ᠭᠡᠰᠡᠷ ᠤᠨ ᠲᠤᠭᠤᠵᠢ 1.15
ᠵᠤᠷ᠂ ᠢᠷ ᠲᠣᠩᠭᠣᠷᠠᠭ ᠮᠠᠩᠭᠤᠰ ᠢ ᠠᠯᠠᠪᠠ
ᠲᠡᠷᠡ ᠴᠠᠭ ᠲᠤ ᠢᠷ ᠲᠣᠩᠭᠣᠷᠠᠭ ᠨᠡᠷᠡᠲᠦ ᠮᠠᠩᠭᠤᠰ ᠲᠩᠷᠢ ᠳᠦ ᠳᠡᠪᠰᠢᠭᠦᠯᠵᠦ (ᠲᠤᠯᠭᠠᠵᠤ) ᠪᠠᠷᠢᠭᠰᠠᠨ ᠬᠦᠷᠮᠡ ᠨᠡᠷᠡᠲᠦ ᠰᠤᠪᠤᠷᠭᠠᠨ ᠤ ᠣᠷᠭᠢᠯ ᠳᠡᠭᠡᠷᠡ ᠭᠠᠷᠴᠤ ᠰᠠᠭᠤᠬᠤ ᠠᠵᠡᠢ ᠃ ᠦᠷᠯᠦᠭᠡᠨ ᠋ᠨᠤ ᠨᠠᠷᠠ ᠵᠢ ᠦᠷᠦᠨᠡ ᠵᠦᠭ ᠋ᠤᠨ ᠬᠦᠮᠦᠨ ᠋ᠳᠦ ᠦᠯᠦ ᠦᠵᠡᠭᠦᠯᠵᠦ᠂ ᠦᠳᠡ ᠵᠢᠨ ᠨᠠᠷᠠ ᠵᠢ ᠳᠣᠷᠣᠨᠠ ᠋ᠳᠠᠬᠢ ᠬᠦᠮᠦᠨ ᠋ᠳᠦ ᠦᠯᠦ ᠦᠵᠡᠭᠦᠯᠵᠦ᠂ ᠬᠦᠮᠦᠨ ᠢ ᠬᠣᠨᠣᠭ ᠤᠨ ᠭᠠᠵᠠᠷ ᠠᠴᠠ ᠬᠠᠷᠠᠵᠤ ᠦᠵᠡᠭᠡᠳ ᠦᠳᠡ ᠶᠢᠨ ᠭᠠᠵᠠᠷ ᠠᠴᠠ ᠦᠷᠦᠪᠬᠦᠶᠢᠭᠡᠳ ᠵᠠᠯᠭᠢᠬᠤ ᠶᠢ ᠵᠤᠷ ᠮᠡᠳᠡᠵᠦ ᠴᠢᠪᠢᠯᠲᠦ ᠬᠠᠯᠲᠠᠷ ᠲᠠᠷᠪᠠᠭᠠ ᠶᠢ ᠤᠬᠠᠵᠤ ᠲᠠᠷᠪᠠᠭᠠᠴᠢᠯᠠᠬᠤ ᠬᠦᠮᠦᠨ ᠪᠣᠯᠤᠨ ᠬᠤᠪᠢᠯᠵᠤ ᠬᠦᠷᠪᠡ᠃ ᠰᠤᠪᠤᠷᠭᠠᠨ ᠤ ᠢᠷᠤᠭᠠᠷ ᠢᠶᠠᠷ ᠨᠦᠬᠡ ᠤᠬᠤᠭᠴᠢ ᠬᠦᠮᠦᠨ ᠪᠣᠯᠤᠨ ᠤᠬᠠᠵᠤ ᠬᠡᠪᠲᠡᠪᠡ᠃ ᠮᠠᠩᠭᠤᠰ ᠳᠠᠭᠤᠳᠠᠵᠤ ᠠᠰᠠᠭᠤᠪᠠ᠄ «ᠴᠢ ᠶᠠᠭᠤᠨ ᠬᠦᠮᠦᠨ ᠪᠤᠢ?» «ᠠᠢ ᠬᠠᠶᠢᠷᠬᠠᠨ ᠴᠢᠮᠠ ᠳᠤ ᠬᠠᠯᠠᠳᠠᠬᠤ ᠶᠣᠰᠣᠨ ᠦᠭᠡᠢ᠃ ᠪᠢ ᠦᠭᠡᠢᠳᠡᠢ ᠶᠠᠳᠠᠩᠭᠢ ᠬᠦᠮᠦᠨ᠂ ᠲᠠᠷᠪᠠᠭᠠᠴᠢᠯᠠᠵᠤ᠂ ᠲᠠᠷᠪᠠᠭᠠ ᠠᠯᠠᠵᠤ ᠶᠠᠪᠤᠨᠠ᠃ ᠡᠨᠡ ᠨᠦᠬᠡᠨ ᠳᠦ ᠲᠠᠷᠪᠠᠭᠠ ᠣᠷᠣᠵᠤ᠂ ᠲᠠᠷᠪᠠᠭᠠ ᠤᠬᠠᠵᠤ ᠬᠡᠪᠲᠡᠨᠡᠮ ᠪᠢ» ᠭᠡᠪᠡ᠃ ᠮᠠᠩᠭᠤᠰ ᠳᠤᠭᠤᠢ ᠰᠠᠭᠤᠪᠠ᠃ ᠰᠤᠪᠤᠷᠭᠠᠨ ᠤ ᠨᠠᠭᠠᠳᠤ ᠢᠷᠤᠭᠠᠷ ᠠᠴᠠ ᠲᠡᠷᠲᠡᠭᠡᠬᠢ ᠢᠷᠤᠭᠠᠷ ᠢ ᠬᠦᠨᠳᠡᠶᠢᠯᠡᠵᠦ ᠤᠬᠤᠭᠠᠳ ᠰᠤᠪᠤᠷᠭᠠ ᠶᠢ ᠲᠦᠯᠬᠡᠵᠦ ᠤᠷᠬᠢᠪᠠ᠃ ᠰᠤᠪᠤᠷᠭᠠ ᠤᠨᠠᠵᠤ ᠳᠦᠷᠪᠡ ᠲᠠᠪᠤᠨ ᠠᠩᠭᠢ ᠪᠣᠯᠪᠠ᠃ ᠮᠠᠩᠭᠤᠰ ᠰᠤᠪᠤᠷᠭᠠᠨ ᠤ ᠦᠵᠦᠭᠦᠷ ᠳᠡᠭᠡᠷᠡ ᠡᠴᠡ ᠨᠢ ᠤᠨᠠᠵᠤ ᠪᠢᠴᠠᠷᠠᠵᠤ ᠦᠬᠦᠪᠡ᠃ ᠵᠤᠷ ᠲᠡᠭᠦᠨ ᠢ ᠠᠯᠠᠭᠠᠳ ᠬᠠᠷᠢᠵᠤ ᠢᠷᠡᠪᠡ᠃
ᠬᠡᠯᠲᠡᠭᠡᠢ ᠬᠠᠷᠠ ᠴᠠᠴᠢᠷ ᠢᠶᠠᠨ ᠠᠴᠢᠶᠠᠯᠠᠭᠠᠳ ᠡᠬᠡ ᠲᠡᠢ ᠪᠡᠨ ᠶᠠᠪᠤᠪᠠ᠃ ᠶᠡᠬᠡ ᠤᠯᠤᠰ ᠲᠤ ᠪᠠᠨ ᠬᠦᠷᠦᠪᠡ᠃ ᠴᠠᠲᠠᠨ ᠨᠣᠶᠠᠨ ᠦᠵᠡᠭᠡᠳ «ᠡᠪᠡᠢ» ᠭᠡᠪᠡ᠃ ᠵᠤᠷ «ᠶᠠᠭᠤ ᠪᠤᠢ?» ᠭᠡᠪᠡ᠃ «ᠴᠢᠮᠠᠢ ᠴᠠᠰᠤ ᠳᠣᠯᠣᠭᠠᠨ ᠠᠯᠪᠢᠨ ᠪᠠᠷᠢᠵᠤ ᠢᠳᠡᠪᠡ ᠭᠡᠵᠦ ᠬᠡᠯᠡᠪᠡ᠃ ᠴᠠᠰᠤ ᠳᠣᠯᠣᠭᠠᠨ ᠠᠯᠪᠢᠨ ᠢ ᠠᠯᠠᠭᠠᠳ ᠠᠭᠲᠠ ᠶᠢ ᠠᠪᠴᠤ ᠢᠷᠡᠪᠡ ᠭᠡᠵᠦ ᠬᠡᠯᠡᠪᠡ ᠨᠠᠳᠠ» ᠭᠡᠪᠡ᠃ «ᠣᠳᠣ ᠴᠠᠰᠤ ᠪᠢᠳᠡ ᠬᠣᠶᠠᠷ ᠢ ᠶᠠᠭᠠᠬᠢᠶᠠ ᠭᠡᠨᠡᠮ ᠴᠢ ᠣᠳᠣ?» ᠭᠡᠪᠡ᠃ ᠴᠠᠲᠠᠨ ᠨᠣᠶᠠᠨ᠄ «ᠡᠬᠡ ᠨᠢ ᠶᠠᠭᠠᠬᠢ ᠭᠡᠪᠡᠯ ᠪᠢ ᠲᠡᠭᠡᠨᠡ» ᠭᠡᠪᠡ᠃ «ᠡᠴᠢᠭᠡ ᠡᠬᠡ ᠳᠦ ᠪᠡᠨ ᠴᠠᠰᠤ ᠨᠠᠮᠠᠢ ᠶᠠᠭᠤ ᠭᠡᠵᠦ ᠭᠦᠵᠢᠷ ᠬᠡᠯᠡᠪᠡ?» ᠭᠡᠳ ᠶᠠᠪᠤᠪᠠ᠃
