1 ᠰᠠᠷᠠ ᠶᠢᠨ 6 ᠤ ᠡᠳᠥᠷ᠂ ᠰᠤᠷᠪᠤᠯᠵᠢᠯᠠᠬᠴᠢ ᠬᠤᠷᠴᠢᠨ ᠵᠡᠭᠦᠨ ᠭᠠᠷᠤᠨ ᠳᠤᠮᠳᠠᠳᠤ ᠬᠤᠰᠢᠭᠤᠨ ᠤ ᠬᠤᠧᠠᠳᠤᠭᠤᠯ ᠠᠵᠤ ᠥᠢᠯᠡᠳᠪᠥᠷᠢ ᠶᠢᠨ ᠬᠥᠷᠢᠶᠡᠯᠡᠩ ᠲᠤᠭᠤᠷᠢᠬ ᠲᠤ ᠪᠠᠶᠢᠷᠢᠯᠠᠭᠠ ᠥᠪᠤᠷ ᠮᠤᠩᠭᠤᠯ ᠤᠨ ᠬᠤᠷᠴᠢᠨ ᠮᠢᠬᠠᠨ ᠤ ᠥᠭᠡᠷ ᠤᠨ ᠥᠷᠠ ᠶᠢᠨ ᠥᠢᠯᠡᠰ ᠤᠨ ᠬᠤᠪᠢ ᠤᠷᠤᠭᠤᠯᠤᠭᠰᠠᠨ ᠬᠢᠵᠠᠭᠠᠷᠳᠤ ᠺᠤᠮᠫᠠᠨᠢ ᠳᠤ ᠬᠥᠷᠬᠦ ᠳᠤ᠂ ᠲᠤᠰ ᠺᠤᠮᠫᠠᠨᠢ ᠶᠢᠨ ᠬᠥᠪᠥᠷᠡᠯ ᠰᠢᠯᠵᠢᠭᠦᠯᠬᠦ ᠲᠥᠪ ᠤᠨ ᠲᠥᠯ ᠤᠨ ᠬᠠᠰᠢᠶᠠᠨ ᠳᠤ ᠲᠦᠯᠯᠡᠭᠡᠳ ᠤᠳᠠᠭᠠᠳᠤᠢ 5 ᠤᠯᠠᠭᠠᠨ ᠠᠯᠠᠭ ᠲᠤᠭᠤᠯ ᠲᠤᠷᠨᠢᠭᠤᠨ ᠲᠤᠬᠯᠠᠵᠤ ᠪᠠᠶᠢᠯᠠ᠃ ︽ᠡᠨᠡ 5 ᠲᠤᠭᠤᠯ ᠪᠤᠯ ᠴᠡᠪᠡᠷ ᠰᠢᠮᠧᠨ᠋ᠳᠡᠷ ᠤᠳᠤᠮ ᠤᠨ ᠲᠤᠭᠤᠯ ᠪᠤᠯᠤᠨᠠ᠂ ᠮᠠᠨ ᠤ ᠺᠤᠮᠫᠠᠨᠢ ᠬᠢᠭᠡᠳ ᠳᠤᠮᠳᠠᠳᠤ ᠤᠯᠤᠰ ᠤᠨ ᠲᠠᠷᠢᠶᠠᠯᠠᠩ ᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠬᠠᠮᠳᠤᠪᠠᠷ ︿ᠬᠤᠷᠤᠭᠤ ᠰᠢᠯ ᠤᠨ ᠲᠤᠭᠤᠯ﹀ ᠢ ᠦᠢᠯᠡᠳᠪᠦᠷᠢᠵᠢᠭᠦᠯᠦᠨ ᠲᠥᠯᠵᠢᠭᠦᠯᠬᠦ ᠲᠤᠷᠰᠢᠯᠲᠠ ᠬᠢᠵᠤ᠂ ᠠᠩᠬᠠᠳᠠᠬᠴᠢ ᠪᠥᠯᠥᠭ ᠲᠤ 23 ᠦᠨᠢᠶᠠ ᠳᠤ ᠬᠥᠪᠥᠷᠡᠯ ᠰᠢᠯᠵᠢᠭᠦᠯᠥᠭᠡᠳ 7 ᠨᠢ ᠭᠡᠭᠡᠯ ᠲᠤᠬᠲᠠᠵᠤ᠂ ᠤᠳᠤᠬᠠᠨ ᠳᠤ ᠨᠢᠭᠡᠨᠳᠡ 5 ᠨᠢ ᠲᠥᠯᠯᠡᠵᠤ᠂ ᠨᠥᠭᠦᠭᠡ 2 ᠨᠢ ᠪᠠᠰᠠ ᠤᠳᠠᠯ ᠥᠭᠡᠢ ᠲᠥᠯᠯᠡᠨᠡ︾ ᠭᠡᠵᠤ ᠥᠪᠤᠷ ᠮᠤᠩᠭᠤᠯ ᠤᠨ ᠬᠤᠷᠴᠢᠨ ᠮᠢᠬᠠᠨ ᠤ ᠥᠭᠡᠷ ᠤᠨ ᠥᠷᠠ ᠶᠢᠨ ᠥᠢᠯᠡᠰ ᠤᠨ ᠬᠤᠪᠢ ᠤᠷᠤᠭᠤᠯᠤᠬᠰᠠᠨ ᠬᠢᠵᠠᠭᠠᠷᠳᠤ ᠺᠤᠮᠫᠠᠨᠢ ᠶᠢᠨ ᠳᠡᠳ᠋ ᠶᠡᠷᠥᠩᠬᠡᠢ ᠳᠠᠭᠠᠭᠠᠮᠠᠯ ᠵᠠᠩ ᠶᠥᠩ ᠲᠤᠤ ᠲᠠᠨᠢᠯᠴᠠᠭᠤᠯᠵᠤ ᠪᠠᠶᠢᠯᠠ᠃
︽ᠬᠤᠷᠤᠭᠤ ᠰᠢᠯ ᠤᠨ ᠲᠤᠭᠤᠯ︾ ᠭᠡᠳᠡᠭ ᠨᠢ ᠦᠨᠢᠶᠡᠨ ᠤ ᠪᠡᠶᠡ ᠶᠢᠨ ᠭᠠᠳᠠᠨᠠ ᠥᠷᠡ ᠲᠤᠬᠳᠠᠭᠠᠬᠤ ᠮᠡᠷᠭᠡᠵᠢᠯ ᠢ ᠬᠡᠯᠡᠵᠤ ᠪᠤᠢ᠂ ᠲᠡᠷᠡ ᠨᠢ ᠦᠨᠳᠡᠬᠡᠨ ᠡᠰ ᠬᠠᠩᠭᠠᠬᠤ ᠥᠨᠢᠶᠠ ᠶᠢᠨ ᠥᠨᠳᠡᠭᠡᠪᠴᠢ ᠠᠴᠠ ᠥᠨᠳᠡᠭᠡᠨ ᠡᠰ ᠴᠤᠬᠯᠠᠭᠤᠯᠤᠨ ᠪᠡᠶᠡ ᠶᠢᠨ ᠭᠠᠳᠠᠨᠠ ᠥᠷᠡ ᠲᠤᠬᠳᠠᠭᠠᠵᠤ᠂ ᠲᠤᠷᠰᠢᠯᠲᠠ ᠶᠢᠨ ᠲᠠᠰᠤᠬ ᠲᠤ ᠰᠢᠯᠢᠳᠡᠭ ᠬᠥᠪᠥᠷᠡᠯ ᠢ ᠪᠥᠢᠵᠢᠭᠤᠯᠬᠤ ᠶᠢ ᠵᠢᠭᠠᠵᠤ ᠪᠠᠶᠢᠨᠠ᠃ ᠦᠢᠯᠡᠳᠪᠦᠷᠢᠵᠢᠭᠦᠯᠦᠨ ᠲᠥᠯᠵᠢᠭᠦᠯᠬᠦ ᠭᠡᠳᠡᠭ ᠨᠢ ᠬᠠᠩᠭᠠᠬᠴᠢ ᠥᠨᠢᠶᠠ ᠶᠢᠨ ᠥᠨᠳᠡᠭᠡᠨ ᠡᠰ ᠢᠯᠭᠠᠷᠠᠭᠤᠯᠬᠤ ᠬᠤᠭᠤᠴᠠᠭᠠᠨ ᠳᠤ ᠦᠯᠦ ᠬᠢᠵᠠᠭᠠᠷᠯᠠᠬᠳᠠᠨ ᠪᠠᠶᠠ ᠶᠢᠨ ᠭᠠᠳᠠᠨᠠ ᠪᠦᠭᠡᠮ ᠢᠶᠠᠷ ᠥᠢᠯᠡᠳᠪᠥᠷᠢᠵᠢᠭᠦᠯᠥᠨ ᠲᠥᠯᠵᠢᠭᠦᠯᠬᠦ ᠶᠢ ᠵᠢᠭᠠᠵᠤ᠂ ᠪᠤᠶᠢᠵᠢᠭᠤᠯᠤᠭᠰᠠᠨ ᠬᠥᠪᠥᠷᠡᠯ ᠢᠶᠠᠨ ᠨᠤᠲᠤᠬ ᠤᠨ ᠦᠨᠢᠶᠡᠨ ᠳᠤ ᠰᠢᠯᠵᠢᠭᠦᠯᠥᠨ᠂ ᠡᠯᠡ ᠲᠥᠷᠥᠯ ᠤᠨ ᠴᠡᠪᠡᠷ ᠤᠳᠤᠮᠳᠤ ᠮᠢᠬᠠᠨ ᠤ ᠥᠭᠡᠷ ᠲᠥᠯᠵᠢᠭᠦᠯᠬᠦ ᠶᠢ ᠬᠡᠯᠡᠨᠡ᠃ ᠬᠤᠷᠴᠢᠨ ᠵᠡᠭᠦᠨ ᠭᠠᠷᠤᠨ ᠳᠤᠮᠳᠠᠳᠤ ᠬᠤᠰᠢᠭᠤ ︽ᠮᠢᠬᠠᠨ ᠤ ᠥᠭᠡᠷ ᠤᠨ ᠨᠤᠲᠤᠬ︾ ᠬᠡᠮᠡᠬᠦ ᠨᠡᠷᠡ ᠲᠡᠮᠳᠡᠭ ᠢ ᠴᠢᠷᠮᠠᠶᠢᠨ ᠡᠭᠦᠳᠴᠥ ᠪᠤᠢ᠃ ᠲᠤᠰ ᠬᠤᠰᠢᠭᠤᠨ ᠤ ᠮᠠᠯ ᠠᠵᠤ ᠠᠬᠤᠢ ᠶᠢᠨ ᠳᠠᠭᠠᠭᠤᠯᠤᠬᠴᠢ ᠠᠵᠤ ᠠᠬᠤᠢᠢᠯᠠᠯ ᠪᠤᠯᠤᠬᠰᠠᠨ ᠤ ᠬᠤᠪᠢ ᠳᠤ᠂ 2017 ᠤᠨ ᠤ 3 ᠰᠠᠷᠠ ᠠᠴᠠ ᠡᠬᠢᠯᠡᠨ᠂ ᠥᠪᠤᠷ ᠮᠤᠩᠭᠤᠯ ᠤᠨ ᠬᠤᠷᠴᠢᠨ ᠮᠢᠬᠠᠨ ᠤ ᠥᠭᠡᠷ ᠤᠨ ᠥᠷᠠ ᠶᠢᠨ ᠥᠢᠯᠡᠰ ᠤᠨ ᠬᠤᠪᠢ ᠤᠷᠤᠭᠤᠯᠤᠭᠰᠠᠨ ᠬᠢᠵᠠᠭᠠᠷᠳᠤ ᠺᠤᠮᠫᠠᠨᠢ ᠳᠤᠮᠳᠠᠳᠤ ᠤᠯᠤᠰ ᠤᠨ ᠲᠠᠷᠢᠶᠠᠯᠠᠩ ᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠲᠠᠢ ᠬᠠᠮᠳᠤ ︽ᠬᠤᠷᠤᠭᠤ ᠰᠢᠯ ᠤᠨ ᠲᠤᠭᠤᠯ︾ ᠢ ᠥᠢᠯᠡᠳᠪᠥᠷᠢᠵᠢᠭᠦᠯᠥᠨ ᠲᠥᠯᠵᠢᠭᠦᠯᠬᠦ ᠢᠨᠵᠧᠨᠧᠷᠢᠩ ᠤᠨ ᠰᠤᠳᠤᠯᠤᠯᠲᠠ ᠶᠢ ᠥᠷᠨᠢᠭᠦᠯᠵᠤ᠂ ᠠᠦ᠋ᠰᠲᠷᠡᠯᠢᠶᠠ ᠶᠢᠨ ᠥᠨᠢᠶᠡ ᠪᠠᠷ ᠥᠨᠳᠡᠭᠡᠨ ᠡᠰ ᠤᠨ ᠬᠠᠩᠭᠠᠬᠴᠢ ᠪᠡᠶᠡ ᠪᠤᠯᠭᠠᠨ OPU ᠪᠡᠶᠡ ᠶᠢᠨ ᠭᠠᠳᠠᠨᠠ ᠬᠥᠪᠥᠷᠡᠯ ᠪᠤᠶᠢᠵᠢᠭᠤᠯᠪᠠ᠂ ᠡᠶᠢᠨᠬᠦ 2017 ᠤᠨ ᠤ ᠡᠴᠥᠰ ᠪᠤᠯᠳᠠᠯᠠ ᠨᠡᠶᠢᠳᠡ 118 ᠰᠢᠷᠬᠡᠭ ᠪᠡᠶᠡ ᠶᠢᠨ ᠭᠠᠳᠠᠨᠠᠬᠢ ᠬᠥᠪᠥᠷᠡᠯ ᠢ ᠠᠮᠵᠢᠯᠲᠠ ᠲᠠᠢ ᠪᠥᠢᠵᠢᠭᠤᠯᠪᠠ᠃
︽ᠬᠤᠷᠤᠭᠤ ᠰᠢᠯ ᠤᠨ ᠲᠤᠭᠤᠯ︾ ᠢ ᠥᠢᠯᠡᠳᠪᠥᠷᠢᠵᠢᠭᠦᠯᠤᠨ ᠲᠥᠯᠵᠢᠭᠦᠯᠬᠦ ᠮᠡᠷᠭᠡᠵᠢᠯ ᠤᠯᠤᠰ ᠤᠨ ᠭᠠᠳᠠᠭᠠᠳᠤ ᠳᠤ ᠪᠠᠶᠢᠬᠤ ᠠᠴᠠ ᠪᠢᠰᠢ ᠬᠠᠷᠢᠨ ᠮᠠᠨ ᠤ ᠤᠯᠤᠰ ᠲᠤ ᠬᠠᠷᠠᠬᠠᠨ ᠦᠭᠡᠢ ᠪᠠᠶᠢᠪᠠ᠃ ᠥᠪᠤᠷ ᠮᠤᠩᠭᠤᠯ ᠤᠨ ᠬᠤᠷᠴᠢᠨ ᠮᠢᠬᠠᠨ ᠤ ᠥᠭᠡᠷ ᠤᠨ ᠥᠷᠠ ᠶᠢᠨ ᠥᠢᠯᠡᠰ ᠤᠨ ᠬᠤᠪᠢ ᠤᠷᠤᠭᠤᠯᠤᠭᠰᠠᠨ ᠬᠢᠵᠠᠭᠠᠷᠳᠤ ᠺᠤᠮᠫᠠᠨᠢ ᠶᠢᠨ ᠡᠨᠡᠬᠦ ᠠᠮᠵᠢᠯᠳᠠ ᠲᠠᠢ ᠲᠤᠷᠰᠢᠯᠳᠠ ᠨᠢ ᠪᠥᠬᠦ ᠤᠯᠤᠰ ᠤᠨ ᠬᠡᠪᠴᠢᠶᠠᠨ ᠤ ᠲᠤᠰ ᠬᠥᠷᠢᠶᠡ ᠴᠠᠷᠠᠭᠠ ᠳᠠᠬᠢ ᠬᠤᠭᠤᠰᠤᠨ ᠢ ᠨᠦᠬᠦᠪᠦᠷᠢᠯᠡᠵᠡᠢ᠃ ︽ᠬᠤᠷᠤᠭᠤ ᠰᠢᠯ ᠤᠨ ᠲᠤᠭᠤᠯ ︾ ᠢ ᠥᠢᠯᠡᠳᠪᠥᠷᠢᠵᠢᠭᠦᠯᠥᠨ ᠲᠥᠯᠵᠢᠭᠦᠯᠬᠦ ᠨᠢ ᠰᠢᠯᠢᠳᠡᠭ ᠥᠨᠢᠶᠡ ᠶᠢᠨ ᠭᠧᠨ ᠢ ᠭᠥᠢᠴᠡᠳ ᠠᠰᠢᠬᠯᠠᠨ ᠡᠭᠦᠯᠳᠡᠷ ᠰᠠᠶᠢᠵᠢᠷᠠᠭᠤᠯᠬᠤ ᠠᠯᠬᠤᠮ ᠢ ᠲᠥᠷᠭᠡᠳᠭᠡᠬᠦ ᠪᠠᠷ ᠪᠠᠷᠠᠬᠤ ᠥᠭᠡᠢ᠂ ᠪᠠᠰᠠ ᠥᠪᠡᠷ ᠤᠨ ᠥᠷᠳᠡᠭ ᠢ ᠶᠡᠭᠡ ᠬᠡᠮᠵᠢᠶᠡ ᠪᠠᠷ ᠪᠠᠭᠤᠷᠠᠭᠤᠯᠵᠤ᠂ ᠡᠭᠦᠯᠳᠡᠷ ᠪᠤᠶᠢᠵᠢᠭᠤᠯᠬᠤ ᠥᠶᠡ ᠶᠢᠨ ᠬᠤᠭᠤᠷᠤᠨᠳᠥᠬᠢ ᠵᠠᠪᠰᠠᠷᠳᠠᠯ ᠢ ᠪᠤᠭᠤᠨᠢᠰᠬᠠᠨ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠮᠡᠷᠭᠡᠵᠢᠯ ᠢ ᠥᠢᠯᠡᠳᠪᠥᠷᠢᠯᠡᠯ ᠤᠨ ᠬᠥᠴᠥᠨ ᠪᠤᠯᠭᠠᠨ ᠬᠤᠪᠢᠷᠠᠭᠤᠯᠬᠤ ᠶᠢ ᠪᠡᠶᠡᠯᠡᠭᠦᠯᠬᠦ ᠪᠤᠯᠤᠨᠠ᠃ ᠤᠳᠤᠬᠠᠨ ᠳᠤ᠂ ᠲᠤᠰ ᠺᠤᠮᠫᠠᠨᠢ ᠶᠢᠨ ᠥᠭᠡᠷ ᠤᠨ ᠲᠤᠭᠠ 465 ᠪᠤᠢ᠂ ᠡᠭᠦᠨ ᠳᠤ 128 ᠪᠤᠬᠠ᠂ ᠠᠦ᠋ᠰᠲᠷᠡᠯᠢᠶᠠ ᠶᠢᠨ 54 ᠬᠠᠩᠭᠠᠬᠴᠢ ᠥᠨᠢᠶᠡ᠂ 100 ᠪᠡᠯᠡᠳᠭᠡᠯ ᠥᠭᠡᠷ᠂ 210 ᠬᠠᠩᠭᠠᠬᠳᠠᠬᠴᠢ ︵ᠬᠦᠷᠲᠡᠭᠴᠢ︶ ᠨᠤᠲᠤᠬ ᠤᠨ ᠥᠨᠢᠶᠡ ᠳᠡᠵᠢᠭᠡᠵᠤ ᠪᠤᠢ᠃ ᠳᠠᠷᠠᠭᠠᠴᠢ ᠶᠢᠨ ᠠᠯᠬᠤᠮ ᠳᠤ᠂ ᠭᠤᠤᠯᠳᠠᠭᠤ OPU ᠪᠡᠶᠡ ᠶᠢᠨ ᠭᠠᠳᠠᠨᠠ ᠬᠥᠪᠥᠷᠡᠯ ᠪᠤᠶᠢᠵᠢᠭᠤᠯᠬᠤ ᠬᠡᠪᠴᠢᠶᠡ ᠪᠠᠨ ᠥᠷᠭᠡᠳᠭᠡᠵᠤ᠂ ᠰᠢᠨᠡ ᠵᠢᠯ ᠳᠤ 200 ᠠᠴᠠ 250 ᠬᠥᠪᠥᠷᠡᠯ ᠪᠥᠢᠵᠢᠭᠤᠯᠤᠨ᠂ 100 ᠠᠴᠠ 150 ︽ᠬᠤᠷᠤᠭᠤ ᠰᠢᠯ ᠤᠨ ᠲᠤᠭᠤᠯ︾ ᠢ ᠥᠢᠯᠡᠳᠪᠥᠷᠢᠵᠢᠭᠦᠯᠥᠨ ᠲᠥᠯᠵᠢᠭᠦᠯᠵᠤ᠂ ᠮᠢᠬᠠᠨ ᠤ ᠥᠭᠡᠷ ᠤᠨ ᠠᠵᠤ ᠥᠢᠯᠡᠰ ᠤᠨ ᠮᠡᠷᠭᠡᠵᠢᠯ ᠤᠨ ᠰᠢᠨᠡ ᠡᠭᠦᠳᠥᠯᠳᠡ ᠶᠢ ᠪᠡᠶᠡᠯᠡᠭᠦᠯᠬᠦ ᠪᠠᠷ ᠲᠥᠯᠥᠪᠯᠡᠵᠤ ᠪᠤᠢ᠃ ᠪᠤᠤ ᠴᠢᠩ ᠱᠧᠩ