-
46209
ᠨᠤᠲᠤᠭ ᠤᠨ ᠰᠠᠬᠢᠭᠤᠰᠤ
2021-09-06 10:15
179
0
ᠬᠠᠭ ᠤᠨ ᠨᠠᠭᠤᠷ ᠮᠢᠨᠢ ᠶᠠᠭᠤ ᠭᠡᠵᠦ ᠁
ᠨᠢᠭᠡ
ᠬᠠᠭ ᠤᠨ ᠨᠠᠭᠤᠷ ᠮᠢᠨᠢ ᠮᠦᠩᠬᠦᠨ ᠳᠤᠯᠬᠢᠶᠠ ᠪᠠᠷ ᠰᠢᠪᠡᠨᠡᠬᠦ ᠳᠤ ᠬᠠᠪᠤᠷ ᠤᠨ ᠰᠢᠪᠠᠭᠤᠳ ᠨᠢ ᠡᠷᠬᠢ ᠳᠠᠭᠠᠭᠠᠳ ᠭᠠᠩᠭᠠᠨᠠᠨᠠ᠃ ᠵᠦᠭᠡᠯᠡᠨ ᠳᠡᠨᠵᠢᠨ ᠳ᠋ᠤ ᠨᠢ ᠬᠡᠤᠬᠡᠳ ᠤᠨ ᠨᠠᠷᠠᠨ ᠪᠦᠮᠪᠦᠷᠢᠬᠦ ᠪᠡᠷ ᠽᠠᠮᠪᠤᠯᠢᠩ ᠤᠨ ᠤᠷᠤᠰᠬᠠᠯ ᠬᠦᠮᠦᠨ ᠵᠤᠨ ᠤ ᠵᠢᠷᠭᠠᠯ ᠳ᠋ᠤ ᠬᠦᠪᠦᠯᠵᠡᠨᠡ᠃
ᠪᠢ ᠬᠤᠷᠢᠨ ᠬᠡᠳᠦᠨ ᠵᠢᠯ ᠤᠨ ᠡᠮᠦᠨᠡ ᠬᠦᠳᠡᠭᠡ ᠭᠡᠷ ᠡᠴᠡ ᠪᠠᠨ ᠠᠶᠠᠷᠯᠠᠵᠦ᠂ ᠬᠤᠰᠢᠭᠤ ᠪᠠᠯᠭᠠᠰᠤᠨ ᠳ᠋ᠤ ᠭᠤᠩᠬᠠᠵᠦ ᠶᠠᠪᠤᠭᠰᠠᠨ ᠬᠢᠵᠢᠶᠠᠯᠢ ᠨᠠᠰᠤᠨ ᠣ ᠰᠤᠷ ᠵᠢᠯᠤᠭᠤ ᠪᠠᠨ ᠭᠡᠨᠡᠤᠬᠡᠨ ᠡᠷᠬᠢᠭᠦᠯᠬᠦ ᠳ᠋ᠤ᠂ ᠮᠦᠷᠦᠭᠡᠳᠦᠯ ᠬᠦᠰᠡᠯ ᠦᠨ ᠶᠢᠷᠲᠢᠨᠴᠦ ᠶᠢᠨ ᠲᠤᠳᠤ ᠦᠩᠭᠡ ᠨᠢ ᠬᠠᠭ ᠤᠨ ᠨᠠᠭᠤᠷ ᠮᠢᠨᠢ ᠴᠢ ᠪᠠᠢᠵᠠᠢ᠃ ᠲᠦᠳᠡᠬᠡᠨ ᠵᠠᠭᠤᠷᠠ ᠬᠡᠭᠡᠷᠡ ᠶᠢᠨ ᠰᠠᠯᠬᠢ ᠨᠢ ᠳᠤᠷᠠᠰᠤᠮᠵᠢ ᠶ᠋ᠢ ᠦᠯᠢᠶᠠᠵᠦ ᠨᠤᠲᠤᠭ ᠲᠤ ᠮᠢᠨᠢ ᠠᠪᠠᠴᠢᠨᠠ᠃ ᠠᠯᠲᠠᠨ ᠦᠷᠡ ᠪᠠᠨ ᠵᠠᠭᠤᠭᠠᠳ ᠠᠬᠢᠭᠠᠳ ᠢᠷᠡᠬᠦ ᠪᠤᠯᠪᠠᠤ ᠬᠡᠮᠡᠨ ᠬᠦᠭᠡᠷᠦᠬᠦᠨ ᠬᠠᠷᠢᠶᠠᠴᠠᠢ ᠶ᠋ᠢ ᠲᠤᠮᠤᠭᠠ ᠦᠭᠡᠢ ᠬᠦᠯᠢᠶᠡᠳᠡᠭ ᠳᠡᠷᠡ ᠨᠢᠭᠡᠨ ᠬᠠᠪᠤᠷ᠂ ᠠᠪᠤ ᠮᠢᠨᠢ ᠬᠠᠭ ᠤᠨ ᠨᠠᠭᠤᠷ ᠤᠨ ᠬᠦᠪᠡᠭᠡᠨ ᠳ᠋ᠤ ᠠᠬᠠ ᠳᠡᠭᠦᠦ ᠬᠡᠳᠦᠭᠦᠯᠡ ᠶ᠋ᠢ ᠬᠦᠯ ᠨᠢᠴᠦᠭᠦᠨ ᠭᠦᠶᠦᠯᠭᠡᠵᠦ᠂ ᠠᠷᠠᠵᠠ ᠰᠦ ᠶ᠋ᠢᠨ ᠰᠠᠴᠤᠯᠢ ᠡᠷᠭᠦᠵᠦ ᠂ ᠨᠠᠨᠳᠢᠨ ᠬᠦᠰᠡᠯ ᠦᠨ ᠬᠤᠷᠤᠢ ᠰᠦᠩᠨᠡᠬᠦ ᠪᠠᠷ ᠠᠩᠬᠠᠯᠠᠨ ᠪᠠᠷᠠᠭᠠᠳᠠᠵᠦ ᠪᠠᠢᠭᠠ ᠨᠠᠳᠠᠳᠤ ᠬᠠᠭ ᠤᠨ ᠨᠠᠭᠤᠷ ᠤᠨ ᠤᠰᠤ ᠨᠢ ᠬᠠᠨᠠᠭᠠᠷ ᠳᠠᠯᠠᠢ ᠡᠴᠡ ᠴᠤ ᠳᠤᠮᠤ ᠰᠠᠨᠠᠭᠳᠠᠵᠦ ᠪᠢᠯᠡ᠃
ᠤᠳᠤᠳᠤ ᠲᠡᠭᠷᠢ ᠶᠢᠨ ᠳᠤᠤᠷᠠ ᠬᠤᠨᠤᠭ ᠵᠠᠢᠴᠢᠯᠠᠨ ᠳᠠᠪᠬᠢᠭᠰᠠᠨ ᠦᠨᠢ ᠮᠦᠩᠬᠡ ᠶ᠋ᠢᠨ ᠡᠷᠢᠯ ᠦᠨ ᠬᠤᠢᠨᠠ ᠂ ᠤᠬᠠᠭᠠ ᠬᠠᠷᠪᠤᠨ ᠤᠳᠤᠬᠤ ᠮᠦᠯᠢᠭᠦᠨ ᠶᠡᠬᠡ ᠤᠷᠤᠰᠬᠠᠯ ᠳ᠋ᠤ ᠳᠤᠷᠠᠰᠤᠯ ᠤᠨ ᠳᠤᠮᠳᠠ ᠲᠠᠷᠠᠭ ᠪᠤᠯᠤᠨ ᠮᠡᠯᠳᠡᠢᠬᠦ ᠬᠠᠭ ᠤᠨ ᠨᠠᠭᠤᠷ ᠮᠢᠨᠢ ᠠᠢᠯ ᠤᠨ ᠬᠡᠤᠬᠡᠳ ᠢ ᠠᠩᠭᠠᠬᠠᠢ ᠦᠷᠡ ᠪᠠᠨ ᠰᠢᠭ ᠱᠤᠩᠪᠠᠭᠤᠯᠵᠦ᠂ ᠠᠯᠤᠰ ᠤᠨ ᠰᠠᠢᠬᠠᠨ ᠬᠦᠰᠡᠯᠡᠩ ᠳ᠋ᠤ ᠱᠤᠤᠬᠢᠭᠤᠯᠤᠭᠰᠠᠨ ᠰᠡᠳᠬᠢᠯ ᠦᠨ ᠮᠢᠨᠢ ᠲᠤᠩᠭᠠᠯᠠᠭ ᠲᠠᠮᠢᠷ ᠪᠤᠯᠵᠦ ᠪᠠᠢᠯᠠ᠃
ᠬᠠᠭ ᠤᠨ ᠨᠠᠭᠤᠷ ᠮᠢᠨᠢ ᠶᠠᠭᠤ ᠭᠡᠵᠦ ᠰᠢᠪᠡᠨᠡᠯᠡ᠁
ᠬᠤᠶᠠᠷ
ᠵᠠᠭᠤᠨ ᠢ ᠰᠤᠨᠳᠠᠯᠠᠨ ᠬᠠᠭ ᠤᠨ ᠨᠠᠭᠤᠷ ᠮᠢᠨᠢ ᠪᠤᠷᠤ ᠬᠦᠳᠡᠭᠡ ᠶᠢᠨ ᠴᠠᠢᠯᠭᠠᠨ ᠬᠤᠩᠭᠤᠷ ᠦᠷᠡᠰ ᠢᠶᠡᠨ ᠪᠠᠲᠤ ᠢᠲᠡᠭᠡᠯ ᠦᠨ ᠳᠤᠮᠳᠠ ᠵᠤᠯᠠ ᠰᠢᠭ᠋ ᠭᠡᠷᠡᠯᠳᠦᠭᠦᠯᠦᠨ᠂ ᠤᠴᠢᠯᠠᠨ ᠰᠦᠮᠡᠯᠵᠠᠬᠦ ᠤᠭ᠍ᠶᠤ ᠴᠡᠩᠭᠡᠷ ᠳᠤᠯᠤᠭᠠᠳ ᠳᠠᠭᠠᠨ ᠨᠤᠲᠤᠭ ᠤᠨ ᠨᠠᠢᠷᠠᠭᠴᠢ ᠪᠠᠨ ᠰᠢᠯᠦᠭ ᠳᠠᠢ ᠳᠠᠭᠤᠤ ᠳᠠᠢ ᠠᠶᠠᠷᠯᠠᠭᠤᠯᠤᠭᠰᠠᠨ ᠪᠢᠯᠡ᠃
ᠠᠩᠬᠠᠨ ᠣ ᠳᠤᠷᠠᠯᠠᠯ ᠢ ᠪᠤᠯᠢᠶᠠᠭᠰᠠᠨ ᠨᠠᠮᠤᠭᠤᠬᠠᠨ ᠰᠢᠷᠠ ᠪᠦᠷᠦᠢ᠂ ᠡᠮᠵᠡᠭᠯᠡᠵᠦ ᠤᠶᠠᠷᠠᠬᠤ ᠶ᠋ᠢ ᠮᠡᠳᠡᠷᠡᠭᠡ ᠦᠭᠡᠢ ᠠᠯᠳᠠᠷᠠᠢᠬᠠᠨ ᠨᠠᠰᠤᠨ ᠳᠠᠭᠠᠨ ᠰᠢᠯᠢ ᠶᠢᠨ ᠳᠡᠭᠵᠢᠨ ᠢᠨᠵᠠᠭᠠ ᠰᠢᠭ᠋ ᠬᠠᠷᠠ ᠨᠢᠳᠦᠨ ᠬᠡᠤᠬᠡᠨ ᠳᠠᠢ ᠬᠠᠷᠠᠴᠠ ᠪᠡᠷ ᠨᠢ ᠲᠤᠭᠯᠠᠵᠤ᠂ ᠬᠠᠯᠢᠭᠠᠳ ᠢᠷᠡᠬᠦ ᠶᠠᠩᠰᠢᠶᠠᠯᠳᠠᠢ ᠳᠠᠢ ᠰᠦᠢᠳ ᠪᠤᠯᠤᠨ ᠳᠡᠷᠪᠡᠬᠦ ᠳ᠋ᠤ ᠬᠠᠭ ᠤᠨ ᠨᠠᠭᠤᠷ ᠮᠢᠨᠢ ᠨᠠᠳᠠ ᠫᠠᠳ ᠦᠭᠡᠢ ᠭᠡᠬᠦ ᠰᠢᠭ ᠶᠠᠯᠢᠮ ᠬᠦᠩᠭᠡᠬᠡᠨ ᠡᠬᠡᠰᠢᠭ ᠢᠶᠡᠷ ᠨᠠᠮ ᠳᠤᠯᠬᠢᠶᠠᠯᠠᠵᠦ ᠯᠠ ᠪᠠᠢᠯᠠ᠁
ᠤᠷᠢᠳᠤ ᠳ᠋ᠤ ᠨᠠᠷᠠᠨ ᠰᠠᠷᠠᠨ ᠬᠢᠯᠪᠠᠵᠦ᠂ ᠴᠠᠰᠤ ᠴᠠᠭᠠᠨ ᠬᠤᠵᠢᠷ ᠠᠰᠬᠠᠷᠠᠨ ᠤᠳᠤᠳ ᠤᠨ ᠭᠡᠭᠡ ᠪᠠᠷ ᠬᠡᠰᠢᠭ ᠢᠪᠡᠭᠡᠭᠰᠡᠨ ᠬᠠᠭ ᠤᠨ ᠨᠠᠭᠤᠷ ᠮᠢᠨᠢ ᠦᠷ ᠰᠠᠯᠬᠤ ᠪᠠᠷ ᠪᠠᠢᠭᠠᠯᠢ ᠶᠢᠨ ᠤᠩᠭᠤᠳ ᠳᠠᠷᠬᠠᠳ ᠳᠠᠭᠠᠨ ᠪᠠᠢᠭᠰᠠᠨ ᠢᠶᠠᠨ ᠬᠠᠢᠷᠠᠯᠠᠵᠦ᠂ ᠠᠷᠭᠠᠯ ᠳᠡᠭᠦᠳᠡᠭ ᠠᠪᠤ ᠶᠢᠨ ᠮᠦᠷ ᠳᠠᠢ ᠠᠷᠤ ᠶᠢᠨ ᠴᠠᠭᠠᠨ ᠳᠡᠷᠡᠰᠦᠨ ᠴᠠᠭᠠᠨᠠ ᠳᠡᠭᠷᠢ ᠶᠢᠨ ᠬᠤᠷᠠ ᠳ᠋ᠤ ᠭᠤᠨᠢᠭ ᠤᠷᠬᠢᠨ ᠨᠢᠯᠪᠤᠰᠤᠨ ᠳᠤᠮᠳᠠ ᠪᠦᠷᠦᠯᠵᠠᠨᠠ᠃
ᠨᠤᠳᠤᠭ ᠤᠨ ᠪᠤᠭᠤᠷᠤᠯᠴᠤᠳ ᠨᠡᠭᠦᠳᠡᠯ ᠰᠢᠪᠠᠭᠤᠳ ᠢ ᠰᠢᠷᠳᠡᠨ︽ ᠬᠤᠨ ᠰᠢᠪᠠᠭᠤ ᠮᠢᠨᠢ ᠡᠷᠬᠢᠭᠡᠷᠡᠢ᠂ ᠬᠠᠭ ᠤᠨ ᠨᠠᠭᠤᠷ ᠮᠢᠨᠢ ᠰᠡᠷᠭᠦᠭᠡᠷᠡᠢ︾ ᠬᠡᠮᠡᠨ ᠴᠠᠭᠠ ᠡᠷᠭᠦᠨᠡ᠃
ᠬᠠᠭ ᠤᠨ ᠨᠠᠭᠤᠷ ᠮᠢᠨᠢ ᠶᠠᠭᠤ ᠭᠡᠵᠦ ᠭᠤᠨᠢᠯᠠ᠁
ᠭᠤᠷᠪᠠ
ᠡᠷᠬᠡ ᠴᠢᠯᠦᠭᠡᠨ ᠣ ᠬᠢᠵᠠᠭᠠᠷ ᠦᠭᠡᠢ ᠬᠦᠬᠡ ᠲᠡᠭᠷᠢ ᠠᠭᠤᠵᠢᠮᠬᠠᠨ ᠴᠡᠯᠡᠢᠨᠡ᠃ ᠬᠠᠭ ᠤᠨ ᠨᠠᠭᠤᠷ ᠮᠢᠨᠢ ᠬᠦᠦ ᠶᠢᠨ ᠵᠡᠭᠦᠳᠦᠨ ᠳ᠋ᠤ ᠨᠤᠮᠢᠨ ᠳᠤᠯᠬᠢᠶᠠ ᠪᠡᠷ ᠰᠠᠴᠤᠷᠠᠩᠬᠠᠨ ᠪᠠᠢᠨᠠ᠃ ᠠᠪᠤ ᠶᠢᠨ ᠮᠢᠨᠢ ᠤᠢᠯᠡᠰ ᠠᠮᠢᠳᠤᠷᠠᠯ ᠬᠡᠮᠡᠨ ᠵᠦᠳᠡᠭᠰᠡᠨ ᠰᠡᠳᠬᠢᠯ᠂ ᠡᠵᠢ ᠶᠢᠨ ᠮᠢᠨᠢ ᠦᠷᠡ ᠰᠢᠪᠠᠭᠤ ᠪᠠᠨ ᠬᠦᠯᠢᠶᠠᠭ᠍ᠰᠡᠨ ᠡᠩᠰᠡᠷᠡᠯ᠂ ᠦᠷᠡ ᠶᠢᠨ ᠬᠠᠷᠢ ᠨᠤᠳᠤᠭ ᠠᠴᠠ ᠬᠠᠭ ᠤᠨ ᠨᠠᠭᠤᠷ ᠭᠡᠬᠦ ᠲᠡᠮᠡᠤᠯᠡᠯ᠁ ᠨᠢᠭᠡᠨ ᠦᠩᠭᠡ ᠶᠢᠨ ᠰᠡᠳᠬᠢᠯ ᠦᠨ ᠪᠤᠳᠤᠭ ᠢ ᠨᠠᠢᠷᠠᠨᠠ᠃
ᠤᠳᠤ ᠪᠢ ᠪᠤᠴᠠᠵᠦ ᠪᠤᠢ ᠠᠶᠠᠨ ᠠᠴᠠ ᠪᠤᠷᠬᠢᠯᠵᠦ ᠪᠤᠢ ᠨᠢᠯᠪᠤᠰᠤᠨ ᠳᠦ ᠪᠦᠷᠦᠯᠵᠡᠬᠦ ᠠᠩᠭᠠᠯ ᠪᠠᠭᠠ ᠨᠠᠰᠤᠨ ᠳᠠᠭᠠᠨ ᠂ ᠬᠠᠭ ᠤᠨ ᠨᠠᠭᠤᠷ ᠤᠨ ᠬᠦᠪᠡᠭᠡᠨ ᠳᠦ ᠶᠠᠪᠠᠭᠠᠨ ᠰᠠᠭᠤᠵᠦ᠂ ᠨᠤᠲᠤᠭ ᠤᠨ ᠰᠠᠯᠬᠢᠨ ᠳ᠋ᠤ ᠰᠢᠪᠰᠢᠭᠤᠯᠤᠨ᠂ ᠪᠤᠷᠬᠠᠨ ᠳ᠋ᠤ ᠤᠳᠤᠭᠰᠠᠨ ᠡᠵᠢ ᠳᠡᠬᠡᠨ ᠪᠤᠳᠤᠭᠰᠠᠨ ᠪᠦᠬᠦᠨ ᠢᠶᠡᠨ ᠶᠠᠷᠢᠬᠤ ᠳᠤ︽ ᠡᠯᠡ ᠬᠠᠯᠠ ᠠᠮᠢᠳᠤᠷᠠᠯ ᠳᠤ ᠢᠨᠢᠶᠡᠮᠰᠦᠭᠯᠡᠨ ᠬᠠᠨᠳᠤᠵᠦ ᠪᠠᠢ︾ ᠭᠡᠬᠦ ᠡᠵᠢ ᠶᠢᠨ ᠤᠶᠠᠬᠠᠨ ᠪᠦᠪᠠᠢ ᠠᠬᠢᠨ ᠰᠤᠨᠤᠷᠲᠠᠬᠤ ᠰᠢᠭ᠋ ᠪᠤᠯᠤᠯᠠ᠃
ᠤᠤᠭᠠᠯ ᠨᠤᠲᠤᠭ ᠤᠨ ᠶᠠᠭᠠᠬᠠᠨ ᠪᠦᠷᠦᠢ ᠰᠡᠳᠬᠢᠯ ᠤᠶᠠᠰᠬᠠᠨ ᠳᠤᠷᠠᠳᠬᠠᠯ ᠤᠨ ᠳᠤᠮᠳᠠ ᠪᠦᠵᠢᠭᠦᠯᠬᠦ ᠳ᠋ᠤ ᠰᠢᠪᠠᠭᠤ ᠶ᠋ᠢ ᠦᠷᠭᠦᠭᠡᠵᠦ᠂ ᠦᠨᠳᠡᠭᠡ ᠶ᠋ᠢ ᠨᠢ ᠳᠡᠭᠦᠭᠰᠡᠨ ᠲᠡᠨᠡᠭ ᠨᠠᠰᠤᠨ ᠳᠤ ᠤᠰᠤᠨ ᠰᠢᠪᠠᠭᠤᠳ ᠬᠠᠪ ᠬᠠᠯᠠᠭᠤᠬᠠᠨ ᠦᠳᠦ ᠪᠠᠨ ᠪᠡᠯᠡᠭᠯᠡᠭᠡᠳ ᠬᠤᠯᠠ ᠨᠢᠰᠴᠠᠢ᠃
ᠬᠠᠭ ᠤᠨ ᠨᠠᠭᠤᠷ ᠮᠢᠨᠢ ᠶᠠᠭᠤ ᠭᠡᠵᠦ ᠬᠦᠯᠢᠶᠡᠯᠡ᠁
ᠳᠦᠷᠪᠡ
ᠬᠦᠳᠡᠭᠡ ᠭᠡᠷ ᠦᠨ ᠡᠯᠡᠭᠳᠡᠵᠦ ᠬᠠᠭᠤᠴᠢᠷᠠᠭᠰᠠᠨ ᠪᠤᠱᠤᠭᠠ ᠭᠢᠰᠬᠢᠵᠦ᠂ ᠡᠯᠡᠩᠬᠡᠢ ᠰᠢᠷᠭᠠᠯ ᠨᠤᠳᠤᠭ ᠤᠨ ᠢᠶᠠᠨ ᠬᠦᠲᠦᠯ ᠳᠠᠮᠵᠢᠨ ᠠᠶᠠᠷᠯᠠᠬᠤ ᠳᠤ ᠬᠠᠭ ᠤᠨ ᠨᠠᠭᠤᠷ ᠮᠢᠨᠢ ᠰᠦᠨ ᠴᠠᠭᠠᠨ ᠨᠢᠯᠪᠤᠰᠤ ᠪᠡᠷ ᠢᠶᠡᠨ ᠨᠠᠮᠠᠢ᠌ᠢ ᠪᠠᠨ ᠦᠳᠡᠯᠡ᠃ ᠭᠡᠬᠦ ᠳᠦ ᠡᠷᠬᠡ ᠴᠢᠯᠦᠭᠡ᠂ ᠤᠢᠳᠬᠠᠷᠳᠦ ᠪᠤᠳᠤᠯ᠂ ᠠᠭᠤᠳᠠᠮ ᠬᠠᠢᠷᠠ᠂ ᠡᠷᠢᠯ ᠬᠦᠰᠡᠯ ᠵᠡᠷᠭᠡ ᠶᠠᠩᠵᠦ ᠶᠢᠨ ᠦᠡᠩᠭᠡ ᠨᠢ ᠬᠠᠭ ᠤᠨ ᠨᠠᠭᠤᠷ ᠤᠨ ᠳᠤᠯᠬᠢᠶᠠᠨ ᠳᠦ ᠰᠤᠯᠤᠩᠭᠠᠷᠠᠨ ᠬᠠᠷᠠᠭᠳᠠᠭᠰᠠᠨ ᠶᠤᠮ᠃
ᠤᠬᠠᠭᠠᠨ ᠪᠤᠳᠤᠯ ᠮᠢᠨᠢ ᠲᠡᠭᠰᠢᠷᠡᠬᠦ ᠳᠤᠰᠤᠮ ᠦᠷ ᠦᠨ ᠳᠤᠯᠤᠩ ᠨᠢᠭᠡ ᠬᠡᠪ ᠲᠡᠭᠡᠨ ᠲᠤᠶᠠᠭᠠᠷᠠᠵᠦ᠂ ᠦᠳᠡᠰᠢ ᠶᠢᠨ ᠪᠦᠷᠦᠢ ᠤᠨᠳᠤᠤ ᠦᠩᠭᠡ ᠪᠠᠷ ᠰᠢᠷᠭᠠᠯᠳᠤᠨᠠ ᠃ ᠨᠤᠲᠤᠭ ᠤᠨ ᠲᠡᠭᠷᠢ ᠪᠠᠨ ᠪᠠᠷᠠᠭᠠᠯᠠᠬᠤ ᠭᠱᠠᠨᠠ ︽ ᠬᠤᠨ ᠮᠢᠨᠢ ᠡᠷᠬᠢᠭᠡᠷᠡᠢ᠂ ᠨᠠᠭᠤᠷ ᠮᠢᠨᠢ ᠰᠡᠷᠭᠦᠭᠡᠷᠡᠢ︾ ᠭᠡᠬᠦ ᠰᠢᠷᠤᠩᠬᠠᠢ ᠤᠷᠲᠤ ᠶᠢᠨ ᠳᠠᠭᠤᠤ ᠶᠢᠨ ᠴᠦᠷᠬᠦᠯᠡᠭᠡ ᠰᠢᠭ ᠰᠡᠳᠬᠢᠯ ᠢ ᠠᠷᠭᠠᠳᠠᠨᠠ᠃
ᠠᠮᠢᠳᠤᠷᠠᠯ ᠤᠨ ᠪᠤᠷᠤ ᠲᠡᠤᠬᠡ ᠶᠠᠭᠤ ᠨᠢᠭᠡ ᠶ᠋ᠢ ᠰᠡᠳᠬᠢᠵᠦ ᠪᠤᠳᠤᠯᠭᠠᠰᠢᠷᠠᠭᠤᠯᠤᠨ᠂ ᠴᠡᠯ ᠵᠠᠯᠠᠭᠤ ᠨᠠᠰᠤ ᠪᠠᠨ ᠳᠤᠷᠠᠳᠠᠢ ᠵᠤᠷᠢᠭᠤᠯᠤᠭᠰᠠᠨ ᠬᠠᠭ ᠤᠨ ᠨᠠᠭᠤᠷ ᠤᠨ ᠴᠠᠭ ᠦᠶᠡ ᠵᠦᠩ ᠢᠶᠡᠷ ᠵᠢᠷᠦᠬᠡᠨ ᠡᠬᠡᠰᠢᠭ ᠢ ᠮᠢᠩᠭᠠᠨ ᠠᠷᠠᠳ ᠤᠨ ᠳᠠᠭᠤᠨ ᠳᠤ ᠬᠠᠩᠬᠢᠨᠠᠲᠠᠯᠠ ᠬᠤᠭᠤᠷᠳᠠᠨᠠ᠃
ᠠᠶᠠ᠂ ᠡᠮᠵᠡᠭᠬᠡᠨ ᠪᠤᠷᠤ ᠵᠢᠷᠦᠬᠡ ᠮᠢᠨᠢ᠂ ᠡᠪᠡᠢ ᠬᠦᠬᠡᠷᠦᠬᠦᠢ ᠬᠠᠭ ᠤᠨ ᠨᠠᠭᠤᠷ ᠮᠢᠨᠦ᠃ ᠪᠢ ᠲᠠᠨ ᠳᠠᠭᠠᠨ ᠨᠤᠲᠤᠭ ᠤᠨ ᠨᠡᠷᠡᠲᠦ ᠨᠠᠢᠷᠠᠭᠴᠢ ᠠᠬᠠ ᠶᠢᠨ ᠳᠠᠭᠤᠤ ᠶᠢᠨ ᠰᠢᠯᠦᠭ︽ ᠮᠦᠷᠦᠭᠡᠳᠦᠯ︾ ᠡᠴᠠ ᠨᠢᠭᠡᠨ ᠱᠠᠳ ᠢ ᠠᠶᠠᠯᠠᠭᠤᠯᠵᠦ ᠲᠠᠢᠳᠬᠤᠷᠠᠯ ᠲᠠᠭᠠᠯᠠᠯ ᠬᠦᠰᠡᠮᠦ᠁
ᠬᠤᠨ ᠣ ᠵᠢᠭᠦᠷ ᠤᠷᠭᠤᠭᠠᠰᠠᠢ ᠳ᠋ᠠ
ᠬᠤᠨ ᠣ ᠵᠢᠭᠦᠷ ᠤᠷᠭᠤᠭᠠᠰᠠᠢ ᠳ᠋ᠠ
ᠬᠤᠷᠤᠮᠬᠠᠨ ᠵᠠᠭᠤᠷᠠ ᠬᠦᠷᠦᠭᠡᠳ ᠤᠴᠢᠬᠤ ᠦᠭᠡᠢ ᠤᠤ
ᠬᠤᠨ ᠣ ᠵᠢᠭᠦᠷ ᠤᠷᠭᠤᠬᠤ ᠦᠭᠡᠢ ᠤᠴᠢᠷ ᠠᠴᠠ ᠡ ᠬᠦᠢ
ᠬᠤᠷᠭᠤᠳᠠᠵᠦ ᠡᠨᠳᠡ ᠡᠴᠡ ᠪᠠᠨ ᠰᠠᠷᠠᠪᠴᠢᠯᠠᠭᠠᠳ ᠪᠠᠢᠨᠠ ᠡ ᠬᠦᠢ
᠁
ᠬᠠᠭ ᠤᠨ ᠨᠠᠭᠤᠷ ᠮᠢᠨᠢ ᠶᠠᠭᠤ ᠭᠡᠵᠦ ᠳᠠᠭᠤᠯᠠᠯᠠ᠁
