-
96675
2021-01-08 09:04
79
0
ᠣᠨ ᠤ᠋ ᠳᠣᠮᠤᠭ
ᠸᠠᠩ ᠠᠯᠲᠠᠨ᠊ᠠ᠋ᠭᠤᠯᠠ
ᠤᠭᠲᠤᠨᠠ ᠦᠳᠡᠨᠡ ᠭᠡᠭᠰᠡᠭᠡᠷ ᠡᠳᠦᠷ ᠨᠢᠮᠭᠡᠷᠡᠨᠡ
ᠮᠡᠳᠡᠶᠡ ᠲᠠᠨᠢᠶᠠ ᠭᠡᠭᠡᠭᠰᠡᠭᠡᠷ ᠦᠭᠡ ᠴᠥᠭᠡᠷᠡᠨᠡ
ᠦᠨᠡᠨ ᠬᠤᠳᠠᠯ ᠬᠣᠯᠢᠯᠳᠤᠭᠰᠠᠨ ᠶᠢᠷᠲᠢᠨᠴᠦ ᠳ᠋ᠤ
ᠠᠮᠢᠳᠤᠷᠠᠯ ᠠ᠋ᠴᠠ ᠯᠠ ᠦᠨᠡᠨ ᠢ᠋ ᠱᠦᠭᠦᠵᠦ ᠰᠠᠭᠤᠨᠠ᠃
ᠡᠷᠭᠢᠵᠦ ᠲᠤᠭᠤᠷᠢᠭᠰᠭᠷ ᠤᠭ ᠣᠷᠤᠨ ᠳ᠋ᠤ ᠪᠠᠨ
ᠡᠷᠢᠵᠦ ᠰᠤᠷᠠᠭᠰᠠᠭᠠᠷ ᠬᠤᠪᠢ ᠪᠡᠶᠡ ᠳᠡᠭᠡᠷᠡ
ᠡᠭᠡᠳᠡᠷᠡᠭᠡᠨ ᠪᠤᠳᠤᠯᠢᠶᠠᠨ ᠳ᠋ᠤ ᠡᠯᠢᠭᠡ ᠨᠢᠭᠡᠲᠡᠢ ᠳ᠋ᠤ ᠪᠠᠨ
ᠡᠬᠡ ᠣᠷᠤᠨ ᠵᠡᠭᠦᠳᠦᠨ ᠳᠤᠮᠳᠠ ᠬᠠᠪᠤᠷ ᠢ᠋ ᠬᠦᠯᠢᠶᠡᠨᠡ᠃
ᠳᠠᠭᠤᠯᠠᠭᠠᠰᠠᠭᠠᠷ ᠪᠦᠵᠢᠭᠯᠡᠭᠡᠭᠰᠡᠭᠡᠷ ᠨᠢᠭᠡ ᠮᠡᠳᠡᠬᠦ ᠳ᠋ᠤ
ᠳᠤᠬᠤᠨ ᠠᠷᠤ ᠪᠡᠷ ᠬᠢᠲᠤᠭᠠ ᠡᠷᠭᠢᠯᠳᠦᠬᠦ ᠵᠢ ᠠᠩᠵᠢᠶᠠᠷᠠᠭᠰᠠᠨ ᠦᠭᠡᠢ
ᠲᠣᠭᠯᠠᠳᠠᠭ ᠰᠡᠭᠦᠳᠡᠷ ᠰᠥᠨᠢ ᠢ᠋ᠢᠨ ᠬᠠᠷᠠᠩᠭᠤᠢ ᠵᠢ ᠰᠣᠴᠢᠭᠠᠵᠤ
ᠲᠤᠭ ᠤ᠋ᠨ ᠵᠢᠪᠠᠷ ᠠ᠋ᠴᠠ ᠬᠡᠯᠮᠡᠭᠳᠡᠭᠰᠡᠨ ᠴᠢᠳᠭᠦᠷ ᠢ᠋ ᠬᠠᠷᠠᠯᠠ᠃
ᠳᠤᠭᠲᠤᠷᠴᠤ ᠪᠣᠰᠤᠭᠰᠠᠨ ᠨᠢᠭᠡ ᠵᠢ ᠬᠦᠷᠢᠶᠡᠯᠡᠵᠦ ᠠᠪᠤᠭᠠᠳ ᠰᠢᠨᠵᠢᠪᠡ
ᠲᠥᠷᠦᠯ ᠤᠳᠤᠮ ᠤ᠋ᠨ ᠢᠷᠡᠯ ᠢ᠋ ᠤᠷᠪᠠᠭᠤᠯᠵᠤ ᠦᠵᠡᠪᠡ
ᠳᠦᠷᠦᠭᠰᠡᠨ ᠰᠢᠨᠵᠢ ᠵᠢ ᠨᠢ ᠲᠣᠯᠢᠳᠠᠵᠤ ᠴᠤ ᠰᠤᠷᠠᠪᠠ
ᠲᠡᠦᠬᠡ ᠱᠠᠰᠲᠢᠷ ᠳᠣᠲᠤᠷᠠ ᠠ᠋ᠴᠠ ᠰᠡᠵᠢᠭ ᠠᠵᠢᠭ ᠴᠤ ᠡᠷᠢᠪᠡ᠃
ᠰᠠᠯᠬᠢᠨ ᠠ᠋ᠴᠠ ᠰᠡᠪ ᠣᠯᠬᠤ ᠪᠡᠷ ᠵᠡᠭᠦᠦ ᠰᠡᠪᠡᠯᠡᠪᠡ
ᠨᠠᠷᠠᠨ ᠠ᠋ᠴᠠ ᠨᠢᠭᠤᠴᠠ ᠵᠢ ᠢᠯᠡᠷᠡᠭᠦᠯᠬᠦ ᠪᠡᠷ ᠰᠢᠪᠦᠭᠡ ᠪᠢᠯᠡᠭᠦᠳᠡᠪᠡ
ᠰᠠᠷᠠᠨ ᠤ᠋ ᠳᠤᠭᠤᠢ ᠳ᠋ᠤ ᠭᠠᠢᠬᠠᠰᠢ ᠠᠯᠳᠠᠭᠠᠳ ᠠᠰᠠᠭᠤᠪᠠ
ᠰᠠᠷᠠᠪᠴᠢᠨ ᠤ᠋ ᠮᠥᠰᠦ ᠡᠷᠡᠦ ᠵᠢ ᠬᠠᠳᠭᠤᠵᠤ ᠡᠪᠡᠳᠭᠡᠨᠡ᠃
ᠨᠢᠯᠪᠤᠭᠰᠠᠨ ᠰᠢᠯᠦᠰᠦ ᠰᠤᠮᠤ ᠪᠣᠯᠵᠤ ᠬᠠᠷᠪᠤᠵᠤ ᠢᠷᠡᠨᠡ
ᠨᠢᠳᠦᠨ ᠴᠡᠴᠡᠭᠡᠢ ᠵᠢ ᠣᠨᠢᠯᠠᠵᠤ ᠢᠷᠡᠨᠡ
ᠨᠠᠷᠠᠨ ᠤ᠋ ᠲᠤᠶᠠᠭᠠ ᠠ᠋ᠴᠠ ᠨᠢᠭᠤᠵᠤ ᠢᠷᠡᠨᠡ
ᠦᠰᠦ ᠪᠡᠷ ᠢ᠋ᠢᠡᠨ ᠨᠢᠳᠦ ᠪᠣᠯᠭᠠᠵᠤ ᠰᠥᠨᠢ ᠢ᠋ᠢᠨ ᠤᠷᠲᠤ ᠵᠢ ᠬᠡᠮᠵᠢᠬᠦ ᠬᠡᠷᠡᠭᠲᠡᠢ ᠪᠣᠯᠵᠠᠢ᠃
ᠶᠠᠰᠤ ᠬᠡᠲᠦᠷᠬᠡᠢ ᠬᠡᠪᠡᠷᠡᠭ ᠬᠦᠢᠲᠡᠨ ᠱᠠᠷᠬᠢᠷᠠᠨᠠ
ᠶᠠᠷᠢ ᠰᠢᠷᠬᠠ ᠳᠡᠩᠳᠡᠭᠦᠦ ᠣᠯᠠᠳᠠᠵᠤ ᠡᠳᠡᠭᠡᠵᠦ ᠠᠮᠵᠢᠬᠤ ᠦᠭᠡᠢ
ᠶᠢᠰᠦᠨ ᠤ᠋ ᠬᠦᠢᠲᠡᠨ ᠰᠦᠨᠡᠰᠦ ᠳᠠᠯᠠᠯᠵᠤ ᠱᠤᠤᠭᠢᠨᠠ
ᠶᠠᠳᠠᠷᠠᠯ ᠤ᠋ᠨ ᠳᠣᠲᠤᠷᠠ ᠠ᠋ᠴᠠ ᠴᠣᠯᠮᠤᠨ ᠣᠳᠤᠨ ᠰᠡᠷᠢᠭᠦᠳᠡᠭᠰᠡᠨ ᠪᠣᠯ ᠤ᠋ᠤ︖
ᠠᠰᠠᠭᠤᠯᠲᠠ ᠬᠡᠲᠦᠷᠬᠡᠢ ᠤᠯᠠᠨ ᠪᠣᠯᠴᠢᠬᠠᠵᠠᠢ
ᠬᠠᠷᠢᠭᠤᠯᠲᠠ ᠵᠠᠮ ᠳᠡᠭᠡᠷᠡ ᠪᠠᠨ ᠲᠡᠷᠭᠡᠨ ᠳ᠋ᠤ ᠰᠢᠬᠠᠭᠳᠠᠪᠠ
ᠠᠷᠤ ᠢ᠋ᠢᠨ ᠪᠠᠷᠠ ᠠ᠋ᠴᠠ ᠨᠢ ᠶᠠᠭᠤ ᠨᠢᠭᠡ ᠵᠢ ᠪᠤᠳᠤᠬᠤ ᠠ᠋ᠴᠠ
ᠬᠠᠰᠢᠯᠠ ᠴᠠᠭ ᠤ᠋ᠨ ᠵᠡᠭᠦᠦ ᠵᠢ ᠬᠤᠷᠴᠠᠯᠠᠵᠤ ᠰᠠᠭᠤᠬᠤ ᠨᠢ ᠳ᠋ᠠ᠃
ᠠᠯᠢ ᠨᠢᠭᠡ ᠡᠳᠦᠷ ᠮᠣᠷᠢᠯᠠᠵᠤ ᠪᠠᠭᠤᠬᠤ ᠴᠢᠮᠠ ᠳ᠋ᠤ
ᠰᠧᠺᠦ᠋ᠨ᠋ᠳ᠋ ᠪᠦᠷᠢ ᠵᠢ ᠪᠡᠯᠡᠭ ᠪᠣᠯᠭᠠᠨ ᠪᠠᠷᠢᠶᠠ
ᠠᠶᠠᠨ ᠤ᠋ ᠴᠢᠨᠢ ᠵᠣᠭᠰᠤᠭᠠᠯ ᠪᠦᠷᠢ ᠳ᠋ᠤ ᠳᠦᠳᠡᠭ ᠭᠠᠯ ᠠᠰᠠᠭᠠᠶᠠ
ᠮᠢᠨᠦ᠋ᠲ ᠪᠦᠷᠢ ᠢ᠋ᠢᠨ ᠢᠯᠴᠢ ᠵᠢ ᠴᠢᠮᠠ ᠳ᠋ᠤ ᠪᠠᠨ ᠥᠭᠬᠦᠶᠡ᠃
ᠰᠡᠭᠦᠷᠡᠰᠦ ᠪᠦᠬᠦᠨ ᠵᠢᠭᠦᠷ ᠣᠷᠭᠤᠭᠠᠳ ᠬᠤᠯᠠ ᠶᠠᠪᠤᠨᠠ
ᠰᠠᠨᠠᠭᠠ ᠪᠣᠳᠤᠯ ᠪᠡᠯᠴᠢᠭᠡᠷ ᠪᠣᠯᠤᠭᠠᠳ ᠨᠣᠭᠤᠭᠠᠷᠠᠨᠠ
ᠠᠳᠤᠭᠤᠨ ᠰᠦᠷᠦᠭ ᠬᠠᠮᠢᠭᠠ ᠪᠠᠢᠨᠠ ᠭᠡᠵᠦ ᠰᠠᠷᠠᠪᠴᠢᠯᠠᠭᠰᠠᠭᠠᠷ
ᠠᠢᠯ ᠤ᠋ᠨ ᠬᠠᠵᠠᠭᠤ ᠳ᠋ᠤ ᠠᠭᠤᠯᠠ ᠪᠣᠯᠵᠤ ᠰᠡᠬᠦᠢᠨᠡ᠃
ᠪᠤᠴᠠᠬᠤ ᠭᠠᠯᠠᠭᠤᠳ ᠴᠢᠭᠯᠡᠯ ᠢ᠋ᠢᠡᠨ ᠠᠯᠳᠠᠭᠠ ᠦᠭᠡᠢ
ᠪᠣᠷᠤ ᠲᠠᠯᠠ ᠢ᠋ᠢᠨ ᠳᠡᠨᠵᠢ ᠪᠡᠷ ᠴᠠᠭᠠᠨ ᠵᠠᠮ ᠵᠤᠷᠠᠢᠯᠭᠠᠨᠠ
ᠬᠥᠬᠡ ᠲᠡᠭᠷᠢ ᠢ᠋ᠢᠨ ᠬᠠᠶᠠᠭᠠ ᠪᠡᠷ ᠬᠣᠭᠤᠰᠤᠨ ᠨᠢᠰᠦᠭᠡ ᠦᠭᠡᠢ
ᠬᠥᠳᠡᠭᠡ ᠨᠤᠲᠤᠭ ᠤ᠋ᠨ ᠬᠡᠢ ᠮᠣᠷᠢ ᠬᠤᠷᠠᠢᠯᠠᠵᠤ ᠢᠷᠡᠨᠡ᠃
ᠠᠷᠭᠠᠯ ᠤ᠋ᠨ ᠣᠪᠤᠭᠠᠨ ᠠ᠋ᠴᠠ ᠭᠠᠯ ᠤ᠋ᠨ ᠰᠤᠷ ᠢ᠋ᠢᠡᠨ ᠠᠮᠢᠯᠠᠭᠤᠯᠵᠤ
ᠠᠷᠤ ᠰᠢᠯᠢ ᠠ᠋ᠴᠠ ᠮᠠᠷᠲᠠᠭᠰᠠᠨ ᠲᠠᠰᠢᠭᠤᠷ ᠢ᠋ᠢᠡᠨ ᠠᠪᠴᠤ
ᠠᠯᠤᠰ ᠤ᠋ᠨ ᠵᠡᠷᠭᠡᠯᠭᠡᠨ ᠬᠥᠩᠭᠡᠬᠡᠨ ᠢᠷᠠᠵᠤ
ᠥᠷᠯᠦᠭᠡᠨ ᠤ᠋ ᠭᠡᠭᠡ ᠵᠢ ᠡᠷᠦᠬᠡ ᠪᠦᠷᠢ ᠳ᠋ᠤ ᠳᠠᠮᠵᠢᠭᠤᠯᠤᠨᠠ᠃
ᠴᠢᠯᠠᠭᠤ ᠰᠡᠷᠭᠦᠵᠦ ᠮᠣᠳᠤᠳ ᠬᠥᠬᠡᠷᠡᠬᠦ ᠪᠡᠷ ᠨᠢ
ᠰᠢᠪᠠᠭᠤᠳ ᠭᠠᠩᠭᠠᠨᠠᠵᠤ ᠠᠮᠢᠰᠭᠤᠭᠠ ᠰᠠᠷᠠᠭᠤᠯᠵᠢᠬᠤ ᠪᠡᠷ ᠨᠢ
ᠭᠤᠷᠠᠬᠠ ᠳᠠᠭᠤᠯᠠᠵᠤ ᠮᠥᠷᠡᠨ ᠲᠠᠩᠭᠢᠰ ᠴᠠᠯᠭᠢᠯᠠᠬᠤ ᠪᠡᠷ ᠨᠢ
ᠰᠢᠷᠠ ᠲᠠᠯᠠ ᠢ᠋ᠢᠨ ᠢ᠋ᠢᠡᠨ ᠡᠯᠢᠭᠡᠨ ᠳᠡᠭᠡᠷᠡ ᠣᠳᠤᠳ ᠰᠢᠪᠡᠵᠦ ᠰᠠᠭᠤᠨᠠ᠃