯ ᠦᠭᠡᠢ ᠠᠷᠢᠬᠢ ᠭᠡᠳᠡᠭ ᠭᠠᠰᠢᠭᠤᠨ ᠤᠰᠤ ᠪᠠᠷ ᠪᠣᠬᠢᠨᠠᠳᠤᠯ ᠢᠶᠠᠨ ᠤᠬᠢᠶᠠᠵᠤ ᠶᠠᠪᠤᠬᠤ ᠳᠤ ᠪᠠᠨ ᠠᠯᠲᠠᠨ ᠰᠤᠷᠭᠠᠯ ᠢ ᠴᠢᠨᠢ ᠠᠪᠤᠯ ᠦᠭᠡᠢ ᠬᠡᠶᠢᠷᠬᠡᠵᠦ ᠲᠠᠨ ᠢ ᠪᠡᠨ ᠬᠡᠴᠢᠨᠡᠨ ᠴᠤ ᠰᠢᠨᠠᠯᠭᠠᠯ᠎ᠠ ᠁
　　　　 ᠳᠥᠴᠢ ᠲᠥᠬᠦᠬᠦ ᠶᠢᠨ ᠦᠶ᠎ᠡ ᠪᠡᠷ ᠰᠠᠶ᠋ᠢ ᠡᠭᠦᠨ ᠢ ᠪᠡᠨ ᠤᠬᠠᠭᠠᠷᠠᠨ ᠲᠠᠨᠢᠭᠰᠠᠨ ᠴᠤ ᠠᠴᠢ ᠶᠢ ᠴᠢᠨᠢ ᠬᠠᠷᠢᠭᠤᠯᠵᠤ ᠠᠮᠵᠢᠭ᠎ᠠ ᠦᠭᠡᠢ ᠪᠡᠷ ᠲᠠ ᠮᠢᠨᠢ ᠥᠩᠭᠡᠲᠦ ᠶᠢᠷᠲᠢᠨᠴᠦ ᠶᠢᠨ ᠮᠥᠩᠬᠡ ᠪᠣᠰᠤ ᠶᠢ ᠦᠵᠡᠭᠦᠯᠴᠢᠬᠡᠳᠡᠭ ᠨᠢ ᠶᠠᠭᠤ ᠪᠢᠯᠡ᠃ ᠤᠬᠠᠭᠠᠷᠠᠵᠤ ᠠᠮᠢᠳᠤᠷᠠᠬᠤ ᠬᠣᠷᠸ᠎ᠠ ᠶᠢᠨ ᠠᠭ᠎ᠠ ᠲᠠᠢ ᠲᠣᠰᠣ ᠲᠠᠢ ᠠᠶᠠᠨ ᠳᠤ ᠡᠩᠬᠦᠯ ᠲᠠᠢ ᠳᠤᠩᠬᠤᠯ ᠲᠠᠢ ᠵᠠᠮ ᠢᠶᠠᠷ ᠪᠦᠳᠦᠴᠢᠨ ᠪᠠᠶᠢᠵᠤ ᠲᠣᠮᠣᠭᠠᠵᠢᠭᠰᠠᠨ ᠮᠢᠨᠢ ᠳᠠᠩᠴᠢ ᠣᠷᠣᠶᠢᠲᠠᠵᠠᠢ ᠁ ᠬᠥᠭᠰᠢᠳ ᠨᠠᠰᠤᠲᠠᠳ ᠲᠠᠢ ᠠᠶᠢᠯ ᠦᠳ ᠢ ᠠᠲᠠᠭᠠᠷᠬᠠᠨ ᠬᠠᠷᠠᠵᠤ ᠶᠠᠪᠤᠬᠤ ᠳᠤ ᠪᠠᠨ ᠭᠡᠷ ᠲᠦ ᠪᠡᠨ ᠣᠷᠣᠭᠰᠠᠭᠠᠷ ᠯᠠ ᠬᠠᠩᠬᠠᠭᠠᠷ ᠬᠥᠨᠳᠡᠢ ᠰᠠᠨᠠᠭᠳᠠᠵᠤ ᠲᠠᠨ ᠢ ᠪᠡᠨ ᠦᠭᠡᠶᠢᠯᠡᠬᠦ ᠨᠢ ᠬᠡᠴᠡᠭᠦᠦ ᠶᠤᠮ ᠡ︕
　　　　ᠪᠠᠯᠴᠢᠷ ᠨᠢᠯᠬ᠎ᠠ ᠠᠴᠠ ᠵᠠᠮᠵᠢᠭᠰᠠᠨ ᠤᠭᠤᠷᠠᠭ ᠰᠤᠷᠭᠠᠯ ᠢ ᠴᠢᠨᠢ ᠳᠡᠭᠡᠳᠦᠯᠡᠵᠦ᠂ ᠠᠵᠢᠯ ᠠᠮᠢᠳᠤᠷᠠᠯ ᠤᠨ ᠢᠶᠠᠨ ᠵᠦᠭᠯᠡᠭᠦᠷ ᠪᠤᠯᠭᠠᠵᠤ ᠶᠠᠪᠤᠶ᠎ᠠ ᠭᠡᠵᠦ ᠲᠠᠩᠭᠠᠷᠢᠭᠯᠠᠨ ᠪᠠᠶᠢᠵᠤ ᠭᠡᠭᠡᠨ ᠰᠦᠨᠡᠰᠦᠨ ᠳᠦ ᠴᠢᠨᠢ ᠮᠦᠷᠭᠦᠶ᠎ᠡ ᠡᠵᠢ ᠡ︕
　　　　
　　　　　
　　　　　
　　　                       2011.07.20