-
44439
ᠪᠠᠷᠠᠭᠠᠨ ᠰᠡᠭᠦᠳᠡᠷ
2018-03-03 15:56
388
0
ᠦᠷᠬᠦᠯᠵᠢᠯᠡᠯ
v
ᠲᠡᠷᠡ ᠡᠳᠦᠷ ᠰᠢᠨᠵᠢᠯᠲᠦ ᠡᠨᠡᠭᠦᠷ ᠬᠤᠯᠬᠢᠵᠤ ᠯᠠ ᠪᠠᠶᠢᠭᠰᠠᠨ᠂ ᠲᠡᠷᠡ ᠦᠢᠯᠡᠳᠦᠭᠰᠡᠨ ᠴᠤ ᠮᠠᠭᠠᠳ ᠦᠭᠡᠢ ᠶᠠ᠃ ᠴᠤᠭᠯᠠᠷᠠᠭᠰᠠᠨ ᠬᠥᠮᠥᠰ ᠥᠪᠡᠷ ᠥᠪᠡᠷ ᠦᠨ ᠦᠵᠡᠵᠦ ᠰᠣᠨᠣᠰᠣᠭᠰᠠᠨ᠂ ᠪᠣᠳᠣᠵᠣ ᠲᠠᠭᠠᠮᠠᠭᠯᠠᠭᠰᠠᠨ ᠢᠶᠠᠨ ᠶᠠᠷᠢᠵᠠᠭᠠᠨᠠ᠃ ᠭᠠᠭᠴᠠ ᠬᠦ ᠰᠠᠶᠢᠵᠢᠷᠠᠬᠤ ᠬᠦᠦ ᠯᠡ ᠬᠥᠭᠡᠷᠦᠬᠦᠢ︕ ᠢᠷᠡᠭᠰᠡᠨ ᠤᠯᠠᠨ ᠳᠤ ᠴᠠᠢ ᠠᠶᠠᠭᠠᠯᠠᠬᠤ᠂ ᠡᠵᠢ ᠶᠢᠨ ᠢᠶᠡᠨ ᠤᠤᠭᠤᠬᠤ ᠡᠮ ᠢ ᠴᠢᠨᠠᠵᠤ ᠣᠶᠢᠷᠠᠲᠤᠭᠤᠯᠬᠤ ᠭᠡᠳ ᠯᠡ ᠶᠠᠭᠠᠷᠠᠤ᠃
ᠠᠢ᠂ ᠨᠢᠳᠦᠨᠦᠨ ᠦ ᠲᠡᠷᠡ ᠦᠭᠭᠦᠭᠰᠡᠨ ᠭᠡᠵᠦ ᠲᠡᠶᠢᠮᠦ ᠯᠠ ᠨᠢᠭᠡ ᠬᠡᠷᠡᠭ ᠡ︕ ᠭᠡᠵᠦ ᠬᠡᠨ ᠨᠢᠭᠡ ᠨᠢ ᠬᠡᠯᠡᠬᠦ ᠳᠦ ᠪᠦᠭᠦᠳᠡᠭᠡᠷ ᠢᠶᠡᠨ ᠰᠡᠭᠦᠷᠡᠰᠦᠯᠡᠪᠡ᠃
ᠨᠢᠳᠤᠨᠤᠨ ᠤ ᠶᠠᠯᠠᠲᠤ ᠡᠲᠡᠭᠡᠳ ᠲᠦ ᠴᠣᠬᠢᠯᠲᠠ ᠥᠭᠬᠦ ᠬᠦᠳᠡᠯᠭᠡᠭᠡᠨ ᠳᠦ ᠭᠠᠬᠠᠢ ᠲᠠᠬᠢᠶᠠ ᠬᠤᠯᠠᠭᠠᠶᠢᠯᠠᠭᠰᠠᠨ᠂ ᠬᠡᠷᠡᠭᠦᠯ ᠵᠣᠳᠣᠭᠠᠨ ᠬᠢᠭᠰᠡᠨ ᠭᠡᠬᠦ ᠮᠡᠲᠦ ᠶᠢᠨ ᠵᠢᠵᠢᠭ ᠰᠡᠵᠢᠭ ᠬᠡᠷᠡᠭ ᠲᠦ ᠬᠣᠯᠪᠣᠭᠳᠠᠭᠰᠠᠳ ᠢ ᠬᠠᠶᠢᠯᠠᠰᠤᠲᠠᠢ ᠶᠢᠨ ᠠᠶᠢᠯ ᠠᠴᠠ ᠲᠠᠪᠢ ᠭᠠᠷᠤᠢ ᠪᠠᠷᠢᠪᠴᠢᠯᠠᠭᠰᠠᠨ ᠪᠣᠯᠪᠠᠴᠤ ᠪᠦᠷ ᠯᠡ ᠲᠣᠷᠭᠠᠭᠤᠯᠢ ᠶᠢᠨ ᠵᠣᠭᠣᠰ ᠲᠤᠰᠢᠶᠠᠭᠠᠳ ᠬᠠᠮᠢᠶᠠ ᠦᠭᠡᠢ ᠰᠤᠯᠠᠯᠠᠭᠳᠠᠭᠰᠠᠨ ᠪᠢᠯᠡ᠃ ᠭᠡᠪᠡᠴᠦ ᠳᠤᠯᠤᠨᠵᠢᠩ᠂ ᠰᠧᠷᠡᠩ᠂ ᠪᠣᠯᠣᠳ᠂ ᠰᠢᠨᠵᠢᠯᠲᠤ ᠵᠡᠷᠭᠡ ᠤᠯᠠᠨ ᠢᠶᠠᠷ ᠢᠶᠠᠨ ᠮᠡᠳᠡᠳᠡᠭ ᠳᠦᠷᠪᠡᠨ ᠨᠡᠷᠡᠲᠦ ᠬᠤᠯᠠᠭᠠᠶᠢᠴᠢ ᠶᠢᠨ ᠨᠢᠭᠡ ᠨᠢ ᠴᠤ ᠪᠠᠷᠢᠭᠳᠠᠭᠰᠠᠨ ᠦᠭᠡᠢ ᠪᠢᠯᠡ᠃
ᠳᠣᠯᠣᠨᠵᠢᠩ ᠤᠨ ᠰᠢᠷᠠ ᠪᠦᠰᠡᠭᠦᠢ ᠴᠢᠨᠢ ᠲᠣᠮᠢᠯᠠᠭᠰᠠᠨ ᠰᠠᠯᠪᠤᠷᠢ ᠶᠢᠨ ᠢᠯᠠᠯᠲᠠ ᠳᠠᠷᠤᠭᠠ ᠲᠠᠢ ᠠᠶᠢᠯ ᠤᠨ ᠮᠥᠷᠳᠡᠭᠡᠨ ᠰᠠᠲᠤᠨ ᠨᠢ ᠪᠣᠯᠳᠠᠭ ᠭᠡᠵᠦ ᠶᠠᠷᠢᠵᠤ ᠪᠠᠶᠢᠭᠰᠠᠨ᠂ ᠢᠩᠭᠢᠭᠡᠳ ᠯᠡ ᠳᠤᠯᠤᠨᠵᠢᠩ ᠢ ᠪᠠᠷᠢᠭᠰᠠᠨ ᠦᠭᠡᠢ ᠪᠠᠶᠢᠬᠠ︕ ᠭᠡᠵᠦ ᠨᠢᠭᠡ ᠨᠢ ᠦᠭᠡ ᠦᠳᠡᠭᠡᠬᠦ ᠳᠦ᠄
ᠡᠴᠢᠭᠡ ᠶᠢᠨ ᠬᠢᠨᠢ ᠲᠣᠯᠣᠭᠠᠢ ᠭᠡᠨᠡ᠂ ᠠᠯᠢ ᠶᠢᠰᠦᠨ ᠲᠦᠷᠦᠯ ᠦᠨ ᠬᠢᠨᠢ ᠰᠠᠲᠤᠨ ᠨᠢ ᠪᠣᠢ︕ ᠢᠯᠠᠯᠲᠠ ᠳᠠᠷᠤᠭᠠ ᠴᠢᠨᠢ ᠳᠣᠯᠣᠨᠵᠢᠩ ᠤᠨ ᠰᠢᠷᠠ ᠪᠦᠰᠡᠭᠦᠢ ᠲᠠᠢ ᠵᠠᠭᠤᠷᠠᠯᠳᠤᠭᠠᠳ ᠰᠠᠯᠳᠠᠭ ᠦᠭᠡᠢ ᠠᠮᠢᠲᠠᠨ᠂ ᠬᠠᠷᠠ ᠡᠳᠦᠷ ᠢᠶᠡᠷ ᠡᠬᠡ ᠡᠴᠡ ᠪᠡᠨ ᠲᠦᠷᠦᠭᠰᠡᠨ ᠨᠢᠴᠦᠭᠦᠨ ᠪᠡᠶᠡ ᠪᠡᠷ ᠢᠶᠡᠨ ᠳᠣᠯᠣᠨᠵᠢᠩ ᠳᠤ ᠬᠡᠳᠦ ᠤᠳᠠᠭᠠ ᠪᠠᠷᠢᠭᠳᠠᠴᠢᠬᠠᠭᠠᠳ ᠶᠠᠮᠠᠷ ᠨᠢᠭᠣᠷ ᠢᠶᠠᠷ ᠳᠣᠯᠣᠨᠵᠢᠩ ᠢ ᠪᠠᠷᠢᠬᠤ ᠶᠤᠮ ᠭᠡᠵᠦ ᠪᠠᠰᠠ ᠨᠢᠭᠡ ᠨᠢ ᠠᠭᠤᠷᠲᠠᠢ ᠶᠠᠷᠢᠨᠠ᠃
ᠬᠦᠢ᠂ ᠬᠦᠮᠦᠨ ᠦ ᠡᠬᠡᠨᠡᠷ ᠲᠠᠢ ᠨᠡᠶᠢᠯᠡᠵᠦ ᠡᠷᠡ ᠳᠦ ᠨᠢ ᠪᠠᠷᠢᠭᠳᠠᠴᠢᠬᠠᠭᠠᠳ ᠪᠠᠰᠠ᠄ ︽ ᠳᠣᠯᠣᠨᠵᠢᠩ ᠴᠢ ᠮᠠᠭᠤ ᠵᠣᠯᠢᠭ᠂ ᠴᠢᠨᠦ ᠶᠠᠭᠤ ᠶᠠᠭᠠᠬᠢᠵᠤ ᠶᠠᠪᠤᠳᠠᠭ ᠢ ᠪᠢ ᠶᠠᠮᠠᠷ ᠮᠡᠳᠡᠬᠦ ᠦᠭᠡᠢ ᠤᠤ︕ ᠡᠨᠡ ᠡᠴᠢᠭᠡ ᠪᠡᠨ ᠠᠭᠤᠷᠯᠠᠭᠤᠯᠪᠠᠯ ᠪᠠᠷᠢᠵᠤ ᠠᠪᠤᠭᠠᠳ ᠭᠢᠨᠳᠠᠨ ᠳᠤ ᠴᠢᠬᠢᠨᠡ ᠰᠢᠦ ᠴᠢᠮᠠᠶᠢ ︾ ᠭᠡᠵᠦ ᠵᠠᠩᠨᠠᠭᠠᠳ ᠥᠮᠥᠳᠦ ᠪᠡᠨ ᠲᠠᠲᠠᠭᠰᠠᠭᠠᠷ ᠮᠠᠰᠢᠨ ᠳᠤ ᠪᠠᠨ ᠭᠠᠷᠤᠭᠰᠠᠨ ᠭᠡᠯᠡᠢ︕ ᠭᠡᠵᠦ ᠪᠠᠰᠠ ᠨᠢᠭᠡ ᠨᠢ ᠥᠨᠡᠷᠬᠡᠪᠡ᠃
ᠪᠢ ᠬᠡᠷᠪᠡ ᠳᠣᠯᠣᠨᠵᠢᠩ ᠪᠠᠶᠢᠭᠰᠠᠨ ᠪᠣᠯ ᠬᠡᠳᠦᠶᠢᠨᠡᠢ ᠲᠡᠷᠡ ᠮᠠᠭᠤ ᠡᠮᠡ ᠶᠢ ᠭᠡᠭᠡᠭᠡᠳ ᠦᠭᠴᠢᠬᠡᠨᠡ ᠭᠡᠵᠦ ᠨᠢᠭᠡ ᠨᠢ ᠡᠯᠭᠦᠬᠦ ᠳᠦ
ᠤᠷᠤᠭ ᠰᠠᠯᠤᠨᠠ ᠭᠡᠵᠦ ᠭᠡᠵᠦ ᠳᠣᠯᠤᠨᠵᠢᠩ ᠡᠬᠡᠨᠡᠷ ᠲᠠᠢ ᠪᠠᠨ ᠬᠡᠷᠡᠭᠦᠯ ᠬᠢᠭᠰᠡᠨ ᠳᠦ ᠪᠦᠰᠡᠭᠦᠢ ᠨᠢ᠄
ᠴᠢᠮᠠ ᠮᠠᠭᠤ ᠶᠢ ᠡᠵᠢ ᠴᠢᠨᠢ ᠨᠢᠭᠡ ᠲᠦᠷᠦᠭᠰᠡᠨ᠂ ᠬᠠᠷᠢᠨ ᠪᠢ ᠴᠢᠮᠠ ᠶᠢ ᠳᠦᠷᠪᠡ ᠲᠦᠷᠦᠵᠡᠢ ᠭᠡᠵᠦ ᠬᠡᠯᠡᠬᠦ ᠳᠦ ᠪᠣᠯᠤᠨᠠ ᠭᠡᠵᠦ ᠳᠥᠷᠪᠡ ᠤᠳᠠᠭᠠᠨ ᠤ ᠬᠤᠯᠠᠭᠠᠶᠢᠴᠢ ᠶᠢᠨ ᠬᠡᠷᠡᠭ ᠨᠢ ᠯᠡᠪᠡᠷᠡᠭᠰᠡᠨ ᠳᠦ ᠢᠯᠠᠯᠲᠠ ᠳᠠᠷᠤᠭᠠ ᠶᠢ ᠭᠤᠶᠤᠵᠤ ᠪᠠᠶᠢᠭᠠᠳ ᠭᠢᠨᠳᠠᠨ ᠳᠤ ᠴᠢᠬᠢᠭᠦᠯᠦᠭᠰᠡᠨ ᠦᠭᠡᠢ ᠭᠠᠪᠢᠶᠠ ᠪᠠᠨ ᠲᠣᠭᠠᠴᠢᠨ᠂ ᠶᠠᠷᠠ ᠶᠢ ᠨᠢ ᠮᠠᠯᠲᠠᠵᠤ ᠪᠠᠶᠢᠭᠠᠳ ᠳᠣᠯᠣᠨᠵᠢᠩ ᠢ ᠨᠣᠮᠣᠬᠠᠷᠠᠭᠤᠯᠵᠤ ᠠᠪᠤᠭᠰᠠᠨ ᠭᠡᠯᠡᠢ︕ ᠭᠡᠵᠦ ᠪᠠᠰᠠ ᠨᠢᠭᠡ ᠨᠢ ᠶᠠᠷᠢᠨᠠ᠃
ᠰᠧᠷᠡᠩ᠂ ᠪᠣᠯᠤᠳ ᠬᠣᠶᠠᠷ ᠶᠠᠭᠠᠬᠢᠭᠠᠳ ᠪᠠᠷᠢᠭᠳᠠᠭᠰᠠᠨ ᠦᠭᠡᠢ ᠪᠣᠢ︖
ᠰᠧᠷᠡᠩ ᠪᠣᠯᠣᠳ ᠬᠣᠶᠠᠷ ᠴᠢᠨᠢ ᠴᠢᠰᠤ ᠪᠠᠨ ᠤᠤᠭᠤᠭᠰᠠᠨ ᠠᠬᠠ ᠳᠡᠭᠦᠦ᠂ ᠲᠡᠭᠡᠭᠡᠳ ᠪᠠᠰᠠ ᠳᠤᠮᠳᠠᠲᠤ ᠰᠤᠷᠭᠠᠭᠤᠯᠢ ᠶᠢᠨ ᠬᠠᠮᠲᠦ ᠰᠤᠷᠤᠭᠴᠢ ᠨᠢ ᠶᠤᠮᠴᠢᠨᠢ ᠰᠧᠷᠡᠩ ᠢ ᠯᠠᠪ ᠪᠠᠷᠢᠬᠤ ᠦᠭᠡᠢ᠃
ᠰᠧᠷᠡᠩ ᠪᠠᠰᠠ ᠵᠠᠯᠢᠲᠠᠢ ᠡᠷᠡ ᠰᠢᠦ︕ ᠵᠢᠯ ᠴᠠᠭᠠᠨ ᠰᠠᠷᠠ ᠣᠶᠢᠷᠠᠲᠤᠭᠰᠠᠭᠠᠷ ᠯᠠ ᠢᠯᠠᠯᠲᠠ ᠳᠠᠷᠤᠭᠠ ᠳᠤ ᠬᠣᠨᠢ ᠦᠬᠡᠷ ᠦᠨ ᠮᠢᠬᠠ ᠶᠢ ᠣᠪᠣᠭᠠ ᠳᠣᠪᠣᠭᠠ ᠬᠦᠷᠭᠡᠳᠡᠭ ᠪᠦᠭᠡᠳ ᠬᠦᠦ ᠳᠦ ᠨᠢ ᠬᠣᠪᠴᠠᠰᠤᠨ ᠵᠣᠭᠣᠰ ᠭᠡᠵᠦ ᠮᠢᠩᠭᠠ ᠮᠢᠩᠭᠠ ᠪᠠᠷ ᠥᠭᠳᠡᠭ ᠭᠡᠨᠡ᠃
ᠪᠣᠯᠣᠳ ᠰᠢᠭ᠋ ᠰᠥᠰᠥ ᠲᠠᠢ ᠡᠷᠡ ᠥᠭᠡᠷᠡ ᠦᠭᠡᠢ᠃ ᠴᠠᠭᠳᠠᠭᠠ ᠬᠦᠷᠦᠭᠡᠳ ᠣᠴᠢᠬᠣ ᠳᠤ ᠨᠢ ᠪᠦᠷ ᠡᠨᠡ ᠮᠠᠭᠤ ᠬᠤᠷᠤᠭᠤ ᠶᠢᠨ ᠤᠷᠰᠢᠭ ᠭᠡᠵᠦ ᠰᠦᠬᠡ ᠠᠪᠴᠤ ᠭᠤᠷᠪᠠᠨ ᠬᠤᠷᠤᠭᠤ ᠪᠠᠨ ᠲᠠᠰᠤ ᠴᠠᠪᠴᠢᠴᠢᠬᠠᠭᠠᠳ ᠣᠶᠢᠰᠢᠶᠠᠬᠤ ᠴᠤ ᠦᠭᠡᠢ ᠪᠠᠷ ᠪᠢ ᠳᠠᠬᠢᠵᠤ ᠬᠤᠯᠠᠭᠠᠶᠢᠯᠠᠬᠤ ᠦᠭᠡᠢ ᠭᠡᠵᠦ ᠲᠠ ᠨᠠᠷ ᠤᠨ ᠡᠮᠦᠨᠡ ᠴᠢᠰᠤ ᠪᠠᠷ ᠢᠶᠠᠨ ᠲᠠᠩᠭᠠᠷᠢᠭᠯᠠᠭᠰᠠᠨ ᠰᠢᠦ ᠭᠡᠳ ᠢᠨᠢᠶᠡᠬᠦᠯᠡᠷ ᠨᠢ ᠴᠠᠭᠳᠠᠭᠠ ᠨᠠᠷ ᠢᠨᠢᠶᠡᠵᠦ ᠴᠤ ᠴᠢᠳᠠᠭᠰᠠᠨ ᠦᠭᠡᠢ ᠤᠬᠢᠯᠠᠵᠤ ᠴᠤ ᠴᠢᠳᠠᠭᠰᠠᠨ ᠦᠭᠡᠢ ᠪᠣᠷᠣ ᠮᠦᠷ ᠢᠶᠡᠷ ᠢᠶᠡᠨ ᠪᠤᠴᠠᠴᠢᠬᠠᠭᠰᠠᠨ ᠭᠡᠵᠦ ᠪᠠᠶᠢᠭᠰᠠᠨ᠃
ᠶᠠᠭ ᠡᠨᠡ ᠥᠶᠡ ᠳᠦ ᠴᠠᠭᠳᠠᠭᠠᠨ ᠰᠦᠯᠳᠡᠲᠦ ᠭᠥᠬᠡ ᠠᠯᠠᠭ ᠥᠩᠭᠡᠳᠡᠢ ᠬᠦᠩᠬᠡᠨ ᠮᠠᠰᠢᠨ ᠵᠣᠷᠢᠭᠲᠤ ᠶᠢᠨ ᠡᠭᠦᠳᠡᠨ ᠳᠦ ᠢᠷᠡᠭᠡᠳ ᠵᠣᠭᠰᠤᠪᠠ᠃ ᠴᠤᠭᠯᠠᠷᠠᠭᠰᠠᠨ ᠤᠯᠠᠨ ᠬᠡᠯᠡ ᠠᠮᠠᠨ ᠳᠤ ᠣᠷᠢᠶᠠᠭᠳᠠᠴᠢᠬᠠᠬᠤ ᠶᠠᠭᠤ ᠮᠠᠭᠠᠳ ᠭᠡᠵᠦ ᠲᠦᠷᠭᠡᠬᠡᠨ ᠭᠡᠭᠴᠢ ᠶᠠᠪᠤᠵᠤ ᠣᠳᠪᠠ᠃
ᠬᠥᠩᠭᠡᠨ ᠮᠠᠰᠢᠨ ᠤ ᠡᠭᠦᠳᠡ ᠨᠡᠭᠡᠭᠡᠭᠳᠡᠵᠦ ᠰᠤᠯᠠ ᠬᠣᠪᠴᠠᠰᠤᠲᠠᠢ ᠳᠦᠷᠪᠡᠨ ᠬᠥᠮᠥᠨ ᠪᠠᠭᠤᠵᠤ ᠢᠷᠡᠭᠰᠡᠨ ᠦ ᠨᠢᠭᠡ ᠨᠢ ᠵᠣᠷᠢᠭᠲᠤ ᠶᠢᠨ ᠳᠡᠭᠦᠦ ᠠᠭᠤᠯᠠ ᠲᠣᠪᠴᠢᠶᠠᠨ ᠳᠠᠷᠤᠭᠠ ᠪᠠᠶᠢᠪᠠ᠃ ᠲᠡᠷᠡ ᠥᠯᠥ ᠲᠠᠨᠢᠬᠤ ᠭᠤᠷᠪᠠᠨ ᠴᠠᠭᠳᠠᠭᠠ ᠪᠠᠨ ᠳᠠᠭᠠᠭᠤᠯᠵᠤ ᠭᠡᠷ ᠲᠤ ᠣᠷᠣᠭᠠᠳ ᠠᠬᠠ ᠪᠡᠷᠭᠡᠨ ᠳᠦ ᠪᠡᠨ ᠮᠡᠨᠳᠦᠴᠢᠯᠡᠪᠡ᠃ ᠵᠣᠷᠢᠭᠲᠤ ᠭᠤᠸᠠᠢ ᠳᠡᠭᠦᠦ ᠪᠡᠨ ᠬᠠᠷᠠᠭᠠᠳ ᠬᠠᠷᠢᠨ ᠬᠢᠯᠢᠰᠳᠡᠭᠰᠡᠨ ᠬᠡᠦᠬᠡᠳ ᠰᠢᠭ ᠡᠪᠬᠡᠷᠡᠲᠡᠯᠡ ᠪᠡᠨ ᠤᠬᠢᠯᠠᠪᠠ᠃
ᠴᠢ ᠶᠠᠭᠤᠨ ᠳᠤ ᠪᠠᠨ ᠲᠡᠭᠡᠵᠦ ᠤᠬᠢᠯᠠᠴᠢᠬᠠᠭᠰᠠᠨ ᠪᠣᠢ︖ ᠪᠡᠷᠭᠡᠨ ᠪᠠᠰᠠ ᠡᠪᠡᠳᠴᠢᠨ ᠬᠠᠭᠤᠴᠢᠨ ᠲᠠᠢ ᠪᠠᠶᠢᠬᠤ ᠳᠤ᠂ ᠬᠡᠳᠦᠨ ᠮᠠᠭᠤ ᠬᠣᠨᠢ ᠯᠠ ᠪᠢᠰᠢᠦ᠂ ᠪᠢ ᠣᠯᠣᠭᠠᠳ ᠥᠭᠭᠦᠶᠡ︕ ᠭᠡᠵᠦ ᠠᠭᠤᠯᠠ ᠲᠣᠪᠴᠢᠶᠠᠨ ᠳᠠᠷᠤᠭᠠ ᠠᠶᠤᠩᠭᠠ ᠶᠢᠨ ᠳᠠᠭᠤᠨ ᠢ ᠴᠤ ᠰᠣᠨᠣᠰᠬᠤ ᠦᠭᠡᠢ ᠠᠬᠠ ᠳᠤ ᠪᠠᠨ ᠰᠣᠨᠣᠰᠬᠠᠬᠤ ᠰᠠᠨᠠᠭᠠ ᠲᠠᠢ ᠳᠡᠭᠡᠷᠡ ᠳᠠᠭᠤᠨ ᠢᠶᠠᠷ ᠶᠠᠷᠢᠪᠠ᠃
ᠵᠠ ᠲᠠ ᠨᠠᠷ ᠰᠠᠶᠢᠨ ᠶᠠᠪᠤᠵᠤ ᠢᠷᠡᠯᠡ᠂ ᠳᠡᠭᠡᠭᠰᠢ ᠪᠡᠨ ᠰᠠᠭᠤ︕ ᠭᠡᠳ ᠰᠠᠶᠢᠵᠢᠷᠠᠬᠤ ᠬᠦᠦ ᠮᠡᠨᠳᠦᠴᠢᠯᠡᠭᠡᠳ᠂ ᠴᠠᠢ ᠤᠰᠤ᠂ ᠥᠷᠥᠮᠡ ᠬᠤᠷᠤᠳ ᠭᠡᠵᠦ ᠪᠠᠰᠠᠯᠠ ᠶᠠᠭᠠᠷᠠᠵᠤ ᠡᠬᠢᠯᠡᠪᠡ᠃
ᠬᠡᠵᠢᠶᠡ ᠭᠡᠭᠡᠭᠰᠡᠨ ᠪᠣᠢ︖ ᠬᠡᠳᠦᠢ ᠬᠣᠨᠢ ᠪᠣᠢ︖ ᠲᠣᠮᠢᠯᠠᠭᠰᠠᠨ ᠰᠠᠯᠪᠤᠷᠢ ᠳᠤ ᠬᠡᠷᠡᠭ ᠮᠡᠳᠡᠭᠦᠯᠦᠭᠰᠡᠨ ᠦᠦ︖ ᠭᠡᠵᠦ ᠠᠪᠠᠭᠠ ᠨᠢ ᠣᠯᠠᠨ ᠠᠰᠠᠭᠤᠯᠲᠠ ᠤᠭᠰᠠᠷᠠᠭᠤᠯᠵᠤ ᠲᠠᠯᠪᠢᠪᠠ᠃
ᠡᠵᠢ ᠪᠢᠳᠡ ᠬᠣᠶᠠᠷ ᠢ ᠬᠠᠷᠢᠵᠤ ᠢᠷᠡᠬᠦ ᠡᠴᠡ ᠭᠤᠷᠪᠠᠨ ᠡᠳᠦᠷ ᠦᠨ ᠡᠮᠦᠨᠡ᠂ ᠨᠡᠶᠢᠲᠡ ᠵᠢᠷᠠᠨ ᠪᠦᠳᠦᠭᠦᠨ ᠬᠣᠨᠢ᠂ ᠲᠣᠮᠢᠯᠠᠭᠰᠠᠨ ᠰᠠᠯᠪᠤᠷᠢ ᠳᠤ ᠬᠡᠷᠡᠭ ᠮᠡᠳᠡᠭᠦᠯᠦᠭᠰᠡᠨ ᠪᠣᠯᠪᠠᠴᠤ ᠢᠷᠡᠭᠰᠡᠨ ᠬᠦᠮᠦᠨ ᠠᠯᠠᠭᠠ᠂ ᠨᠢᠭᠡᠨᠲᠡ ᠳᠦᠷᠪᠡ ᠬᠣᠨᠤᠴᠢᠬᠠᠭᠰᠠᠨ ᠰᠢᠦ︕ ᠭᠡᠳ ᠰᠠᠶᠢᠵᠢᠷᠠᠬᠤ ᠬᠦᠦ ᠶᠢᠨ ᠨᠢᠳᠦᠨ ᠳᠦ ᠨᠢᠯᠪᠣᠰᠤ ᠴᠡᠶᠢᠯᠡᠭᠡᠨᠡᠪᠡ᠃
ᠬᠠᠷᠠᠭᠠᠨᠠᠲᠤ ᠰᠣᠮᠣᠨ ᠠᠴᠠ ᠬᠠᠶᠢᠯᠠᠰᠤᠲᠠᠢ ᠬᠦᠷᠬᠦ ᠮᠠᠩᠬᠠᠨ ᠵᠠᠮ ᠢᠶᠠᠷ ᠢᠯᠠᠯᠲᠠ ᠳᠠᠷᠤᠭᠠ ᠬᠠᠭᠤᠴᠢᠪᠲᠤᠷ ︽ ᠪᠡᠭᠡᠵᠢᠩ2020︾ ᠢᠶᠡᠨ ᠵᠢᠯᠣᠭᠣᠳᠴᠤ ᠦᠬᠡᠷ ᠬᠠᠰᠠᠭ ᠰᠢᠭ᠋ ᠯᠠ ᠤᠳᠠᠭᠠᠨ ᠵᠢᠳᠭᠦᠭᠦᠯᠦᠨᠡ᠃
ᠵᠠᠮ ᠡᠶᠢᠮᠦ ᠮᠠᠭᠤ ᠪᠠᠶᠢᠲᠠᠯᠠ ᠬᠡᠷᠡᠭ ᠵᠠᠷᠭᠤ ᠲᠠᠰᠤᠷᠠᠳᠠᠭ ᠦᠭᠡᠢ ᠶᠠᠮᠠᠷ ᠬᠠᠰᠢ ᠶᠢᠨ ᠭᠠᠵᠠᠷ ᠪᠣᠢ︖ ᠭᠡᠵᠦ ᠢᠯᠠᠯᠲᠠ ᠳᠠᠷᠤᠭᠠ ᠠᠮᠠᠨ ᠳᠤ ᠪᠠᠨ ᠲᠦᠳᠦᠨᠡᠭᠡᠳ ᠡᠪᠰᠢᠶᠡᠯᠭᠡᠭᠰᠡᠭᠡᠷ ᠲᠡᠷᠭᠡ ᠪᠡᠨ ᠵᠣᠭᠰᠣᠭᠠᠪᠠ᠃ ᠰᠦᠨᠢᠵᠢᠨ ᠮᠠᠵᠢᠶᠠᠩ ᠨᠠᠭᠠᠳᠤᠭᠰᠠᠨ ᠤ ᠬᠢ ᠪᠣᠯᠣᠯᠲᠠᠢ ᠰᠥᠷᠡᠬᠡᠢ ᠨᠣᠶᠢᠷᠮᠣᠭᠯᠠᠨᠠ᠃ ᠨᠢᠭᠡ ᠨᠣᠶᠢᠷ ᠤᠨᠲᠠᠭᠠᠳ ᠠᠪᠤᠶᠠ᠂ ᠥᠨᠥ ᠰᠥᠨᠢ ᠰᠢᠷᠠ ᠡᠭᠡᠴᠢ ᠶᠢᠨ ᠳᠦ ᠬᠣᠨᠣᠬᠤ ᠯᠠ ᠪᠣᠯᠵᠠᠢ︕ ᠭᠡᠵᠦ ᠲᠦᠳᠦᠨᠡᠵᠦ ᠪᠠᠶᠢᠭᠰᠠᠭᠠᠷ ᠵᠠᠯᠠᠭᠤᠷ ᠢᠶᠠᠨ ᠲᠦᠰᠢᠭᠡᠳ ᠴᠢᠮᠡᠭᠡ ᠲᠠᠰᠤᠷᠠᠪᠠ᠃
ᠬᠠᠷᠢᠯᠴᠠᠭᠤᠷ ᠤᠨ ᠬᠣᠩᠬᠣᠨ ᠤ ᠵᠢᠩᠭᠢᠨᠡᠭᠰᠡᠨ ᠳᠠᠭᠤᠨ ᠳᠤ ᠰᠣᠴᠢᠨ ᠰᠡᠷᠢᠪᠡᠯ ᠨᠠᠷᠠ ᠬᠡᠳᠦᠶᠢᠨ ᠦᠳᠡ ᠬᠡᠯᠪᠡᠶᠢᠵᠦ ᠬᠣᠨᠢᠳ ᠤᠨ ᠲᠣᠯᠣᠭᠠᠢ ᠬᠣᠲᠠ ᠵᠦᠭ ᠢᠶᠡᠨ ᠡᠷᠭᠢᠭᠰᠡᠨ ᠪᠠᠶᠢᠪᠠ᠃
ᠪᠠᠰᠠ ᠯᠡ ᠬᠡᠨ ᠨᠢ ᠤᠳᠠᠰᠤ ᠢᠷᠡᠭᠦᠯᠴᠢᠬᠡᠪᠡ︕ ᠭᠡᠵᠦ ᠤᠴᠠᠭᠠᠷᠳᠠᠨ ᠪᠠᠶᠢᠵᠤ ᠬᠠᠷᠢᠯᠴᠠᠭᠤᠷ ᠢᠶᠠᠨ ᠬᠠᠷᠠᠭᠠᠳ ᠮᠡᠯᠡᠷᠡᠴᠢᠬᠡᠪᠡ᠃ ᠲᠡᠷᠡ ᠨᠢᠭᠡ ᠤᠴᠢᠷ ᠢ ᠪᠣᠳᠣᠭᠠᠳ ᠤᠯᠵᠠᠢ᠃ ᠳᠡᠭᠡᠷᠡ ᠤᠳᠠᠭᠠ ᠬᠤᠷᠠᠯ ᠢᠶᠠᠷ ᠲᠣᠪᠴᠢᠶᠠᠨ ᠳᠤ ᠪᠠᠨ ᠬᠦᠷᠬᠦ ᠳᠦ ᠠᠭᠤᠯᠠ ᠲᠣᠪᠴᠢᠶᠠᠨ ᠳᠠᠷᠤᠭᠠ ᠲᠡᠭᠦᠨ ᠳᠦ ᠠᠬᠠ ᠪᠣᠯᠣᠨ ᠠᠴᠢ ᠬᠦᠦ ᠪᠡᠨ ᠳᠤᠷᠠᠳᠴᠤ ᠪᠠᠶᠢᠭᠰᠠᠨ ᠶᠤᠮ ᠪᠢᠯᠡ᠃
ᠣᠳᠣ ᠴᠤ ᠬᠠᠷᠠᠯᠠᠭᠰᠠᠨ᠂ ᠭᠡᠵᠦ ᠭᠠᠭᠴᠠᠭᠠᠷ ᠢᠶᠠᠨ ᠬᠠᠰᠬᠢᠷᠴᠤ ᠠᠪᠤᠭᠠᠳ ᠲᠦᠭᠦᠰᠢ ᠪᠡᠨ ᠬᠣᠶᠠᠷ ᠠᠯᠠᠭᠠᠳᠠᠪᠠ᠃ ᠡᠨᠡ ᠮᠠᠭᠤ ᠬᠡᠷᠡᠭ ᠦᠨ ᠲᠦᠷᠦᠭᠦᠦ ᠮᠢᠨᠢ ᠡᠨᠡ ᠬᠡᠷᠡᠭ ᠲᠦ ᠬᠣᠯᠪᠣᠭᠳᠠᠬᠤ ᠦᠭᠡᠢ ᠯᠠ ᠪᠣᠯᠣᠭᠠᠰᠠᠢ ᠭᠡᠵᠦ ᠬᠦᠷᠢ ᠳᠡᠭᠦᠦ ᠰᠢᠨᠵᠢᠯᠲᠦ ᠶᠢᠨ ᠢᠶᠡᠨ ᠲᠦᠯᠦᠭᠡ ᠰᠠᠨᠠᠭᠠ ᠪᠣᠯᠵᠤ ᠰᠡᠭᠦᠷᠡᠰᠦᠯᠡᠪᠡ᠃
ᠵᠠᠮ ᠲᠣᠵᠢ ᠲᠣᠪᠴᠢᠶᠠᠨ ᠳᠠᠷᠤᠭᠠ ᠪᠠᠨ ᠶᠠᠭᠠᠬᠢᠵᠤ ᠠᠷᠭᠠᠴᠠᠭᠠᠬᠤ ᠠᠷᠭᠠ ᠪᠠᠰᠢᠯᠭᠠᠭᠰᠠᠨ ᠢᠯᠠᠯᠲᠠ ᠳᠠᠷᠤᠭᠠ ᠶᠢᠨ ᠲᠡᠷᠭᠡ ᠤᠨᠠᠬᠣ ᠨᠠᠷᠠ ᠲᠠᠢ ᠤᠷᠤᠯᠳᠤᠨ ᠪᠠᠶᠢᠵᠤ ᠵᠣᠷᠢᠭᠲᠤ ᠶᠢᠨ ᠡᠭᠦᠳᠡᠨ ᠳᠦ ᠵᠣᠭᠰᠤᠪᠠ᠃
ᠰᠢᠷᠭᠠᠯᠳᠤᠨ ᠭᠢᠯᠠᠯᠵᠠᠭᠰᠠᠨ ᠨᠠᠷᠠᠨ ᠤ ᠪᠤᠮᠠᠨ ᠰᠠᠴᠤᠷᠠᠭ ᠦᠳ ᠠᠭᠤᠯᠠᠨ ᠴᠠᠭᠠᠨᠠ ᠳᠠᠯᠳᠠᠷᠢᠵᠤ ᠦᠳᠡᠰᠢ ᠶᠢᠨ ᠪᠦᠷᠦᠢ ᠨᠦᠮᠦᠷᠢᠳᠦᠨ ᠠᠶᠢᠰᠦᠢ᠃ ᠠᠶᠠᠭᠠ ᠲᠠᠢ ᠬᠣᠨᠢᠨ ᠮᠢᠬᠠᠨ ᠠᠴᠠ ᠠᠭᠤᠷ ᠰᠠᠪᠰᠠᠬᠤ ᠪᠠᠨ ᠵᠣᠭᠰᠣᠭᠰᠠᠨ ᠴᠤ ᠵᠢᠷᠭᠠᠯ ᠭᠤᠸᠠᠢ ᠰᠠᠪᠬᠠ ᠬᠥᠷᠥᠭᠡ ᠦᠭᠡᠢ ᠠᠷᠢᠬᠢ ᠪᠠᠨ ᠰᠢᠮᠡᠵᠦ ᠴᠢᠷᠠᠢ ᠪᠠᠷᠣᠭᠠᠷ ᠰᠠᠭᠤᠨᠠ᠃ ᠰᠢᠷᠡᠭᠡᠨ ᠦ ᠵᠡᠭᠦᠨ ᠲᠠᠯᠠ ᠳᠤ ᠰᠠᠶᠢᠨᠠ ᠬᠦᠭᠰᠢᠨ ᠮᠥᠴᠢᠳᠬᠡᠨ ᠰᠠᠭᠤᠵᠤ ᠬᠤᠨᠳᠠᠭᠠᠨ ᠳᠤ ᠪᠠᠨ ᠠᠷᠢᠬᠢ ᠬᠢᠭᠰᠡᠨ ᠴᠤ ᠤᠭᠤᠤᠯ ᠦᠭᠡᠢ ᠫᠢᠯᠠ ᠬᠠᠭᠠᠯᠤᠭᠰᠠᠨ ᠮᠤᠤᠷ ᠤᠨ ᠨᠢᠳᠦᠯᠡᠵᠦ᠂ ᠡᠪᠦᠭᠡᠨ ᠤ ᠪᠠᠨ ᠠᠮᠠ ᠶᠢ ᠬᠠᠷᠠᠨᠠ᠃
ᠵᠣᠷᠢᠭᠲᠤ ᠮᠠᠨ ᠳᠤ ᠠᠴᠢ ᠲᠠᠢ ᠬᠦᠮᠦᠨ᠂ ᠲᠡᠷᠡ ᠵᠢᠯ ᠴᠢ ᠮᠤᠬᠤᠷ ᠣᠯᠣᠭᠠᠢ ᠶᠢᠨ ᠥᠷᠪᠢᠰᠦᠯ ᠣᠯᠣᠭᠠᠳ ᠦᠬᠦᠮᠡᠷ ᠪᠠᠶᠢᠬᠤ ᠳᠤ ᠴᠢᠨᠢ ᠡᠮᠨᠡᠯᠭᠡ ᠳᠦ ᠬᠥᠷᠭᠡᠭᠡᠳ ᠠᠪᠤᠷᠠᠵᠤ ᠠᠪᠤᠭᠰᠠᠨ᠂ ᠡᠮᠨᠡᠯᠭᠡ ᠶᠢᠨ ᠵᠠᠷᠤᠳᠠᠯ ᠮᠢᠩᠭᠠ ᠭᠠᠷᠤᠢ ᠲᠦᠭᠦᠷᠢᠭ ᠢ ᠴᠢ ᠬᠦᠮᠦᠨ ᠳᠦ ᠪᠤᠴᠠᠭᠠᠭᠰᠠᠨ ᠦᠦ︖ ᠭᠡᠵᠦ ᠰᠢᠷᠦᠭᠦᠨ ᠬᠠᠷᠠᠨᠠ᠃
ᠴᠢ ᠵᠣᠷᠢᠭᠲᠤ ᠶᠢᠨ ᠳᠦ ᠬᠠᠭᠠᠰ ᠵᠢᠯ ᠬᠣᠨᠢ ᠶᠢ ᠨᠢ ᠬᠠᠷᠢᠭᠤᠯᠵᠤ ᠥᠭᠭᠥᠭᠰᠡᠨ ᠪᠢᠰᠢᠦ︕ ᠭᠡᠳ ᠰᠠᠶᠢᠨᠠ ᠬᠥᠭᠰᠢᠨ ᠳᠣᠷᠣᠢ ᠳᠤᠤᠭᠠᠷᠤᠨᠠ᠃
ᠮᠠᠭᠤ ᠬᠦᠮᠦᠨ ᠦ ᠰᠡᠪᠡᠰᠦ ᠦᠭᠡᠢ ᠠᠮᠢᠲᠠᠨ ᠢ ᠵᠦᠭᠡᠷ ᠴᠢ᠂ ᠬᠦᠴᠦᠨ ᠦ ᠣᠷᠣᠨ ᠳᠤ ᠲᠠᠰᠤ ᠪᠦᠳᠦᠭᠦᠨ ᠠᠷᠪᠠᠨ ᠡᠮᠡ ᠬᠣᠨᠢ ᠰᠠᠯᠭᠠᠵᠤ ᠦᠭᠭᠦᠭᠰᠡᠨ ᠦᠭᠡᠢ ᠪᠣᠯ ᠴᠢ ᠪᠢᠳᠡ ᠬᠠᠮᠢᠭᠠ ᠠᠴᠠ ᠲᠠᠪᠢ ᠵᠢᠷᠠᠨ ᠬᠣᠨᠢ ᠲᠠᠢ ᠪᠣᠯᠵᠤ ᠴᠢᠳᠠᠬᠤ ᠶᠤᠮ᠃ ᠭᠡᠳ ᠵᠢᠷᠭᠠᠯ ᠭᠤᠸᠠᠢ ᠶᠢᠨ ᠳᠠᠭᠤ ᠨᠢ ᠴᠢᠩᠭᠠᠷᠠᠪᠠ᠃
ᠲᠡᠭᠡᠯᠡ ᠭᠡᠳ ᠪᠢᠳᠡ ᠳᠣᠯᠣᠨᠵᠢᠩ ᠤᠨ ᠬᠤᠯᠠᠭᠠᠶᠢᠯᠠᠭᠰᠠᠨ ᠢ ᠣᠯᠵᠤ ᠬᠠᠷᠠᠭᠰᠠᠨ ᠦᠭᠡᠢ ᠶᠤᠮᠴᠢᠨᠢ︕ ᠭᠡᠵᠦ ᠰᠠᠮᠠᠭᠠᠨ ᠨᠢ ᠭᠡᠳᠡᠷᠯᠡᠪᠡ᠃
ᠮᠡᠬᠡᠯᠡ ᠴᠢ᠂ ᠴᠠᠭᠳᠠᠭᠠ ᠶᠢ ᠬᠦᠷᠲᠡᠯᠡ ᠮᠡᠬᠡᠯᠡᠬᠦ ᠴᠢᠨᠢ︕ ᠥᠨᠥᠳᠥᠷ ᠪᠢ ᠣᠷᠳᠣ ᠠᠶᠢᠯ ᠤᠨ ᠪᠠᠲᠤ ᠬᠦᠦ ᠡᠴᠡ ᠰᠤᠨᠤᠰᠤᠭᠰᠠᠨ᠂ ᠬᠤᠳᠠᠯ ᠭᠡᠷᠡᠴᠢ ᠵᠣᠬᠢᠶᠠᠪᠠᠯ ᠬᠠᠤᠯᠢ ᠶᠢ ᠵᠦᠷᠢᠴᠡᠵᠦ ᠭᠢᠨᠳᠠᠨ ᠳᠤ ᠰᠠᠭᠤᠨᠠ ᠭᠡᠵᠦ ᠪᠠᠶᠢᠭᠰᠠᠨ᠃ ᠭᠡᠵᠦ ᠡᠪᠦᠭᠡᠨ ᠠᠭᠰᠤᠮᠨᠠᠨᠠ᠃
ᠦᠭᠡᠢ ᠪᠠᠶᠢᠯᠭᠦᠢ᠂ ᠪᠢ ᠦᠨᠡᠨ ᠣᠯᠵᠤ ᠬᠠᠷᠠᠭᠰᠠᠨ ᠦᠭᠡᠢ ᠶᠤᠮᠴᠢᠨᠢ︕ ᠳᠣᠯᠣᠨᠵᠢᠩ ᠬᠤᠯᠠᠭᠠᠶᠢᠯᠠᠯᠠ ᠭᠡᠵᠦ ᠬᠡᠯᠡᠵᠦ ᠴᠢᠳᠠᠨᠠ ᠦᠦ ᠶᠠᠮᠠᠷ ᠭᠡᠳ ᠰᠠᠶᠢᠨᠠ ᠬᠥᠭᠰᠢᠨ ᠥᠪᠡᠷ ᠢ ᠪᠡᠨ ᠵᠥᠪᠲᠥᠭᠡᠨᠡ᠃
ᠳᠣᠯᠣᠨᠵᠢᠩ ᠮᠠᠨᠠᠶᠢᠬᠢᠨ ᠳᠤ ᠪᠦᠲᠦᠨ ᠰᠦᠨᠢ ᠪᠡᠷ ᠠᠷᠢᠬᠢᠳᠠᠯᠠ ᠭᠡᠳᠡᠭ ᠴᠢᠨᠢ ᠲᠡᠭᠡᠭᠡᠳ ᠦᠨᠡᠨ ᠶᠠᠪᠤᠳᠠᠯ ᠦᠦ︖ ᠭᠡᠳ ᠡᠪᠦᠭᠡᠨ ᠬᠠᠰᠭᠢᠷᠤᠨᠠ᠃
ᠦᠭᠡᠢ ᠶᠡᠷᠦᠨᠢ ᠳᠣᠣᠷᠠ ᠳᠠᠭᠤᠨ ᠢᠶᠠᠷ ᠶᠠᠷᠢᠵᠤ ᠪᠣᠯᠳᠠᠭ ᠦᠭᠡᠢ ᠨᠢ ᠦᠦ︖ ᠪᠢ ᠥᠨᠡᠨ ᠭᠢᠨᠳᠠᠨ ᠳᠤ ᠰᠠᠭᠤᠴᠢᠬᠠᠪᠠᠯ ᠶᠠᠭᠤ ᠬᠡᠯᠡᠯᠲᠡᠢ ᠪᠢᠯᠡ᠂ ᠪᠦᠷ ᠵᠢᠷᠠ ᠳᠦᠬᠦᠴᠢᠬᠡᠭᠰᠡᠨ ᠬᠦᠮᠦᠨ ᠪᠠᠶᠢᠭᠠᠳ︕ ᠭᠡᠵᠦ ᠬᠣᠭᠣᠯᠠᠢ ᠨᠢ ᠴᠡᠴᠡᠷᠬᠢᠯᠡᠪᠡ᠃ ᠲᠡᠳᠡ ᠬᠣᠶᠠᠭᠤᠯᠠ ᠦᠭᠡ ᠳᠠᠭᠤᠨ ᠦᠭᠡᠢ ᠬᠡᠰᠡᠭ ᠰᠠᠭᠤᠭᠰᠠᠨ ᠢᠶᠠᠨ ᠪᠤᠳᠠᠭᠠ ᠴᠤ ᠢᠳᠡᠯ ᠦᠭᠡᠢ ᠰᠢᠷᠡᠭᠡ ᠪᠡᠨ ᠬᠤᠷᠢᠶᠠᠪᠠ᠃
ᠬᠦᠮᠦᠨ ᠭᠡᠭᠴᠢ ᠵᠠᠩᠭᠢᠯᠠᠭᠠ ᠶᠢᠨ ᠦᠶᠡ ᠳᠦ ᠰᠠᠶ᠋ᠢ ᠵᠢᠩᠭᠢᠨᠢ ᠬᠦᠮᠦᠨ ᠴᠢᠨᠠᠷ ᠢᠶᠠᠨ ᠤᠶᠢᠯᠠᠭᠠᠳᠠᠭ ᠴᠤ ᠴᠢᠮᠤ᠂ ᠵᠢᠷᠭᠠᠯ ᠭᠤᠸᠠᠢ ᠲᠤᠩ ᠰᠠᠳᠭᠢᠯ ᠲᠣᠭᠲᠠᠪᠤᠷᠢ ᠦᠭᠡᠢ ᠣᠷᠣᠨ ᠳᠤ ᠪᠠᠨ ᠣᠪᠣᠯᠵᠠᠭᠠᠳ ᠪᠠᠶᠢᠪᠠ᠃ ᠪᠦᠷᠦᠢ ᠲᠠᠰᠤᠷᠠᠬᠤ ᠦᠶᠡ ᠪᠡᠷ ᠳᠣᠯᠣᠨᠵᠢᠩ ᠤᠨ ᠭᠡᠷ ᠲᠦ ᠮᠠᠶᠢᠵᠢᠭᠢᠴᠠᠨ ᠣᠷᠣᠭᠰᠠᠨ ᠬᠦᠭᠰᠢᠨ ᠢᠶᠡᠨ ᠬᠠᠷᠠᠭᠠᠳ ᠵᠢᠷᠭᠠᠯ ᠭᠤᠸᠠᠢ ᠱᠣᠭᠰᠢᠷᠠᠲᠠᠯᠠ ᠪᠠᠨ ᠬᠡᠰᠡᠭ ᠤᠬᠢᠯᠠᠭᠰᠠᠨ ᠢᠶᠠᠨ ᠵᠣᠷᠢᠭᠲᠤ ᠶᠢᠨ ᠭᠡᠷ ᠵᠦᠭ ᠬᠣᠷᠳᠤᠯᠠᠨ ᠠᠯᠬᠤᠯᠠᠪᠠ ᠃