ᠬᠦᠨᠳᠦ ᠬᠦᠩᠭᠡᠨ ᠦ ᠰᠤᠷᠭᠠᠯ 
       
         ᠯᠤᠪᠰᠠᠩᠳᠠᠮᠪᠢᠵᠠᠯᠰᠠᠨ ᠭᠡᠭᠡᠨ 

ᠪᠤᠷᠬᠠᠨ ᠪᠠᠭᠰᠢ ᠶᠢᠨ ᠨᠤᠮᠯᠠᠭᠰᠠᠨ
ᠵᠠᠷᠯᠢᠭ ᠨᠢᠭᠡᠨ ᠬᠦᠨᠳᠦ ᠃ 
ᠪᠤᠭᠳᠠ ᠪᠠᠭᠰᠢ ᠶᠢᠨ ᠬᠠᠢᠷᠠᠯᠠᠭᠰᠠᠨ
ᠰᠡᠳᠬᠢᠯ ᠨᠢᠭᠡᠨ ᠬᠦᠨᠳᠦ ᠃ 
ᠪᠤᠶᠠᠨᠳᠠᠨ ᠢ ᠡᠷᠭᠦᠭᠰᠡᠨ 
ᠦᠭᠯᠢᠭᠡ ᠨᠢᠭᠡᠨ ᠬᠦᠨᠳᠦ ᠪᠤᠢ ᠃ 
ᠪᠤᠳᠤᠴᠢᠯᠠᠨ ᠤᠯᠤᠭᠰᠠᠨ 
ᠬᠡᠰᠢᠭ ᠨᠢᠭᠡᠨ ᠬᠦᠨᠳᠦ ᠪᠤᠢ ᠃ 
ᠬᠤᠳᠤᠭ ᠶᠡᠬᠡ ᠪᠤᠭᠳᠠᠰ ᠨᠢ
ᠱᠠᠰᠢᠨ ᠳ᠋ᠠᠭᠠᠨ ᠦᠨᠡᠨᠴᠢ ᠪᠤᠢ ᠃ 
ᠰᠠᠢᠨ ᠶᠤᠰᠤᠳᠠᠢ ᠱᠠᠪᠢ ᠨᠢ
ᠰᠠᠨᠸᠠᠷ ᠶᠠᠭᠤ ᠪᠠᠨ ᠰᠠᠬᠢᠨ ᠪᠤᠢ ᠃ 
ᠬᠤᠨ ᠰᠢᠪᠠᠭᠤᠨ ᠭᠡᠭᠴᠢ ᠨᠢ
ᠤᠰᠤᠨ ᠳ᠋ᠠᠭᠠᠨ ᠴᠢᠮᠡᠭ ᠪᠤᠢ ᠃ 
ᠬᠤᠸᠠᠷᠠᠭ ᠬᠦᠮᠦᠨ ᠭᠡᠭᠴᠢ ᠨᠢ
ᠬᠤᠷᠠᠯ ᠳ᠋ᠠᠭᠠᠨ ᠴᠢᠮᠡᠭ ᠪᠤᠢ ᠃ 
ᠰᠠᠢᠨ ᠦᠷ᠎ᠡ ᠭᠡᠭᠴᠢ ᠨᠢ 
ᠤᠯᠠᠨ ᠤ ᠲᠤᠮᠳᠠ ᠪᠠᠨ ᠴᠢᠮᠡᠭ ᠪᠤᠢ ᠃ 
ᠰᠠᠢᠨ ᠡᠬᠡᠨᠠᠷ ᠭᠡᠭᠴᠢ ᠨᠢ 
ᠭᠡᠷ ᠦᠨ ᠲᠤᠮᠳᠠ ᠪᠠᠨ ᠴᠢᠮᠡᠭ ᠪᠤᠢ ᠃ 
ᠰᠠᠢᠨ ᠦᠭᠡ ᠰᠤᠨᠤᠰᠪᠠᠯ 
ᠴᠢᠬᠢᠨ ᠳ᠋ᠡᠭᠡᠨ ᠴᠢᠮᠡᠭ ᠪᠤᠢ ᠃ 
ᠰᠠᠨᠠᠭ᠎ᠠ ᠠᠮᠤᠷ ᠶᠠᠪᠤᠪᠠᠯ 
ᠵᠢᠷᠭᠠᠯ ᠳ᠋ᠤᠷ ᠴᠢᠮᠡᠭ ᠪᠤᠢ ᠃ 
ᠭᠡᠳᠡᠷᠭᠦ ᠪᠡᠨ ᠬᠠᠷᠠᠪᠠᠯ
ᠲᠦᠭᠡᠷᠡᠬᠦ ᠦᠭᠡᠢ ᠪᠡᠨ ᠲᠡᠮᠳᠡᠭᠯᠡᠨ ᠃ 
ᠬᠢᠰᠬᠢᠬᠦ ᠭᠠᠵᠠᠷ ᠢᠶᠠᠨ ᠬᠠᠷᠠᠪᠠᠯ 
ᠤᠨᠠᠬᠤ ᠦᠭᠡᠢ ᠪᠡᠨ ᠲᠡᠮᠳᠡᠭᠯᠡᠨ ᠃ 
ᠬᠡᠢ ᠦᠭᠡᠢ ᠶᠠᠪᠤᠪᠠᠯ 
ᠬᠡᠷᠰᠡᠦᠵᠢᠬᠦ ᠪᠡᠨ ᠲᠡᠮᠳᠡᠭᠯᠡᠨ ᠃ 
ᠭᠡᠮ ᠦᠭᠡᠢ ᠶᠠᠪᠤᠪᠠᠯ 
ᠨᠢᠭᠦᠯ ᠦᠭᠡᠢ ᠪᠡᠨ ᠲᠡᠮᠳᠡᠭᠯᠡᠨ ᠃
ᠦᠮᠴᠢ ᠨᠢᠭᠡ ᠪᠤᠯᠪᠠᠰᠤ 
ᠡᠪᠡᠳᠡᠷᠡᠬᠦ ᠦᠭᠡᠢ ᠪᠡᠨ ᠲᠡᠮᠳᠡᠭᠯᠡᠨ ᠃ 
ᠦᠰᠢᠷᠡᠬᠦ ᠪᠤᠯᠪᠠᠰᠤ 
ᠴᠤᠴᠠᠷᠠᠬᠤ ᠦᠭᠡᠢ ᠪᠡᠨ ᠲᠡᠮᠳᠡᠭᠯᠡᠨ ᠃ 
ᠠᠮᠢᠨᠴᠢᠯᠠᠨ ᠬᠠᠢᠷᠠᠯᠠᠪᠠᠰᠤ
ᠬᠠᠳᠠᠭᠠᠯᠠᠬᠤ ᠪᠠᠨ ᠲᠡᠮᠳᠡᠭᠯᠡᠨ ᠃ 
ᠠᠪᠬᠤ ᠶᠤᠭᠠᠨ ᠰᠢᠮᠳᠡᠪᠡᠰᠦ
ᠠᠩᠬᠠᠷᠠᠬᠤ ᠪᠠᠨ ᠲᠡᠮᠳᠡᠭᠯᠡᠨ ᠃ 
ᠮᠤᠩᠬᠠᠷᠠᠭᠰᠠᠨ ᠬᠦᠮᠦᠨ ᠳᠦ 
ᠡᠷᠳᠡᠮ ᠪᠢᠯᠢᠭ ᠬᠤᠯᠠ ᠪᠤᠢ 
ᠮᠤᠬᠤᠷᠳᠠᠭᠰᠠᠨ ᠬᠦᠮᠦᠨ ᠳᠦ 
ᠡᠳ᠋ ᠡᠷᠳᠡᠨᠢ ᠬᠤᠯᠠ ᠪᠤᠢ ᠃ 
ᠢᠷᠸ᠎ᠠ ᠶᠢᠨ ᠵᠠᠩ ᠲᠠᠢ ᠬᠦᠮᠦᠨ ᠳᠦ 
ᠬᠠᠨᠢ ᠨᠦᠬᠦᠷ ᠬᠤᠯᠠ ᠪᠤᠢ ᠃ 
ᠶᠠᠳᠠᠷᠠᠭᠰᠠᠨ ᠬᠦᠮᠦᠨ ᠳᠦ 
ᠭᠠᠵᠠᠷ ᠵᠠᠮ ᠬᠤᠯᠠ ᠪᠤᠢ ᠃ 
ᠪᠡᠯᠡ ᠲᠡᠢᠬᠡᠨ ᠬᠦᠮᠦᠨ ᠳᠦ 
ᠨᠤᠶᠠᠨ ᠬᠦᠮᠦᠨ ᠲᠦᠳᠡ ᠪᠤᠢ ᠃ 
ᠪᠢᠯᠢᠭ ᠲᠡᠢᠬᠡᠨ ᠬᠦᠮᠦᠨ ᠳᠦ 
ᠨᠤᠮᠴᠢ ᠬᠦᠮᠦᠨ ᠲᠦᠳᠡ ᠪᠤᠢ ᠃ 
ᠡᠳ᠋ ᠲᠡᠢᠬᠡᠨ ᠬᠦᠮᠦᠨ ᠳᠦ 
ᠢᠵᠢᠯᠢ ᠨᠦᠬᠦᠷ ᠲᠦᠳᠡ ᠪᠤᠢ ᠃ 
ᠡᠶ᠎ᠡ ᠰᠠᠢᠳᠤ ᠬᠦᠮᠦᠨ ᠳᠦ 
ᠡᠯᠳᠡᠪ ᠤᠯᠠᠨ ᠲᠦᠳᠡ ᠪᠤᠢ ᠃ 
ᠬᠤᠳᠠᠯ ᠬᠡᠯᠡᠳᠡᠭ ᠬᠦᠮᠦᠨ ᠳᠦ 
ᠦᠨᠡᠨ ᠦᠭᠡ ᠬᠠᠷᠰᠢ ᠪᠤᠢ ᠃ 
ᠬᠤᠯᠭᠠᠢᠴᠢ ᠬᠦᠮᠦᠨ ᠳᠦ 
ᠪᠠᠶᠠᠨ ᠬᠦᠮᠦᠨ ᠬᠠᠷᠰᠢ ᠪᠤᠢ ᠃ 
ᠬᠤᠪ ᠵᠦᠭᠡᠳᠡᠭ ᠬᠦᠮᠦᠨ ᠳᠦ 
ᠰᠢᠯᠤᠭᠤᠨ ᠬᠦᠮᠦᠨ ᠬᠠᠷᠰᠢ ᠪᠤᠢ ᠃ 
ᠬᠤᠮᠠᠢ ᠪᠠᠷᠳᠠᠮ ᠬᠦᠮᠦᠨ ᠳᠦ 
ᠬᠤᠯᠠ ᠤᠢᠷ᠎ᠠ ᠶᠢᠨ ᠬᠠᠷᠰᠢ ᠪᠤᠢ ᠃ 
ᠮᠦᠩᠬᠡᠷᠡᠬᠦ ᠬᠦᠮᠦᠨ ᠳᠦ 
ᠡᠪᠡᠷᠡᠬᠦ ᠶᠢᠨ ᠲᠠᠢᠰᠤᠨ ᠪᠤᠢ ᠃ 
ᠦᠳᠡᠯᠡᠭᠰᠡᠨ ᠬᠦᠮᠦᠨ ᠳᠦ 
ᠨᠠᠰᠤᠨ ᠰᠡᠭᠦᠳᠡᠷ ᠲᠠᠢᠰᠤᠨ ᠪᠤᠢ ᠃ 
ᠡᠪᠡᠳᠦᠭᠰᠡᠨ ᠬᠦᠮᠦᠨ ᠳᠦ 
ᠮᠠᠬᠠᠪᠤᠳ ᠨᠢ ᠲᠠᠢᠰᠤᠨ ᠪᠤᠢ ᠃ 
ᠦᠩᠭᠡᠷᠡᠭᠰᠡᠨ ᠬᠦᠮᠦᠨ ᠳᠦ 
ᠡᠷᠢᠵᠦ ᠤᠯᠬᠤ ᠨᠢ ᠲᠠᠢᠰᠤᠨ ᠪᠤᠢ ᠃ 
ᠦᠨᠳᠦᠷ ᠡᠴᠡ ᠪᠠᠭᠤᠭᠰᠠᠨ 
ᠦᠶᠡᠷ ᠨᠢᠭᠡᠨ ᠭᠠᠯᠵᠠᠭᠤ ᠃ 
ᠦᠯᠦᠩ ᠳ᠋ᠤᠨᠢ ᠰᠢᠳᠠᠭᠰᠠᠨ
ᠲᠦᠢᠮᠡᠷ ᠨᠢᠭᠡᠨ ᠭᠠᠯᠵᠠᠭᠤ ᠃ 
ᠰᠠᠮᠠᠳᠢ ᠳ᠋ᠠᠭᠠᠨ ᠲᠠᠰᠤᠭᠰᠠᠨ
ᠪᠠᠭᠰᠢ ᠨᠢᠭᠡᠨ ᠨᠤᠮᠤᠬᠨ ᠃ 
ᠰᠠᠷᠬᠤᠳ ᠲᠤᠷ ᠰᠤᠭᠳᠤᠭᠰᠠᠨ
ᠪᠡᠴᠢᠨ ᠨᠢᠭᠡᠨ ᠨᠤᠮᠤᠬᠨ ᠃ 
ᠬᠤᠯᠤᠭᠠᠨ ᠢ ᠪᠠᠷᠢᠭᠴᠢ
ᠮᠢᠭᠤᠢ ᠨᠢᠭᠡᠨ ᠨᠤᠮᠤᠬᠨ ᠃ 
ᠬᠤᠶᠠᠷ ᠬᠦᠮᠦᠨ ᠢ ᠰᠠᠯᠭᠠᠭᠴᠢ
ᠬᠤᠪ ᠨᠢᠭᠡᠨ ᠨᠤᠮᠤᠬᠨ ᠃ 
ᠠᠬᠤᠢ ᠶᠡᠬᠡ ᠪᠠᠶᠠᠨᠳᠠᠨ ᠨᠢ
ᠵᠢᠷᠭᠠᠬᠤ ᠨᠢ ᠦᠨᠡᠨ ᠪᠤᠢ ᠃ 
ᠠᠷᠢᠯᠤᠭᠰᠠ① ᠬᠦᠮᠦᠨ ᠳᠦ 
ᠪᠤᠷᠬᠠᠨ ᠪᠤᠯᠬᠤ ᠨᠢ ᠦᠨᠡᠨ ᠪᠤᠢ ᠃ 
ᠠᠮᠢᠳᠤ ᠶᠠᠪᠤᠬᠤ ᠪᠡᠶ᠎ᠡ ᠮᠢᠨᠢ 
ᠦᠬᠦᠬᠦ ᠢᠨᠤ ᠦᠨᠡᠨ ᠪᠤᠢ ᠃ 
ᠦᠬᠦᠬᠰᠡᠨ ᠦ  ᠬᠤᠢᠨ᠎ᠠ 
ᠲᠠᠮᠤ ᠳᠤ ᠤᠴᠢᠬᠤ ᠨᠢ ᠦᠨᠡᠨ ᠪᠤᠢ ᠃ 
ᠡᠷᠳᠡᠮ ᠨᠤᠮ ᠢ ᠲᠡᠪᠴᠢᠪᠡᠯ
ᠪᠤᠷᠬᠠᠨ ᠪᠤᠯᠬᠤ ᠬᠤᠯᠠ ᠪᠤᠢ ᠃ 
ᠡᠴᠢᠭᠡ ᠡᠬᠡ ᠪᠡᠨ ᠲᠡᠪᠴᠢᠪᠡᠯ 
ᠰᠠᠢᠨ ᠪᠤᠯᠬᠤ ᠨᠢ ᠬᠤᠯᠠ ᠪᠤᠢ ᠃ 
ᠠᠬ᠎ᠠ ᠲᠡᠭᠦᠦ ᠪᠡᠨ ᠲᠡᠪᠴᠢᠪᠡᠯ 
ᠪᠠᠶᠠᠨ ᠪᠤᠯᠬᠤ ᠨᠢ ᠬᠤᠯᠠ ᠪᠤᠢ ᠃ 
ᠠᠢᠮᠠᠭ ᠢᠶᠠᠨ ᠲᠡᠪᠴᠢᠪᠡᠯ 
ᠨᠤᠶᠠᠨ ᠪᠤᠯᠬᠤ ᠨᠢ ᠬᠤᠯᠠ ᠪᠤᠢ ᠃  

①ᠠᠷᠢᠯᠤᠭᠰᠠ ᠭᠡᠵᠦ ᠠᠷᠢᠭᠤᠨ ᠪᠤᠯᠤᠭᠰᠠᠨ ᠂ ᠰᠡᠳᠬᠢᠯ ᠠᠷᠢᠭᠤᠨ ᠪᠤᠯᠤᠭᠰᠠᠨ ᠭᠡᠬᠦ ᠮᠡᠳᠦ ᠤᠢᠯᠭᠠᠵᠤ ᠮᠡᠳᠡᠬᠦ ᠬᠡᠷᠡᠭ᠍ᠳᠠᠢ ᠃ 

                     2024.2.1