-
16658
ᠥᠪᠥᠷ ᠮᠣᠩᠭᠣᠯ ᠬᠡᠯᠡᠨ ᠣ ᠤᠰᠤᠲᠤᠨ ᠮᠥᠬᠥᠬᠦ ᠵᠢᠨ ᠲᠠᠪᠤᠨ ᠬᠡᠯᠪᠡᠷᠢ
2018-01-15 22:52
406
0
ᠥᠪᠥᠷ ᠮᠣᠩᠭᠣᠯ ᠬᠡᠯᠡᠨ ᠣ ᠥᠨᠥᠳᠥᠷ ᠦᠨ ᠪᠠᠢᠳᠠᠯ ᠳ᠋ᠥ ᠮᠣᠩᠭᠣᠯᠴᠤᠳ ᠪᠦᠬᠦᠨ ᠰᠠᠨᠠᠭᠠ ᠪᠣᠯᠵᠤ ᠪᠠᠢᠭᠠ ᠪᠣᠯᠪᠠᠴᠤ ᠲᠡᠭᠦᠨ ᠤ ᠤᠯᠠᠮ ᠵᠢᠠᠷ ᠰᠤᠯᠠᠷᠠᠨ ᠮᠠᠭᠤᠲᠠᠵᠤ ᠪᠠᠢᠭᠠ ᠪᠠᠢᠳᠠᠯ ᠨᠢ ᠬᠥᠮᠥᠰ ᠦᠨ ᠬᠦᠰᠡᠯ ᠳ᠋ᠥ ᠲᠠᠭᠠᠯᠠᠭᠳᠠᠮᠠᠷ ᠬᠠᠷᠢᠭᠤᠯᠲᠠ ᠲᠠᠢ ᠪᠣᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠨᠠ᠃ ᠶᠠᠭ ᠡᠢᠮᠦ ᠡᠴᠡ ᠵᠠᠷᠢᠮ ᠨᠢ ᠣᠳᠣ ᠲᠠᠪᠢᠨ ᠵᠢᠯ ᠪᠤᠢ ᠬᠡᠮᠡᠨ ᠭᠤᠲᠤᠷᠠᠵᠤ᠂ ᠪᠠᠰᠠ ᠵᠠᠷᠢᠮ ᠨᠢ ᠶᠠᠭᠠᠬᠢᠬᠤᠪ᠂ ᠴᠡᠪᠡᠷᠬᠡᠨ ᠶᠠᠷᠢᠵᠤ ᠪᠠᠢᠪᠠᠯ ᠲᠡᠢᠮᠦ ᠲᠠᠪᠢᠯᠠᠩ ᠳ᠋ᠥ ᠦᠯᠦ ᠬᠦᠷᠬᠦ ᠪᠤᠢ ᠬᠡᠮᠡᠨ ᠪᠠᠷᠳᠠᠮ ᠪᠣᠳᠣᠵᠤ ᠵᠥᠭᠡᠯᠡᠨ ᠳᠤᠤᠭᠠᠷᠤᠭᠰᠠᠭᠠᠷ ᠨᠡᠢᠭᠡᠮ ᠦᠨ ᠦᠨᠡᠨ ᠣ ᠡᠮᠦᠨᠡ ᠰᠥᠬᠥᠷᠡᠨᠡ᠃ ᠬᠡᠷᠪᠡ ᠪᠣᠰᠣᠭᠠ ᠮᠣᠩᠭᠣᠯ ᠦᠰᠦᠭ ᠮᠠᠨᠢ ᠦᠨᠡᠬᠡᠷ ᠥᠪᠥᠷ ᠮᠣᠩᠭᠣᠯ ᠳ᠋ᠥ ᠰᠥᠨᠥᠬᠦ ᠳ᠋ᠥ ᠬᠥᠷᠥᠨᠡ ᠭᠡᠪᠡᠯ ᠲᠡᠷᠡ ᠨᠢ ᠴᠣᠬᠣᠮ ᠶᠠᠭᠠᠬᠢᠵᠤ ᠰᠥᠨᠥᠳᠡᠭ ᠪᠣᠯ︖ ᠲᠤᠩᠭᠠᠨ ᠪᠣᠳᠣᠪᠠᠯ ᠲᠡᠭᠦᠨ ᠳ᠋ᠥ ᠳᠠᠷᠠᠭᠠᠬᠢ ᠮᠡᠲᠦ 5 ᠵᠦᠢᠯ ᠦᠨ ᠰᠥᠨᠥᠬᠦ ᠠᠷᠭᠠ ᠪᠤᠢ ᠪᠠᠢᠬᠠ᠃
ᠰᠥᠨᠥᠬᠦ ᠬᠡᠯᠪᠡᠷᠢ 1᠂
ᠲᠡᠷᠡ ᠨᠤᠲᠤᠭ ᠤᠨ ᠲᠡᠢᠮᠦ ᠨᠢᠭᠡᠨ ᠮᠠᠯᠵᠢᠬᠤ ᠬᠣᠰᠢᠭᠤ ᠪᠠᠷ ᠶᠠᠪᠤᠵᠤ ᠪᠠᠢᠬᠤ ᠳ᠋ᠥ ᠡᠢᠮᠦ ᠨᠢᠭᠡᠨ ᠰᠡᠳᠬᠢᠯ ᠳᠣᠭᠳᠣᠯᠤᠭᠤᠯᠤᠮᠠ ᠶᠠᠪᠤᠳᠠᠯ ᠳ᠋ᠥ ᠳᠣᠬᠢᠶᠠᠯᠠᠭᠳᠠᠭᠰᠠᠨ ᠪᠢᠯᠡ᠃ ᠬᠣᠰᠢᠭᠤ ᠵᠠᠰᠠᠭ ᠤᠨ ᠨᠢᠭᠡᠨ ᠪᠠᠢᠭᠤᠯᠤᠯᠭᠠ ᠲᠣ ᠠᠬᠠᠮᠠᠳ ᠨᠠᠰᠤᠲᠠᠢ ᠠᠷᠪᠠᠨ ᠠᠵᠢᠯᠲᠠᠨ ᠠᠵᠢᠯᠯᠠᠳᠠᠭ ᠪᠠᠢᠵᠠᠢ᠃ ᠡᠷᠬᠡ ᠴᠢᠳᠠᠪᠤᠷᠢ ᠨᠢ ᠪᠠᠭᠠᠲᠠᠢ᠂ ᠡᠳ᠋ ᠮᠥᠩᠭᠥ ᠵᠢᠨ ᠣᠷᠣᠯᠭᠠ ᠦᠭᠡᠢ᠂ ᠲᠡᠦᠬᠡ ᠰᠣᠶᠣᠯ ᠤᠨ ᠬᠡᠳᠦᠨ ᠳᠠᠩᠰᠠ ᠡᠪᠬᠡᠮᠡᠯ ᠢ ᠡᠮᠬᠢᠯᠡᠨ᠂ ᠳ᠋ᠤᠭᠠᠷᠯᠠᠨ᠂ ᠬᠢᠮᠠᠭᠠᠳᠠᠨ ᠡᠳᠦᠷ ᠪᠣᠷᠣᠯᠠᠭᠤᠯᠳᠠᠭ ᠡᠨᠡ ᠵᠢᠭᠠᠬᠠᠨ ᠪᠠᠢᠭᠤᠯᠭᠠ ᠨᠢ ᠡᠷᠲᠡ ᠬᠡᠳᠦᠨ ᠵᠢᠯ ᠡᠴᠡ ᠭᠠᠷ ᠬᠦᠷᠦᠯᠴᠡᠬᠦ ᠦᠭᠡᠢ ᠪᠠᠢᠨᠠ᠂ ᠠᠵᠢᠯᠲᠠᠳ ᠨᠠᠰᠤᠵᠢᠭᠠᠳ ᠠᠵᠢᠯ ᠬᠦᠨᠳᠦᠷᠡᠭᠡᠳ ᠪᠠᠢᠨᠠ ᠭᠡᠵᠦ ᠬᠣᠰᠢᠭᠤᠨ ᠣ ᠪᠣᠯᠪᠠᠰᠤᠨ ᠬᠦᠴᠦᠨ ᠳ᠋ᠥ ᠡᠷᠭᠦᠳᠡᠯ ᠭᠠᠷᠭᠠᠨ᠂ ᠰᠢᠨᠡ ᠵᠠᠯᠠᠭᠤ ᠣᠶᠤᠲᠠᠳ ᠠᠴᠠ ᠪᠠᠨ ᠶᠠᠳᠠᠵᠤ ᠨᠢᠭᠡ ᠶ᠋ᠢ ᠭᠡᠵᠦ ᠭᠤᠶᠤᠴᠢᠯᠠᠭᠰᠠᠨ ᠪᠣᠯᠪᠠᠴᠤ ᠬᠠᠷᠢᠭᠤᠯᠲᠠ ᠦᠭᠡᠢ ᠬᠡᠴᠢᠨᠡᠨ ᠵᠢᠯ ᠪᠣᠯᠵᠠᠢ᠃
2012 ᠣᠨ ᠪᠣᠯᠬᠤ ᠳ᠋ᠥ ᠬᠣᠰᠢᠭᠤ ᠵᠠᠰᠠᠭ ᠤᠨ ᠪᠣᠯᠪᠠᠰᠤᠨ ᠬᠦᠴᠦᠨ ᠣ ᠬᠢᠨᠢ ᠭᠡᠨᠡᠳᠲᠡ ᠰᠠᠨᠠᠭᠠᠨ ᠳ᠋ᠥ ᠣᠷᠣᠭᠰᠠᠨ ᠶᠤᠮ ᠦᠦ᠂ ᠮᠣᠩᠭᠣᠯ ᠬᠡᠯᠡ ᠦᠭᠡᠢ ᠣᠶᠤᠲᠠᠨ ᠥᠬᠢᠨ ᠢ ᠲᠣᠮᠢᠯᠠᠨ ᠢᠷᠡᠭᠦᠯᠪᠡ᠃ ᠨᠠᠰᠤᠲᠠᠢ ᠬᠥᠮᠥᠰ ᠲᠣ ᠶᠡᠷᠦ ᠨᠢ ᠵᠠᠯᠠᠭᠤ ᠬᠥᠮᠥᠨ ᠬᠥᠭᠡᠷᠦᠬᠦᠢᠯᠡᠭᠳᠡᠨ ᠬᠠᠷᠠᠭᠳᠠᠳᠠᠭ᠃ ᠪᠠᠢᠭᠤᠯᠭᠠ ᠵᠢᠨ ᠠᠷᠪᠠᠨ ᠠᠵᠢᠯᠲᠠᠨ ᠳ᠋ᠥ ᠠᠰᠢᠭᠦᠢ ᠲᠣᠮᠣ ᠰᠣᠨᠢᠨ ᠪᠣᠯᠵᠤ ᠢᠷᠡᠭᠰᠡᠨ ᠡᠨᠡ ᠣᠶᠤᠲᠠᠨ ᠥᠬᠢᠨ ᠢ ᠬᠢᠲᠠᠳ ᠭᠡᠵᠦ ᠢᠯᠭᠠᠪᠤᠷᠢᠯᠠᠭᠰᠠᠨ ᠬᠥᠮᠥᠨ ᠦᠭᠡᠢ᠂ ᠵᠠᠯᠠᠭᠤ ᠣᠶᠤᠲᠠᠨ ᠴᠦ ᠤᠬᠠᠭᠠᠨᠲᠠᠢ ᠰᠠᠷᠠᠭᠤᠯ ᠥᠬᠢᠨ ᠪᠠᠢᠵᠤ᠂ ᠠᠪᠠᠭᠠ᠂ ᠡᠭᠡᠴᠢ ᠭᠡᠳ ᠵᠥᠭᠡᠯᠡᠨ ᠵᠥᠭᠡᠯᠡᠨ ᠳᠤᠤᠭᠠᠷᠴᠤ᠂ ᠰᠠᠩᠪᠦ ᠠᠬᠠ ᠵᠢᠨ ᠳ᠋ᠥ ᠴᠠᠢ ᠤᠤᠭᠤᠵᠤ᠂ ᠰᠠᠮᠠᠭᠠ ᠡᠭᠡᠴᠢ ᠵᠢᠨ ᠳ᠋ᠥ ᠦᠳᠡᠯᠡᠵᠦ᠂ ᠽᠠᠨᠳᠠᠨ ᠡᠭᠡᠴᠢ ᠵᠢᠨ ᠬᠢ ᠪᠠᠷ ᠨᠢᠭᠡ ᠬᠣᠨᠣᠵᠤ᠂ ᠲᠥᠷᠥᠭᠰᠡᠨ ᠡᠴᠡ ᠢᠯᠡᠭᠦᠦ ᠳᠣᠲᠣᠨᠣᠴᠢᠯᠠᠭᠳᠠᠵᠤ᠂ ᠰᠠᠳᠤᠨ ᠠᠴᠠ ᠳᠤᠲᠠᠭᠤ ᠦᠭᠡᠢ ᠥᠬᠥᠭᠡᠷᠳᠡᠭᠳᠡᠭᠰᠡᠭᠡᠷ᠂ ᠨᠢᠭᠡ ᠮᠡᠳᠡᠬᠦ ᠳ᠋ᠥ ᠰᠠᠨᠠᠭᠠ ᠰᠠᠢᠲᠠᠢ ᠬᠡᠦᠬᠡᠨ᠂ ᠠᠵᠢᠯ ᠰᠠᠢᠲᠠᠢ ᠥᠬᠢᠨ ᠭᠡᠵᠦ ᠡᠷᠡᠬᠡᠢ ᠭᠠᠷᠭᠠᠨ ᠮᠠᠭᠲᠠᠭᠤᠯᠬᠤ ᠪᠣᠯᠵᠠᠢ᠃
ᠡᠢᠮᠦ ᠰᠠᠢᠬᠠᠨ ᠥᠬᠢᠨ᠂ ᠢᠩᠭᠢᠵᠦ ᠰᠠᠢᠨ ᠠᠵᠢᠯᠯᠠᠳᠠᠭ ᠬᠡᠦᠬᠡᠳ᠂ ᠮᠣᠩᠭᠣᠯ ᠬᠡᠯᠡ ᠦᠭᠡᠢ ᠨᠢ ᠬᠥᠭᠡᠷᠦᠬᠦᠢ ᠶᠤᠮ ᠠ ᠭᠡᠳ᠂ ᠬᠤᠷᠠᠯ ᠤᠨ ᠡᠳᠦᠷ ᠲᠣᠪᠴᠢᠶᠠᠨ ᠳᠠᠷᠤᠭᠠ ᠮᠣᠳᠣᠨ ᠬᠡᠯᠡ ᠪᠠᠷ ᠬᠢᠲᠠᠳ ᠵᠢᠠᠷ ᠶᠠᠷᠢᠵᠤ ᠡᠬᠢᠯᠡᠪᠡ᠃ ᠬᠡᠭᠡᠷᠡ ᠵᠢᠨ ᠪᠠᠢᠴᠠᠭᠠᠯᠲᠠ ᠪᠠᠷ ᠣᠴᠢᠭᠰᠠᠨ ᠮᠢᠨᠤ ᠡᠮᠦᠨᠡ ᠲᠣᠪᠴᠢᠶᠠᠨ ᠳᠠᠷᠤᠭᠠ ᠮᠠᠨᠢ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠭᠠᠳ︽ ᠠ᠂ ᠵᠡᠭᠧ ᠵᠡᠭᠧ᠂ ᠱᠢᠶᠣᠣ ᠵᠠᠩ ᠪᠦᠬᠦᠢ ᠮᠡᠩᠭᠦᠶ᠋ᠢ ᠮᠠ︾ ᠯᠡ ᠭᠡᠳ ᠠᠨᠠᠢᠬᠠᠨ ᠮᠡᠳᠡᠳᠡᠭ ᠬᠢᠲᠠᠳ ᠬᠡᠯᠡ ᠪᠡᠨ ᠳᠥᠷᠪᠡᠳᠦᠭᠡᠷ ᠠᠶᠠᠯᠭᠤ ᠪᠠᠷ ᠴᠣᠯᠭᠢᠭᠤᠯᠵᠤ ᠡᠬᠢᠯᠡᠪᠡ᠃
ᠰᠥᠨᠥᠬᠦ ᠬᠡᠯᠪᠡᠷᠢ 2᠂
ᠪᠡᠭᠡᠵᠢᠩ ᠶᠡᠬᠡ ᠰᠤᠷᠭᠠᠭᠤᠯᠢ᠂ ᠲᠣᠣᠺᠢᠥ ᠶᠡᠬᠡ ᠰᠤᠷᠭᠠᠭᠤᠯᠢ᠂ ᠨᠢᠦ᠋ ᠶᠥᠷᠺ ᠶᠡᠬᠡ ᠰᠤᠷᠭᠠᠭᠤᠯᠢ ᠭᠡᠵᠦ ᠪᠠᠢᠳᠠᠭ᠃ ᠪᠠᠰᠠ ᠵᠢᠭᠠᠬᠠᠨ ᠲᠠᠲᠠᠭᠠᠳ ᠶᠠᠷᠢᠬᠤ ᠳ᠋ᠥ ᠭᠢᠷᠢᠨ ᠶᠡᠬᠡ ᠰᠤᠷᠭᠠᠭᠤᠯᠢ᠂ ᠬᠠᠷᠠᠮᠥ᠋ᠷᠡᠨ ᠶᠡᠬᠡ ᠰᠤᠷᠭᠠᠭᠤᠯᠢ ᠭᠡᠵᠦ ᠣᠯᠠᠨ ᠣᠯᠠᠨ ᠪᠠᠢᠳᠠᠭ᠃ ᠬᠡᠨ ᠨᠢ ᠴᠤ ᠲᠡᠭᠦᠨ ᠳ᠋ᠥ ︽ ᠤᠨ ︾ ᠨᠡᠮᠡᠵᠦ ᠳᠠᠭᠤᠳᠠᠭᠠ ᠦᠭᠡᠢ᠃ ᠬᠥᠬᠡᠬᠣᠲᠠ ᠦᠨᠳᠦᠰᠦᠲᠡᠨ ᠣ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠵᠢᠨ ᠬᠢᠨ ᠬᠠᠷᠢᠨ ᠬᠥᠬᠡᠬᠣᠲᠠ ᠵᠢᠨ ᠦᠨᠳᠦᠰᠦᠲᠡᠨ ᠣ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠭᠡᠵᠦ︽ ᠵᠢᠨ ᠤᠨ ᠤ ︾ ᠳᠠᠭᠠᠯᠳᠤᠭᠤᠯᠤᠨ ᠬᠠᠮᠢᠶᠠᠳᠠᠭᠤᠯᠤᠨ ᠳᠠᠭᠤᠳᠠᠬᠤ ᠪᠠᠷ ᠶᠡᠬᠡᠯᠡ ᠠᠭᠤᠷᠯᠠᠵᠤ᠂ ᠬᠥᠬᠡᠬᠣᠲᠠ ᠵᠢᠨ ᠪᠢᠰᠢ᠂ ᠥᠪᠥᠷ ᠮᠣᠩᠭᠣᠯ ᠤᠨ ᠬᠥᠬᠡᠬᠣᠲᠠ ᠦᠨᠳᠦᠰᠦᠲᠡᠨ ᠣ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠰᠢᠦ ᠳ᠋ᠡ ᠭᠡᠵᠦ ᠲᠣᠳᠣᠷᠬᠠᠢᠯᠠᠳᠠᠭ ᠭᠡᠨᠡ᠃ ᠳᠠᠮ ᠤᠨ ᠰᠣᠨᠣᠰᠤᠯᠲᠠ ᠶ᠋ᠢ ᠦᠨᠡᠨ ᠭᠡᠵᠦ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠢᠯᠡ᠂ ᠭᠡᠪᠡᠴᠦ ᠬᠠᠷᠢᠨ ᠮᠠᠨ ᠣ ᠳ᠋ᠥ ᠨᠢᠭᠡ ᠲᠡᠢᠮᠦ︽ ᠤᠨ︾ ᠭᠡᠳᠡᠭ ᠵᠢᠠᠨ ᠮᠠᠷᠲᠠᠯ ᠦᠭᠡᠢ ᠵᠢᠭᠢᠷᠢᠭᠯᠡᠨ ᠨᠡᠮᠡᠵᠦ ᠳᠠᠰᠤᠭᠰᠠᠨ ᠲᠡᠢᠮᠦ ᠨᠢᠭᠡᠨ ᠠᠢᠬᠤᠪᠲᠤᠷ ᠶᠡᠬᠡ ᠰᠤᠷᠭᠠᠭᠤᠯᠢ ᠪᠠᠢᠵᠤ᠂ ᠲᠡᠨᠳᠡᠬᠢ ᠵᠢᠨ ᠫᠷᠣᠹᠧᠰᠰᠣᠷ ᠴᠣᠯᠠ ᠲᠠᠢ ᠳ᠋ᠣᠺᠲ᠋ᠣᠷ ᠪᠠᠲᠤᠯᠠᠭᠰᠠᠨ ᠡᠷᠳᠡᠮᠲᠡᠳ ᠨᠢ ᠠᠭᠤᠯᠵᠠᠯᠳᠠᠬᠤ ᠪᠠᠷ︽ ᠲᠣᠯᠣᠭᠠᠢ ᠲᠣᠯᠣᠭᠠᠢ ᠪᠠᠨ ᠬᠢᠷᠭᠠᠵᠤ ︾ ᠠᠮᠤᠷ ᠮᠡᠨᠳᠦ ᠪᠠᠨ ᠠᠰᠠᠭᠤᠨ ᠮᠡᠨᠳᠦᠴᠢᠯᠡᠨ ᠵᠣᠯᠭᠠᠯᠳᠤᠳᠠᠭ ᠬᠠᠴᠢᠨ ᠭᠠᠢᠬᠠᠯᠲᠠᠢ ᠰᠤᠷᠲᠠᠬᠤᠨ ᠲᠠᠢ ᠶᠤᠮ ᠪᠢᠯᠡ᠃
ᠬᠠᠷᠸᠠᠷᠲ ᠠᠴᠠ ᠬᠠᠷᠢᠵᠤ ᠢᠷᠡᠭᠰᠡᠨ ᠡᠷᠳᠡᠮᠲᠡᠨ ᠪᠠᠭᠰᠢ ᠪᠠᠯᠳᠠᠨᠫᠥ᠋ᠷᠪᠦ ᠫᠷᠣᠹᠧᠰᠰᠣᠷ ᠬᠢᠴᠢᠶᠡᠯ ᠦᠨ ᠵᠠᠪᠰᠠᠷ ᠠᠰᠠᠷ ᠤᠨ ᠭᠤᠯᠳᠤᠩ ᠳ᠋ᠥ ᠮᠧᠷᠸᠢᠨ ᠡᠴᠡ ᠢᠷᠡᠭᠰᠡᠨ ᠮᠠᠩᠯᠠᠢᠪᠠᠭᠠᠲᠤᠷ ᠪᠠᠭᠰᠢ ᠲᠠᠢ ᠬᠠᠯᠵᠠ ᠲᠠᠭᠠᠷᠠᠨ ᠠᠭᠤᠯᠵᠠᠯᠳᠠᠪᠠ᠃
︽ ᠥ᠂ ᠰᠠᠢᠨ ᠪᠠᠢᠨᠠ ᠦᠦ᠂ ᠮᠠ ᠪᠠᠭᠰᠢ ᠠ︾ ᠭᠡᠳ ᠪᠠᠯᠳᠠᠨᠫᠥ᠋ᠷᠪᠦ ᠫᠷᠣᠹᠧᠰᠰᠣᠷ ᠤᠷᠢᠳᠠᠪᠠᠷ ᠬᠢᠷᠭᠠᠵᠤ ᠠᠮᠵᠢᠬᠤ ᠳ᠋ᠥ᠂︽ ᠪᠠ ᠪᠠᠭᠰᠢ ᠬᠢᠴᠢᠶᠡᠯ ᠲᠠᠢ ᠪᠠᠢᠭᠰᠠᠨ ᠶᠤᠮ ᠦᠦ᠂ ᠬᠠ ᠬᠠ︾ ᠭᠡᠵᠦ ᠮᠠᠩᠯᠠᠢᠪᠠᠭᠠᠲᠤᠷ ᠪᠠᠭᠰᠢ ᠠᠯᠳᠠᠯ ᠦᠭᠡᠢ ᠬᠠᠷᠢᠭᠤ ᠬᠢᠷᠭᠠᠪᠠ᠃
ᠳ᠋ᠠᠢ ᠰᠡᠴᠡᠨ ᠵᠢᠠᠷ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠲᠠᠢ ᠠᠭᠤᠯᠵᠠᠯᠳᠠᠬᠤ ᠪᠠᠷ︽ ᠶᠢ ᠬᠤᠳᠠ ᠠ᠂ ᠪᠢ ᠨᠠᠴᠢᠨ ᠱᠣᠩᠬᠣᠷ ᠲᠣᠭᠣᠨᠣ ᠳ᠋ᠥ ᠰᠠᠭᠤᠭᠰᠠᠨ ᠭᠡᠳ ᠵᠡᠭᠦᠳᠦᠯᠡᠭᠰᠡᠨ ᠰᠢᠦ᠂ ᠬᠠ ᠬᠠ ᠬᠠ ︾ ᠭᠡᠵᠦ ᠮᠡᠨᠳᠦᠴᠢᠯᠡᠨ ᠠᠭᠤᠯᠵᠠᠭᠰᠠᠨ ᠪᠣᠯᠪᠠ ᠦᠦ︖ ᠡᠰᠡᠬᠦᠯᠡ ᠴᠢᠩᠭᠢᠰ ᠬᠠᠭᠠᠨ ᠵᠠᠮᠤᠬᠠ ᠲᠠᠢ ᠠᠭᠤᠯᠵᠠᠬᠤ ᠳᠠᠭᠠᠨ ᠵᠠᠮᠤᠬᠠ ᠠᠨᠳᠠ ᠠ ᠪᠢᠰᠢ︽ ᠵᠠ ᠠᠨᠳᠠ ᠠ᠂ ᠰᠠᠢᠬᠠᠨ ᠡᠪᠦᠯᠵᠢᠵᠦ ᠪᠠᠢᠨᠠ ᠦᠦ︾ ᠭᠡᠵᠦ ᠠᠭᠤᠯᠵᠠᠭᠰᠠᠨ ᠴᠤ ᠶᠤᠮ ᠦᠦ᠂ ᠪᠦᠦ ᠮᠡᠳᠡ᠃ ᠭᠡᠨᠡᠳᠲᠡ ᠨᠢᠭᠡ ᠮᠡᠳᠡᠬᠦ ᠪᠠᠷ ᠮᠠᠨ ᠣ ᠥᠪᠥᠷ ᠮᠣᠩᠭᠣᠯᠴᠤᠳ ᠮᠠᠨᠢ ᠰᠢᠶᠣᠣ ᠵᠠᠩ᠂ ᠯᠣᠣ ᠵᠠᠩ ᠭᠡᠳᠡᠭ ᠡᠴᠡ ᠪᠠᠨ ᠯᠤᠤ ᠠ᠂ ᠯᠣᠣ ᠪᠠ ᠭᠡᠵᠦ ᠨᠡᠷᠡ ᠲᠠᠢ ᠬᠥᠮᠥᠨ ᠢ ᠨᠡᠷᠡ ᠨᠢ ᠪᠢᠰᠢ᠂ ᠲᠣᠯᠣᠭᠠᠢ ᠶᠢ ᠨᠢ ᠬᠢᠷᠭᠠᠨ ᠲᠣᠢᠮᠣᠴᠢᠯᠠᠨ ᠳᠠᠭᠤᠳᠠᠳᠠᠭ ᠪᠣᠯᠵᠤ ᠪᠢᠯᠡ᠃
ᠠ᠂ ᠮᠣᠩᠭᠣᠯᠴᠤᠳ ᠲᠣ ᠣᠪᠣᠭ ᠦᠭᠡᠢ ᠶᠤᠮ ᠦᠦ᠂ ᠵᠠ᠂ ᠯᠤᠤ ᠠ ᠭᠡᠬᠦ ᠦᠦ ᠭᠡᠳ ᠭᠡᠬᠦᠯᠵᠬᠦ ᠬᠢᠲᠠᠳ ᠶᠢᠨ ᠳᠠᠭᠤᠳᠠᠯᠭᠠ ᠶᠢ ᠳᠠᠭᠠᠯᠳᠤᠭᠠᠳ᠂ ᠮᠠᠨ ᠮᠣᠩᠭᠣᠯᠴᠤᠳ ᠲᠣᠯᠣᠭᠠᠢ ᠬᠢᠷᠭᠠᠨ ᠮᠡᠨᠳᠦᠴᠢᠯᠡᠵᠦ᠂ ᠲᠡᠭᠦᠨ ᠵᠢᠠᠨ ᠰᠠᠢᠬᠠᠨ ᠬᠦᠨᠳᠦᠯᠡᠵᠦ ᠮᠡᠨᠳᠦᠴᠢᠯᠡᠵᠦ ᠪᠤᠢ ᠭᠡᠵᠦ ᠪᠣᠳᠣᠳᠠᠭ ᠪᠣᠯᠵᠠᠢ᠃ ᠬᠢᠲᠠᠳ ᠰᠣᠶᠣᠯ ᠳ᠋ᠥ ᠬᠢᠲᠠᠳ ᠣᠪᠣᠭ ᠤᠨ ᠰᠠᠢᠬᠠᠨ ᠰᠣᠶᠣᠯ ᠤᠨ ᠰᠢᠰᠲ᠋ᠧᠮ ᠪᠠᠢᠵᠤ᠂ ᠺᠦᠩᠽᠢ ᠵᠢᠨ ᠬᠣᠢᠴᠢᠰ ᠨᠢ ᠺᠦᠩ ᠣᠪᠣᠭ ᠵᠢᠠᠷ ᠪᠠᠬᠠᠷᠬᠠᠯ ᠵᠢᠠᠨ ᠪᠣᠯᠭᠠᠳᠠᠭ᠃ ᠶᠡᠬᠡ ᠵᠸᠦ ᠵᠢᠨ ᠶ᠋ᠢ ᠣᠪᠣᠭ ᠨᠢ ᠲᠡᠭᠦᠨ ᠣ ᠬᠣᠢᠴᠢᠰ ᠤᠨ ᠪᠠᠬᠠᠷᠬᠠᠯ ᠪᠣᠯᠵᠤ᠂ ᠺᠦᠩ᠂ ᠶ᠋ᠢ ᠣᠪᠣᠭᠲᠠᠨ ᠨᠤᠭᠤᠳ ᠥᠪᠡᠷ ᠢ ᠪᠠᠨ ᠲᠠᠨᠢᠯᠴᠠᠭᠤᠯᠬᠤ ᠳ᠋ᠥ︽ ᠮᠢᠶᠠᠨ ᠭᠦᠢ ᠰᠢᠩ ᠺᠦᠩ︵ ᠶ᠋ᠢ︶︾ ᠭᠡᠵᠦ ᠬᠢᠴᠢᠶᠡᠩᠭᠦᠢᠯᠡᠭᠰᠡᠨ ᠬᠡᠯᠡᠯᠭᠡ ᠶ᠋ᠢ ᠬᠡᠷᠡᠭᠯᠡᠬᠦ ᠡᠴᠡ ᠲᠠᠲᠠᠭᠠᠯᠵᠠᠳᠠᠭ᠃ ᠲᠡᠳᠡᠨᠦᠰ ᠺᠦᠩ᠂ ᠶ᠋ᠢ ᠣᠪᠣᠭ ᠢ ᠡᠷᠬᠢᠮ ᠪᠢᠰᠢ ᠭᠡᠵᠦ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ ᠬᠡᠮᠡᠨ ᠬᠢᠴᠢᠶᠡᠳᠡᠭ᠃ ᠪᠤᠰᠤᠳ ᠣᠪᠣᠭ ᠤᠨ ᠬᠢᠲᠠᠳ ᠢᠷᠭᠡᠳ ᠴᠤ ᠭᠡᠰᠡᠨ ᠭᠡᠷ ᠦᠨ ᠴᠠᠳᠢᠭ ᠬᠡᠮᠡᠨ ᠦᠶᠡ ᠦᠶᠡ ᠲᠡᠮᠳᠡᠭᠯᠡᠨ ᠦᠯᠡᠳᠡᠭᠡᠭᠰᠡᠨ ᠭᠡᠷ ᠦᠨ ᠲᠡᠦᠬᠡ ᠪᠢᠴᠢᠭᠡᠰᠦ ᠪᠠᠨ ᠳᠡᠭᠡᠳᠦᠰ ᠦᠨ ᠲᠠᠬᠢᠯᠭᠠ ᠵᠢᠨ ᠦᠶᠡ ᠪᠠᠷ ᠦᠷᠡ ᠨᠢᠯᠬᠠᠰ ᠲᠠᠭᠠᠨ ᠨᠢᠳᠦᠯᠡᠭᠦᠯᠦᠨ ᠲᠠᠨᠢᠭᠤᠯᠵᠤ᠂ ᠣᠪᠣᠭ ᠲᠥᠷᠥᠯ ᠦᠨ ᠪᠠᠬᠠᠷᠬᠠᠯ ᠣᠮᠣᠭᠰᠢᠯ ᠢ ᠬᠥᠮᠥᠵᠢᠭᠦᠯᠳᠡᠭ᠃ ᠬᠢᠲᠠᠳ ᠰᠣᠶᠣᠯ ᠳ᠋ᠥ ᠣᠪᠣᠭ ᠵᠢᠠᠷ ᠨᠢ ᠣᠪᠣᠭᠴᠢᠯᠠᠨ ᠳᠠᠭᠤᠳᠠᠬᠤ ᠵᠠᠩᠰᠢᠯ ᠨᠢ ᠲᠡᠷᠡ ᠰᠣᠶᠣᠯ ᠳ᠋ᠥ ᠲᠣᠬᠢᠷᠠᠯᠴᠠᠭᠰᠠᠨ ᠬᠦᠨᠳᠦᠳᠬᠡᠯ ᠦᠨ ᠠᠭᠤᠯᠭᠠ ᠰᠢᠨᠵᠢ ᠲᠠᠢ ᠪᠠᠢᠳᠠᠭ᠃
ᠭᠡᠲᠡᠯᠡ ᠮᠣᠩᠭᠣᠯ ᠰᠣᠶᠣᠯ ᠴᠢᠨᠢ ᠬᠢᠲᠠᠳ ᠰᠣᠶᠣᠯ ᠪᠢᠰᠢ᠃ ᠬᠢᠲᠠᠳ ᠰᠣᠶᠣᠯ ᠤᠨ ᠣᠪᠣᠭᠴᠢᠯᠠᠨ ᠳᠠᠭᠤᠳᠠᠬᠤ ᠬᠦᠨᠳᠦᠳᠬᠡᠯ ᠢ ᠰᠣᠬᠣᠷ ᠪᠠᠯᠠᠢ ᠪᠠᠷ ᠳᠠᠭᠤᠷᠢᠶᠠᠨ ᠮᠣᠩᠭᠣᠯ ᠨᠡᠷᠡ ᠵᠢᠨ ᠲᠣᠯᠣᠭᠠᠢ ᠶ᠋ᠢ ᠬᠢᠷᠭᠠᠨ ᠲᠠᠰᠤᠳᠠᠬᠤ ᠴᠢᠨᠢ ᠬᠦᠨᠳᠦᠳᠬᠡᠯ ᠪᠢᠰᠢ ᠬᠠᠷᠢᠶᠠᠯ᠃ ᠶᠠᠷᠢᠶᠠᠨ ᠦᠭᠡᠢ ᠮᠣᠩᠭᠣᠯᠴᠤᠳ ᠥᠪᠡᠷ ᠦᠨ ᠣᠪᠣᠭ ᠲᠥᠷᠥᠯ ᠦᠨ ᠰᠣᠶᠣᠯ ᠰᠢᠰᠲ᠋ᠧᠮ ᠲᠠᠢ ᠪᠠᠢᠭᠠ᠃ ᠬᠢᠲᠠᠳ ᠰᠣᠶᠣᠯ ᠤᠨ ᠵᠠᠭᠤᠨ ᠣᠪᠣᠭᠲᠠᠨ ᠣ ᠵᠢᠭᠰᠠᠭᠠᠯᠲᠠ ᠠᠴᠠ ᠪᠢ ᠶᠠᠮᠠᠷ ᠣᠪᠣᠭ ᠲᠠᠢ ᠭᠡᠵᠦ ᠡᠷᠢᠬᠦ ᠬᠡᠷᠡᠭ ᠴᠦ ᠦᠭᠡᠢ᠃ ᠮᠣᠩᠭᠣᠯᠴᠤᠳ ᠤᠨ ᠬᠦᠨᠳᠦᠳᠬᠡᠯ ᠶᠣᠰᠣᠨ ᠳ᠋ᠥ ᠣᠪᠣᠭ ᠢ ᠬᠠᠮᠢᠶᠠ ᠦᠭᠡᠢ ᠳᠠᠭᠤᠳᠠᠯᠴᠬᠤ ᠪᠢᠰᠢ᠂ ᠬᠠᠷᠢᠨ ᠠᠪᠤ ᠡᠵᠢ ᠵᠢᠨ ᠬᠠᠢᠷᠠᠯᠠᠭᠰᠠᠨ ᠨᠡᠷᠡ ᠪᠠᠷ ᠨᠢ ᠳᠠᠭᠤᠳᠠᠯᠴᠠᠳᠠᠭ᠃ ᠮᠣᠩᠭᠣᠯ ᠤᠨ ᠲᠡᠦᠬᠡᠨ ᠳ᠋ᠥ ᠠᠳᠠᠯᠢᠬᠠᠨ ᠨᠡᠷᠡ ᠲᠠᠢ ᠬᠥᠮᠥᠰ᠂ ᠵᠢᠱᠢᠶᠡᠯᠡᠪᠡᠯ ᠲᠡᠮᠦᠵᠢᠨ᠂ ᠬᠤᠪᠢᠯᠠᠢ᠂ ᠨᠠᠴᠢᠨ᠂ ᠲᠡᠮᠦᠷᠪᠤᠬᠠ᠂ ᠮᠤᠬᠣᠯᠠᠢ ᠭᠡᠬᠦ ᠵᠡᠷᠭᠡ ᠣᠯᠠᠨ ᠪᠠᠢᠳᠠᠭ᠃ ᠲᠡᠷᠡ ᠨᠢ ᠮᠣᠩᠭᠣᠯᠴᠤᠳ ᠤᠨ ᠳᠡᠭᠡᠳᠦᠰ ᠦᠨ ᠦᠯᠡᠳᠡᠭᠡᠭᠰᠡᠨ ᠣᠪᠣᠭ ᠲᠠᠢ ᠠᠳᠠᠯᠢᠬᠠᠨ᠂ ᠥᠪᠡᠷ ᠲᠣ ᠨᠢ ᠣᠯᠭᠤᠭᠠᠭᠳᠠᠭᠰᠨ ᠨᠡᠷᠡ ᠶ᠋ᠢ ᠬᠦᠨᠳᠦᠯᠡᠨ ᠦᠵᠡᠳᠡᠭ ᠦᠨ ᠵᠢᠱᠢᠶᠡ ᠪᠣᠯᠬᠤ ᠶᠤᠮ᠃ ᠭᠠᠯᠠᠭᠤ ᠭᠠᠷᠪᠠᠯ ᠳᠠᠭᠤ ᠪᠠᠨ᠂ ᠬᠥᠮᠥᠨ ᠶᠠᠪᠤᠪᠠᠯ ᠨᠡᠷᠡ ᠪᠠᠨ᠂ ᠬᠠᠷᠢᠨ ᠬᠢᠷᠭᠠᠭᠰᠠᠨ ᠭᠠᠭᠴᠠᠬᠠᠨ ᠠᠪᠢᠶᠠ ᠪᠢᠰᠢ᠃ ᠰᠣᠶᠣᠯ᠂ ᠠᠮᠢᠳᠤᠷᠠᠯ ᠤᠨ ᠰᠣᠯᠪᠢᠴᠠᠭᠰᠠᠨ ᠴᠡᠭ ᠲᠣ ᠦᠨᠳᠦᠰᠦᠲᠡᠨ ᠣ ᠣᠶᠣᠨ ᠣ ᠠᠯᠮᠠᠰ ᠬᠠᠳᠠᠭᠠᠰᠤ ᠪᠠᠢᠳᠠᠭ᠃ ᠮᠥᠩᠬᠡ ᠲᠡᠭᠷᠢ ᠵᠢᠨ ᠵᠠᠶᠠᠭᠠ᠂ ᠣᠯᠭᠣᠭᠰᠠᠨ ᠨᠡᠷᠡ᠂ ᠬᠦᠷᠲᠡᠭᠡᠭᠰᠡᠨ ᠬᠡᠰᠢᠭ᠂ ᠳᠠᠭᠠᠭᠠᠯᠭᠠᠭᠰᠠᠨ ᠡᠭᠦᠷᠭᠡ᠂ ᠲᠡᠷᠡ ᠪᠦᠭᠦᠳᠡ ᠨᠢ ᠠᠮᠢᠳᠤᠷᠠᠯ ᠤᠨ ᠵᠠᠩ ᠦᠢᠯᠡ ᠳ᠋ᠥ ᠤᠯᠠᠮᠵᠢᠯᠠᠯ ᠵᠢᠠᠨ ᠣᠯᠵᠤ᠂ ᠮᠣᠩᠭᠣᠯ ᠭᠡᠰᠡᠨ ᠮᠦᠰᠦ ᠶ᠋ᠢ ᠪᠦᠷᠢᠯᠳᠦᠭᠦᠯᠳᠡᠭ᠃
ᠮᠣᠩᠭᠣᠯ ᠬᠥᠮᠥᠨ ᠨᠡᠷᠡ ᠨᠡᠷᠡ ᠪᠠᠨ ᠲᠠᠰᠤᠴᠢᠨ ᠳᠠᠭᠤᠳᠠᠳᠠᠭ ᠦᠭᠡᠢ ᠶᠤᠮ ᠰᠢᠦ ᠭᠡᠰᠡᠨ ᠭᠠᠭᠴᠠᠬᠠᠨ ᠦᠭᠡ ᠴᠢᠨᠢ ᠲᠠᠨ ᠣ ᠬᠡᠦᠬᠡᠳ ᠦᠨ ᠥᠪᠡᠷ ᠢ ᠪᠡᠨ ᠮᠣᠩᠭᠣᠯ ᠭᠡᠳᠡᠭ ᠮᠡᠳᠡᠷᠡᠯ ᠢ ᠣᠷᠭᠢᠯᠤᠭᠤᠯᠤᠨ ᠪᠤᠴᠠᠯᠭᠠᠵᠤ ᠴᠢᠳᠠᠬᠤ ᠶᠤᠮ᠃ ᠦᠭᠡᠢ ᠪᠣᠯ ᠮᠣᠩᠭᠣᠯ ᠬᠡᠯᠡᠨ ᠣ ᠰᠥᠨᠥᠬᠦ ᠬᠡᠯᠪᠡᠷᠢ ᠡᠨᠡ ᠪᠣᠯᠠᠢ᠃
ᠰᠥᠨᠥᠬᠦ ᠬᠡᠯᠪᠡᠷᠢ 3
ᠠᠮᠧᠷᠢᠺᠠ ᠵᠢᠨ ᠬᠡᠯᠡᠨ ᠣ ᠡᠷᠳᠡᠮᠲᠡᠨ ᠴᠣᠢᠮᠰᠺᠢ ᠬᠡᠯᠡᠭᠰᠡᠨ ᠨᠢ︽ ᠬᠥᠮᠥᠨ ᠲᠥᠷᠥᠯᠬᠢᠲᠡᠨ ᠳ᠋ᠥ ᠲᠠᠷᠢᠬᠢᠨ ᠣ ᠬᠡᠯᠡ ᠵᠦᠢ ᠵᠢᠨ ᠲᠣᠭᠲᠠᠯᠴᠠᠭᠠ ᠳ᠋ᠥ ᠨᠡᠢᠳᠡᠮ ᠬᠡᠯᠡᠨ ᠵᠦᠢ ᠭᠡᠵᠦ ᠲᠥᠷᠥᠯᠬᠢ ᠴᠢᠳᠠᠪᠬᠢ ᠪᠠᠢᠳᠠᠭ᠃ ᠲᠡᠷᠡ ᠨᠢ ᠬᠡᠦᠬᠡᠳ ᠤᠳ ᠶᠠᠮᠠᠷ ᠴᠤ ᠬᠡᠯᠡ ᠶᠢ ᠰᠤᠷᠴᠤ ᠪᠣᠯᠬᠤ ᠪᠣᠯᠣᠯᠴᠠᠭᠠ ᠶ᠋ᠢ ᠬᠠᠩᠭᠠᠵᠤ ᠪᠠᠢᠳᠠᠭ᠃︾᠃ ᠶᠠᠭ ᠡᠢᠮᠦ ᠡᠴᠡ ᠬᠡᠦᠬᠡᠳ ᠶᠠᠮᠠᠷ ᠬᠡᠯᠡᠨ ᠳ᠋ᠥ ᠣᠢᠷᠠᠲᠤᠬᠤ ᠭᠡᠳᠡᠭ ᠨᠢ ᠲᠡᠭᠦᠨ ᠣ ᠶᠠᠮᠠᠷ ᠬᠡᠯᠡ ᠲᠠᠢ ᠪᠣᠯᠣᠨ ᠬᠥᠮᠥᠵᠢᠬᠦ ᠭᠡᠳᠡᠭ ᠢ ᠰᠢᠢᠳᠴᠦ ᠪᠠᠢᠳᠠᠭ᠃ ᠶᠠᠭ ᠡᠢᠮᠦ ᠡᠴᠡ ᠹᠷᠠᠨᠼᠢ ᠵᠢᠨ ᠬᠡᠯᠡᠨ ᠣ ᠡᠷᠳᠡᠮᠲᠡᠨ ᠶᠠᠩ ᠪᠠᠷ︽ ᠠᠮᠢᠳᠤᠷᠠᠯ ᠤᠨ ᠬᠡᠯᠡ ᠨᠢ ᠴᠥᠭᠡᠬᠡᠨ ᠲᠣᠭᠠᠲᠠᠨ ᠣ ᠬᠡᠯᠡᠨ ᠣ ᠤᠯᠠᠮᠵᠢᠯᠠᠭᠳᠠᠬᠤ᠂ ᠲᠠᠰᠤᠯᠳᠠᠬᠤ᠂ ᠰᠡᠷᠭᠦᠬᠦ᠂ ᠰᠥᠨᠥᠬᠦ ᠵᠢᠨ ᠵᠠᠩᠭᠢᠯᠠᠭᠠ ᠪᠣᠯᠬᠤ ᠶᠤᠮ᠃︾︽ ᠢᠪᠷᠡᠢ ᠬᠡᠯᠡᠨ ᠣ ᠭᠠᠢᠬᠠᠯᠲᠠᠢ ᠬᠤᠷᠳᠤᠨ ᠰᠡᠷᠭᠦᠯᠲᠡ ᠨᠢ ᠢᠪᠷᠡᠢᠴᠦᠳ ᠦᠨ ᠬᠣᠶᠠᠷ ᠰᠢᠯᠢᠳᠡᠭ ᠤᠯᠠᠮᠵᠢᠯᠠᠯ ᠠᠴᠠ ᠰᠠᠯᠵᠤ ᠴᠢᠳᠠᠬᠤ ᠦᠭᠡᠢ︾᠂ ᠲᠡᠭᠦᠨ ᠣ ᠨᠢᠭᠡ ᠨᠢ ᠢᠪᠷᠡᠢ ᠱᠠᠰᠢᠨ ᠣ ᠰᠤᠳᠤᠷ ᠲᠠᠬᠢ ᠪᠢᠴᠢᠭ ᠦᠨ ᠬᠡᠯᠡᠨ ᠣ ᠡᠬᠢ ᠪᠠᠶᠠᠯᠢᠭ᠂ ᠨᠥᠭᠥᠭᠡ ᠨᠢ ᠢᠪᠷᠡᠢᠴᠦᠳ ᠭᠡᠷ ᠦᠨ ᠠᠮᠢᠳᠤᠷᠠᠯ ᠳᠠᠭᠠᠨ ᠵᠠᠪᠠᠯ ᠢᠪᠷᠡᠢ ᠬᠡᠯᠡ ᠪᠠᠷ ᠬᠠᠷᠢᠯᠴᠠᠳᠠᠭ ᠶᠠᠪᠤᠳᠠᠯ ᠪᠣᠯᠣᠨᠠ᠂ ᠨᠠᠼᠢᠰ ᠾᠢᠲᠲᠯᠠᠷ ᠤᠨ ᠬᠦᠨᠳᠦ ᠰᠢᠬᠠᠯᠲᠠ ᠵᠢᠨ ᠦᠶᠡ ᠳ᠋ᠥ ᠴᠤ ᠡᠢᠮᠦ ᠪᠠᠢᠭᠰᠠᠨ ᠭᠡᠵᠡᠢ᠃ ᠡᠨᠡ ᠨᠢ︽ ᠬᠠᠮᠤᠭ ᠰᠡᠭᠦᠯᠴᠢ ᠵᠢᠨ ᠬᠢᠴᠢᠶᠡᠯ︾ ᠭᠡᠳᠡᠭ ᠬᠠᠷᠠᠮᠰᠠᠯᠲᠤ ᠳᠠᠭᠤᠯᠠᠯ ᠠᠴᠠ ᠬᠠᠮᠢᠶᠠ ᠦᠭᠡᠢ ᠥᠷᠳᠡᠭ ᠲᠠᠢ ᠪᠠᠢᠵᠤ ᠮᠠᠭᠠᠳ ᠦᠭᠡᠢ᠃ ᠶᠠᠫᠤᠨ ᠣ ᠡᠷᠳᠡᠮᠲᠡᠨ ᠺᠠᠽᠢᠶᠠ ᠺᠸᠢᠰᠦᠺᠧ ᠡᠴᠡ ᠳᠤᠮᠳᠠᠳᠤ ᠤᠯᠤᠰ ᠤᠨ ᠴᠦᠬᠡᠨ ᠲᠣᠭᠠᠲᠠᠨ ᠣ ᠬᠡᠯᠡᠨ ᠣ ᠠᠬᠤᠢ ᠵᠢᠨ ᠰᠢᠭᠦᠮᠵᠢᠯᠡᠯ ᠳᠡᠬᠡᠨ 90% ᠭᠡᠬᠦ ᠬᠠᠷᠢᠴᠠᠯᠠᠰᠢᠭᠦᠢ ᠬᠡᠯᠡᠨ ᠣ ᠰᠢᠬᠠᠯᠲᠠ ᠵᠢᠨ ᠣᠷᠴᠢᠨ ᠳ᠋ᠥ ᠴᠦᠬᠡᠨ ᠲᠣᠭᠠᠲᠠᠨ ᠣ ᠬᠡᠯᠡᠨ ᠣ ᠬᠠᠷᠢᠴᠠᠩᠭᠤᠢ ᠠᠮᠢᠵᠢᠷᠠᠯ ᠤᠨ ᠣᠷᠣᠨ ᠵᠠᠢ ᠪᠠᠢᠨᠠ ᠭᠡᠵᠦ ᠵᠢᠱᠢᠬᠦ ᠳ᠋ᠥ ᠬᠥᠷᠪᠡᠯ᠂ ᠲᠡᠷᠡ ᠨᠢ ᠭᠡᠷ ᠪᠦᠯᠢ ᠵᠢᠨ ᠠᠮᠢᠳᠤᠷᠠᠯ ᠳ᠋ᠥ ᠬᠠᠩᠭᠠᠯᠲᠠᠲᠠᠢ ᠶᠠᠷᠢᠭᠳᠠᠵᠤ ᠪᠠᠢᠬᠤ ᠶᠠᠪᠤᠳᠠᠯ ᠪᠠᠢᠬᠠ᠃ ᠫᠦ᠋ ᠲᠦᠩ ᠬᠤᠸᠠ ᠭᠡᠬᠦ ᠨᠢᠭᠡᠳᠦᠯ ᠦᠨ ᠬᠤᠭᠤᠰ ᠳᠤᠮᠳᠠ ᠪᠠᠢᠭᠠ ᠲᠥᠷᠥ ᠵᠢᠨ ᠬᠡᠯᠡᠨ ᠣ ᠨᠢᠭᠡᠳᠬᠡᠬᠦ ᠶᠠᠪᠤᠴᠠ ᠨᠢ ᠳᠤᠮᠳᠠᠳᠤ ᠤᠯᠤᠰ ᠤᠨ ᠢᠷᠭᠡᠨ ᠣ ᠨᠢᠭᠲᠠᠷᠠᠯ ᠤᠨ ᠱᠠᠭᠠᠷᠳᠠᠯᠭᠠ ᠠᠴᠠ ᠪᠣᠯᠵᠤ ᠤᠯᠠᠮ ᠵᠢᠠᠷ ᠴᠢᠩᠭᠠᠷᠠᠬᠤ ᠪᠠᠢᠬᠠ ᠭᠡᠵᠦ ᠵᠢᠱᠢᠬᠦ ᠦᠶᠡ ᠨᠡᠩ ᠢᠯᠠᠩᠭᠤᠶᠠ ᠭᠡᠷ ᠪᠦᠯᠢ ᠡᠴᠡ ᠭᠠᠳᠠᠨᠠ ᠬᠣᠶᠠᠳᠠᠭᠢ ᠰᠣᠩᠭᠣᠯᠲᠠ ᠵᠢᠨ ᠪᠣᠯᠣᠯᠴᠠᠭᠠ ᠪᠠᠢᠬᠤ ᠦᠭᠡᠢ ᠪᠢᠵᠡ ᠭᠡᠵᠦ ᠶᠠᠫᠤᠨ ᠬᠥᠮᠥᠨ ᠣ ᠬᠢᠴᠢᠶᠡᠩᠭᠦᠢ ᠥᠭᠦᠯᠡᠮᠵᠢ ᠪᠠᠷ ᠥᠭᠦᠯᠡᠭᠰᠡᠨ ᠪᠠᠢᠳᠠᠭ᠃
ᠭᠡᠬᠦ ᠳ᠋ᠥ ᠥᠪᠥᠷ ᠮᠣᠩᠭᠣᠯᠴᠤᠳ ᠮᠠᠨᠢ ᠭᠡᠷ ᠪᠦᠯᠢ ᠵᠢᠨ ᠠᠮᠢᠳᠤᠷᠠᠯ ᠳ᠋ᠥ ᠮᠣᠩᠭᠣᠯ ᠵᠢᠠᠷ ᠵᠢᠠᠨ ᠶᠠᠷᠢᠯᠴᠠᠳᠠᠭ ᠪᠣᠯᠪᠠ ᠦᠦ︖ᠨᠠᠮᠤᠷ ᠤᠨ ᠬᠠᠭᠤᠷᠠᠢ ᠤᠯᠠᠷᠢᠯ ᠳ᠋ᠥ ᠬᠠᠨᠢᠶᠠᠳᠤ ᠳᠡᠯᠭᠡᠷᠡᠵᠦ᠂ ᠠᠷᠭᠠ ᠦᠭᠡᠢ ᠵᠡᠭᠡᠯᠢ ᠵᠢᠨ ᠮᠣᠬᠣᠷ ᠲᠤ ᠪᠠᠢᠭᠠ ᠬᠤᠪᠢ ᠵᠢᠨ ᠡᠮᠨᠡᠯᠭᠡ ᠲᠤ ᠲᠠᠷᠢᠯᠭᠠ ᠳᠤᠰᠤᠯᠭᠠᠬᠤ ᠪᠠᠷ ᠪᠣᠯᠣᠯᠠ᠃ ᠠᠷᠠᠢ ᠰᠢᠷᠠᠯᠠᠵᠦ ᠪᠦᠷᠪᠦᠢᠭᠰᠡᠨ ᠴᠠᠭᠠᠨ ᠬᠤᠴᠢᠯᠭᠠ ᠲᠠᠢ ᠣᠷᠣ ᠳᠡᠭᠡᠷᠡ ᠳᠤᠰᠤᠯᠭᠠ ᠵᠢᠨ ᠳᠤᠰᠤᠯ ᠢ ᠲᠣᠭᠠᠯᠠᠵᠤ ᠬᠡᠪᠲᠡᠬᠦ ᠳ᠋ᠥ᠂ ᠬᠣᠶᠠᠷ ᠣᠷᠣ ᠵᠢᠭᠢᠷᠢᠭᠯᠡᠨ ᠴᠠᠭᠠᠨᠠ ᠣᠷᠣ ᠳᠡᠭᠡᠷᠡ ᠨᠢᠭᠡᠨ 7-8 ᠨᠠᠰᠤᠨ ᠣ ᠪᠠᠨᠳᠢ ᠬᠠᠨᠢᠶᠠᠳᠤ ᠠᠪᠴᠤ ᠳᠤᠰᠤᠯᠭᠠ ᠲᠠᠷᠢᠭᠤᠯᠵᠤ ᠬᠡᠪᠲᠡᠵᠦ ᠪᠠᠢᠯᠠ᠃ ᠪᠣᠭᠣᠷᠰᠣᠭ ᠢᠳᠡᠨᠡ᠂ ᠰᠢᠬᠢᠷ ᠢᠳᠡᠨᠡ᠂ ᠠ᠂ ᠦᠭᠡᠢ ᠵᠢᠮᠢᠰ ᠢᠳᠡᠨᠡ ᠭᠡᠳ ᠬᠢᠲᠠᠳ ᠬᠡᠯᠡ ᠱᠣᠯᠣᠭᠣᠨᠠᠬᠤ ᠳ᠋ᠥ᠂ ᠣᠷᠣ ᠵᠢᠨ ᠬᠠᠵᠠᠭᠤ ᠳ᠋ᠥ ᠠᠰᠠᠷᠠᠨ ᠰᠠᠭᠤᠭᠰᠠᠨ ᠵᠢᠷᠠᠭᠠᠳ ᠨᠠᠰᠤᠨ ᠣ ᠡᠪᠦᠭᠡ ᠨᠢ ᠣᠬᠠᠢ᠂ ᠶᠠᠭ ᠮᠣᠩᠭᠣᠯ ᠰᠢᠳᠡ ᠭᠡᠵᠦ ᠮᠡᠳᠡᠭᠳᠡᠮᠡ ᠠᠨᠠᠢᠬᠠᠨ ᠬᠢᠲᠠᠳ ᠬᠡᠯᠡ ᠪᠠᠷ ᠬᠡᠦᠬᠡᠳ ᠵᠢᠠᠨ ᠠᠷᠭᠠᠴᠠᠭᠠᠵᠤ ᠪᠠᠢᠯᠠ᠃ ᠺᠸ ᠰᠧᠦ ᠯᠠ᠂ ᠲᠠᠩ ᠪᠦᠦ ᠨᠡᠩ ᡂᠢ ᠭᠡᠵᠦ ᠪᠠᠢᠯᠠ᠃ ᠲᠡᠭᠡᠵᠦ ᠪᠠᠢᠲᠠᠯᠠ ᠡᠮᠡᠭᠡ ᠡᠵᠢ ᠨᠢ ᠬᠥᠷᠴᠦ ᠢᠷᠡᠯᠡ᠃ ᠥ᠂ ᠸᠧ ᠳ᠋ᠢ ᠰᠦᠨᠽᠢ ᠭᠡᠳ ᠥᠬᠥᠭᠡᠷᠳᠡᠭᠡᠳ ᠡᠬᠢᠯᠡᠯᠡ᠃
ᠠᠢ᠂ ᠬᠥᠭᠡᠷᠦᠬᠦᠢ᠂ ᠪᠠᠰᠠ ᠨᠢᠭᠡᠨ ᠮᠣᠩᠭᠣᠯ ᠬᠡᠦᠬᠡᠳ ᠮᠣᠩᠭᠣᠯ ᠬᠡᠯᠡ ᠪᠠᠨ ᠠᠯᠳᠠᠵᠤ ᠳ᠋ᠠ ᠭᠡᠳ ᠬᠠᠶᠠ ᠨᠢᠭᠡ ᠬᠠᠷᠠᠭᠠᠳ᠂ ᠬᠢᠲᠠᠳ ᠪᠣᠯᠣᠭᠰᠠᠨ ᠣᠮᠪᠣᠯᠣ ᠲᠠᠢ ᠪᠠᠨ ᠬᠠᠷᠢᠴᠠᠬᠤ ᠵᠢᠨ ᠲᠥᠯᠥᠭᠡ ᠮᠣᠳᠣᠨ ᠬᠡᠯᠡ ᠪᠠᠷ ᠶᠠᠷᠢᠵᠦ ᠰᠠᠭᠤᠭᠠ ᠬᠣᠶᠠᠷ ᠬᠥᠭᠰᠢᠨ ᠢ ᠥᠷᠥ ᠡᠪᠡᠳᠦᠨ ᠬᠥᠭᠡᠷᠦᠬᠦᠢᠯᠡᠵᠦ ᠬᠡᠪᠲᠡᠭᠰᠡᠭᠡᠷ ᠪᠠᠢᠲᠠᠯᠠ ᠬᠣᠶᠠᠷᠳᠠᠬᠢ ᠰᠢᠯ ᠲᠠᠢ ᠲᠠᠷᠢᠯᠭᠠ ᠵᠢᠨ ᠡᠮ ᠬᠦᠷᠴᠦ ᠢᠷᠠᠵᠤ᠂ ᠦᠳᠡ ᠣᠢᠷᠠᠲᠤᠨ ᠥᠯᠥᠰᠥᠭᠰᠡᠨ ᠭᠡᠳᠡᠰᠦ ᠬᠠᠶᠠ ᠨᠢ ᠬᠦᠷᠴᠢᠭᠢᠨᠡᠨ ᠳᠤᠤᠭᠠᠷᠴᠤ ᠪᠠᠢᠯᠠ᠃ ᠬᠠᠨᠢᠶᠠᠳᠤ ᠵᠢᠨ ᠬᠠᠯᠠᠭᠤᠷᠠᠯ ᠳ᠋ᠥ ᠤᠢᠳᠬᠠᠷ ᠭᠤᠨᠢᠭ ᠳᠠᠪᠬᠤᠴᠠᠨ ᠬᠢᠳᠡᠯ ᠠᠯᠳᠠᠨ ᠬᠡᠪᠲᠡᠲᠡᠯᠡ ᠭᠡᠨᠡᠳᠲᠡ︽ ᠥ᠂ ᠮᠢᠨᠤ ᠬᠦᠦ ᠵᠦᠭᠡᠷ ᠪᠣᠯᠣᠭᠰᠠᠨ ᠦᠦ︖ ᠡᠵᠢ ᠪᠠᠨ ᠰᠠᠨᠠᠭᠰᠠᠨ ᠦᠦ︾ ᠭᠡᠭᠰᠡᠭᠡᠷ ᠨᠢᠭᠡᠨ ᠵᠠᠯᠠᠭᠤᠬᠠᠨ ᠪᠦᠰᠡᠭᠦᠢ ᠣᠷᠣᠵᠤ ᠢᠷᠡᠵᠦ᠂ ᠰᠠᠶ᠋ᠢ ᠵᠢᠨ ᠡᠪᠦᠭᠡ ᠡᠮᠡᠭᠡ ᠲᠠᠢ ᠪᠠᠨ ᠬᠢᠲᠠᠳ ᠵᠢᠠᠷ ᠱᠣᠯᠣᠭᠠᠨᠠᠭᠠᠳ ᠪᠠᠢᠭᠰᠠᠨ ᠪᠠᠨᠳᠢ ᠶ᠋ᠢ ᠥᠬᠥᠭᠡᠷᠳᠡᠨ ᠢᠯᠢᠪᠡ᠃ ᠪᠠᠨᠳᠢ ᠴᠤ ᠡᠵᠢ ᠪᠠᠨ ᠬᠠᠷᠠᠭᠠᠳ ᠤᠬᠠᠭᠠ ᠦᠭᠡᠢ ᠪᠠᠶᠠᠷᠯᠠᠨ᠂ ᠡᠢᠮᠦ ᠵᠢᠮᠢᠰ ᠢᠳᠡᠯᠡ᠂ ᠲᠡᠢᠮᠦ ᠪᠣᠭᠣᠷᠰᠣᠭ ᠢᠳᠡᠯᠡ᠃ ᠪᠠᠰᠠ ᠬᠡᠳᠦᠢ ᠤᠰᠤ ᠤᠤᠭᠤᠯᠠ ᠭᠡᠳ ᠶᠣᠰᠣᠲᠠᠢ ᠰᠠᠢᠬᠠᠨ ᠪᠠᠷᠢᠮᠵᠢᠶᠠ ᠮᠣᠩᠭᠣᠯ ᠵᠢᠠᠷ ᠲᠦᠴᠢᠭᠢᠨᠡᠲᠡᠯᠡ ᠨᠢ ᠶᠠᠷᠢᠵᠦ ᠡᠬᠢᠯᠡᠯᠡ᠃ ᠶᠠᠮᠠᠷ ᠭᠣᠶᠣ ᠪᠣᠢ ᠭᠡᠵᠦ ᠪᠠᠬᠠᠷᠬᠠᠨ ᠬᠠᠷᠠᠵᠤ ᠬᠡᠪᠲᠡᠲᠡᠯᠡ ᠡᠮᠡᠭᠡ ᠡᠵᠢ ᠨᠢ ᠪᠡᠷᠢ ᠳᠡᠬᠡᠨ ᠬᠢᠲᠠᠳ ᠬᠡᠯᠡ ᠪᠠᠷ ᠲᠤᠰᠢᠶᠠᠯ ᠳᠠᠭᠠᠭᠠᠯᠭᠠᠵᠤ ᠡᠬᠢᠯᠡᠪᠡ᠃ ᠮᠣᠩᠭᠣᠯ ᠬᠡᠯᠡ ᠪᠠᠷ ᠳᠦᠩᠭᠡᠷ ᠳᠠᠩᠭᠠᠷ ᠶᠠᠷᠢᠵᠦ ᠰᠠᠭᠤᠭᠠ ᠡᠬᠡ ᠬᠦᠦ ᠬᠣᠶᠠᠭᠤᠯᠠ ᠲᠠᠢ ᠠᠨᠠᠢ ᠬᠢᠲᠠᠳ ᠬᠡᠯᠡ ᠪᠠᠷ ᠰᠤᠷᠭᠠᠵᠤ ᠰᠠᠭᠤᠭᠠ ᠡᠮᠡᠭᠡ ᠡᠬᠡ ᠨᠢ ᠶᠠᠭᠠᠬᠢᠬᠤ ᠵᠢᠨ ᠠᠷᠭᠠ ᠦᠭᠡᠢ ᠢᠨᠢᠶᠡᠳᠦᠮ ᠲᠠᠢ ᠴᠦ ᠶᠤᠮ ᠦᠦ᠂ ᠭᠣᠨᠢᠭᠯᠠᠯ ᠲᠠᠢ ᠴᠤ ᠶᠤᠮ ᠦᠦ ᠰᠠᠨᠠᠭᠳᠠᠯᠠ᠃
ᠶᠡᠬᠡ ᠬᠤᠪᠢᠰᠬᠠᠯ᠂ ᠰᠢᠯᠢᠳᠡᠭ ᠰᠣᠶᠣᠯ᠂ ᠠᠭᠤᠤ ᠶᠡᠬᠡ ᠨᠢᠭᠡᠳᠦᠯ ᠦᠨ ᠰᠤᠷᠭᠠᠨ ᠬᠥᠮᠥᠵᠢᠯ ᠳ᠋ᠥ ᠤᠬᠢᠶᠠᠭᠳᠠᠭᠰᠠᠨ ᠬᠡᠯᠡᠨ ᠣ ᠤᠬᠠᠮᠰᠠᠷ ᠤᠨ ᠡᠷᠭᠢᠯᠲᠡ ᠵᠠᠰᠠᠷᠠᠭᠳᠠᠬᠤ ᠦᠭᠡᠢ ᠶᠤᠮ ᠪᠣᠯ ᠮᠣᠩᠭᠣᠯ ᠬᠡᠯᠡᠨ ᠣ ᠰᠥᠨᠥᠬᠦ ᠬᠡᠯᠪᠡᠷᠢ ᠵᠢᠨ ᠨᠢᠭᠡ ᠨᠢ ᠲᠡᠷᠡ ᠪᠣᠯᠬᠤ ᠶᠤᠮ᠃
ᠰᠥᠨᠥᠬᠦ ᠬᠡᠯᠪᠡᠷᠢ 4
ᠯᠣᠭᠢᠭ ᠭᠡᠳᠡᠭ ᠨᠢ ᠶᠠᠭᠤ ᠪᠢᠯᠡ︖
ᠠᠢ ᠶᠠ᠂ ᠲᠡᠷᠡ ᠴᠢᠨᠢ ᠯᠥᠸᠧ ᠵᠢᠢ ᠰᠢᠳᠡ᠃
ᠣᠣᠬᠠᠢ᠂ ᠲᠡᠢᠮᠦ ᠪᠠᠢᠨᠠ ᠰᠢᠳᠡ᠃
ᠬᠢᠲᠠᠳ ᠬᠡᠯᠡ ᠶ᠋ᠢ ᠮᠣᠩᠭᠣᠯ ᠬᠡᠯᠡᠨ ᠳ᠋ᠥ ᠬᠥᠷᠪᠡᠭᠦᠯᠵᠦ᠂ ᠮᠣᠩᠭᠣᠯ ᠬᠡᠯᠡ ᠶ᠋ᠢ ᠬᠢᠲᠠᠳ ᠬᠡᠯᠡᠨ ᠳ᠋ᠥ ᠬᠥᠷᠪᠡᠭᠦᠯᠦᠭᠡᠳ ᠣᠢᠯᠭᠠᠭᠰᠠᠨ ᠪᠣᠯᠵᠤ ᠰᠠᠭᠤᠬᠤ ᠶᠤᠮ᠃
ᠠᠪᠤ ᠠ᠂ ᠬᠦᠮᠡᠯᠢ ᠭᠡᠳᠡᠭ ᠨᠢ ᠶᠠᠭᠤ ᠪᠤᠢ︖
ᠥ᠂ ᠲᠡᠷᠡ ᠴᠢᠨᠢ ᠱᠠ ᠽᠦᠩ ᠰᠢᠳᠡ᠃
ᠭᠣᠪᠢ ᠬᠥᠳᠡᠭᠡ ᠪᠠᠷ ᠤᠷᠭᠤᠳᠠᠭ ᠭᠣᠭᠣᠳ ᠰᠢᠭ ᠬᠡᠭᠡᠷᠡ ᠵᠢᠨ ᠤᠷᠭᠤᠮᠠᠯ ᠭᠡᠪᠡᠯ ᠶᠠᠭᠠᠬᠢᠳᠠᠭ ᠪᠣᠯ︖
ᠥᠪᠥᠷ ᠮᠣᠩᠭᠣᠯ ᠶᠡᠬᠡ ᠰᠤᠷᠭᠠᠭᠤᠯᠢ ᠵᠢᠨ ᠵᠢᠷᠠᠨ ᠵᠢᠯ ᠣᠢ ᠶ᠋ᠢ ᠲᠡᠮᠳᠡᠭᠯᠡᠬᠦ ᠤᠷᠠᠨ ᠰᠠᠢᠬᠠᠨ ᠣ ᠲᠣᠭᠯᠠᠯᠲᠠ ᠨᠢ ᠵᠠᠪᠠᠯ ᠬᠢᠲᠠᠳ ᠬᠡᠯᠡᠨ ᠳ᠋ᠥ ᠪᠡᠨ ᠵᠣᠬᠢᠴᠠᠵᠤ᠂ ᠦᠰᠦᠭ ᠦᠨ ᠲᠣᠭᠠ ᠨᠢ ᠠᠳᠠᠯᠢᠬᠠᠨ ᠪᠠᠢᠬᠤ ᠬᠡᠷᠡᠭᠲᠡᠢ ᠭᠡᠨᠡ᠃ ᠲᠡᠭᠡᠭᠡᠳ ᠪᠠᠶᠠᠷᠯᠠᠨ ᠤᠭᠲᠤᠬᠤ᠂ ᠶᠡᠬᠡ ᠲᠣᠭᠯᠠᠯᠲᠠ ᠭᠡᠬᠦ ᠵᠡᠷᠭᠡ ᠪᠠᠷ ᠣᠷᠴᠢᠭᠤᠯᠵᠤ ᠡᠬᠢᠯᠡᠬᠦ ᠶᠤᠮ᠃ ᠮᠣᠩᠭᠣᠯ ᠵᠢᠠᠷ ᠰᠡᠳᠬᠢᠵᠦ᠂ ᠮᠣᠩᠭᠣᠯ ᠵᠢᠡᠷ ᠵᠢᠠᠨ ᠨᠠᠢᠷᠠᠭᠤᠯᠵᠤ ᠪᠣᠯᠳᠠᠭ ᠦᠭᠡᠢ ᠶᠤᠮ ᠭᠡᠵᠢ ᠦᠦ︖
ᠰᠡᠳᠬᠢᠬᠦ ᠴᠢᠳᠠᠪᠤᠷᠢ ᠵᠢᠠᠨ ᠠᠯᠳᠠᠭᠰᠠᠨ ᠬᠡᠯᠡ ᠨᠢ ᠦᠭᠡ ᠪᠦᠲᠦᠬᠦ ᠴᠢᠳᠠᠪᠤᠷᠢ ᠵᠢᠠᠨ ᠠᠯᠳᠠᠳᠠᠭ᠃ ᠶᠣᠰᠣᠲᠠᠢ ᠬᠡᠯᠡᠨ ᠣ ᠲᠥᠯᠥᠪᠯᠡᠭᠡᠲᠦ ᠦᠷᠡᠵᠢᠯ ᠦᠨ ᠱᠠᠲᠦᠨ ᠳ᠋ᠥ ᠣᠷᠣᠨᠠ᠃︽ ᠨᠡᠢᠯᠡᠬᠦ ᠵᠢᠨ ᠬᠡᠮ ᠵᠢᠷᠤᠮ︾ ᠭᠡᠳᠡᠭ ᠤᠳᠬᠠ ᠠᠴᠠ ᠨᠡᠢᠭᠡᠮ ᠭᠡᠳᠡᠭ ᠦᠭᠡ ᠪᠦᠲᠦᠭᠡᠭᠳᠡᠯᠡ ᠭᠡᠳᠡᠭ᠃ ᠪᠠᠰᠠ ᠠᠳᠤᠭᠤ ᠬᠠᠷᠠᠬᠤ᠂ ᠭᠡᠭᠦᠦ ᠰᠠᠭᠠᠬᠤ ᠭᠡᠳ ᠬᠤᠷᠢᠮ ᠳ᠋ᠥ ᠰᠠᠭᠤᠭᠰᠠᠨ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠭᠦᠲᠦᠯ ᠳᠠᠪᠠᠨ ᠵᠢᠷᠤᠭᠠᠯᠠᠨ ᠬᠤᠷᠳᠤᠯᠠᠬᠤ ᠵᠢ ᠭᠡᠷ ᠲᠤ ᠰᠠᠭᠤᠭᠠᠳ ᠬᠠᠷᠠᠵᠤ ᠪᠠᠢᠭᠰᠠᠨ ᠪᠢᠮᠪᠠ ᠵᠢᠨ ᠷᠢᠨᠴᠢᠨ ᠭᠤᠸᠠᠢ ᠵ ᠵᠣᠷᠯᠣᠩ ᠭᠡᠳᠡᠭ ᠰᠠᠢᠬᠠᠨ ᠦᠭᠡ ᠶ᠋ᠢ ᠪᠦᠲᠦᠭᠡᠯᠡ ᠭᠡᠳᠡᠭ᠃
ᠠᠲ᠋ᠣᠮ ᠭᠡᠷ ᠪᠦᠯᠢ ᠪᠤᠶᠤ ᠴᠦᠮᠡ ᠭᠡᠷ ᠪᠦᠯᠢ ᠭᠡᠬᠦ ᠳ᠋ᠥ ᠵᠠᠪᠠᠯ ᠭᠣᠣᠯᠳᠠᠯᠭᠠᠲᠤ ᠭᠡᠷ ᠪᠦᠯᠢ ᠭᠡᠵᠦ ᠵᠠᠯᠠᠷᠠᠭᠤᠯᠤᠨ ᠵᠠᠰᠠᠬᠤ ᠬᠡᠯᠡᠨ ᠣ ᠡᠷᠳᠡᠮᠲᠡᠨ ᠮᠡᠷᠭᠡᠳ ᠣᠯᠠᠰᠢᠷᠠᠵᠤ᠂ ᠲᠡᠷᠡ ᠮᠡᠷᠭᠡᠵᠢᠯ ᠦᠨ ᠬᠦᠷᠢᠶᠡᠨ ᠳ᠋ᠥ ᠲᠡᠷᠡ ᠨᠢ ᠶᠠᠮᠠᠷ ᠤᠳᠬᠠ ᠭᠡᠳᠡᠭ ᠢ ᠨᠡᠬᠡᠨ ᠦᠵᠡᠬᠦ ᠦᠭᠡᠢ᠂ ᠬᠢᠲᠠᠳ ᠬᠡᠯᠡᠨ ᠳ᠋ᠥ ᠾᠧ ᠰᠢᠨ ᠵᠢᠶᠠ ᠲᠢᠩ ᠪᠢᠰᠢ ᠦᠦ᠂ ᠾᠧ ᠰᠢᠨ ᠭᠡᠳᠡᠭ ᠴᠢᠨᠢ ᠭᠣᠣᠯᠳᠠᠯᠭᠠ ᠪᠢᠰᠢ ᠦᠦ ᠭᠡᠳ ᠬᠤᠴᠢᠬᠤ ᠶᠤᠮ᠃ ᠡᠴᠢᠭᠡ ᠵᠢᠨ ᠴᠢᠨᠢ ᠾᠧ ᠰᠢᠨ᠂ ᠲᠡᠷᠡ ᠴᠢᠨᠢ ᠠᠲ᠋ᠣᠮ ᠪᠤᠶᠤ ᠴᠦᠮᠡ ᠭᠡᠰᠡᠨ ᠠᠩᠭ᠍ᠯᠢ ᠭᠠᠷᠤᠯ ᠲᠠᠢ ᠨᠡᠷᠡ ᠲᠣᠮᠢᠶᠠᠨ ᠣ ᠬᠢᠲᠠᠳ ᠣᠷᠴᠢᠭᠤᠯᠭᠠ᠃
ᠮᠦᠯᠵᠢᠭᠦᠷ ᠪᠣᠳᠠᠰ ᠣᠯᠳᠠᠭᠰᠠᠨ ᠭᠠᠭᠴᠠᠬᠠᠨ ᠵᠦᠢᠯ ᠳ᠋ᠥ ᠪᠠᠨ ᠮᠦᠴᠢᠷᠬᠡᠨ ᠠᠮᠢᠳᠤᠷᠠᠬᠤ ᠵᠣᠷᠰᠢᠯ ᠰᠢᠭ᠂ ᠵᠥᠪ ᠪᠦᠬᠦᠨ ᠢ ᠭᠠᠭᠴᠠᠬᠠᠨ ᠮᠡᠳᠡᠳᠡᠭ ᠬᠡᠯᠡᠨ ᠡᠴᠡ ᠬᠠᠷᠢᠭᠤᠯᠲᠠ ᠡᠷᠢᠳᠡᠭ ᠪᠣᠯᠪᠠᠯ᠂ ᠬᠡᠯᠡ ᠵᠢᠠᠨ ᠥᠪᠡᠷᠲᠡᠭᠡᠨ ᠺᠣᠯᠣᠨᠢᠴᠢᠯᠠᠬᠤ ᠪᠣᠯᠣᠨᠠ᠃ ᠲᠠᠪᠤᠨ ᠥᠩᠭᠡ ᠳᠦᠷᠪᠡᠨ ᠬᠠᠷᠢ ᠶ᠋ᠢ ᠮᠡᠳᠡᠬᠦ ᠦᠭᠡᠢ᠂ ᠬᠠᠷᠢ ᠭᠠᠳᠠᠭᠠᠳᠤ ᠵᠢᠨ ᠮᠡᠳᠡᠯᠭᠡ ᠶ᠋ᠢ ᠳᠠᠮᠵᠢᠭᠤᠯᠤᠨ ᠵᠥᠭᠡᠭᠡᠬᠦ ᠦᠭᠡᠢ᠂ ᠣᠷᠴᠢᠭᠤᠯᠤᠭᠰᠠᠨ ᠵᠦᠢᠯᠡᠰ ᠢ ᠢᠯᠭᠠᠨ ᠭᠠᠳᠠᠭᠤᠷᠬᠠᠵᠤ᠂ ᠲᠣᠮᠣ ᠭᠦᠷᠦᠨ ᠣ ᠰᠣᠶᠣᠯ ᠤᠨ ᠶᠡᠬᠡᠷᠬᠡᠭ ᠦᠵᠡᠯ ᠢ ᠳᠠᠭᠤᠷᠢᠶᠠᠨ᠂ ᠣᠷᠴᠢᠭᠤᠯᠭᠠ ᠶ᠋ᠢ ᠪᠦᠲᠦᠭᠡᠯ ᠦᠯᠦ ᠲᠣᠭᠠᠴᠢᠬᠤ ᠪᠣᠯᠣᠭᠰᠠᠨ ᠨᠢ ᠥᠪᠡᠰᠦᠪᠡᠨ ᠥᠪᠡᠷ ᠦᠨ ᠰᠡᠳᠬᠢᠬᠦᠢ ᠵᠢᠨ ᠰᠢᠮᠡ ᠲᠡᠵᠢᠭᠡᠯ ᠦᠨ ᠢᠷᠡᠯᠲᠡ ᠵᠢᠡᠨ ᠲᠠᠰᠤᠳᠠᠨ ᠣᠭᠴᠣᠷᠠᠭᠰᠠᠨ ᠲᠠᠢ ᠨᠢᠭᠡᠨ ᠠᠳᠠᠯᠢ ᠪᠤᠶᠤ᠃
ᠬᠡᠷᠡᠭ ᠪᠣᠳᠠᠰ ᠤᠨ ᠭᠦᠨ ᠳᠠᠯᠳᠠ ᠵᠢᠨ ᠵᠢᠮᠡ ᠬᠠᠦᠯᠢ ᠶ᠋ᠢ ᠰᠣᠨᠢᠷᠬᠠᠨ ᠰᠢᠨᠵᠢᠯᠡᠬᠦ ᠳᠠᠳᠬᠠᠯ ᠵᠢᠠᠨ ᠠᠯᠳᠠᠨ᠂ ᠰᠡᠳᠬᠢᠬᠦᠢ ᠵᠢᠨ ᠳᠠᠩ ᠴᠣᠯᠭᠣᠢ ᠡᠷᠭᠢᠯᠲᠡ ᠳ᠋ᠥ ᠲᠡᠨᠦᠵᠦ᠂ ᠦᠭᠡ ᠪᠦᠲᠦᠬᠦ ᠵᠢᠨ ᠴᠢᠳᠠᠪᠤᠷᠢ ᠵᠢᠠᠨ ᠠᠯᠳᠠᠭᠰᠠᠨ ᠲᠠᠢᠭᠠᠨ ᠬᠡᠯᠡ ᠠᠨᠤ ᠰᠥᠨᠥᠬᠦ ᠵᠢᠨ ᠬᠡᠯᠪᠡᠷᠢ 4 ᠲᠡᠷᠡ ᠪᠤᠶᠤ᠃
ᠰᠥᠨᠥᠬᠦ ᠬᠡᠯᠪᠡᠷᠢ 5
ᠳᠤᠮᠳᠠᠳᠤ ᠤᠯᠤᠰ ᠲᠤ ᠰᠢᠨᠡ ᠭᠡᠳᠡᠭ ᠨᠢ ᠶᠣᠰᠣᠲᠠᠢ ᠰᠢᠨᠡ ᠢᠳᠢᠥᠷᠥᠭᠢ ᠵᠢᠨ ᠰᠢᠨᠡ ᠬᠡᠯᠪᠡᠷᠢ᠃ ᠰᠢᠶᠠ ᠱᠠᠩ ᠵᠸᠦ ᠵᠢᠨ ᠦᠶᠡ ᠡᠴᠡ ᠲᠥᠷᠥ ᠨᠢ ᠰᠢᠨᠡ᠂ ᠡᠵᠡᠨ ᠨᠢ ᠰᠢᠨᠡ᠂ ᠣᠷᠴᠢᠨ ᠦᠶᠡ ᠪᠣᠯᠬᠤ ᠳ᠋ᠥ ᠨᠡᠢᠭᠡᠮ ᠰᠢᠨᠡ᠂ ᠰᠣᠶᠣᠯ ᠰᠢᠨᠡ᠂ ᠦᠰᠦᠭ ᠨᠢ ᠰᠢᠨᠡ᠂ ᠨᠡᠩ ᠴᠢᠨᠠᠭᠰᠢᠯᠠᠭᠠᠳ ᠦᠵᠡᠯ ᠰᠠᠨᠠᠭᠠ᠂ ᠦᠭᠡ ᠶᠠᠷᠢᠶᠠ ᠨᠢ ᠴᠤ ᠰᠢᠨᠡ᠃
ᠰᠢᠨᠡᠴᠢᠯᠡᠯ ᠭᠡᠳᠡᠭ ᠨᠢ ᠡᠨᠡ ᠬᠦ ᠲᠥᠷᠥ ᠵᠢᠨ ᠪᠦᠬᠦ ᠰᠣᠨᠢᠷᠬᠠᠯ᠂ ᠬᠥᠳᠡᠯᠭᠡᠬᠦ ᠬᠦᠴᠦᠨ ᠪᠣᠯᠣᠭᠰᠠᠨ ᠪᠠᠢᠳᠠᠭ᠃ ᠰᠢᠨᠡ ᠦᠶᠡ ᠵᠢᠨ ᠰᠢᠨᠡ ᠪᠠᠢᠳᠠᠯ ᠳ᠋ᠥ ᠵᠣᠬᠢᠴᠠᠬᠤ ᠨᠢ ᠡᠷᠳᠡᠮᠲᠡᠳ ᠦᠨ ᠵᠠᠩ ᠠᠷᠠᠨᠰᠢᠨ ᠪᠣᠯᠵᠤ᠂ ᠰᠢᠨᠡ ᠰᠣᠨᠢᠨ᠂ ᠤᠬᠠᠭᠠᠨ ᠨᠢ ᠣᠯᠳᠠᠬᠤ ᠦᠭᠡᠢ ᠰᠢᠨᠡ ᠣᠨᠣᠯ ᠴᠤ ᠮᠣᠩ ᠦᠭᠡᠢ ᠣᠯᠠᠨ ᠭᠠᠷᠴᠤ ᠢᠷᠡᠭᠰᠡᠨ ᠪᠢᠯᠡ᠃ ᠤᠲᠤᠭᠠ ᠤᠨᠢᠶᠠᠷ ᠨᠢ ᠣᠷᠴᠢᠨ ᠦᠶᠡ ᠵᠢᠨ ᠰᠠᠨᠰᠠᠷ ᠤᠨ ᠳᠠᠢᠨ ᠳ᠋ᠥ ᠪᠠᠢᠭᠠᠯᠢ ᠠᠴᠠ ᠣᠯᠭᠣᠭᠰᠠᠨ ᠪᠠᠮᠪᠠᠢ ᠰᠢᠬᠦᠷ᠂ ᠶᠠᠳᠠᠭᠤ ᠠᠢᠯ ᠤᠨ ᠬᠡᠦᠬᠡᠳ ᠶᠡᠬᠡ ᠰᠤᠷᠭᠠᠭᠤᠯᠢ ᠳ᠋ᠥ ᠰᠠᠭᠤᠬᠤ ᠬᠡᠷᠡᠭ ᠦᠭᠡᠢ᠂ ᠪᠠ ᠲᠢᠶᠧ ᠠᠪᠲᠣᠫᠦᠰ ᠦᠨ ᠰᠢᠨᠡ ᠨᠡᠭᠡᠭᠡᠯᠲᠡ᠂ ᠴᠢᠨᠠᠭᠰᠢᠯᠠᠭᠠᠳ ᠺᠢᠨᠣ᠋ ᠤᠷᠠᠨ ᠪᠦᠲᠦᠭᠡᠯ ᠨᠢ ᠬᠦᠷᠲᠡᠯᠡ ᠪᠤᠤ ᠵᠢᠨ ᠰᠣᠮᠣ ᠵᠢᠨ ᠨᠢᠰᠦᠯᠲᠡ ᠶ᠋ᠢ ᠬᠦᠴᠦ ᠪᠠᠷ ᠬᠠᠶᠠᠯᠲᠠ ᠵᠢᠨ ᠱᠤᠭᠤᠮ ᠳ᠋ᠥ ᠰᠢᠯᠵᠢᠭᠦᠯᠬᠦ᠂ ᠡᠮᠡᠭᠲᠡᠢ ᠬᠥᠮᠥᠨ ᠣ ᠠᠯᠠᠨ ᠳ᠋ᠥ ᠭᠷᠨᠠᠳ᠋ ᠨᠥᠭᠡᠴᠡᠯᠡᠬᠦ ᠵᠡᠷᠭᠡ ᠬᠥᠮᠥᠨ ᠲᠥᠷᠥᠯᠬᠢᠲᠡᠨ ᠣ ᠲᠡᠦᠬᠡᠨ ᠳ᠋ᠥ ᠭᠠᠷᠤᠭᠠ ᠦᠭᠡᠢ ᠡᠭᠦᠳᠦᠯᠲᠡ ᠨᠦᠭᠥᠳ ᠢᠯᠡᠷᠡᠭᠰᠡᠨ ᠪᠢᠯᠡ᠃ ᠵᠠ ᠶᠠᠭᠠᠬᠢᠪᠠ᠂ 5000 ᠣᠨ ᠣ ᠰᠣᠶᠣᠯ᠂ 10 ᠳ᠋ᠦᠩᠰᠢᠭᠤᠷ ᠢᠷᠭᠡᠨ ᠦ ᠬᠦᠴᠦ ᠲᠡᠨᠳᠡ ᠪᠠᠢᠭᠠ᠂ ᠶᠠᠭᠠᠬᠢᠵᠤ ᠰᠠᠨᠳᠠᠭᠠᠭᠰᠠᠨ ᠴᠦ ᠬᠥᠷᠥᠩᠭᠡ ᠬᠦᠴᠦ ᠬᠥᠮᠥᠨ ᠭᠤᠷᠪᠠ ᠨᠢ ᠵᠠᠭᠤᠨ ᠵᠢᠯ᠂ ᠬᠣᠶᠠᠷ ᠵᠠᠭᠤᠨ ᠵᠢᠯ ᠬᠠᠩᠭᠠᠯᠲᠠᠲᠠᠢ ᠬᠦᠷᠦᠯᠴᠡᠨᠡ᠃
ᠭᠡᠲᠡᠯᠡ ᠮᠠᠨ ᠣ ᠬᠢᠨ ᠴᠤ ᠡᠬᠢᠯᠡᠭᠡᠳ ᠰᠢᠨᠡ ᠭᠡᠳ ᠬᠥᠭᠡᠭᠡᠴᠡᠯᠳᠦᠬᠦ ᠶᠤᠮ᠃ ᠵᠥᠪ ᠪᠢᠴᠢᠬᠦ ᠳᠦᠷᠢᠮ ᠨᠢ ᠰᠢᠨᠡᠴᠢᠯᠡᠯᠡ᠃ ᠬᠡᠦᠬᠡᠳ ᠨᠢ ᠮᠠᠨ ᠣ ᠪᠢᠴᠢᠭᠰᠡᠨ ᠢ ᠲᠠᠨᠢᠬᠤ ᠦᠭᠡᠢ ᠪᠣᠯᠣᠯᠠ᠂ ᠬᠡᠦᠬᠡᠳ ᠦᠨ ᠪᠢᠴᠢᠭᠰᠡᠨ ᠢ ᠪᠢᠳᠡ ᠲᠠᠨᠢᠬᠤ ᠪᠠᠨ ᠪᠣᠯᠢᠯᠠ᠃ ᠮᠣᠩᠭᠣᠯ ᠬᠡᠯᠡᠨ ᠣ ᠰᠤᠷᠠᠭ ᠵᠠᠩᠭᠢᠴᠢᠯᠠᠯᠲᠠ ᠭᠡᠳ ᠮᠣᠩᠭᠣᠯ ᠬᠡᠯᠡᠨ ᠣ ᠣᠯᠠᠨ ᠺᠣᠮᠫᠢᠦ᠋ᠲ᠋ᠧᠷ ᠰᠤᠹᠲ ᠨᠤᠭᠤᠳ ᠭᠠᠷᠴᠤ ᠢᠷᠡᠯᠡ᠃ ᠣᠯᠠᠨ ᠰᠤᠹᠲ ᠨᠢ ᠰᠢᠨᠡ ᠰᠢᠨᠡ ᠮᠡᠷᠭᠡᠵᠢᠯ ᠢ ᠬᠡᠷᠡᠭᠯᠡᠭᠰᠡᠨ ᠭᠡᠵᠦ ᠵᠠᠷᠯᠠᠵᠤ᠂ ᠬᠡᠨ ᠠᠯᠢᠨ ᠳᠤ ᠪᠠᠨ ᠵᠣᠬᠢᠴᠠᠨ ᠲᠣᠬᠢᠷᠠᠯᠴᠠᠬᠤ ᠦᠭᠡᠢ᠂ ᠴᠦᠬᠡᠨ ᠬᠡᠳᠦᠨ ᠮᠣᠩᠭᠣᠯ ᠤᠨ ᠬᠢ ᠪᠠᠨ ᠠᠯᠭᠠᠨ ᠲᠡᠳᠦᠢ ᠵᠠᠬᠠ ᠶ᠋ᠢ︽ ᠣᠳᠣ ᠲᠠᠢ ᠲᠡᠭᠷᠢ ᠣᠷᠴᠢᠵᠤ᠂ ᠣᠯᠠᠨ ᠤᠯᠤᠰ ᠲᠡᠮᠡᠴᠡᠯᠳᠦᠵᠦ᠂ ᠣᠷᠣᠨ ᠳᠠᠭᠠᠨ ᠬᠡᠪᠲᠡᠬᠦ ᠵᠠᠪ ᠦᠭᠡᠢ᠂ ᠣᠯᠵᠠᠯᠳᠣᠨ ᠪᠤᠯᠢᠶᠠᠯᠳᠤᠵᠤ︾ ᠪᠠᠢᠨᠠ ᠪᠢᠯᠡ᠃
ᠳᠠᠶᠠᠭᠠᠷᠴᠢᠯᠠᠯᠲᠠ ᠵᠢᠨ ᠦᠨᠳᠦᠰᠦ ᠤᠯᠠᠮᠵᠢᠯᠠᠯ ᠳ᠋ᠥ ᠪᠠᠢᠳᠠᠭ᠂ ᠬᠠᠷᠢᠨ ᠲᠡᠭᠦᠨ ᠤ ᠡᠰᠡᠷᠭᠦ ᠪᠢᠰᠢ᠃ ᠭᠢᠳᠢᠨᠰ ᠭᠡᠵᠦ ᠨᠥᠬᠥᠷ ᠶᠠᠷᠢᠭᠰᠠᠨ ᠪᠠᠢᠳᠠᠭ᠃ ᠳᠠᠶᠠᠭᠠᠷᠴᠢᠯᠠᠯᠲᠠ ᠨᠢ ᠳᠡᠯᠡᠬᠡᠢ ᠵᠢᠨ ᠪᠦᠬᠦ ᠰᠣᠶᠣᠯ ᠨᠢ ᠮᠡᠳᠡᠭᠡᠯᠡᠯ ᠦᠨ ᠮᠡᠷᠭᠡᠵᠢᠯ ᠳ᠋ᠥ ᠳᠡᠪᠰᠢᠨ᠂ ᠳᠡᠯᠡᠬᠡᠢ ᠵᠢᠨ ᠬᠦᠷᠢᠶᠡᠨ ᠳ᠋ᠥ ᠡᠷᠬᠡ ᠲᠡᠭᠰᠢ ᠳᠡᠯᠭᠡᠷᠡᠨ ᠴᠡᠴᠡᠭᠯᠡᠬᠦ ᠵᠢ ᠵᠢᠭᠠᠳᠠᠭ᠃ ᠬᠠᠷᠢᠨ ᠤᠯᠠᠮᠵᠢᠯᠠᠯ ᠰᠣᠶᠣᠯ ᠵᠢᠠᠨ ᠲᠠᠶᠠᠭᠳᠠᠨ᠂ ᠰᠢᠨᠡ ᠶ᠋ᠢ ᠬᠥᠭᠡᠭᠡᠴᠡᠯᠳᠦᠨ᠂ ᠰᠣᠶᠣᠯ ᠤᠯᠠᠮᠵᠢᠯᠠᠯ ᠵᠢᠠᠨ ᠵᠠᠬᠠ ᠵᠡᠭᠡᠯᠢ ᠵᠢᠨ ᠬᠠᠷᠠ ᠮᠠᠢᠮᠠᠢ ᠪᠣᠯᠭᠠᠬᠤ ᠶᠠᠪᠤᠳᠠᠯ ᠪᠢᠰᠢ᠃ ᠨᠡᠩ ᠴᠦ ᠥᠪᠡᠷ ᠦᠨ ᠠᠰᠢᠭ ᠲᠤᠰᠠ ᠵᠢᠨ ᠲᠥᠯᠥᠭᠡ ᠨᠠᠵᠠᠭᠠᠢᠷᠠᠭᠤᠯᠤᠨ᠂ ᠬᠤᠪᠢᠷᠠᠭᠤᠯᠤᠨ᠂ ᠥᠭᠡᠷᠡᠴᠢᠯᠡᠨ ᠲᠠᠢᠯᠪᠤᠷᠢᠯᠠᠵᠤ ᠰᠢᠨᠡ ᠶᠢ ᠡᠭᠦᠳᠦᠯᠡ ᠭᠡᠵᠦ ᠣᠩᠭᠢᠷᠠᠬᠤ ᠶᠠᠪᠤᠳᠠᠯ ᠪᠢᠰᠢ᠃ ᠰᠢᠨᠡ ᠭᠡᠳᠡᠭ ᠨᠢ ᠲᠦᠯᠡᠰᠢᠨ ᠣ ᠳᠡᠪᠰᠢᠯᠲᠡ ᠡᠴᠡ ᠬᠠᠶᠠᠭᠳᠠᠭᠰᠠᠨ ᠠᠷᠭᠠᠯ ᠵᠢᠠᠨ ᠬᠣᠭ ᠪᠢᠰᠢ ᠪᠠᠶᠠᠯᠢᠭ ᠪᠣᠯᠭᠠᠨ ᠨᠡᠭᠡᠭᠡᠬᠦ᠂ ᠦᠨᠡ ᠨᠢ ᠤᠨᠠᠵᠤ ᠬᠠᠶᠠᠭᠳᠠᠵᠤ ᠪᠠᠢᠭᠠ ᠠᠷᠠᠰᠤ ᠰᠢᠷᠢ ᠵᠢᠡᠨ ᠪᠠᠶᠠᠯᠢᠭ ᠪᠣᠯᠭᠠᠨ ᠪᠣᠯᠪᠠᠰᠤᠷᠠᠭᠤᠯᠬᠤ ᠵᠡᠷᠭᠡ ᠤᠯᠠᠮᠵᠢᠯᠠᠯ ᠵᠢᠠᠨ ᠵᠠᠯᠭᠠᠮᠵᠢᠯᠠᠨ ᠬᠥᠭᠵᠢᠭᠦᠯᠬᠦ ᠶᠠᠪᠤᠳᠠᠯ ᠪᠣᠯᠬᠤ ᠶᠤᠮ᠃ ᠮᠠᠯᠵᠢᠯ ᠰᠣᠶᠣᠯ ᠴᠠᠭ ᠡᠷᠡᠨ ᠡᠴᠡ ᠬᠣᠴᠣᠷᠤᠭᠰᠠᠨ ᠪᠢᠰᠢ᠂ GDP ᠪᠠᠷ ᠪᠠᠷᠢᠮᠵᠢᠶᠠᠯᠠᠭᠰᠠᠨ ᠰᠢᠯᠭᠠᠯᠲᠠ ᠳ᠋ᠥ ᠢᠯᠭᠠᠪᠤᠷᠢᠯᠠᠭᠳᠠᠨ ᠭᠠᠳᠠᠭᠤᠷᠴᠢᠯᠠᠭᠳᠠᠭᠰᠠᠨ ᠲᠡᠳᠦᠢ ᠶᠤᠮ᠃ ᠭᠠᠳᠠᠭᠤᠷᠴᠢᠯᠠᠯ ᠢ ᠡᠰᠡᠷᠭᠦᠴᠡᠬᠦ ᠦᠭᠡᠢ ᠰᠢᠳᠤᠷᠭᠤᠯᠠᠨ ᠵᠢᠷᠤᠭᠤᠯᠵᠤ᠂ ᠤᠯᠠᠮᠵᠢᠯᠠᠯ ᠵᠢᠠᠨ ᠬᠠᠶᠠᠭᠰᠠᠨ ᠨᠡᠢᠭᠡᠮ ᠨᠢ ᠰᠦᠨᠡᠰᠦ ᠪᠠᠨ ᠭᠡᠭᠡᠭᠰᠡᠨ ᠬᠡᠭᠦᠷ ᠲᠡᠳᠦᠢ ᠪᠠᠢᠵᠤ᠂ ᠬᠡᠯᠡ ᠨᠢ ᠭᠣᠯᠣᠭᠠᠳ ᠲᠡᠨᠳᠡ ᠡᠷᠭᠢᠴᠡᠬᠦ ᠦᠭᠡᠢ᠃ ᠥᠪᠥᠷ ᠮᠣᠩᠭᠣᠯ ᠬᠡᠯᠡᠨ ᠣ ᠰᠥᠨᠥᠬᠦ ᠬᠡᠯᠪᠡᠷᠢ ᠵᠢᠨ 5 ᠨᠢ ᠡᠨᠡ ᠪᠣᠯᠬᠤ ᠠᠵᠤᠭᠤ᠃
ᠬᠡᠯᠡ ᠰᠤᠳᠤᠯᠤᠯ ᠤᠨ ᠡᠷᠳᠡᠮᠲᠡᠨ ᠳ᠋ᠠᠨᠢᠸᠢᠯ᠂ ᠨᠧᠲ᠋ᠧᠯ ᠪᠣᠯᠣᠨ ᠰᠣᠽᠠᠨᠧ᠂ ᠿᠤᠮᠠᠢᠨᠧ ᠠᠴᠠ ᠬᠡᠯᠡᠨ ᠣ ᠮᠥᠬᠥᠯ ᠰᠥᠨᠥᠯ ᠦᠨ ᠲᠤᠬᠠᠢ ᠥᠭᠥᠯᠡᠬᠦ ᠳᠡᠬᠡᠨ︽ ᠬᠡᠯᠡ ᠥᠪᠡᠰᠦᠪᠡᠨ ᠰᠦᠨᠦᠬᠦ ᠪᠢᠰᠢ᠂ ᠬᠠᠷᠢᠨ ᠬᠡᠯᠡ ᠨᠢ ᠬᠡᠯᠡᠨ ᠳ᠋ᠥ ᠪᠠᠨ ᠬᠥᠨᠥᠭᠡᠭᠳᠡᠳᠡᠭ ᠶᠤᠮ ︾ ᠭᠡᠵᠡᠢ᠃ ᠣᠳᠣ ᠳᠡᠯᠡᠬᠡᠢ ᠵᠢᠨ ᠬᠡᠪᠴᠢᠶᠡᠨ ᠳ᠋ᠥ 6000 ᠭᠠᠷᠤᠢ ᠲᠥᠷᠥᠯ ᠦᠨ ᠬᠡᠯᠡ ᠣᠷᠣᠰᠢᠨ ᠪᠠᠢᠭᠠ ᠭᠡᠵᠦ ᠲᠣᠭᠠᠴᠢᠯᠠᠭᠳᠠᠵᠤ ᠪᠠᠢᠨᠠ᠃ ᠭᠡᠲᠡᠯᠡ ᠥᠪᠡᠷ ᠦᠨ ᠭᠡᠰᠡᠨ ᠨᠡᠷᠡᠢᠳᠦᠯ ᠲᠠᠢ ᠬᠡᠯᠡ ᠨᠢ ᠠᠯᠪᠠᠨ ᠶᠣᠰᠣᠨ ᠤ ᠲᠣᠭᠠᠴᠠᠭᠠ ᠵᠢᠨ 6 ᠳᠠᠬᠢᠨ ᠢᠯᠡᠭᠦᠦ 39000 ᠲᠥᠷᠥᠯ ᠪᠠᠢᠭᠠ ᠭᠡᠵᠦ ᠬᠡᠯᠡ ᠰᠤᠳᠤᠯᠤᠯ ᠤᠨ ᠡᠷᠳᠡᠮᠲᠡᠳ ᠡᠴᠡ ᠮᠡᠳᠡᠭᠡᠯᠡᠵᠦ ᠪᠤᠢ᠃ ᠭᠡᠪᠡᠴᠦ ᠣᠳᠣ ᠳᠡᠯᠡᠬᠡᠢ ᠵᠢᠨ ᠤᠯᠤᠰ ᠤᠨ ᠲᠣᠭᠠ ᠨᠢ 200 ᠭᠠᠷᠤᠢᠬᠠᠨ ᠪᠠᠢᠵᠤ᠂ ᠰᠢᠭᠤᠳ ᠲᠡᠭᠰᠢᠳᠬᠡᠨ ᠦᠵᠡᠪᠡᠯ ᠤᠯᠤᠰ ᠨᠢᠭᠡᠪᠦᠷᠢ ᠳ᠋ᠥ 300 ᠭᠠᠷᠤᠢ ᠬᠡᠯᠡ ᠶ᠋ᠢ ᠬᠡᠷᠡᠭᠯᠡᠵᠦ ᠪᠠᠢᠨᠠ ᠭᠡᠬᠦ ᠲᠣᠭᠠᠴᠠᠭᠠ ᠪᠣᠯᠬᠤ ᠶᠤᠮ᠃
ᠳᠡᠯᠡᠬᠡᠢ ᠵᠢᠨ ᠬᠡᠯᠡ ᠬᠥᠮᠥᠨ ᠢ ᠰᠣᠴᠢᠭᠠᠮᠠ ᠲᠥᠷᠥᠯᠵᠢᠨ ᠳᠡᠯᠭᠡᠷᠡᠵᠦ ᠪᠠᠢᠭᠠ ᠪᠣᠯᠪᠠᠴᠤ ᠤᠯᠤᠰ ᠨᠢᠭᠡᠪᠦᠷᠢ 300 ᠲᠥᠷᠥᠯ ᠦᠨ ᠬᠡᠯᠡ ᠶ᠋ᠢ ᠬᠡᠷᠡᠭᠯᠡᠵᠦ ᠪᠠᠢᠨᠠ ᠭᠡᠳᠡᠭ ᠰᠡᠳᠬᠢᠯ ᠦᠨ ᠣᠯᠣᠯᠲᠠ ᠮᠠᠨᠤᠰ ᠲᠣ ᠣᠬᠠᠢ ᠲᠡᠢᠮᠦ ᠪᠤᠢ ᠭᠡᠵᠦ ᠲᠣᠯᠣᠭᠠᠢ ᠳᠣᠬᠢᠨ ᠵᠥᠪᠰᠢᠶᠡᠬᠦ ᠲᠥᠷᠥᠭᠳᠡᠯ ᠢ ᠣᠯᠭᠣᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠳᠠᠭ᠃ ᠳᠡᠯᠡᠬᠡᠢ ᠵᠢᠨ ᠬᠡᠯᠡᠨ ᠣ ᠲᠠᠷᠬᠠᠯᠲᠠ ᠵᠢᠨ ᠨᠢᠭᠲᠠᠴᠠ ᠨᠢ ᠠᠹᠷᠢᠺᠠ ᠲᠢᠪ ᠪᠤᠶᠤ ᠠᠦ᠋ᠰᠲᠷᠠᠯᠢᠶᠠ ᠵᠡᠷᠭᠡ ᠣᠷᠣᠨ ᠵᠢᠠᠷ ᠭᠠᠢᠬᠠᠯ ᠲᠥᠷᠥᠮᠠ ᠣᠯᠠᠨ ᠬᠡᠯᠡ ᠬᠥᠷᠰᠢᠯᠡᠳᠦᠨ ᠣᠷᠣᠰᠢᠬᠤ ᠪᠣᠯᠪᠠᠴᠤ᠂ ᠡᠸᠦ᠋ᠷᠦᠫᠡ ᠲᠢᠪ ᠦᠨ ᠤᠯᠤᠰ ᠣᠷᠣᠨ ᠵᠢᠠᠷ ᠳᠡᠯᠡᠬᠡᠢ ᠵᠢᠨ ᠨᠢᠭᠡᠳᠦᠭᠡᠷ ᠤᠳᠠᠭᠠᠨ ᠣ ᠳᠠᠢᠨ ᠠᠴᠠ ᠡᠬᠢᠯᠡᠨ ᠡᠷᠴᠢᠮᠯᠡᠭᠳᠡᠨ ᠴᠢᠩᠭᠠᠷᠠᠭᠰᠠᠨ︽ ᠨᠢᠭᠡ ᠬᠡᠯᠡ᠂ ᠨᠢᠭᠡ ᠦᠨᠳᠦᠰᠦᠲᠡᠨ᠂ ᠨᠢᠭᠡ ᠲᠥᠷᠥ︾ ᠵᠢᠨ ᠤᠯᠤᠰ ᠲᠥᠷᠥ ᠵᠢᠨ ᠢᠳᠢᠥᠷᠥᠭᠢ ᠳ᠋ᠥ ᠨᠣᠴᠢᠲᠠᠢ ᠨᠥᠯᠥᠭᠡᠯᠡᠭᠳᠡᠨ᠂ ᠨᠢᠭᠡ ᠤᠯᠤᠰ ᠲᠤ ᠨᠢᠭᠡ ᠬᠡᠯᠡ ᠭᠠᠭᠴᠠᠭᠠᠷ ᠡᠵᠡᠷᠬᠡᠬᠦ ᠬᠡᠯᠡᠨ ᠣ ᠰᠡᠢᠷᠡᠭ ᠪᠠᠢᠳᠠᠯ ᠨᠡᠢᠳᠡᠮᠵᠢᠭᠰᠡᠨ ᠪᠠᠢᠳᠠᠭ᠃ ᠠᠽᠢᠶᠠ ᠵᠢᠨ ᠬᠣᠵᠢᠮᠳᠠᠭᠤ ᠦᠶᠡ ᠳ᠋ᠥ ᠣᠷᠴᠢᠨ ᠦᠶᠡ ᠵᠢᠨ ᠲᠥᠷᠥ ᠵᠢᠨ ᠪᠠᠢᠭᠤᠯᠤᠯ ᠢ ᠵᠢᠭᠡᠯᠡᠨ ᠰᠤᠷᠤᠯᠴᠠᠭᠰᠠᠨ ᠤᠯᠤᠰ ᠣᠷᠣᠨ ᠨᠢ ᠶᠠᠭᠤᠨ ᠣ ᠡᠮᠦᠨᠡ ᠬᠡᠯᠡᠨ ᠦ ᠨᠢᠭᠡᠳᠦᠯ ᠢ ᠴᠢᠬᠤᠯᠠᠴᠢᠯᠠᠨ ᠦᠵᠡᠬᠦ ᠪᠣᠯᠣᠭᠰᠠᠨ ᠨᠢ ᠴᠤ ᠡᠭᠦᠨ ᠡᠴᠡ ᠢᠷᠡᠯᠲᠡᠢ ᠶᠤᠮ᠃
ᠳᠡᠯᠡᠬᠡᠢ ᠵᠢᠨ ᠬᠡᠯᠡᠨ ᠣ ᠲᠥᠷᠥᠯ ᠨᠢ 6000 ᠭᠡᠬᠦ ᠳ᠋ᠥ ᠠᠰᠤᠷᠤ ᠶᠡᠬᠡ ᠲᠣᠭᠠ ᠰᠢᠭ᠋ ᠬᠠᠷᠠᠭᠳᠠᠬᠤ ᠪᠣᠯᠪᠠᠴᠤ ᠡᠨᠡ ᠨᠢ 500 ᠵᠢᠯ ᠦᠨ ᠡᠮᠦᠨᠡᠬᠢ ᠬᠡᠯᠡᠨ ᠣ ᠲᠥᠷᠥᠯ ᠲᠣᠭᠠ ᠵᠢᠨ ᠲᠠᠯᠠ ᠬᠠᠭᠠᠰ ᠲᠡᠳᠦᠢ ᠶᠤᠮ᠃ ᠡᠨᠡ ᠨᠢ 500 ᠵᠢᠯ ᠦᠨ ᠲᠤᠷᠰᠢ ᠳ᠋ᠥ ᠳᠡᠯᠡᠬᠡᠢ ᠵᠢᠨ ᠬᠡᠯᠡᠨ ᠣ ᠲᠠᠯᠠ ᠬᠠᠭᠠᠰ ᠨᠢ ᠰᠥᠨᠥᠭᠰᠡᠨ ᠭᠡᠳᠡᠭ ᠲᠣᠭᠠᠴᠠᠭᠠ ᠪᠣᠯᠬᠤ ᠪᠥᠭᠡᠳ ᠦᠯᠡᠳᠡᠵᠦ ᠪᠤᠢ ᠲᠠᠯᠠ ᠬᠠᠭᠠᠰ ᠵᠢᠨ ᠬᠢᠨᠢ 20% ᠵᠢᠨ ᠬᠡᠯᠡ ᠨᠢ ᠴᠦ ᠰᠥᠨᠥᠬᠦ ᠶᠠᠪᠤᠴᠠ ᠪᠠᠨ ᠡᠬᠢᠯᠡᠭᠦᠯᠦᠭᠰᠡᠨ ᠪᠥᠭᠡᠳ ᠡᠨᠡ ᠬᠦ ᠶᠠᠪᠤᠴᠠ ᠨᠢ ᠤᠯᠠᠮ ᠵᠢᠠᠷ ᠬᠤᠷᠳᠤᠰᠬᠤ ᠣᠨᠴᠠᠯᠢᠭ ᠰᠢᠨᠵᠢ ᠲᠠᠢ ᠪᠣᠯᠵᠠᠢ᠃ ᠳ᠋ᠠᠨᠢᠸᠢᠯ᠂ ᠨᠧᠲ᠋ᠧᠯ ᠪᠣᠯᠣᠨ ᠰᠣᠽᠠᠨᠧ᠂ ᠿᠣᠮᠠᠢᠨᠧ ᠠᠴᠠ︽ ᠰᠥᠨᠥᠨ ᠣᠳᠬᠤ ᠬᠡᠯᠨ ᠨᠤᠭᠤᠳ︾ ᠭᠡᠳᠡᠭ ᠪᠦᠲᠦᠭᠡᠯ ᠳᠡᠬᠡᠨ ᠨᠢᠭᠡ ᠲᠥᠷᠥᠯ ᠦᠨ ᠬᠡᠯᠡ ᠨᠢ ᠰᠥᠨᠥᠵᠦ ᠣᠳᠬᠤ ᠵᠢᠨ ᠰᠢᠯᠲᠠᠭᠠᠨ ᠢ ᠤᠯᠤᠰ ᠲᠥᠷᠥ᠂ ᠠᠵᠤ ᠠᠬᠤᠢ᠂ ᠨᠡᠢᠭᠡᠮ ᠦᠨ ᠬᠠᠷᠠᠭᠠᠰᠤᠨ ᠠᠴᠠ ᠰᠢᠨᠵᠢᠯᠡᠨ ᠵᠠᠳᠠᠯᠵᠤ᠂ ᠴᠥᠭᠡᠬᠡᠨ ᠲᠣᠭᠠᠲᠠᠳ ᠤᠨ ᠬᠡᠯᠡᠨ ᠣ ᠮᠥᠬᠥᠯ ᠶᠢᠨ ᠬᠠᠷᠠᠰᠠᠯᠲᠤ ᠪᠠᠢᠳᠠᠯ ᠢ ᠮᠡᠳᠡᠭᠡᠯᠡᠭᠰᠡᠨ ᠪᠠᠢᠳᠠᠭ᠃ ᠲᠤᠰ ᠨᠣᠮ ᠳ᠋ᠥ︽ ᠠᠢᠷᠯᠠᠨᠳ᠋ ᠬᠡᠯᠡ ᠨᠢ ᠬᠡᠯᠡᠨ ᠦ ᠠᠯᠠᠭᠤᠷᠴᠢᠨ ᠠᠩᠭ᠍ᠯᠢ ᠬᠡᠯᠡ ᠳ᠋ᠥ ᠬᠥᠨᠥᠭᠡᠭᠳᠡᠪᠡ︾ ᠭᠡᠵᠦ ᠬᠡᠯᠡᠭᠰᠡᠨ ᠪᠠᠢᠳᠠᠭ᠃1966 ᠣᠨ ᠣ ᠦᠶᠡ ᠳ᠋ᠥ ᠳᠡᠯᠡᠬᠡᠢ ᠵᠢᠨ ᠰᠢᠦᠳᠠᠨ ᠳᠠᠮᠵᠢᠭᠤᠯᠭᠠ ᠵᠢᠨ 70% ᠣᠷᠴᠢᠮ ᠨᠢ ᠠᠩᠭ᠍ᠯᠢ ᠬᠡᠯᠡ ᠪᠡᠷ ᠬᠠᠶᠠᠭᠯᠠᠭᠳᠠᠵᠤ᠂ ᠷᠠᠳᠢᠤ ᠲᠸ᠋ᠯᠸᠢᠰ ᠦᠨ ᠨᠡᠪᠲᠡᠷᠡᠭᠦᠯᠭᠡ ᠵᠢᠨ ᠬᠡᠯᠡᠨ ᠣ 60% ᠨᠢ ᠠᠩᠭ᠍ᠯᠢ ᠬᠡᠯᠡ ᠪᠣᠯᠵᠠᠢ᠃ ᠣᠯᠠᠨ ᠤᠯᠤᠰ ᠤᠨ ᠬᠠᠷᠢᠯᠴᠠᠭᠠ᠂ ᠤᠯᠤᠰ ᠲᠥᠷᠥ᠂ ᠠᠵᠤ ᠠᠬᠤᠢ ᠵᠢᠨ ᠲᠠᠪᠴᠠᠩ ᠳ᠋ᠥ ᠠᠩᠭ᠍ᠯᠢ ᠬᠡᠯᠡ ᠬᠣᠰᠢᠭᠤᠴᠢᠯᠠᠨ ᠴᠣᠯᠭᠣᠷᠠᠵᠤ᠂ ᠳᠡᠯᠡᠬᠡᠢ ᠵᠢᠨ ᠲᠠᠯᠠ ᠬᠠᠭᠠᠰ ᠢ ᠳᠠᠪᠠᠭᠰᠠᠨ ᠣᠯᠠᠨ ᠲᠣᠭᠠᠨ ᠣ ᠬᠥᠮᠥᠨ ᠠᠮᠠ ᠵᠢᠨ ᠠᠮᠢᠳᠤᠷᠠᠯ ᠳ᠋ᠥ ᠰᠢᠭᠤᠳ ᠪᠤᠶᠤ ᠳᠠᠮ ᠵᠢᠠᠷ ᠨᠥᠯᠥᠭᠡᠯᠡᠬᠦ ᠪᠣᠯᠵᠠᠢ᠃ ᠭᠡᠲᠡᠯᠡ ᠠᠩᠭ᠍ᠯᠢ ᠬᠡᠯᠡ ᠥᠪᠡᠷ ᠢ ᠪᠠᠨ ᠬᠡᠯᠡᠨ ᠣ ᠠᠯᠠᠭᠤᠷᠴᠢᠨ ᠭᠡᠵᠦ ᠶᠡᠷᠦ ᠡᠴᠡ ᠮᠡᠳᠡᠷᠡᠵᠦ ᠦᠵᠡᠭᠡ ᠦᠭᠡᠢ ᠪᠥᠭᠡᠳ ᠲᠡᠭᠡᠵᠦ ᠮᠡᠳᠡᠷᠡᠵᠦ ᠦᠵᠡᠬᠦ ᠪᠣᠳᠣᠯ ᠴᠤ ᠪᠠᠢᠬᠤ ᠦᠭᠡᠢ᠃ ᠮᠠᠨ ᠡᠷᠡᠨ ᠣ 17-18 ᠵᠠᠭᠤᠨ ᠣ ᠬᠣᠭᠣᠷᠣᠨᠳᠤ ᠥᠷᠥᠨᠡᠳᠠᠬᠢᠨ ᠣ ᠬᠡᠯᠡᠨ ᠨᠤᠭᠤᠳ ᠥᠪᠡᠷ ᠥᠪᠡᠷ ᠦᠨ ᠺᠣᠯᠣᠨᠢ ᠣᠷᠣᠨ ᠳ᠋ᠥ ᠲᠡᠷᠡ ᠨᠤᠲᠤᠭ ᠤᠨ ᠤᠤᠭᠠᠯ ᠬᠡᠯᠡᠨ ᠳ᠋ᠥ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢ ᠢᠯᠡᠷᠬᠡᠢᠯᠡᠯ ᠳ᠋ᠥ ᠡᠰᠡ ᠵᠣᠬᠢᠴᠠᠭᠰᠠᠨ ᠪᠦᠳᠦᠭᠦᠯᠢᠭ ᠪᠣᠷᠣᠭᠵᠢᠭᠤᠨ ᠬᠡᠯᠡᠨ ᠨᠦᠭᠥᠳ ᠭᠡᠬᠦ ᠱᠣᠰᠢᠭᠠ ᠶᠢ ᠬᠠᠳᠠᠨ᠂ ᠲᠡᠨᠳᠡᠬᠢ ᠢᠷᠭᠡᠳ ᠢ ᠤᠤᠭᠠᠯ ᠬᠡᠯᠡᠨ ᠡᠴᠡ ᠪᠠᠨ ᠠᠩᠭ᠍ᠯᠢ ᠬᠡᠯᠡᠨ ᠳ᠋ᠥ ᠰᠢᠯᠵᠢᠬᠦ ᠶᠢ ᠤᠷᠮᠠᠰᠢᠭᠤᠯᠤᠨ ᠬᠥᠬᠢᠭᠦᠯᠵᠦ᠂ ᠲᠡᠭᠦᠨ ᠢ ᠪᠡᠨ ᠢᠷᠭᠡᠨᠰᠢᠯ ᠦᠨ ᠶᠡᠬᠡ ᠳᠡᠪᠰᠢᠯᠲᠡ ᠬᠡᠮᠡᠨ ᠤᠶᠠᠩᠭᠠᠯᠠᠨ ᠤᠬᠠᠭᠤᠯᠤᠭᠰᠠᠨ ᠪᠢᠯᠡ᠃
ᠰᠥᠨᠥᠨ ᠣᠳᠣᠭᠰᠠᠨ ᠬᠡᠯᠡᠨ ᠨᠦᠭᠥᠳ ᠨᠢ ᠦᠨᠡᠬᠡᠷ ᠳᠠᠩ ᠴᠤᠯᠭᠤᠢ ᠪᠦᠳᠦᠭᠦᠯᠢᠭ ᠬᠡᠯᠡᠨ ᠨᠦᠭᠥᠳ ᠪᠠᠢᠭᠰᠠᠨ ᠦᠦ︖ ᠱᠠᠯ ᠬᠤᠳᠠᠯ ᠬᠤᠴᠠᠭᠰᠠᠨ ᠭᠡᠳᠡᠭ ᠨᠢ ᠣᠳᠣ ᠰᠡᠭᠦᠯ ᠦᠨ ᠦᠶᠡ ᠵᠢᠨ ᠬᠡᠯᠡ ᠰᠤᠳᠤᠯᠤᠯ ᠤᠨ ᠳ᠋ᠦᠩ ᠳ᠋ᠥ ᠢᠯᠡᠷᠡᠭᠰᠡᠨ ᠪᠠᠢᠨᠠ᠃ ᠦᠪᠢᠹ ᠬᠡᠯᠡ ᠨᠢ 81 ᠭᠡᠢᠭᠦᠯᠦᠭᠴᠢ᠂ 3 ᠡᠭᠡᠰᠢᠭ ᠲᠠᠢ ᠬᠡᠯᠡ ᠰᠤᠳᠤᠯᠤᠯ ᠤᠨ ᠬᠤᠪᠢ ᠳ᠋ᠥ ᠭᠠᠢᠬᠠᠮᠰᠢᠭ ᠲᠠᠢ ᠰᠠᠢᠬᠠᠨ ᠣᠨᠴᠠᠯᠢᠭ ᠪᠦᠬᠦᠢ ᠬᠡᠯᠡ ᠪᠠᠢᠭᠰᠠᠨ ᠪᠠ ᠫᠠᠪᠦᠨᠢᠶᠠ ᠺᠸ᠋ᠨᠢᠶᠠ ᠵᠢᠨ ᠿᠣᠲᠺᠠᠰ ᠬᠡᠯᠡ ᠨᠢ 5 ᠡᠭᠡᠰᠢᠭ 6 ᠭᠡᠢᠭᠦᠯᠦᠭᠴᠢ ᠪᠦᠬᠦᠢ ᠰᠣᠨᠢᠷᠬᠠᠯᠲᠠᠢ ᠰᠠᠢᠬᠠᠨ ᠬᠡᠯᠡ ᠪᠠᠢᠭᠰᠠᠨ ᠪᠢᠯᠡ᠃ ᠠᠪᠢᠶᠠ ᠵᠢᠨ ᠬᠤᠪᠢ ᠳ᠋ᠥ ᠡᠢᠨᠬᠦ ᠪᠠᠢᠭᠰᠠᠨ ᠭᠠᠳᠠᠨᠠ᠂ ᠰᠡᠳᠬᠢᠬᠦᠢ ᠵᠢᠨ ᠬᠤᠪᠢ ᠳ᠋ᠥ᠂ ᠢᠨᠦᠢᠲ ᠬᠡᠯᠡ ᠨᠢ ᠨᠣᠬᠠᠢ ᠵᠢᠨ ᠪᠡᠶᠡ ᠵᠢᠨ ᠵᠢᠩ ᠪᠠ ᠴᠢᠷᠭᠠ ᠵᠢᠨ ᠶᠡᠬᠡ ᠪᠠᠭᠠ ᠶᠢ ᠢᠯᠭᠠᠪᠤᠷᠢᠯᠠᠨ ᠵᠢᠭᠠᠬᠤ ᠴᠢᠳᠠᠪᠬᠢ ᠲᠠᠢ ᠪᠠᠢᠭᠰᠠᠨ ᠪᠠ ᠢᠨᠳᠢᠶᠠᠨᠴᠤᠳ ᠤᠨ ᠮᠢᠺᠮᠠᠺ ᠬᠡᠯᠡ ᠨᠢ ᠣᠢ ᠪᠠᠷ ᠨᠡᠪᠲᠡᠷᠡᠨ ᠥᠩᠭᠡᠷᠡᠬᠦ ᠰᠠᠯᠬᠢᠨ ᠣ ᠴᠢᠭᠯᠡᠯ ᠪᠠ ᠲᠡᠭᠦᠨ ᠣ ᠠᠨᠢᠷ ᠴᠢᠮᠡᠭᠡ ᠳ᠋ᠥ ᠦᠨᠳᠦᠰᠦᠯᠡᠨ ᠣᠢ ᠵᠢᠨ ᠲᠥᠷᠥᠯ ᠵᠦᠢᠯ ᠢ ᠢᠯᠭᠠᠪᠤᠷᠢᠯᠠᠨ ᠬᠤᠪᠢᠶᠠᠷᠢᠯᠠᠵᠤ᠂ ᠨᠡᠷᠡᠢᠳᠴᠦ ᠪᠠᠢᠭᠰᠠᠨ ᠪᠠᠢᠨᠠ᠃ ᠪᠠᠰᠠ ᠤᠰᠸ᠋ᠨᠢᠶᠠ ᠵᠢᠨ ᠣᠯᠠᠩᠬᠢ ᠬᠡᠯᠡ ᠨᠢ ᠥᠮᠴᠢᠯᠡᠭᠦᠯᠦᠨ ᠵᠠᠯᠭᠠᠮᠵᠢᠯᠠᠵᠤ ᠪᠣᠯᠬᠤ ᠵᠦᠢᠯ ᠪᠠ ᠥᠮᠴᠢᠯᠡᠭᠦᠯᠦᠨ ᠵᠠᠯᠭᠠᠮᠵᠢᠯᠠᠵᠤ ᠦᠯᠦ ᠪᠣᠯᠬᠤ ᠵᠦᠢᠯ ᠭᠡᠬᠦ ᠵᠠᠷᠴᠢᠮ ᠵᠢᠠᠷ ᠬᠡᠷᠡᠭ ᠪᠣᠳᠠᠰ ᠢ ᠢᠯᠭᠠᠪᠤᠷᠢᠯᠠᠨ ᠨᠡᠷᠡᠯᠡᠳᠡᠭ ᠪᠠᠢᠭᠰᠠᠨ ᠪᠥᠭᠡᠳ ᠣᠷᠴᠢᠨ ᠦᠶᠡ ᠵᠢᠨ ᠬᠡᠯᠡ ᠵᠦᠢ ᠵᠢᠨ ᠣᠨᠣᠯ ᠳ᠋ᠥ ᠦᠭᠡᠰ ᠤᠨ ᠰᠠᠩ ᠨᠢ ᠴᠢᠩᠭᠠ︵ ᠡᠷᠡ ︶ ᠬᠥᠨᠳᠡᠢ︵ ᠡᠮᠡ ︶᠂ ᠪᠠᠢᠭᠠᠯᠢ ᠵᠢᠨ ᠪᠤᠶᠤ ᠲᠣᠭᠲᠠᠮᠠᠯ ᠨᠡᠷᠡ ᠵᠡᠷᠭᠡ ᠳ᠋ᠥ ᠬᠤᠪᠢᠶᠠᠷᠢᠯᠠᠭᠰᠠᠨ ᠪᠦᠬᠦ ᠦᠭᠡᠰ ᠢ ᠲᠡᠷᠡ ᠵᠠᠷᠴᠢᠮ ᠤᠨ ᠳᠠᠭᠠᠤ ᠳ᠋ᠥ ᠬᠣᠶᠠᠷ ᠶᠡᠬᠡ ᠲᠥᠷᠥᠯ ᠳ᠋ᠥ ᠬᠤᠪᠢᠶᠠᠷᠢᠯᠠᠵᠤ ᠴᠢᠳᠠᠳᠠᠭ ᠪᠠᠢᠨᠠ᠃ 500 ᠵᠠᠭᠤᠨ ᠵᠢᠯ ᠦᠨ ᠲᠤᠷᠰᠢ ᠳ᠋ᠥ ᠲᠣᠭᠠᠯᠠᠰᠢ ᠦᠭᠡᠢ ᠣᠯᠠᠨ ᠲᠥᠷᠥᠯ ᠦᠨ ᠣᠶᠣᠨ ᠣ ᠨᠥᠭᠡᠴᠡ᠂ ᠬᠥᠮᠥᠨ ᠲᠥᠷᠥᠯᠬᠢᠲᠡᠨ ᠣ ᠰᠡᠳᠬᠢᠬᠦᠢ ᠵᠢᠨ ᠬᠡᠯᠪᠡᠷᠢ ᠵᠢᠨ ᠰᠢᠨᠡ ᠪᠤᠶᠤ ᠥᠭᠡᠷᠡ ᠨᠢᠭᠡᠨ ᠲᠥᠷᠥᠯ ᠦᠨ ᠪᠣᠯᠣᠯᠴᠠᠭᠠ ᠨᠤᠭᠤᠳ ᠨᠢ ᠲᠡᠷᠡ ᠬᠡᠯᠡᠨ ᠣ ᠬᠢ ᠬᠠᠮᠲᠤ ᠡᠨᠡ ᠬᠣᠷᠸᠠ ᠡᠴᠡ ᠰᠥᠨᠥᠵᠦ ᠣᠳᠣᠭᠰᠠᠨ ᠪᠠᠢᠨᠠ᠃
ᠬᠡᠯᠡᠨ ᠣ ᠠᠯᠠᠭᠤᠷᠴᠢᠨ ᠣ ᠬᠤᠷᠴᠠ ᠵᠡᠪᠰᠡᠭ ᠨᠢ ᠲᠡᠭᠦᠨ ᠣ ᠣᠮᠣᠷᠬᠠᠭ ᠦᠵᠡᠯ ᠤᠨ ᠬᠣᠱᠣᠩᠨᠠᠯ᠂ ᠢᠯᠭᠠᠪᠤᠷᠢᠯᠠᠯ᠂ ᠱᠣᠰᠢᠭᠠᠯᠠᠯ ᠪᠣᠯᠣᠨᠠ᠃ ᠨᠤᠲᠤᠭ ᠤᠨ ᠠᠶᠠᠯᠭᠤ᠂ ᠠᠷᠠᠳ ᠤᠨ ᠠᠮᠠᠨ ᠠᠶᠠᠯᠭᠤ ᠳ᠋ᠥ ᠬᠠᠨᠳᠤᠭᠤᠯᠤᠭᠰᠠᠨ ᠢᠯᠭᠠᠪᠤᠷᠢᠯᠠᠯ᠂ ᠳᠣᠣᠷᠠᠰᠢᠶᠠᠯ ᠪᠠ ᠶᠡᠬᠡ ᠬᠡᠯᠡᠨ ᠳ᠋ᠥ ᠬᠠᠨᠳᠤᠭᠰᠠᠨ ᠪᠠᠭᠠ ᠬᠡᠯᠡᠨ ᠣ ᠰᠡᠳᠬᠢᠯ ᠦᠨ ᠬᠢᠮᠤᠷᠠᠯ ᠵᠡᠷᠭᠡ ᠨᠢ ᠬᠡᠯᠡᠨ ᠣ ᠠᠯᠠᠭᠤᠷᠴᠢᠨ ᠳ᠋ᠥ ᠰᠢᠳᠤᠷᠭᠤ ᠪᠠᠷ ᠳᠠᠭᠠᠯᠳᠤᠭᠰᠠᠳ ᠤᠨ ᠨᠢᠭᠤᠴᠠ ᠵᠡᠪᠰᠡᠭ ᠪᠣᠯᠬᠤ ᠶᠤᠮ᠃ ᠬᠡᠯᠡᠨ ᠦ ᠶᠡᠬᠡ ᠬᠢᠳᠤᠯᠭᠠ ᠳ᠋ᠥ ᠬᠥᠨᠥᠭᠡᠭᠳᠡᠭᠡ ᠦᠭᠡᠢ ᠬᠠᠲᠠᠭᠤᠵᠢᠨ ᠴᠢᠭᠢᠷᠠᠭᠵᠢᠭᠰᠠᠨ ᠬᠡᠯᠡᠨ ᠣ ᠨᠢᠭᠡᠨ ᠳ᠋ᠥ ᠣᠳᠣ ᠦᠶᠡ ᠳ᠋ᠥ ᠬᠡᠯᠡᠨ ᠣ ᠠᠯᠠᠭᠤᠷᠴᠢᠨ᠂ ᠬᠡᠯᠡᠨ ᠣ ᠡᠵᠡᠷᠬᠡᠭ ᠦᠵᠡᠯᠲᠡᠨ ᠭᠡᠭᠳᠡᠭᠰᠡᠨ ᠠᠩᠭ᠍ᠯᠢ ᠬᠡᠯᠡ ᠲᠣᠭᠠᠯᠠᠭᠳᠠᠬᠤ ᠶᠤᠮ᠃ ᠯᠠᠲ᠋ᠢᠨ ᠬᠡᠯᠡ᠂ ᠭᠷᠢᠭ ᠬᠡᠯᠡ᠂ ᠹᠷᠠᠨᠼᠢ ᠬᠡᠯᠡ ᠵᠡᠷᠭᠡ ᠡᠸᠦ᠋ᠷᠦᠫᠡ ᠵᠢᠨ ᠣᠯᠠᠨ ᠬᠡᠯᠡ ᠡᠴᠡ ᠶᠡᠬᠡ ᠬᠡᠮᠵᠢᠶᠡ ᠪᠠᠷ ᠵᠢᠭᠡᠯᠡᠨ ᠬᠤᠷᠠᠮᠳᠤᠭᠤᠯᠤᠭᠰᠠᠨ ᠦᠭᠡᠰ ᠨᠢ ᠠᠩᠭ᠍ᠯᠢ ᠬᠡᠯᠡᠨ ᠣ ᠦᠭᠡᠰ ᠦᠨ ᠰᠠᠩ ᠤᠨ 60-70% ᠢ ᠡᠵᠡᠯᠡᠳᠡᠭ᠃ ᠬᠥᠷᠰᠢ ᠪᠠᠢᠭᠠ ᠨᠠᠷᠠᠨ ᠤᠯᠤᠰ ᠤᠨ ᠶᠠᠫᠤᠨ ᠬᠡᠯᠡᠨ ᠨᠢ ᠬᠢᠲᠠᠳ ᠬᠡᠯᠡᠨ ᠳ᠋ᠥ ᠰᠢᠭᠤᠳ ᠳᠠᠭᠠᠷᠢᠭᠳᠠᠵᠤ᠂ ᠮᠠᠢᠵᠢ ᠵᠢᠨ ᠰᠢᠨᠡᠴᠢᠯᠡᠯ ᠦᠨ ᠦᠶᠡ ᠳ᠋ᠥ ᠪᠠᠢᠩᠭᠤ ᠬᠡᠷᠡᠭᠯᠡᠬᠦ ᠬᠢᠲᠠᠳ ᠦᠰᠦᠭ ᠤᠨ ᠲᠣᠭᠠ ᠶ᠋ᠢ ᠬᠠᠤᠯᠢ ᠪᠠᠷ ᠬᠢᠵᠠᠭᠠᠷᠯᠠᠨ᠂ ᠾᠢᠷᠠᠭᠠᠨᠠ᠂ ᠺᠠᠲᠠᠺᠠᠨᠠ ᠦᠰᠦᠭ ᠢ ᠬᠡᠷᠡᠭᠯᠡᠬᠦ ᠶ᠋ᠢ ᠤᠷᠮᠠᠰᠢᠭᠤᠯᠤᠨ ᠬᠥᠬᠢᠭᠦᠯᠵᠦ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠣᠳᠣ ᠦᠶᠡ ᠳ᠋ᠥ ᠨᠢᠭᠡᠨᠲᠡ ᠬᠡᠳᠦᠨ ᠵᠠᠭᠤᠨ ᠵᠢᠯ ᠦᠷᠭᠦᠯᠵᠢᠯᠡᠭᠰᠡᠨ ᠬᠢᠲᠠᠳ ᠬᠡᠯᠡᠨ ᠨᠥᠯᠥᠭᠡ ᠶᠢ ᠲᠤᠭᠤᠯᠤᠨ ᠳᠠᠪᠠᠵᠤ ᠴᠢᠳᠠᠭᠰᠠᠨ ᠪᠠᠢᠨᠠ᠃ ᠦᠭᠡᠰ ᠦᠨ ᠰᠠᠩ ᠤᠨ ᠵᠢᠭᠡᠯᠡᠯᠭᠡ ᠨᠢ ᠬᠡᠯᠡᠨ ᠮᠥᠬᠥᠯ ᠦᠨ ᠦᠨᠳᠦᠰᠦᠨ ᠰᠢᠯᠲᠠᠭᠠᠨ ᠪᠢᠰᠢ ᠭᠡᠳᠡᠭ ᠨᠢ ᠬᠡᠯᠡ ᠰᠤᠳᠤᠯᠤᠯ ᠤᠨ ᠣᠯᠠᠨ ᠮᠡᠳᠡᠭᠦᠯᠦᠯᠲᠡ ᠳ᠋ᠥ ᠪᠠᠲᠤᠯᠠᠭᠳᠠᠭᠰᠠᠨ ᠪᠠᠢᠳᠠᠭ᠃ ᠬᠡᠯᠡᠨ ᠣ ᠮᠥᠬᠥᠯ ᠰᠥᠨᠥᠯ ᠭᠡᠵᠦ ᠶᠠᠷᠢᠭᠰᠠᠨ ᠴᠤ ᠬᠡᠯᠡ ᠨᠢ ᠥᠪᠡᠰᠦᠪᠡᠨ ᠪᠡᠶᠡ ᠪᠠᠨ ᠳᠠᠭᠠᠭᠰᠠᠨ ᠠᠮᠢᠳᠤ ᠪᠣᠳᠠᠰ ᠪᠢᠰᠢ ᠪᠠᠢᠳᠠᠭ ᠤᠨ ᠬᠤᠪᠢ ᠳ᠋ᠥ᠂ ᠲᠡᠷᠡ ᠨᠢ ᠲᠡᠭᠦᠨ ᠢ ᠬᠡᠷᠡᠭᠯᠡᠭᠴᠢᠳ ᠦᠨ ᠤᠯᠤᠰ ᠲᠥᠷᠥ᠂ ᠨᠡᠢᠭᠡᠮ ᠠᠵᠤ ᠠᠬᠤᠢ ᠵᠢᠴᠢ ᠦᠵᠡᠯ ᠤᠬᠠᠮᠰᠠᠷ ᠤᠨ ᠰᠢᠯᠲᠠᠭᠠᠨ ᠠᠴᠠ ᠪᠣᠯᠵᠤ︽ ᠠᠯᠠᠭᠳᠠᠵᠤ ︾ ᠪᠠᠢᠳᠠᠭ᠃