ᠡᠨᠡ ᠪᠡᠶ᠎ᠡ ᠶᠢᠨ ᠮᠠᠨᠢ ᠬᠤᠪᠢ ᠤᠴᠠᠷᠠᠯ ᠡᠶᠢᠮᠦ ᠰᠠᠶᠢᠬᠠᠨ ᠪᠣᠯᠣᠭ᠎ᠠ ᠳ᠋ᠦ ᠪᠡᠨ ᠪᠡᠶ᠎ᠡ ᠰᠡᠳᠬᠢᠯ ᠤᠨ ᠭᠦᠨ ᠡᠴᠡ ᠪᠡᠨ ᠮᠡᠬᠦᠶᠢᠨ ᠮᠡᠬᠦᠶᠢᠨ ᠶᠣᠰᠤᠯᠠᠵᠤ ᠵᠠᠯᠪᠠᠷᠢᠨ ᠵᠠᠯᠪᠠᠷᠢᠨ ᠳᠠᠭᠠᠳᠬᠠᠨᠠᠮ᠃ ᠡᠨᠡ ᠰᠠᠶᠢᠬᠠᠨ ᠬᠣᠷᠸ᠎ᠠ ᠳ᠋ᠦ ᠬᠦᠮᠦᠨ ᠪᠣᠯᠵᠤ ᠮᠡᠨᠳᠦᠯᠡᠭᠡᠳ ᠣᠳᠤᠨ ᠮᠡᠴᠢᠳ ᠰᠢᠭ ᠬᠢᠯᠠᠯᠵᠠᠭᠰᠠᠨ ᠰᠣᠳᠤᠨ ᠪᠠᠭᠰᠢ ᠨᠠᠷ ᠲᠠᠢ ᠤᠴᠠᠷᠠᠭᠰᠠᠨ ᠮᠠᠨᠢ ᠲᠠᠩᠰᠤᠭ ᠰᠠᠶᠢᠬᠠᠨ ᠠᠵᠠ ᠲᠣᠬᠢᠶᠠᠯ ᠭᠡᠵᠦ ᠪᠢ ᠡᠷᠢᠭᠡ ᠢᠮᠡᠷᠦᠨ ᠪᠠᠶᠢᠵᠤ ᠭᠡᠭᠡᠨ ᠡᠳᠦᠷ ᠭᠡᠷᠡᠯᠲᠦ ᠨᠠᠷᠠᠨ ᠤ ᠳᠣᠣᠷ᠎ᠠ ᠪᠣᠳᠣᠨ ᠪᠣᠳᠣᠨ ᠪᠠᠶᠠᠰᠤᠨᠠᠮ᠃ ᠨᠢᠭᠡ ᠬᠥᠮᠥᠨ ᠰᠢᠯᠢᠳᠡᠭ ᠰᠠᠶᠢᠨ ᠡᠴᠢᠭᠡ ᠡᠬᠡ  ᠳᠤ ᠵᠠᠶᠠᠭᠠᠭᠳᠠᠬᠤ  ᠬᠥᠮᠥᠨ ᠪᠣᠯᠬᠤ ᠶᠢᠨ ᠰᠠᠭᠤᠷᠢ ᠶᠢ ᠣᠯᠣᠭᠰᠠᠨ ᠲᠠᠢ ᠠᠳᠠᠯᠢ ᠪᠣᠯ ᠰᠣᠶᠣᠯ ᠬᠥᠮᠥᠵᠢᠯ ᠬᠦᠷᠲᠡᠬᠦ ᠶᠠᠪᠤᠴᠠ ᠳᠤ ᠰᠣᠳᠣᠨ ᠮᠡᠳᠡᠯᠭᠡᠲᠦ ᠪᠠᠭᠰᠢ ᠨᠠᠷ ᠲᠠᠢ ᠲᠣᠬᠢᠶᠠᠯᠳᠤᠬᠤ ᠨᠢ ᠬᠣᠵᠢᠮ  ᠬᠣᠶᠢᠰᠢᠲᠠ ᠶᠢᠨ  ᠳᠡᠪᠳᠡᠷᠢᠬᠦ ᠶᠢᠨ ᠵᠢᠭᠦᠷ ᠢ ᠣᠯᠣᠭᠰᠠᠨ ᠲᠠᠢ ᠡᠭᠡᠭᠡ ᠠᠳᠠᠯᠢᠬᠠᠨ ᠪᠢᠯᠡ᠃ ᠥᠲᠡᠯᠬᠦ ᠶᠢᠨ ᠦᠵᠦᠭᠦᠷ ᠡᠭᠦᠨ ᠢ ᠪᠡᠨ ᠪᠣᠳᠣᠭᠠᠳ ᠥᠪᠡᠷ ᠤᠨ ᠡᠷᠬᠡ ᠦᠭᠡᠢ ᠪᠣᠳᠣᠯ ᠰᠡᠳᠬᠢᠯ ᠤᠨ ᠳᠣᠭᠳᠣᠯᠤᠯ ᠡᠭᠦᠰᠬᠦ  ᠶᠠᠭᠤᠳᠠᠢ ᠰᠠᠶᠢᠬᠠᠨ ᠠᠵᠢ᠃
      ᠨᠢᠭᠡ
  ᠨᠠᠳᠠ ᠠᠵᠠ ᠵᠢᠷᠭᠠᠯ ᠤᠨ ᠣᠳᠣ ᠪᠣᠯᠵᠤ ᠰᠠᠨᠠᠭᠳᠠᠭᠠᠳ ᠪᠠᠶᠢᠳᠠᠭ ᠠᠴᠢᠲᠤ ᠪᠠᠭᠰᠢ ᠨᠠᠷ ᠮᠢᠨᠢ᠂ ᠲᠠᠨ ᠳ᠋ᠦ ᠪᠡᠨ ᠪᠢ ᠡᠳᠦᠷ ᠤᠨ ᠨᠠᠷᠠᠨ ᠤ ᠭᠡᠷᠡᠯ ᠳᠣᠣᠷ᠎ᠠ ᠡᠪᠦᠳᠦᠭ ᠰᠥᠬᠥᠷᠡᠨ ᠮᠥᠷᠭᠥᠨᠡᠮ᠃ ᠠᠮᠢᠳᠤ ᠶᠢᠨ  ᠢᠶᠡᠨ ᠡᠳ᠋ᠯᠡᠭᠡ ᠪᠥᠬᠥᠨ ᠪᠤᠶᠤ ᠪᠤᠷᠬᠠᠨ ᠤ ᠲᠠᠪᠢᠯᠠᠩ ᠳ᠋ᠦ ᠳᠡᠪᠰᠢᠭᠰᠡᠨ ᠪᠥᠬᠥᠨ ᠳ᠋ᠦ ᠬᠠᠨᠳᠤᠵᠤ ᠦᠨᠡᠨ ᠰᠡᠳᠬᠢᠯ ᠡᠴᠡ ᠪᠡᠨ ᠲᠠᠯᠠᠷᠬᠠᠵᠤ ᠪᠠᠶᠢᠭ᠎ᠠ ᠪᠡᠨ ᠢᠯᠡᠷᠬᠡᠢᠢᠯᠡᠨᠡᠮ᠃
 ᠥᠨᠥᠳᠥᠷ ᠪᠠᠭᠰᠢ ᠶᠢᠨ ᠪᠠᠶᠠᠷ ᠪᠣᠯᠵᠤ ᠪᠠᠶᠢᠬᠤ ᠳ᠋ᠤᠨᠢ ᠲᠠ ᠨᠠᠷ ᠢᠶᠡᠨ ᠰᠠᠨᠠᠭᠠᠨ ᠳ᠋ᠦ ᠣᠷᠣᠵᠤ ᠰᠠᠨᠠᠭᠠᠯᠵᠠᠵᠤ ᠪᠠᠶᠢᠭ᠎ᠠ ᠲᠡᠳᠤᠢ ᠪᠢᠰᠢ᠂ ᠡᠩ ᠤᠨ ᠡᠳᠦᠷ ᠦᠳ ᠴᠤ ᠭᠡᠰᠡᠨ ᠡᠨᠡᠷᠢᠯᠲᠦ ᠬᠥᠮᠥᠨ ᠤ ᠬᠤᠪᠢ ᠪᠡᠷ ᠥᠷᠥᠴᠡ ᠵᠢᠷᠦᠬᠡᠨ ᠳ᠋ᠦ ᠪᠡᠨ ᠲᠠ ᠨᠠᠷ ᠢᠶᠡᠨ ᠮᠠᠷᠳᠠᠰᠢ ᠦᠭᠡᠢ ᠪᠣᠳᠣᠭᠰᠠᠭᠠᠷ ᠢᠷᠡᠭᠰᠡᠨ ᠭᠡᠳᠡᠭ ᠢᠶᠡᠨ ᠡᠨᠳᠡ ᠣᠨᠴᠠᠯᠠᠨ ᠲᠣᠳᠤᠷᠬᠠᠶᠢᠯᠠᠶ᠎ᠠ᠃ ᠵᠦᠪᠭᠡᠨ ᠪᠡᠶᠡᠴᠢᠯᠡᠨ ᠬᠦᠷᠴᠦ ᠡᠷᠭᠢᠵᠦ ᠦᠵᠡᠭᠰᠡᠨ ᠢᠶᠡᠷ ᠳᠤᠲᠠᠮᠠᠭ ᠪᠣᠯᠣᠭᠰᠠᠨ ᠮᠠᠨᠢ ᠬᠦᠨᠳᠦᠳᠭᠡᠯ ᠦᠨ ᠶᠣᠰᠣ ᠤᠴᠢᠷ ᠢ ᠠᠯᠮᠠᠶᠢᠷᠠᠭᠰᠠᠨ ᠠᠴᠠ ᠪᠣᠯᠤᠭᠰᠠᠨ ᠣᠰᠣᠯ ᠪᠣᠯᠬᠤ ᠨᠢ ᠲᠡᠷᠡ ᠳ᠋ᠡ᠃
 ᠮᠡᠳᠡᠯᠭᠡ ᠮᠡᠬᠦᠰ ᠴᠢᠳᠠᠪᠤᠷᠢ ᠴᠠᠯᠠᠭᠠᠢ ᠦᠶᠡᠰ ᠪᠤᠶᠤ ᠮᠡᠳᠡᠶ᠎ᠡ ᠴᠢᠳᠠᠶ᠎ᠠ ᠭᠡᠬᠦ ᠬᠦᠰᠡᠯᠲᠦ ᠰᠡᠳᠬᠢᠯ ᠬᠥᠪᠬᠢᠵᠦ ᠪᠠᠶᠢᠭ᠎ᠠ ᠮᠥᠴᠡ ᠳ᠋ᠦ ᠵᠦᠪᠬᠡᠨ ᠲᠠ ᠨᠠᠷ ᠡᠴᠡ ᠪᠡᠨ ᠮᠡᠳᠡᠯᠭᠡ ᠴᠢᠳᠠᠪᠤᠷᠢ ᠬᠦᠷᠲᠡᠬᠦ ᠶᠢᠨ ᠵᠣᠷᠢᠯᠭ᠎ᠠ ᠪᠡᠷ ᠪᠠᠶᠠᠰᠤᠩᠭᠤᠢ ᠴᠢᠷᠠᠶᠢᠴᠢᠯᠠᠵᠤ ᠂ ᠬᠦᠩᠭᠡᠮᠰᠦᠭᠯᠡᠨ ᠪᠠᠭᠠᠰᠢᠯᠠᠵᠤ ᠪᠠᠶᠢᠭᠰᠠᠨ ᠲᠡᠳᠦᠢ ᠪᠢᠰᠢ᠂ ᠬᠠᠷᠢᠨ ᠲᠠ ᠨᠠᠷ ᠤᠨ ᠢᠶᠡᠨ ᠦᠨᠡᠨᠴᠢ ᠬᠠᠶᠢᠷ᠎ᠠ ᠪᠡᠷ ᠢᠶᠡᠨ ᠱᠠᠲᠤᠯᠠᠨ ᠲᠠᠯᠪᠢᠭᠰᠠᠨ ᠬᠥᠮᠥᠵᠢᠯ ᠤᠨ ᠱᠠᠲᠤ ᠪᠡᠷ ᠲᠠᠪᠰᠢᠨ ᠲᠠᠪᠰᠢᠭᠰᠠᠭᠠᠷ ᠮᠡᠳᠡᠭᠰᠡᠨ ᠵᠤᠶᠢᠯᠡᠰ ᠨᠡᠮᠡᠭᠳᠡᠬᠦ ᠲᠤᠲᠤᠮ ᠢᠶᠡᠨ︽ ᠵᠤᠯᠠ ᠶᠢᠨ ᠭᠡᠷᠡᠯ ᠲᠣᠰᠤᠨ ᠠᠴᠠ᠂ ᠱᠠᠪᠢ ᠶᠢᠨ ᠡᠷᠳᠡᠮ ᠪᠠᠭᠰᠢ ᠠᠴᠠ︾ ᠢᠷᠡᠳᠡᠭ   ᠶᠤᠰᠤᠨ ᠢ ᠬᠦᠨ ᠣᠶᠢᠯᠠᠭᠠᠵᠤ ᠲᠠ ᠨᠠᠷ  ᠢ ᠪᠡᠨ ᠮᠠᠷᠲᠠᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ ᠳᠤᠷᠠᠰᠤᠨ ᠰᠠᠨᠠᠭᠠᠯᠵᠠᠬᠤ ᠪᠣᠯᠣᠭᠰᠠᠨ ᠮᠠᠨᠢ ᠦᠨᠡᠨ᠃
  ᠲᠠ ᠨᠠᠷ ᠢᠶᠡᠨ ᠪᠢ ᠪᠠᠭ᠎ᠠ᠂ ᠳᠤᠮᠳᠠ᠂ ᠶᠡᠬᠡ           ᠭᠡᠵᠦ ᠢᠯᠭᠠᠳᠠᠭ ᠦᠭᠡᠢ᠃ ᠪᠠᠭ᠎ᠠ ᠶᠢ ᠪᠠᠰᠤᠮᠵᠢᠯᠠᠭᠰᠠᠳ ᠲᠦ ᠳᠤᠮᠳᠠ ᠦᠭᠡᠢ᠂ ᠳᠤᠮᠳᠠ ᠶᠢ ᠣᠮᠳᠤᠭᠠᠶᠢᠯᠠᠭᠰᠠᠳ ᠲᠦ ᠳᠡᠭᠡᠳᠦ ᠦᠭᠡᠢ᠂ ᠳᠡᠭᠡᠳᠦ ᠶᠢ ᠦᠲᠡᠷᠭᠡᠭᠰᠡᠳ ᠲᠦ ᠶᠠᠭᠤ ᠴᠤ ᠦᠭᠡᠢ ᠪᠠᠶᠢᠳᠠᠭ᠃ ᠱᠠᠲᠤ ᠱᠠᠲᠤ ᠪᠡᠷ ᠢᠶᠡᠨ ᠥᠭᠰᠥᠨ ᠪᠠᠶᠢᠵᠤ ᠱᠤᠪᠤᠷᠭ᠎ᠠ ᠪᠣᠯᠳᠠᠭ ᠶᠣᠰᠣᠨ ᠪᠣᠢ ᠶᠢᠨ ᠲᠤᠯᠠ ᠠᠯᠢ ᠨᠢᠭᠡᠨ ᠱᠠᠲᠤ ᠶᠢ ᠨᠢ ᠭᠡᠳ ᠣᠮᠳᠤᠭᠠᠶᠢᠯᠠᠵᠤ ᠡᠰᠡ ᠪᠣᠯᠳᠠᠭ᠃ 
  ᠪᠠᠭᠰᠢ ᠨᠠᠷ ᠮᠢᠨᠢ᠂ ᠲᠠᠨᠤᠰ ᠪᠣᠯ ᠨᠠᠮ᠎ᠠ ᠪᠡᠨ  ᠣᠯᠠᠨ ᠦᠶᠡᠲᠦ ᠨᠢᠭᠡ ᠴᠣᠭᠴᠠᠲᠤ ᠠᠯᠳᠠᠨ ᠰᠤᠪᠤᠷᠭ᠎ᠠ᠃ ᠨᠠᠳᠠ ᠪᠡᠨ ᠡᠷᠭᠦᠭᠡᠳ ᠠᠯᠤᠰ ᠶᠢ ᠪᠠᠷᠠᠳᠠᠭᠤᠯᠤᠭᠰᠠᠨ ᠠᠵᠠ ᠶᠢᠨ ᠰᠤᠪᠤᠷᠭ᠎ᠠ᠃ ᠲᠡᠭᠲᠦ ᠲᠡᠭᠲᠦ ᠪᠡᠷ ᠢᠶᠡᠨ ᠨᠠᠮ᠎ᠠ ᠳ᠋ᠦ ᠪᠡᠨ  ᠶᠣᠰᠣᠨ ᠢ ᠰᠡᠳᠬᠢᠭᠦᠯᠦᠭᠰᠡᠨ ᠳᠡᠯᠭᠡᠷ ᠰᠡᠳᠬᠢᠬᠦᠢ᠃
     ᠬᠣᠶᠠᠷ
  ᠠᠵᠠ ᠲᠣᠬᠢᠶᠠᠯ  ᠠᠮᠠᠷᠬᠠᠨ ᠢᠷᠡᠳᠡᠭ ᠶᠠᠭᠤᠮ᠎ᠠ ᠪᠢᠰᠢ  ᠶᠢ ᠠᠮᠢᠳᠤᠷᠠᠯ ᠰᠤᠷᠤᠯᠭ᠎ᠠ ᠠᠵᠢᠯ ᠦᠢᠯᠡ ᠶᠢᠨ ᠶᠠᠪᠤᠴᠠ ᠡᠴᠡ ᠪᠢ ᠤᠬᠠᠭᠠᠷᠠᠭᠰᠠᠨ ᠶᠤᠮ᠃ ᠬᠥᠮᠥᠨ ᠠᠮᠢᠳᠤᠷᠠᠯ ᠲᠡᠮᠡᠴᠡᠯ ᠤᠨ ᠤᠷᠳᠤ ᠠᠶᠠᠯᠠᠯ ᠳ᠋ᠦ ᠪᠡᠨ  ᠤᠬᠠᠭᠠᠨᠲᠤ ᠡᠴᠢᠭᠡ ᠡᠬᠡ᠂ ᠰᠢᠯᠢᠳᠡᠭ ᠮᠡᠳᠡᠯᠭᠡᠲᠦ ᠰᠣᠳᠣᠨ ᠬᠦᠮᠦᠵᠢᠯᠲᠦ ᠪᠠᠭᠰᠢ ᠨᠠᠷ ᠲᠠᠢ ᠤᠴᠠᠷᠠᠯᠳᠤᠵᠤ ᠲᠡᠳᠡ ᠨᠠᠷ ᠡᠴᠡ ᠪᠡᠨ ᠰᠣᠳᠣᠨ ᠤᠬᠠᠭᠠᠨ ᠰᠢᠯᠢᠳᠡᠭ ᠬᠦᠮᠦᠵᠢᠯ ᠬᠦᠷᠲᠡᠵᠦ ᠶᠠᠪᠤᠬᠤ  ᠣᠯᠳᠠᠰᠢ ᠦᠭᠡᠢ ᠶᠡᠬᠡ ᠠᠵᠠ ᠲᠣᠬᠢᠶᠠᠯ᠂ ᠬᠥᠮᠥᠨ ᠪᠣᠯᠬᠤ ᠶᠢᠨ ᠬᠦᠷᠲᠡᠭᠡᠯ ᠰᠣᠶᠣᠷᠬᠠᠯ  ᠲᠡᠷᠡ ᠪᠢᠯᠡ᠃ ᠢᠩᠬᠢᠭᠡᠳ ᠯᠡ ᠪᠠᠭᠰᠢ ᠨᠠᠷ ᠤᠨ ᠢᠶᠠᠨ ᠳᠠᠷᠬᠠᠨ ᠬᠠᠶᠢᠷ᠎ᠠ ᠶᠢᠨ ᠰᠣᠶᠤᠷᠬᠠᠯ ᠢ ᠬᠦᠯᠢᠶᠡᠵᠦ ᠬᠦᠷᠲᠡᠭᠰᠡᠨ ᠲᠡᠷᠡ ᠮᠥᠴᠡ ᠡᠴᠡ ᠡᠬᠢᠯᠡᠵᠦ ᠢᠳᠡᠭ ᠢᠳᠡᠭ ᠢᠶᠡᠷ ᠤᠬᠠᠭᠠᠨ ᠤ ᠴᠣᠮᠣᠷᠯᠢᠭ ᠳᠡᠯᠭᠡᠵᠦ᠂ ᠣᠶᠣᠨ ᠤ ᠭᠡᠭᠡᠪᠴᠢ ᠭᠡᠶᠢᠭᠦᠵᠦ᠂ ᠮᠡᠳᠡᠯᠭᠡ ᠶᠢᠨ ᠮᠡᠯᠮᠡᠢ ᠭᠡᠷᠡᠯᠲᠦᠵᠦ᠂ ᠮᠡᠳᠡᠬᠦ ᠦᠭᠡᠢ ᠴᠢᠳᠠᠬᠤ ᠦᠭᠡᠢ ᠵᠤᠶᠢᠯ ᠬᠠᠰᠤᠭᠳᠠᠵᠤ᠂  ᠪᠥᠬᠥᠨ ᠴᠠᠭᠠᠨ ᠪᠣᠯᠵᠤ ᠴᠠᠶᠢᠯᠵᠠᠭᠰᠠᠨ ᠶᠤᠮ᠃
ᠡᠴᠢᠭᠡ ᠡᠬᠡ  ᠶᠢ ᠦᠷ ᠤᠨ ᠴᠣᠯᠮᠣᠨ︱ ᠡᠳᠦᠷ ᠡᠬᠢᠯᠡᠭᠦᠯᠦᠭᠰᠡᠨ ᠭᠡᠭᠡ ᠪᠡᠷ ᠪᠣᠳᠣᠪᠠᠯ ᠪᠠᠭᠰᠢ ᠬᠥᠮᠥᠨ   ᠶᠢ ᠡᠷᠲᠡ ᠶᠢᠨ ᠨᠠᠷᠠ︱ ᠥᠪᠴᠢ ᠶᠢ ᠭᠡᠷᠡᠯᠲᠦᠭᠦᠯᠦᠭᠴᠢ ᠮᠥᠩᠬᠡ  ᠭᠡᠷᠡᠯ ᠭᠡᠵᠦ ᠦᠵᠡᠬᠦ ᠯᠡ ᠶᠣᠰᠤᠲᠡᠢ 
     ᠭᠤᠷᠪᠠ
 ᠪᠠᠭᠰᠢ ᠬᠦᠮᠦᠨ  ᠭᠬᠢᠷ ᠦᠭᠡᠢ ᠠᠷᠢᠭᠤᠨ ᠣᠶᠤᠨ ᠤ ᠨᠠᠷᠠ ᠪᠢᠯᠡ᠃ ᠡᠨᠡ ᠨᠠᠷᠠ ᠶᠢ ᠭᠬᠢᠷᠳᠦᠭᠡᠵᠦ ᠦᠯᠦ ᠪᠣᠯᠤᠨ᠎ᠠ᠃ ᠭᠬᠢᠷᠲᠦᠭᠡᠪᠡᠰᠦ ᠣᠶᠤᠨ ᠤ ᠭᠡᠭᠡ ᠪᠦᠳᠡᠭᠢᠷᠡᠵᠦ᠂ ᠤᠬᠠᠭᠠᠨ ᠤ ᠴᠣᠯᠮᠤᠨ ᠪᠠᠯᠠᠷᠰᠢᠬᠤ ᠪᠣᠯᠤᠨ᠎ᠠ᠃ ᠲᠡᠶᠢᠮᠦ ᠪᠣᠯᠬᠤᠷ ᠪᠠᠭᠰᠢ ᠬᠦᠮᠦᠨ ᠢ ᠨᠡᠶᠢᠭᠡᠮ ᠨᠡᠶᠢᠲᠡ ᠬᠦᠮᠦᠨ ᠠᠷᠠᠳ ᠢᠶᠠᠷ ᠢᠶᠠᠨ  ᠡᠷᠬᠢᠮᠰᠦᠭᠯᠡᠨ ᠬᠦᠨᠲᠦᠳᠭᠡᠳᠡᠭ᠃
 ᠪᠢ ᠰᠤᠷᠤᠭᠴᠢ ᠪᠠᠶᠢᠭᠰᠠᠨ ᠦᠶ᠎ᠡ ᠠᠴᠠ ᠣᠳᠤ ᠪᠣᠯᠲᠠᠯ᠎ᠠ ᠪᠠᠭᠰᠢ ᠨᠠᠷ ᠢᠶᠡᠨ ᠶᠡᠷᠤ ᠡᠴᠡ ᠪᠠᠰᠤᠵᠤ ᠳᠣᠣᠷᠠᠰᠢᠶᠠᠵᠤ ᠦᠵᠡᠭᠡ ᠦᠭᠡᠢ᠂ ᠨᠡᠩ ᠴᠤ ᠨᠢᠭᠤᠷ ᠳᠡᠭᠡᠷ᠎ᠡ ᠨᠢ ᠮᠠᠭᠲᠠᠵᠤ ᠠᠷᠤ ᠬᠣᠶᠢᠨ᠎ᠠ ᠨᠢ ᠮᠠᠭᠤᠰᠢᠶᠠᠬᠤ ᠣᠪᠵᠢᠨ ᠠᠪᠲᠠᠯ ᠭᠠᠷᠭᠠᠭ᠎ᠠ ᠦᠭᠡᠢ᠃ ᠡᠣᠰᠤ ᠶᠢ ᠨᠢ ᠤᠤᠭᠤᠭᠰᠠᠨ ᠬᠣᠶᠢᠨ᠎ᠠ ᠬᠤᠳᠳᠤᠭ ᠢᠶᠡᠨ ᠪᠤᠯᠠᠩᠭᠢᠷᠲᠤᠭᠤᠯᠬᠤ ᠶᠣᠰᠣ ᠦᠭᠡᠢ ᠦᠢᠯᠡ ᠶᠢ ᠶᠠᠭᠠᠬᠢᠭᠰᠠᠨ ᠴᠤ ᠬᠢᠵᠦ ᠪᠣᠯᠬᠤ ᠦᠭᠡᠢ᠃ ᠬᠡᠨ ᠡᠴᠡ ᠡᠷᠳᠡᠮ ᠬᠦᠷᠲᠡᠭᠰᠡᠨ ᠭᠡᠳᠡᠭ ᠢᠶᠡᠨ ᠦᠷᠭᠦᠯᠵᠢ ᠬᠡᠬᠦᠳᠡᠭ ᠲᠦ ᠪᠡᠨ  ᠠᠴᠢᠲᠤ ᠪᠠᠭᠰᠢ ᠨᠠᠷ ᠢᠶᠡᠨ ᠬᠡᠵᠢᠶᠡᠳᠡ ᠮᠠᠷᠲᠠᠬᠤ ᠦᠭᠡᠢ ᠶᠠᠪᠤᠨ᠎ᠠ᠃ ᠪᠠᠭᠰᠢ ᠨᠠᠷ  ᠤᠨ ᠢᠶᠠᠨ ᠵᠦᠪ ᠵᠢᠯᠤᠭᠤᠳᠤᠯᠭ᠎ᠠ ᠪᠠᠷ ᠰᠤᠷᠤᠭᠴᠢ ᠬᠦᠮᠦᠨ ᠦ ᠰᠡᠳᠬᠢᠯ ᠰᠠᠨᠠᠭ᠎ᠠ ᠡᠳᠥᠷ ᠡᠴᠡ ᠡᠳᠥᠷ ᠦᠷᠭᠡᠵᠢᠵᠦ ᠪᠠᠶᠢᠭ᠎ᠠ ᠦᠵᠡᠯ ᠰᠠᠨᠠᠭ᠎ᠠ ᠦᠢᠯᠡ ᠠᠵᠢᠯᠯᠠᠭᠠᠨ ᠤ ᠪᠠᠨ ᠵᠦᠭ ᠤᠷᠤᠭᠰᠢᠯᠠᠵᠤ ᠴᠢᠳᠠᠭᠰᠠᠨ ᠪᠠᠶᠢᠳᠠᠭ ᠃ ᠪᠢ ᠪᠠᠭᠰᠢ ᠨᠠᠷ ᠲᠦ ᠪᠡᠨ ᠥᠷᠢ ᠲᠠᠢ ᠭᠡᠳᠡᠭ ᠢᠶᠡᠨ ᠲᠣᠳᠣ ᠮᠡᠳᠡᠨ᠎ᠡ᠃ ᠪᠠᠭᠰᠢ ᠨᠠᠷ ᠤᠨ ᠬᠦᠮᠦᠵᠢᠯ ᠨᠠᠳᠠ ᠨᠡᠶᠢᠭᠡᠮ ᠨᠡᠶᠢᠲᠡ ᠳ᠋ᠦ ᠦᠨᠡᠨᠴᠢ ᠪᠡᠷ ᠵᠢᠳᠬᠦᠬᠦ ᠶᠢ ᠮᠡᠳᠡᠭᠦᠯᠦᠭᠰᠡᠨ᠃ ᠲᠡᠭᠡᠵᠦ ᠪᠠᠶᠢᠵᠤ ᠣᠯᠤᠭᠰᠠᠨ ᠠᠮᠵᠢᠯᠲᠠ᠂ ᠭᠠᠷᠭᠠᠭᠰᠠᠨ ᠵᠢᠳᠬᠦᠯ᠂ ᠭᠠᠶᠢᠬᠠᠯᠲᠠᠢ ᠮᠠᠭᠲᠠᠭᠠᠯ ᠪᠥᠬᠥᠨ ᠮᠠᠨᠢ ᠲᠡᠳᠡᠨ ᠤ ᠪᠣᠯᠬᠤ ᠡᠴᠡ ᠪᠢᠰᠢ ᠮᠢᠨᠤᠬᠢ ᠪᠣᠯᠬᠤ ᠶᠣᠰᠣ ᠦᠭᠡᠢ᠃ ᠲᠡᠷᠡ ᠪᠥᠬᠥᠨ ᠳᠡᠭᠡᠷ᠎ᠡ ᠮᠠᠨᠢ ᠵᠥᠪᠬᠡᠨ ᠮᠢᠨᠦ ᠨᠡᠷ᠎ᠡ ᠶᠢ ᠪᠢᠴᠢᠭᠰᠡᠨ ᠪᠠᠭᠰᠢ ᠨᠠᠷ ᠤᠨ ᠵᠢᠷᠦᠬᠡᠨ ᠲᠠᠮᠢᠷ ᠤᠨ ᠢᠷᠠᠭᠤ ᠠᠯᠳᠠᠷ ᠳᠤᠷᠠᠶᠢᠬᠤ ᠶᠣᠰᠤᠲᠠᠢ᠃ ᠲᠡᠶᠢᠮᠦ ᠪᠣᠯᠬᠣᠷ ᠪᠠᠭᠰᠢ ᠨᠠᠷ ᠡᠴᠡ ᠪᠡᠨ ᠳᠡᠭᠡᠭᠦᠷ ᠬᠡᠮᠡᠨ ᠪᠠᠷᠳᠠᠮᠨᠠᠨ ᠳᠡᠭᠡᠷᠡᠰᠢᠶᠡᠬᠦ ᠡᠷᠬᠡ ᠨᠠᠳᠠ ᠠᠯᠠᠭ᠎ᠠ᠃ ᠬᠠᠷᠢᠨ ᠪᠠᠭᠰᠢ ᠨᠠᠷ ᠤᠨ ᠠᠯᠳᠠᠷ ᠨᠡᠷ᠎ᠡ᠂ ᠣᠮᠣᠭᠰᠢᠯ ᠪᠠᠶᠠᠰᠤᠯ᠂ ᠣᠷᠣᠢ ᠶᠢᠨ ᠴᠢᠮᠡᠭ ᠂ ᠴᠠᠭᠠᠰᠢᠯᠠᠪᠠᠯ ᠨᠡᠷ᠎ᠡ ᠲᠥᠷᠥ ᠶᠢ ᠨᠢ ᠬᠦᠷᠲᠡᠯ᠎ᠡ ᠡᠷᠭᠦᠵᠦ ᠶᠠᠪᠤᠭ᠎ᠠ ᠪᠡᠨ ᠡᠭᠦᠷᠭᠡ ᠬᠠᠷᠢᠭᠤᠴᠠᠯᠭ᠎ᠠ ᠢᠶᠡᠨ ᠭᠦᠢᠴᠡᠳᠬᠡᠵᠦ ᠪᠠᠶᠢᠨ᠎ᠠ ᠭᠡᠵᠦ ᠪᠢ ᠪᠣᠳᠣᠳᠠᠭ᠃ ᠡᠶᠢᠮᠦᠷᠬᠦᠦ ᠥᠭᠡᠳᠡ ᠲᠠᠢ ᠪᠣᠳᠣᠯ ᠪᠣᠳᠠᠲᠠᠢ ᠠᠵᠢᠯᠯᠠᠭ᠎ᠠ ᠳ᠋ᠦ ᠯᠡ ᠪᠠᠭᠰᠢ ᠨᠠᠷ ᠮᠠᠨᠢ ᠪᠠᠶᠠᠰᠴᠤ ᠴᠢᠳᠠᠳᠠᠭ ᠪᠥᠭᠡᠳ ᠬᠥᠮᠥᠵᠢᠯ ᠤᠨ ᠦᠨ᠎ᠡ ᠴᠡᠨ᠎ᠡ ᠳ᠋ᠦ ᠪᠡᠨ ᠣᠮᠣᠭᠰᠢᠳᠠᠭ᠃
ᠪᠠᠭᠰᠢ ᠬᠥᠮᠥᠨ ᠭᠡᠳᠡᠭ ᠰᠣᠷᠣᠭᠴᠢ ᠪᠡᠷ ᠢᠶᠡᠨ ᠣᠮᠤᠭᠰᠢᠵᠤ ᠰᠠᠴᠤᠷᠠᠵᠤ ᠬᠢᠯᠠᠯᠵᠠᠳᠠᠭ ᠣᠶᠣᠨ ᠤ ᠨᠠᠷᠠ᠃ ᠡᠨᠡ ᠨᠠᠷᠠ ᠶᠢ ᠭᠬᠢᠷᠲᠦᠭᠡᠵᠦ ᠥᠯᠥ ᠪᠣᠯᠣᠨ᠎ᠠ᠃ ᠭᠬᠢᠷᠲᠦᠭᠡᠪᠡᠰᠦ ᠬᠡᠢᠢᠮᠣᠷᠢ ᠮᠣᠷᠢ ᠪᠠᠭᠤᠷᠠᠵᠤ ᠬᠡᠰᠢᠭ ᠪᠤᠶᠠᠨ ᠤᠷᠤᠭᠤᠳᠠᠨ᠎ᠠ᠃
    ᠳᠥᠷᠪᠡ
 ᠪᠠᠭᠰᠢ ᠬᠥᠮᠥᠨ ᠪᠡᠶ᠎ᠡ ᠰᠡᠳᠬᠢᠯ ᠢᠶᠡᠨ ᠬᠡᠨ ᠤ ᠲᠥᠯᠥᠭᠡ ᠵᠦᠲᠡᠭᠡᠳᠡᠭ ᠪᠣᠢ  ᠪᠥᠬᠥ ᠬᠦᠴᠦ ᠣᠶᠣᠨ ᠤᠬᠠᠭᠠᠨ ᠢᠶᠠᠨ ᠶᠠᠭᠤᠨ ᠳ᠋ᠦ ᠵᠠᠷᠤᠴᠠᠭᠤᠯᠳᠠᠭ ᠪᠤᠢ  ᠬᠠᠷᠢᠭᠤᠯᠲᠠ ᠮᠠᠰᠢ ᠲᠣᠳᠣᠷᠬᠠᠢ᠃
ᠲᠡᠳᠡᠨ ᠳ᠋ᠦ ᠰᠣᠷᠣᠭᠴᠢᠳ ᠤᠨ ᠢᠶᠡᠨ ᠲᠥᠯᠥᠭᠡ ᠭᠡᠬᠦ ᠭᠠᠭᠴᠠ ᠪᠣᠳᠣᠯ᠂ ᠦᠨᠳᠦᠰᠦᠲᠡᠨ ᠤ ᠪᠡᠨ ᠲᠥᠯᠥᠭᠡ ᠭᠡᠬᠦ ᠬᠠᠭᠠᠴᠠ ᠵᠣᠷᠢᠯᠲᠡ᠂ ᠢᠷᠡᠭᠡᠳᠦᠢ ᠶᠢᠨ ᠢᠶᠡᠨ ᠲᠥᠯᠥᠭᠡ ᠭᠡᠬᠦ ᠭᠠᠭᠴᠠ ᠬᠠᠷᠠᠯᠲᠠ᠂ ᠡᠬᠡ ᠤᠯᠤᠰ ᠤᠨ ᠢᠶᠡᠨ ᠲᠥᠯᠥᠭᠡ ᠭᠡᠬᠦ ᠭᠠᠭᠴᠠ ᠠᠮᠢ ᠲᠠᠢ ᠪᠠᠶᠢᠳᠠᠭ᠃ ᠡᠭᠦᠨ ᠤ ᠪᠡᠨ ᠲᠥᠯᠥᠭᠡ ᠲᠡᠳᠡ ᠪᠠᠭᠰᠢ ᠭᠡᠳᠡᠭ ᠠᠯᠳᠠᠷ ᠨᠡᠷ᠎ᠡ ᠬᠦᠷᠲᠡᠭᠰᠡᠨ ᠲᠡᠷᠡ ᠡᠳᠦᠷ ᠡᠴᠡ ᠪᠡᠨ ᠡᠬᠢᠯᠡᠭᠡᠳ ᠰᠤᠷᠭᠠᠭᠤᠯᠢ ᠶᠢᠨ ᠬᠦᠷᠢᠶᠡᠨ ᠳ᠋ᠦ ᠪᠡᠭᠡᠷᠡᠭᠦᠯ ᠪᠣᠯᠵᠤ ᠡᠷᠭᠢᠭᠡᠳ᠂ ᠰᠤᠷᠭᠠᠭᠤᠯᠢ ᠶᠢᠨ ᠬᠦᠷᠢᠶᠡᠨ ᠤ ᠪᠦᠬᠦᠢ ᠯᠡ ᠠᠵᠢᠯᠯᠠᠭᠠᠨ ᠳ᠋ᠦ ᠪᠠᠶᠠᠴᠢᠯᠡᠨ ᠣᠷᠣᠯᠴᠠᠬᠤ ᠪᠣᠯᠣᠭᠰᠠᠨ ᠶᠤᠮ᠃ ᠲᠡᠳᠡ ᠪᠠᠯᠲᠤ ᠵᠦᠭᠡᠢ  ᠮᠠᠰᠢ ᠶᠠᠭᠠᠷᠠᠯᠲᠠᠢ ᠠᠵᠢᠯᠯᠠᠳᠠᠭ ᠤᠯᠤᠰ᠃ ᠶᠠᠳᠠᠷᠠᠯ ᠢᠶᠡᠷ ᠵᠢᠷᠭᠠᠯ ᠰᠣᠯᠢᠳᠠᠭ ᠬᠤᠪᠤᠷᠬᠠᠨ ᠤᠯᠤᠰ᠃ ᠲᠡᠳᠡᠨ ᠤ ᠠᠵᠢᠯ ᠦᠢᠯᠡ ᠶᠢᠨ ᠠᠷᠪᠢᠨ  ᠳᠠᠩᠴᠢ ᠬᠡᠳᠦᠷᠬᠡᠢ᠃ 
 ᠲᠡᠳᠡ ᠡᠷᠲᠡ ᠶᠢᠨ ᠲᠠᠮᠢᠷ᠂ ᠡᠳᠦᠷ ᠤᠨ ᠬᠢᠴᠢᠶᠡᠯ᠂ ᠦᠳᠡᠰᠢ ᠶᠢᠨ ᠳᠠᠪᠲᠠᠯᠭ᠎ᠠ᠂ ᠪᠠᠶᠢᠷᠢ ᠶᠢᠨ ᠬᠠᠮᠢᠶᠠᠷᠤᠯᠲᠠ᠂ ᠡᠭᠡᠯᠵᠢ ᠶᠢᠨ ᠵᠢᠵᠢᠭᠦᠷ ᠭᠡᠳ ᠬᠢᠵᠠᠭᠠᠷ ᠦᠭᠡᠢ ᠦᠢᠯᠡᠴᠢᠯᠡᠭᠡ ᠳ᠋ᠦ ᠬᠣᠰᠢᠭᠤᠷᠠᠨ᠎ᠠ᠃ ᠤᠯᠤᠰ ᠲᠥᠷᠥ ᠶᠢᠨ ᠰᠤᠷᠤᠯᠴᠠᠯᠭ᠎ᠠ᠂ ᠦᠷᠭᠦᠯᠵᠢᠯᠡᠭᠰᠡᠨ ᠰᠤᠷᠤᠯᠴᠠᠯᠭ᠎ᠠ᠂ ᠲᠤᠰᠬᠠᠢ ᠮᠡᠷᠭᠡᠵᠢᠯ ᠤᠨ ᠰᠤᠷᠤᠯᠴᠠᠯᠭ᠎ᠠ᠁ ᠤᠯᠠᠨ ᠵᠤᠶᠢᠯ ᠤᠨ ᠰᠤᠷᠤᠯᠴᠠᠯᠭ᠎ᠠ ᠳ᠋ᠦ ᠢᠳᠡᠪᠬᠢᠯᠡᠨ᠎ᠡ᠃ ᠰᠤᠷᠭᠠᠭᠤᠯᠢ ᠶᠢᠨ ᠬᠤᠷᠠᠯ᠂ ᠳᠤᠭᠤᠶᠢᠯᠠᠩ ᠤᠨ ᠬᠤᠷᠠᠯ᠂ ᠰᠤᠳᠤᠯᠭᠠᠨ ᠤ ᠬᠤᠷᠠᠯ᠂ ᠰᠠᠭᠤᠳᠠᠯ ᠤᠨ ᠬᠤᠷᠠᠯ᠂ ᠶᠠᠷᠢᠶ᠎ᠠ ᠢᠯᠡᠳᠬᠡᠯ ᠤᠨ ᠬᠤᠷᠠᠯ᠂ ᠠᠩᠭᠢ ᠨᠢᠭᠡᠴᠢ ᠶᠢᠨ ᠬᠤᠷᠠᠯ᠂ ᠣᠨ ᠨᠢᠭᠡᠴᠢ ᠶᠢᠨ ᠬᠤᠷᠠᠯ ᠁ ᠲᠡᠷᠡ ᠪᠥᠬᠥᠨ ᠳ᠋ᠦ ᠣᠷᠣᠯᠴᠠᠨ᠎ᠠ᠂ ᠰᠤᠷᠤᠯᠴᠠᠯᠭ᠎ᠠ ᠶᠢᠨ ᠲᠡᠮᠳᠡᠭᠯᠡᠯ᠂ ᠣᠯᠣᠯᠲᠠ ᠲᠥᠷᠥᠭᠳᠡᠯ ᠤᠨ ᠲᠡᠮᠳᠡᠭᠯᠡᠯ ᠁ ᠭᠡᠳ ᠣᠪᠣᠭ᠎ᠠ ᠣᠯᠠᠨ ᠲᠡᠮᠳᠡᠭᠯᠡᠯ ᠪᠢᠴᠢᠨ᠎ᠡ᠃ ᠰᠤᠳᠤᠯᠭᠠᠨ ᠤ ᠥᠭᠦᠯᠡᠯ᠂ ᠮᠦᠷᠦᠶᠢᠴᠡᠭᠡᠨ ᠤ ᠵᠣᠬᠢᠶᠠᠯ᠁ ᠭᠡᠳ ᠮᠠᠰᠢ ᠠᠷᠪᠢᠨ ᠵᠣᠬᠢᠶᠠᠯ ᠲᠤᠭᠤᠷᠪᠢᠨ᠎ᠠ᠃ ᠬᠢᠴᠢᠶᠡᠯᠯᠡᠭᠡ ᠶᠢᠨ ᠲᠥᠰᠥᠪ᠂ ᠰᠣᠷᠣᠭᠴᠢ ᠬᠥᠮᠥᠵᠢᠭᠦᠯᠬᠦ ᠲᠥᠰᠥᠪ᠂ ᠠᠩᠭᠢ ᠡᠷᠭᠢᠯᠡᠭᠴᠢ ᠶᠢᠨ ᠲᠥᠰᠥᠪ᠁ ᠭᠡᠳ ᠣᠯᠠᠨ ᠠᠷᠪᠢᠨ ᠲᠥᠰᠥᠪ ᠲᠥᠯᠥᠪᠯᠡᠨ᠎ᠡ᠃ ᠬᠢᠴᠢᠶᠡᠯ ᠪᠡᠯᠡᠳᠬᠡᠬᠦ᠂ ᠬᠢᠴᠢᠶᠡᠯ ᠬᠦᠤᠷᠨᠢᠬᠦ᠂ ᠬᠢᠴᠢᠶᠡᠯ ᠰᠣᠨᠣᠰᠬᠤ᠂ ᠬᠢᠴᠢᠶᠡᠯ ᠰᠣᠨᠣᠰᠬᠠᠬᠤ᠂ ᠬᠢᠴᠢᠶᠡᠯᠯᠡᠭᠡ ᠶᠠᠷᠢᠯᠴᠠᠬᠤ᠂ ᠳᠠᠰᠬᠠᠯ ᠳᠠᠭᠠᠭᠠᠯᠭᠠᠪᠤᠷᠢ ᠦᠯᠡᠳᠡᠭᠡᠵᠦ ᠪᠣᠯᠪᠠᠰᠤᠷᠠᠯ ᠤᠨ ᠰᠡᠳᠣᠪ ᠬᠢᠨᠠᠬᠤ᠂ ᠬᠠᠷᠢᠭᠤ ᠪᠤᠴᠠᠯᠲᠠ ᠬᠢᠬᠦ᠂ ᠬᠣᠴᠤᠷᠤᠭᠰᠠᠨ ᠰᠣᠷᠣᠭᠴᠢ ᠳ᠋ᠦ ᠬᠢᠴᠢᠶᠡᠯ ᠨᠦᠬᠦᠪᠦᠷᠢᠯᠡᠬᠦ ᠁ ᠭᠡᠬᠦ ᠮᠡᠲᠦ ᠳᠤᠬᠠᠶᠢᠯᠠᠭᠰᠠᠨ ᠠᠵᠢᠯ ᠳ᠋ᠦ ᠪᠡᠨ ᠶᠠᠭᠠᠷᠠᠯᠲᠠᠢ ᠭᠠᠪᠰᠢᠭᠠᠶᠢᠯᠠᠨ᠎ᠠ᠃ ᠨᠢᠭᠡᠴᠢ ᠶᠢᠨ ᠰᠢᠯᠭᠠᠯᠲᠠ᠂ ᠰᠠᠷ᠎ᠠ ᠶᠢᠨ ᠰᠢᠯᠠᠭᠠᠯᠲᠠ᠂ ᠬᠤᠭᠤᠴᠠᠭᠠᠨ ᠳᠤᠮᠳᠠᠬᠢ ᠰᠢᠯᠠᠭᠠᠯᠲᠠ᠂ ᠬᠤᠭᠤᠴᠠᠭᠠᠨ ᠡᠴᠤᠰ ᠤᠨ ᠰᠢᠯᠠᠭᠠᠯᠲᠠ᠂ ᠣᠯᠠᠨ ᠵᠤᠶᠢᠯ ᠤᠨ ᠰᠤᠷᠢᠯᠲᠠ ᠰᠡᠳᠦᠪ ᠢ ᠲᠣᠯᠤᠭᠠᠢ ᠦᠨᠳᠡᠶᠢᠯ ᠦᠭᠡᠢ ᠵᠢᠭᠠᠨ ᠵᠢᠯᠤᠭᠤᠳᠤᠨ᠎ᠠ᠃ ᠵᠠᠯᠬᠠᠭᠤ ᠵᠠᠶᠢᠳᠠᠩ ᠰᠣᠷᠣᠭᠴᠢ᠂ ᠵᠣᠳᠤᠯᠳᠤᠵᠤ
ᠬᠡᠷᠡᠭᠦᠯᠳᠦᠳᠡᠭ ᠰᠣᠷᠣᠭᠴᠢ᠂ ᠰᠤᠷᠲᠠᠯ ᠠᠨᠠᠢ ᠰᠣᠷᠣᠭᠴᠢ᠂ ᠰᠤᠷᠤᠯᠭ᠎ᠠ ᠲᠣᠷᠣᠢ ᠰᠣᠷᠣᠭᠴᠢ᠂ ᠣᠶᠣᠨ ᠰᠡᠳᠬᠢᠴᠡ ᠡᠮᠵᠡᠭ ᠲᠠᠢ ᠰᠣᠷᠣᠭᠴᠢ᠂ ᠤᠬᠠᠭᠠᠨ ᠰᠠᠨᠠᠭ᠎ᠠ ᠨᠢ ᠲᠥᠪᠯᠡᠷᠡᠬᠦ ᠦᠭᠡᠢ ᠰᠣᠷᠣᠭᠴᠢ᠁ ᠭᠡᠳ ᠤᠯᠠᠨ ᠲᠥᠷᠥᠯ ᠤᠨ ᠰᠣᠷᠣᠭᠴᠢ ᠲᠦ ᠣᠨᠴᠠᠭᠠᠢ ᠰᠢᠭᠦᠮᠵᠢ ᠰᠠᠨᠠᠭᠤᠯᠤᠮᠵᠢ᠂ ᠵᠥᠪ ᠵᠢᠯᠣᠭᠣᠳᠤᠮᠵᠢ᠂ ᠵᠤᠶᠢᠲᠠᠢ ᠬᠥᠮᠥᠵᠢᠯ ᠬᠦᠷᠲᠡᠭᠡᠨ᠎ᠡ᠃
 ᠲᠡᠳᠡ ᠣᠯᠠᠨ ᠠᠵᠢᠯ ᠳ᠋ᠦ ᠶᠠᠭᠠᠷᠠᠯᠳᠤᠨ᠎ᠠ᠃ ᠢᠩᠭᠢᠭᠡᠳ ᠪᠠᠰᠠ ᠣᠶᠢᠯᠠᠭᠠᠭᠳᠠᠬᠤ ᠦᠭᠡᠢ ᠤᠴᠢᠷ ᠲᠦ ᠲᠤᠯᠭᠠᠷᠠᠳᠠᠭ᠃ ᠪᠠᠭᠰᠢ ᠶᠢᠨ ᠠᠵᠢᠯ  ᠢ ᠣᠶᠢᠯᠠᠭᠠᠬᠤ ᠦᠭᠡᠢ ᠬᠥᠮᠥᠨ ᠳ᠋ᠦ ᠪᠠᠭᠰᠢ ᠬᠥᠮᠥᠨ  ᠠᠵᠢᠯᠯᠠᠬᠤ ᠡᠴᠡ ᠥᠭᠡᠷ᠎ᠡ ᠶᠠᠭᠤᠮ᠎ᠠ ᠮᠡᠳᠡᠳᠡᠭ ᠦᠭᠡᠢ ᠠᠦ᠋ᠲ᠋ᠦ᠋ ᠮᠠᠰᠢᠨ ᠰᠢᠭ᠋  ᠠᠩᠭᠢ ᠶᠢᠨ ᠭᠡᠷ᠂ ᠪᠠᠶᠢᠷᠢ ᠶᠢᠨ ᠭᠡᠷ᠂ ᠠᠯᠪᠠᠨ ᠭᠡᠷ᠂ ᠬᠤᠷᠠᠯ ᠤᠨ ᠭᠡᠷ ᠳᠥᠷᠪᠡ ᠪᠡᠨ ᠡᠷᠭᠢᠭᠰᠡᠨ ᠡᠷᠭᠢᠭᠦᠳᠡᠭᠰᠡᠨ ᠲᠡᠨᠡᠭ ᠰᠢᠭ  ᠬᠢᠴᠢᠶᠡᠯ ᠦᠨ ᠂ ᠰᠡᠳᠤᠪ ᠰᠢᠯᠭᠠᠯᠲᠠ᠂ ᠲᠠᠰᠬᠠᠯ ᠳᠠᠭᠠᠭᠠᠯᠭᠠᠪᠣᠷᠢ᠂ ᠰᠤᠷᠤᠭᠴᠢ ᠬᠡᠳᠦᠭᠦᠯᠡ ᠲᠠᠢ ᠪᠠᠨ ᠨᠣᠣᠷᠠᠯᠳᠤᠭᠰᠠᠨ ᠬᠡᠪᠰᠢᠮᠡᠯ ᠠᠮᠢᠲᠠᠨ ᠰᠢᠭ᠋  ᠶᠣᠰᠤ ᠮᠤᠷᠠᠯ᠂ ᠰᠤᠷᠲᠠᠯ ᠰᠤᠷᠭᠠᠯ᠂ ᠳᠦᠷᠢᠮ ᠳᠣᠭᠲᠠᠭᠠᠯ ᠨᠤᠷᠰᠢᠳᠠᠭ ᠶᠠᠩᠰᠢᠶ᠎ᠠ ᠯᠠᠮᠠᠲᠠᠨ ᠰᠢᠭ᠋ ᠰᠠᠨᠠᠭᠳᠠᠳᠠᠭ᠃
 ᠲᠡᠳᠡ ᠳᠠᠩᠴᠢ ᠬᠦᠭᠡᠷᠦᠬᠦᠶᠢᠯᠡᠯᠲᠡᠢ ᠤᠯᠤᠰ᠃ ᠬᠥᠮᠥᠰ ᠶᠠᠭᠤ ᠬᠡᠯᠡᠬᠦ ᠶᠢ ᠶᠡᠷᠤ ᠠᠴᠠ ᠬᠠᠶᠢᠬᠤᠷᠳᠠᠭ ᠦᠭᠡᠢ ᠰᠣᠨᠢᠨ ᠤᠯᠤᠰ᠃ ᠲᠡᠳᠡ ᠰᠤᠷᠭᠠᠭᠤᠯᠢ ᠰᠠᠶᠢᠨ᠂ ᠰᠣᠷᠣᠭᠴᠢ ᠰᠠᠶᠢᠨ᠂ ᠰᠦᠷᠲᠠᠯ ᠰᠠᠶᠢᠨ ᠢ ᠪᠣᠳᠣᠵᠤ ᠶᠠᠪᠤᠳᠠᠭ ᠪᠠᠰᠠ ᠪᠡᠶᠡᠯᠡᠭᠦᠯᠵᠦ ᠶᠠᠪᠤᠳᠠᠭ ᠤᠯᠤᠰ᠃ ᠲᠡᠳᠡ ᠦᠪᠡᠷᠲᠡᠭᠡᠨ ᠡᠷᠦᠭᠡ ᠭᠡᠷ ᠦᠷ᠎ᠡ ᠬᠡᠤᠬᠡᠳ ᠲᠠᠢ ᠪᠠᠶᠢᠵᠤ ᠪᠠᠶᠢᠲᠠᠯ᠎ᠠ ᠶᠠᠭ ᠦᠭᠡᠢ ᠶᠤᠮ ᠰᠢᠭ ᠯᠡ ᠥᠷᠥᠭᠡᠯ ᠪᠤᠰᠤᠳ ᠤᠨ ᠬᠡᠤᠬᠡᠳ ᠤᠨ ᠲᠥᠯᠥᠭᠡ ᠡᠳᠦᠷ ᠰᠥᠨᠢ ᠢ ᠬᠠᠢᠬᠤᠷᠤᠯ ᠦᠭᠡᠢ ᠪᠣᠷᠪᠢ ᠪᠣᠭᠢᠰᠬᠢᠯ ᠦᠭᠡᠢ ᠠᠵᠢᠯᠯᠠᠨ᠎ᠠ᠃ ᠬᠠᠤᠯᠢ ᠲᠠᠢ ᠴᠠᠭ᠂ ᠬᠢᠵᠠᠭᠠᠷ ᠲᠠᠢ ᠣᠯᠭᠣᠮᠵᠢ ᠲᠡᠳᠡᠨ ᠤ ᠠᠵᠢᠯᠯᠠᠭ᠎ᠠ ᠶᠢ ᠶᠡᠷᠦ ᠡᠴᠡ ᠰᠠᠭᠠᠲᠠᠭᠠᠵᠤ ᠳᠡᠶᠢᠯᠳᠡᠭ ᠦᠭᠡᠢ ᠨᠢ ᠰᠣᠨᠢᠨ᠃ ᠲᠡᠳᠡᠨ ᠤ ᠰᠡᠳᠬᠢᠯ ᠰᠠᠨᠠᠭ᠎ᠠ ᠴᠠᠶᠢᠯᠭᠠᠨ᠂ ᠦᠵᠡᠯ ᠪᠣᠳᠣᠯ ᠠᠷᠢᠭᠤᠨ᠂ ᠬᠠᠷᠠᠯᠲᠠ ᠵᠣᠷᠢᠯᠲᠡ ᠲᠣᠳᠣᠷᠬᠠᠢ᠂ ᠬᠦᠰᠡᠯᠡᠩ ᠬᠥᠭᠡᠭᠡᠴᠡᠯᠳᠦᠯ ᠠᠯᠤᠰ᠂ ᠬᠦᠰᠡᠯᠡᠩ ᠤᠨ ᠣᠷᠭᠢᠯ ᠰᠢᠷᠳᠡᠵᠦ ᠪᠠᠶᠢᠭᠠᠳ ᠬᠡᠤᠬᠡᠳ ᠬᠣᠶᠢᠴᠢᠰ ᠢᠶᠠᠨ ᠡᠷᠭᠦᠭᠡᠳ ᠣᠷᠤᠭᠰᠢᠯᠠᠳᠠᠭ ᠊— ᠡᠶᠢᠮᠦ ᠯᠡ ᠰᠤᠷᠲᠠᠬᠤᠨ ᠢᠶᠠᠷ ᠦᠪᠡᠷ ᠪᠡᠶ᠎ᠡ ᠪᠡᠨ ᠴᠢᠮᠡᠭᠡᠳ ᠪᠠᠶᠠᠰᠳᠠᠭ ᠤᠯᠤᠰ᠃ ᠣᠶᠢᠯᠠᠭᠠᠬᠤ ᠦᠭᠡᠢ ᠬᠦᠮᠦᠨ ᠳᠦ ᠪᠣᠯ ᠲᠡᠳᠡ ᠴᠢᠨᠢ ᠲᠡᠨᠡᠭ ᠮᠤᠩᠬᠠᠭᠴᠢᠨ᠂ ᠣᠶᠢᠯᠠᠭᠠᠳᠠᠭ ᠬᠦᠮᠦᠨ ᠳᠦ ᠲᠡᠳᠡ ᠴᠢᠨᠢ ᠠᠭᠤᠤ  
ᠬᠦᠮᠦᠰ ᠡ᠄
 ᠡᠷᠬᠢᠮ ᠳᠡᠭᠡᠳᠦ ᠬᠥᠮᠥᠰ ᠬᠠᠮᠢᠭ᠎ᠠ ᠪᠠᠶᠢᠭ᠎ᠠ ᠪᠣᠢ  ᠡᠴᠢᠭᠡ ᠡᠬᠡ  ᠬᠦᠨᠳᠦᠲᠡᠢ ᠬᠥᠮᠥᠨ ᠬᠡᠨ ᠪᠣᠯᠬᠤ ᠪᠣᠢ  ᠡᠨᠳᠡ ᠪᠢ ᠥᠴᠥᠬᠡᠨ ᠴᠤ ᠡᠷᠡᠭᠡᠯᠵᠡᠯ ᠦᠭᠡᠢ ᠪᠡᠷ ᠪᠠᠬᠠᠳᠤᠵᠤ ᠬᠡᠯᠡᠮᠡᠷ ᠬᠦᠮᠦᠨ ᠪᠣᠯ᠄
ᠪᠠᠭᠰᠢ ᠬᠥᠮᠥᠨ  ᠪᠠᠭᠰᠢ ᠬᠥᠮᠥᠨ  ᠪᠠᠭᠰᠢ ᠬᠥᠮᠥᠨ  
      ᠲᠠᠪᠤ
 ᠨᠠᠳᠠ ᠪᠠᠭᠰᠢ ᠳ᠋ᠦ ᠪᠡᠨ ᠭᠣᠮᠣᠳᠠᠮᠠᠷ ᠤᠴᠢᠷ ᠠᠯᠠᠭ᠎ᠠ᠃ ᠬᠡᠷᠪᠡ ᠭᠣᠮᠣᠳᠠᠯ ᠲᠠᠢ ᠭᠡᠪᠡᠯ ᠪᠠᠭᠰᠢ  ᠪᠡᠨ ᠭᠣᠮᠣᠳᠠᠭᠰᠠᠨ  ᠦᠶ᠎ᠡ ᠳ᠋ᠦ ᠪᠠᠭᠰᠢ ᠨᠠᠷ ᠤᠨ ᠢᠶᠡᠨ ᠰᠢᠭᠦᠮᠵᠢᠯᠡᠯ ᠰᠤᠷᠭᠠᠯ ᠶᠢ ᠪᠤᠷᠤᠭᠤ ᠬᠦᠷᠲᠡᠭᠡᠯ ᠪᠣᠯᠭᠠᠨ ᠣᠶᠢᠯᠠᠭᠠᠭᠰᠠᠨ ᠤᠴᠢᠷ ᠲᠡᠳᠦᠢ᠃ ᠬᠡᠷᠡᠭ ᠳᠡᠭᠡᠷ᠎ᠡ ᠪᠡᠨ ᠪᠠᠭᠰᠢ ᠳ᠋ᠦ ᠪᠡᠨ ᠪᠠᠶᠠᠷᠯᠠᠪᠠᠯ ᠵᠣᠬᠢᠬᠤ ᠰᠠᠨ᠃
 ᠨᠠᠳᠠ ᠪᠠᠭᠰᠢ ᠳ᠋ᠦ ᠪᠡᠨ ᠬᠣᠷᠣᠰᠤᠮᠠᠷ ᠤᠴᠢᠷ ᠠᠯᠠᠭ᠎ᠠ᠃ ᠬᠡᠷᠪᠡ ᠬᠣᠷᠣᠰᠤᠯ᠎ᠠ ᠭᠡᠪᠡᠯ ᠪᠠᠭᠰᠢ  ᠶᠢᠨ  ᠢᠶᠡᠨ ᠬᠦᠨᠳᠦ ᠨᠠᠶᠢᠳᠠᠪᠤᠷᠢ  ᠶᠢ ᠬᠥᠰᠡᠷᠳᠡᠭᠦᠯᠦᠭᠡᠳ ᠣᠯᠪᠠᠰᠤ ᠵᠣᠬᠢᠬᠤ ᠵᠠᠯᠬᠠᠭᠠᠯ ᠣᠯᠣᠭᠰᠠᠨ ᠢᠶᠡ ᠬᠢᠯᠢᠰᠳᠡᠯ᠎ ᠭᠡᠵᠦ ᠡᠨᠳᠡᠭᠦᠦ ᠪᠣᠳᠣᠭᠰᠠᠨ ᠲᠡᠳᠦᠢ᠃ ᠶᠣᠰᠣᠨ ᠳ᠋ᠦ ᠪᠡᠨ ᠪᠠᠭᠰᠢ ᠳ᠋ᠦ ᠪᠡᠨ ᠲᠠᠯᠠᠷᠬᠠᠪᠠᠯ ᠲᠠᠭᠠᠷᠠᠬᠤ ᠰᠠᠨ᠃
 ᠰᠤᠷᠭᠠᠯ ᠰᠢᠭᠦᠮᠵᠢᠯᠡᠯ᠂ ᠵᠠᠯᠬᠠᠭᠠᠯ ᠰᠢᠢᠳᠬᠡᠯ᠁ ᠲᠡᠷᠡ ᠪᠥᠬᠥᠨ ᠢ ᠭᠣᠮᠣᠳᠠᠯ ᠪᠤᠶᠤ ᠬᠣᠷᠣᠰᠤᠯ ᠢᠶᠡᠷ ᠣᠢᠯᠠᠭᠠᠪᠠᠯ ᠪᠤᠷᠤᠭᠤ᠃ ᠲᠡᠷᠡ ᠪᠣᠯ ᠵᠠᠯᠠᠭᠠᠳ ᠳᠡᠶᠢᠯᠬᠦ ᠦᠭᠡᠢ ᠬᠡᠣᠬᠡᠳ ᠢ ᠵᠠᠮ ᠢᠶᠡᠷ ᠨᠢ ᠣᠷᠣᠭᠤᠯᠵᠤ ᠵᠠᠰᠠᠵᠤ ᠱᠣᠭᠰᠢᠭᠤᠯᠬᠤ ᠬᠠᠲᠠᠭᠤ ᠬᠠᠶᠢᠷ᠎ᠠ  ᠶᠢᠨ ᠭᠠᠯ ᠬᠡᠳᠦ ᠳᠦᠷᠡᠯᠵᠡᠭᠰᠡᠨ ᠤ ᠤᠴᠢᠷ ᠂ ᠬᠥᠮᠥᠨ ᠪᠣᠯᠭᠠᠬᠤ ᠬᠥᠮᠥᠵᠢᠯ ᠤᠨ ᠬᠠᠷᠢᠭᠤᠴᠠᠯᠭ᠎ᠠ ᠶᠢᠨ ᠠᠶᠤᠩᠭ᠎ᠠ ᠬᠡᠳᠦ ᠨᠢᠵᠢᠭᠢᠨᠡᠭᠰᠡᠨ ᠤ ᠬᠠᠷᠠᠭ᠎ᠠ᠃ ᠮᠠᠭᠲᠠᠭᠠᠯ ᠰᠠᠶᠢᠰᠢᠶᠠᠯ᠂ ᠠᠷᠭᠠᠳᠠᠯ ᠢᠯᠪᠢᠯᠲᠡ ᠵᠡᠷᠭᠡ ᠠᠯᠢᠪᠠ ᠵᠥᠭᠡᠯᠡᠨ ᠬᠥᠮᠥᠵᠢᠯ ᠢ ᠦᠲᠡᠷᠭᠡᠭᠰᠡᠳ ᠲᠦ ᠱᠠᠩᠨᠠᠭᠰᠠᠨ ᠬᠣᠮᠰᠢᠮ᠎ᠠ ᠪᠣᠳ᠋ᠢᠰᠡᠳ᠋ᠸ᠎ᠠ  ᠶᠢᠨ ᠡᠷᠳᠡᠨᠢ ᠴᠠᠭᠠᠷᠢᠭ᠃ ᠡᠭᠦᠨ ᠳ᠋ᠦ ︽ ᠬᠠᠶᠢᠷ᠎ᠠ ᠪᠠ ᠬᠠᠷᠢᠭᠤᠴᠠᠯᠭ᠎ᠠ︾ ᠭᠡᠬᠦ ᠬᠣᠶᠠᠷ ᠬᠤᠪᠢᠯᠭᠠᠨ ᠰᠢᠳᠢ ᠪᠣᠢ᠃ ᠪᠠᠭᠰᠢ ᠬᠥᠮᠥᠨ ᠡᠭᠦᠨ ᠢᠶᠡᠨ ᠬᠡᠷᠡᠭ ᠲᠠᠢ ᠦᠶ᠎ᠡ ᠳ᠋ᠦ ᠨᠢ ᠬᠡᠷᠡᠭᠯᠡᠵᠦ ᠴᠢᠳᠠᠪᠠᠯ ᠬᠥᠮᠥᠨ ᠠᠪᠤᠷᠠᠨ᠎ᠠ᠃ ᠬᠥᠮᠥᠵᠢᠯ ᠰᠤᠷᠭᠠᠯ ᠤᠨ ᠬᠤᠷ᠎ᠠ ᠴᠠᠭ ᠲᠦ ᠪᠡᠨ ᠱᠠᠭᠢᠵᠦ᠂ ᠴᠠᠭᠯᠠᠰᠢ ᠦᠭᠡᠢ ᠣᠯᠠᠨ ᠴᠡᠴᠡᠭ ᠳᠡᠯᠪᠢ ᠪᠡᠨ ᠳᠡᠯᠭᠡᠨ᠎ᠡ᠃
 ᠣᠯᠠᠩᠬᠢ ᠰᠣᠷᠣᠭᠴᠢ ᠶᠢᠨ ᠭᠣᠮᠣᠳᠠᠯ᠂ ᠬᠣᠷᠣᠰᠤᠯ᠂ ᠳᠤᠷ᠎ᠠ ᠦᠭᠡᠢᠢᠴᠡᠯ ᠪᠥᠬᠥᠨ ᠪᠤᠷᠤᠭᠤ ᠣᠶᠢᠯᠠᠭᠠᠯᠲᠠ ᠡᠴᠡ ᠪᠣᠢ ᠪᠣᠯᠳᠠᠭ᠃ ᠥᠪᠡᠷ ᠤᠨ ᠠᠯᠢᠪᠠ ᠦᠢᠯᠡ ᠪᠡᠨ ᠵᠥᠪ ᠬᠡᠮᠡᠨ ᠵᠣᠷᠢᠭᠤᠳᠠ ᠵᠢᠳᠬᠦᠵᠦ ᠪᠣᠳᠣᠳᠠᠭ ᠡᠴᠡ ᠪᠣᠯᠳᠠᠭ᠃ ᠲᠡᠭᠡᠭᠡᠳ ᠯᠡ ᠪᠠᠭᠰᠢ  ᠨᠠᠷ ᠤᠨ ᠢᠶᠡᠨ ᠥᠴᠥᠬᠡᠨ ᠪᠠᠭ᠎ᠠ ᠳᠤᠲᠠᠭᠳᠠᠯ ᠢ ᠦᠰᠦᠳᠡᠵᠦ ᠲᠠᠰᠤᠳᠠᠭᠠᠳ ᠲᠠᠯᠪᠢᠬᠤ ᠦᠭᠡᠢ᠂ ᠥᠰᠢᠵᠦ ᠵᠥᠷᠢᠭᠡᠳ ᠪᠠᠶᠢᠳᠠᠭ᠃ ᠡᠶᠢᠮᠦ ᠰᠣᠷᠣᠭᠴᠢ ᠬᠡᠵᠢᠶᠡᠳᠡ ᠬᠠᠶᠢᠷ᠎ᠠ ᠶᠢ ᠬᠠᠯᠠ ᠪᠠᠷ ᠣᠶᠢᠯᠠᠭᠠᠵᠤ ᠬᠦᠮᠦᠵᠢᠯ ᠳᠦ ᠭᠠᠵᠢ ᠪᠠᠷ ᠬᠠᠨᠳᠤᠳᠠᠭ ᠲᠤᠯᠠ ᠬᠦᠮᠦᠵᠢᠯ ᠰᠤᠷᠭᠠᠯ ᠤᠨ ᠡᠷᠬᠢᠮ ᠨᠠᠨᠳᠢᠨ   ᠢ ᠴᠠᠭ ᠲᠤᠬᠠᠢ ᠳᠤ ᠨᠢ ᠬᠦᠯᠢᠶᠡᠨ ᠠᠪᠴᠤ ᠬᠦᠷᠲᠡᠵᠦ ᠳᠡᠶᠢᠯᠬᠦ ᠦᠭᠡᠢ ᠠᠯᠳᠠᠭᠠᠳ ᠶᠠᠪᠤᠭᠤᠯᠴᠢᠬᠠᠳᠠᠭ᠃ ᠢᠩᠬᠢᠭᠡᠳ ᠦᠷᠭᠦᠯᠵᠢ ᠪᠠᠭᠰᠢ ᠠᠬᠠᠮᠠᠳ ᠢᠶᠠᠨ ᠵᠣᠪᠠᠭᠠᠳᠠᠭ᠃ ᠬᠡᠵᠢᠶ᠎ᠡ ᠬᠣᠶᠢᠨ᠎ᠠ ᠬᠡᠷᠡᠭ ᠤᠴᠢᠷ ᠢ ᠭᠦᠢᠴᠡᠳ ᠣᠶᠢᠯᠠᠭᠠᠵᠤ ᠢᠷᠡᠬᠦ ᠪᠡᠷ︽ ᠭᠡᠮ ᠨᠢ ᠡᠮᠦᠨ᠎ᠡ ᠪᠡᠨ ᠭᠡᠮᠰᠢᠯ ᠨᠢ ᠬᠣᠶᠢᠨ᠎ᠡ ᠪᠠᠨ︾ ᠪᠣᠯᠳᠠᠭ᠃
      ᠵᠢᠷᠭᠤᠭ᠎ᠠ
 ᠰᠤᠷᠤᠭᠴᠢ ᠪᠣᠯᠤᠭᠰᠠᠳ ᠪᠠᠭᠰᠢ ᠨᠠᠷ ᠢᠶᠡᠨ ᠬᠡᠵᠢᠶ᠎ᠡ ᠡᠴᠡ ᠡᠬᠢᠯᠡᠵᠦ ᠬᠡᠲᠦ ᠢᠯᠡᠭᠦᠦ ᠣᠶᠢᠯᠠᠭᠠᠳᠠᠭ ᠪᠣᠢ  
 ᠬᠡᠯᠡᠯᠭᠡᠨ ᠦᠭᠡᠢ ᠨᠡᠶᠢᠭᠡᠮ ᠳ᠋ᠦ ᠭᠠᠷᠤᠭᠠᠳ ᠬᠠᠶᠠᠭ᠎ᠠ ᠮᠥᠷᠭᠥᠵᠦ ᠬᠠᠳᠠᠭᠠᠰᠤ ᠬᠠᠷᠭᠤᠬᠤ ᠮᠥᠴᠡ ᠳ᠋ᠦ᠂ ᠮᠡᠳᠡᠯᠭᠡ ᠮᠡᠬᠦᠰᠳᠡᠨ ᠴᠢᠳᠠᠪᠤᠷᠢ ᠲᠣᠯᠢᠮᠠᠭᠳᠠᠭᠠᠳ ᠪᠤᠰᠤᠳ ᠤᠨ ᠳᠣᠣᠷᠠᠰᠢᠶᠠᠯ ᠳ᠋ᠦ ᠤᠴᠠᠷᠠᠭᠰᠠᠨ ᠴᠠᠭ  ᠂ ᠦᠨᠡᠨ ᠰᠡᠳᠬᠢᠯ ᠤᠨ ᠰᠢᠭᠦᠮᠵᠢ ᠰᠤᠷᠭᠠᠮᠵᠢ ᠣᠯᠵᠤ ᠬᠦᠷᠲᠡᠬᠦ ᠦᠭᠡᠢ ᠦᠶ᠎ᠡ ᠳ᠋ᠦ ᠪᠠᠭᠰᠢ ᠨᠠᠷ ᠢᠶᠡᠨ ᠬᠡᠨ ᠡᠴᠡ ᠢᠯᠡᠭᠦᠦ ᠣᠶᠢᠯᠠᠭᠠᠵᠤ᠂ ᠬᠦᠨᠳᠦᠳᠬᠡᠬᠦ ᠰᠡᠳᠬᠢᠯ ᠲᠥᠷᠥᠭᠳᠡᠬᠦ ᠪᠣᠯᠣᠨ᠎ᠠ᠃
ᠬᠦᠮᠦᠰ ᠪᠠᠭᠰᠢ ᠨᠠᠷ ᠢᠶᠡᠨ ᠬᠡᠵᠢᠶ᠎ᠡ ᠡᠴᠡ ᠡᠬᠢᠯᠡᠵᠦ ᠬᠡᠲᠦ ᠢᠯᠡᠭᠦᠦ ᠬᠦᠨᠳᠦᠳᠬᠡᠨ ᠪᠢᠰᠢᠷᠡᠳᠡᠭ ᠪᠣᠢ ᠥᠰᠴᠦ ᠲᠣᠮᠣᠭᠠᠵᠢᠭᠰᠠᠨ ᠬᠣᠶᠢᠨ᠎ᠠ ᠪᠤᠶᠤ ᠦᠷ᠎ᠡ ᠲᠠᠢ ᠬᠡᠤᠭᠡᠳ ᠲᠠᠢ ᠪᠣᠯᠣᠭᠠᠳ ᠦᠷ᠎ᠡ ᠬᠡᠤᠬᠡᠳ  ᠲᠤ  ᠪᠡᠨ ᠬᠥᠮᠥᠵᠢᠯ ᠬᠦᠷᠲᠡᠭᠡᠬᠦ ᠦᠶᠡᠰ ᠡᠰᠡᠬᠦᠯ᠎ᠡ ᠦᠪᠡᠷᠳᠡᠭᠡᠨ ᠬᠥᠮᠥᠵᠢᠯ ᠤᠨ ᠲᠠᠶᠢᠰᠠᠨ ᠳ᠋ᠦ ᠵᠣᠭᠰᠣᠭᠰᠠᠨ ᠴᠠᠭ ᠲᠦ ᠪᠠᠭᠰᠢ ᠳ᠋ᠦ ᠪᠡᠨ ᠳᠤᠷ᠎ᠠ ᠦᠭᠡᠢᠢᠴᠡᠵᠦ᠂ ᠭᠣᠮᠣᠳᠠᠵᠤ ᠬᠢᠯᠢᠩᠨᠡᠵᠦ᠂ ᠵᠠᠨᠤᠵᠤ ᠬᠣᠷᠤᠰᠴᠦ ᠪᠠᠶᠢᠭᠰᠠᠨ ᠪᠥᠬᠥᠨ ᠢᠶᠡᠨ ᠪᠤᠷᠤᠭᠤ  ᠶᠢ ᠮᠡᠳᠡᠵᠦ᠂ ᠬᠠᠶᠢᠷ᠎ᠠ ᠬᠠᠷᠢᠭᠤᠴᠠᠯᠭ᠎ᠠ ᠶᠠᠭᠤ ᠪᠣᠯᠬᠤ ᠶᠢ ᠬᠠᠮᠤᠭ ᠡᠴᠡ ᠢᠯᠡᠭᠦᠦ ᠣᠶᠢᠯᠠᠭᠠᠵᠤ ᠤᠴᠢᠷᠯᠠᠳᠠᠭ᠃
 ᠪᠢ ᠪᠠᠭᠰᠢ ᠬᠦᠮᠦᠨ ᠪᠣᠯᠬᠣᠷ ᠪᠠᠭᠰᠢ ᠨᠠᠷ ᠢᠶᠡᠨ ᠬᠠᠮᠤᠭ ᠡᠴᠡ ᠢᠯᠡᠭᠦᠦ ᠣᠶᠢᠯᠠᠭᠠᠨ᠎ᠠ᠃ ᠪᠠᠭᠰᠢ ᠨᠠᠷ ᠮᠠᠨᠢ ᠬᠡᠨ ᠤ ᠲᠥᠯᠥᠭᠡ ᠶᠠᠭᠤᠨ ᠤ ᠤᠴᠢᠷ ᠲᠦ ᠬᠦᠴᠦ ᠪᠡᠨ ᠡᠷᠭᠦᠵᠦ ᠨᠠᠰᠤ ᠪᠡᠨ ᠦᠷᠡᠳᠡᠭ ᠢ ᠪᠢ ᠬᠡᠨ ᠡᠴᠡ ᠴᠤ ᠢᠯᠡᠭᠦᠦ ᠮᠡᠳᠡᠨ᠎ᠡ᠃ ᠬᠠᠶᠢᠷ᠎ᠠ ᠬᠠᠷᠢᠭᠤᠴᠠᠯᠭ᠎ᠠ ᠬᠦᠨᠳᠠᠵᠦ ᠪᠣᠯᠣᠰᠢ ᠦᠭᠡᠢ ᠳᠠᠷᠬᠠᠨ ᠲᠢᠲᠢᠮ  ᠢᠶᠡᠨ ᠬᠥᠰᠡᠷ ᠣᠶᠢᠴᠢᠭᠤᠯᠤᠯ ᠦᠭᠡᠢ ᠡᠷᠭᠦᠬᠡᠳ ᠤᠷᠤᠭᠰᠢᠯᠠᠭᠠᠳ ᠪᠠᠶᠢᠳᠠᠭ ᠢ ᠨᠢ ᠪᠢ ᠮᠡᠳᠡᠨ᠎ᠡ᠃ ᠭᠣᠮᠣᠳᠠᠯ ᠨᠡᠭᠡᠭᠡᠳᠡᠭ ᠰᠣᠷᠣᠭᠴᠢ ᠳ᠋ᠦ ᠪᠡᠨ︽ ᠴᠢ ᠮᠦᠨᠴᠦ ᠥᠰᠴᠦ ᠭᠦᠢᠴᠡᠭᠡ ᠦᠭᠡᠢ ᠪᠠᠶᠢᠭᠰᠠᠭᠠᠷ︾ ᠭᠡᠵᠦ ᠰᠠᠨᠠᠭᠤᠯᠤᠭᠠᠳ ᠢᠨᠢᠶᠡᠭᠡᠳ ᠶᠠᠪᠤᠳᠠᠭ ᠢ ᠨᠢ ᠪᠢ ᠪᠠᠰᠠ ᠮᠡᠳᠡᠨ᠎ᠡ᠃ ᠢᠨᠢᠶᠡᠳᠦᠨ ᠳ᠋ᠦ ᠨᠢ ᠡᠨᠡᠷᠢᠩᠭᠦᠢ ᠪᠤᠷᠬᠠᠨ ᠤ ᠳᠦᠷᠢ ᠲᠣᠳᠣᠷᠠᠭᠠᠳ ᠪᠠᠶᠢᠳᠠᠭ ᠢ ᠪᠢ ᠨᠡᠩ ᠮᠡᠳᠡᠨ᠎ᠡ᠃
 ᠲᠡᠳᠡ ᠦᠨᠡᠨ ᠬᠦ ᠠᠭᠤᠳᠠᠮᠴᠢ ᠡᠷᠬᠢᠮᠰᠦᠭ ᠤᠯᠤᠰ᠂ ᠲᠡᠭᠷᠢ ᠶᠢᠨ ᠳᠣᠣᠷ᠎ᠠ ᠨᠠᠷᠠ ᠰᠢᠭ᠋ ᠬᠡᠷᠡᠯᠳᠦᠭᠡᠳ ᠵᠢᠷᠭᠠᠨ ᠵᠢᠷᠭᠠᠲᠠᠯ᠎ᠠ ᠠᠴᠢ ᠬᠦᠷᠲᠡᠭᠡᠯ ᠢᠶᠡᠨ ᠦᠷ᠎ᠡ ᠬᠣᠶᠢᠴᠢᠰ ᠲᠦ ᠪᠡᠨ ᠳᠠᠭᠤ ᠦᠭᠡᠢ ᠡᠷᠭᠦᠬᠡᠳ ᠰᠢᠩᠭᠡᠳᠡᠭ ᠤᠯᠤᠰ᠃ ᠲᠡᠶᠢᠮᠦ ᠪᠣᠯᠬᠣᠷ ᠲᠡᠳᠡᠨ ᠳ᠋ᠦ ᠪᠡᠨ ᠭᠣᠮᠣᠳᠠᠵᠤ ᠤᠴᠠᠭᠠᠷᠯᠠᠬᠤ ᠡᠷᠬᠡ ᠰᠣᠷᠣᠭᠴᠢ ᠬᠥᠮᠥᠨ ᠳ᠋ᠦ ᠠᠯᠠᠭ᠎ᠠ᠃
 ᠣᠶᠢᠯᠠᠭᠠᠬᠤ ᠶᠢᠨ ᠬᠠᠷᠠᠭ᠎ᠠ ᠪᠠᠷ ᠰᠤᠷᠤᠭᠴᠢ ᠬᠦᠮᠦᠨ ᠦ ᠳᠣᠲᠤᠭᠠᠲᠤ ᠰᠡᠳᠭᠢᠯ ᠠᠷᠢᠭᠤᠰᠳᠠᠭ᠂ ᠣᠶᠢᠯᠠᠭᠠᠭᠳᠠᠬᠤ ᠶᠢᠨ ᠡᠷᠬᠡ ᠪᠡᠷ ᠪᠠᠭᠰᠢ ᠬᠦᠮᠦᠨ ᠦ ᠰᠣᠳᠤᠨ ᠴᠢᠨᠠᠷ ᠭᠢᠯᠪᠠᠳᠠᠭ᠃
 ᠪᠠᠭᠰᠢ ᠶᠢᠨ ᠪᠠᠶᠠᠷ ᠪᠣᠯᠵᠤ ᠪᠠᠶᠢᠭ᠎ᠠ ᠡᠨᠡ ᠬᠦ ᠲᠠᠰᠢᠷᠠᠮ ᠢᠶᠡᠷ ᠬᠠᠷᠢᠯᠴᠢᠨ ᠣᠶᠢᠯᠠᠭᠠᠯᠴᠠᠬᠤ ᠶᠢᠨ ᠴᠢᠬᠤᠯᠠ ᠬᠠᠷᠠᠭᠠᠰᠤ ᠠᠴᠠ ᠨᠠᠳᠠ ᠪᠠᠭᠰᠢᠯᠠᠭᠰᠠᠨ ᠪᠠᠭᠰᠢ ᠪᠥᠬᠥᠨ ᠳ᠋ᠦ  ᠪᠡᠨ ᠲᠡᠷᠡᠴᠢᠯᠡᠨ ᠨᠡᠳᠠ ᠪᠠᠭᠰᠢᠯᠠᠭᠰᠠᠨ ᠦᠭᠡᠢ ᠴᠤ ᠪᠠᠭᠰᠢ ᠶᠢᠨ ᠠᠯᠪᠠ ᠡᠭᠦᠷᠭᠡ ᠭᠦᠢᠴᠡᠳᠬᠡᠵᠦ ᠪᠠᠶᠢᠭ᠎ᠠ ᠪᠥᠬᠥ ᠪᠠᠭᠰᠢ ᠨᠠᠷ ᠲᠦ  ᠪᠡᠨ ᠪᠠᠶᠠᠷ ᠤᠨ ᠡᠳᠦᠷ ᠤᠨ ᠬᠠᠯᠠᠭᠤᠨ ᠮᠡᠨᠳᠤᠴᠢᠯᠡᠯ ᠳᠡᠪᠰᠢᠭᠦᠯᠵᠦ ᠪᠠᠶᠢᠨᠠᠮ 