                  

                                                                                       

 ᠲᠡᠭᠡᠬᠦ ᠪᠡᠷ ᠮᠢᠬ᠎ᠠ ᠪᠠᠷ ᠢᠶᠠᠨ ᠬᠣᠭᠣᠯᠠ ᠬᠢᠬᠦ ᠶᠢᠨ ᠡᠮᠦᠨ᠎ᠡ  ᠤᠤ  ᠰᠠᠶ᠋ᠢᠬᠠᠨ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠮᠢᠬ᠎ᠠ ᠶᠢ ᠶᠠᠮᠠᠷ ᠴᠤ ᠨᠥᠬᠥᠴᠡᠯ ᠳᠦ ᠤᠭᠢᠶᠠᠵᠤ ᠪᠣᠯᠬᠤ ᠦᠭᠡᠢ ᠭᠡᠳᠡᠭ ᠢ ᠡᠨᠡ ᠤᠳᠠᠭ᠎ᠠ ᠲᠠᠶᠢᠯᠪᠤᠷᠢᠯᠠᠶ᠎ᠠ᠃ ᠬᠡᠴᠢᠨᠡᠨ ᠪᠠᠶᠢᠭᠰᠠᠨ ᠴᠤ ᠤᠭᠢᠶᠠᠵᠤ ᠪᠣᠯᠬᠤ ᠦᠭᠡᠢ ᠰᠢᠦ᠃ 
 ᠮᠢᠬ᠎ᠠ ᠶᠠᠩᠵᠤᠯᠠᠬᠤ ᠨᠢ
 ᠠᠶᠢᠯ ᠤᠨ ᠡᠵᠡᠭᠲᠡᠢ ᠬᠦᠨᠡᠰᠦ ᠪᠡᠨ ᠬᠡᠷᠡᠭᠯᠡᠬᠦ ᠶᠢᠨ ᠡᠮᠦᠨ᠎ᠡ ᠰᠠᠶᠢᠲᠤᠷ ᠤᠭᠢᠶᠠᠵᠤ ᠴᠡᠪᠡᠷᠯᠡᠬᠦ ᠶᠣᠰᠣᠲᠠᠢ ᠭᠡᠳᠡᠭ ᠢ ᠮᠡᠳᠡᠨ᠎ᠡ᠃ ᠨᠣᠭᠣᠭ᠎ᠠ᠂ ᠵᠢᠮᠢᠰ᠂ ᠥᠨᠳᠡᠭᠡ ᠭᠡᠳ ᠪᠦᠭᠦᠳᠡ ᠶᠢ ᠤᠭᠢᠶᠠᠨ᠎ᠠ᠃ ᠮᠥᠨ ᠰᠠᠶ᠋ᠢᠬᠠᠨ ᠬᠦᠨᠡᠰᠦᠨ ᠦ ᠵᠠᠬ᠎ᠠ ᠠᠴᠠ ᠠᠪᠴᠢᠷᠠᠭᠰᠠᠨ ᠮᠢᠬ᠎ᠠ ᠶᠢ ᠴᠤ ᠭᠡᠰᠡᠨ ᠢᠩᠭᠢᠵᠦ  ᠪᠠᠶᠢᠳᠠᠭ᠃ ᠬᠠᠮᠢᠭ᠎ᠠ ᠴᠤ ᠪᠠᠶᠢᠭᠰᠠᠨ ᠶᠤᠮ ᠪᠢᠯᠡ᠂ ᠬᠡᠨ ᠬᠦᠷᠦᠭᠰᠡᠨ᠂ ᠬᠡᠴᠢᠨᠡᠨ ᠢᠯᠠᠭ᠎ᠠ ᠰᠠᠭᠤᠭᠰᠠᠨ ᠢ ᠪᠢᠳᠡ ᠮᠡᠳᠡᠬᠦ ᠦᠭᠡᠢ᠃ ᠭᠡᠬᠦ ᠳᠦ ᠪᠡᠨ ᠭᠠᠯ ᠲᠣᠭᠣᠭᠠᠨ ᠤ ᠮᠡᠷᠭᠡᠵᠢᠯᠲᠡᠨ ᠨᠦᠭᠦᠳ ᠶᠠᠮᠠᠷ ᠴᠤ ᠮᠢᠬ᠎ᠠ ᠠᠪᠤᠭᠰᠠᠨ ᠪᠠᠢ ᠤᠭᠢᠶᠠᠵᠤ ᠣᠭᠲᠣ ᠪᠣᠯᠬᠤ ᠦᠭᠡᠢ ᠭᠡᠵᠦ ᠠᠩᠬᠠᠷᠤᠭᠤᠯᠳᠠᠭ᠃ ᠮᠢᠬᠠᠨ ᠠᠴᠠ ᠠᠶᠤᠯᠲᠠᠢ ᠪᠠᠺᠲ᠋ᠧᠷᠢ ᠶᠢ ᠤᠭᠢᠶᠠᠵᠤ ᠠᠷᠢᠯᠭᠠᠬᠤ ᠭᠡᠵᠦ ᠣᠷᠣᠯᠳᠤᠬᠤ ᠨᠢ ᠪᠠᠶᠢᠳᠠᠯ ᠢ ᠤᠯᠠᠮ ᠬᠦᠨᠳᠦᠷᠡᠭᠦᠯᠳᠡᠭ ᠪᠠᠶᠢᠨ᠎ᠠ᠃ ᠡᠳᠡᠭᠡᠷ ᠥᠴᠥᠬᠡᠨ ᠪᠠᠺᠲ᠋ᠧᠷᠢ ᠨᠢ ᠤᠰᠤᠨ ᠤ ᠮᠣᠯᠧᠺᠤᠯ ᠲᠠᠢ ᠴᠤᠭ ᠲᠠᠨ ᠤ ᠠᠮᠠ᠂ ᠬᠠᠮᠠᠷ ᠲᠤ ᠣᠷᠣᠵᠤ᠂ ᠠᠷᠠᠰᠤᠨ ᠳᠤ ᠨᠠᠭᠠᠯᠳᠤᠵᠤ᠂ ᠤᠭᠢᠶᠠᠯᠲᠠᠭᠤᠷ ᠪᠣᠯᠤᠨ ᠪᠤᠰᠤᠳ ᠬᠦᠨᠡᠰᠦ᠂ ᠬᠤᠪᠴᠠᠰᠤ ᠳᠤ ᠲᠠᠨᠢ  ᠨᠠᠭᠠᠯᠳᠤᠵᠤ ᠪᠠᠶᠢᠬᠤ ᠶᠢ ᠲᠥᠰᠥᠭᠡᠯᠡᠭᠡᠳ ᠦᠵᠡ᠃ 
  ᠲᠠ ᠮᠢᠬ᠎ᠠ ᠶᠢ ᠪᠣᠯᠭᠣᠵᠤ ᠢᠳᠡᠬᠦ ᠭᠡᠵᠦ ᠪᠠᠶᠢᠭ᠎ᠠ ᠪᠣᠯᠬᠤ ᠠᠴᠠ ᠲᠦᠭᠦᠬᠡᠢ ᠪᠡᠷ ᠨᠢ ᠢᠳᠡᠬᠦ ᠪᠢᠰᠢ ᠤᠴᠢᠷ ᠤᠬᠢᠶᠠᠬᠤ ᠨᠢ ᠶᠠᠮᠠᠷ ᠴᠤ ᠤᠳᠬ᠎ᠠ ᠦᠭᠡᠢ ᠵᠦᠢᠯ ᠪᠥᠭᠡᠳ ᠪᠦᠬᠦ ᠯᠠ ᠪᠠᠺᠲ᠋ᠧᠷᠢ ᠨᠤᠭᠤᠳ ᠬᠠᠯᠠᠭᠤᠨ ᠤ ᠦᠢᠯᠡᠴᠢᠯᠡᠭᠡᠨ ᠳᠦ ᠤᠰᠠᠳᠴᠤ ᠦᠭᠡᠢ ᠪᠣᠯᠬᠤ ᠪᠢᠯᠡ᠃ ᠬᠠᠷᠢᠨ ᠭᠠᠯ ᠲᠣᠭᠣᠭᠠᠨ ᠤ ᠬᠡᠷᠡᠭᠰᠡᠯ ᠳᠡᠭᠡᠷ᠎ᠡ ᠲᠣᠭᠲᠠᠵᠤ ᠦᠯᠡᠳᠡᠭᠰᠡᠨ ᠪᠠᠺᠲ᠋ᠧᠷᠢ ᠨᠤᠭᠤᠳ ᠢ ᠤᠰᠠᠳᠬᠠᠬᠤ ᠶᠢᠨ ᠲᠤᠯᠠᠳᠠ ᠨᠢᠭᠡ ᠪᠤᠰᠤ ᠤᠳᠠᠭ᠎ᠠ ᠶᠢᠨ ᠲᠣᠮᠣᠬᠠᠨ ᠴᠡᠪᠡᠷᠯᠡᠭᠡ ᠬᠢᠬᠦ ᠬᠡᠷᠡᠭ ᠪᠣᠯᠬᠤ ᠪᠢᠵᠡ ᠡ᠃ ᠴᠤᠬᠤᠮ ᠡᠳᠡᠭᠡᠷ ᠪᠠᠺᠲ᠋ᠧᠷᠢ ᠲᠠᠷᠠᠭᠰᠠᠨ ᠬᠡᠷᠡᠭᠰᠡᠯ ᠦᠳ ᠨᠢ ᠬᠣᠭᠣᠯᠠᠨ ᠤ ᠬᠣᠣᠷᠳᠠᠯᠭ᠎ᠠ ᠶᠢᠨ ᠡᠬᠢ ᠡᠭᠦᠰᠪᠦᠷᠢ ᠪᠣᠯᠳᠠᠭ ᠪᠠᠶᠢᠨ᠎ᠠ᠃ 
  ᠡᠨᠡ ᠨᠢ ᠢᠯᠠᠩᠭᠤᠶ᠎ᠠ ᠲᠠᠬᠢᠶᠠᠨ ᠤ ᠮᠢᠬ᠎ᠠ ᠲᠠᠢ ᠬᠠᠮᠢᠶᠠᠲᠠᠢ ᠪᠥᠭᠡᠳ ᠰᠠᠯᠮᠤᠨᠧᠯ ᠦᠨ ᠬᠠᠯᠳᠠᠪᠤᠷᠢ ᠶᠢᠨ ᠰᠢᠯᠲᠠᠭᠠᠨ ᠪᠣᠯᠳᠠᠭ ᠭᠡᠨ᠎ᠡ᠃ ᠲᠠᠬᠢᠶᠠᠨ ᠤ ᠮᠢᠬ᠎ᠠ ᠶᠢ ᠤᠭᠢᠶᠠᠵᠤ ᠪᠠᠶᠢᠬᠤ ᠦᠶ᠎ᠡ ᠳᠦ ᠬᠣᠣᠷ ᠲᠠᠢ ᠪᠠᠺᠲ᠋ᠧᠷᠢ ᠨᠤᠭᠤᠳ 1 ᠮᠧᠲ᠋ᠷ ᠬᠦᠷᠲᠡᠯ᠎ᠡ ᠵᠠᠢ ᠳᠤ  ᠪᠠᠶᠢᠨ᠎ᠠ᠃ ᠬᠡᠷᠪᠡ ᠲᠠ ᠣᠳᠣ ᠬᠦᠷᠲᠡᠯ᠎ᠡ ᠡᠷᠡᠭᠡᠯᠵᠡᠭᠰᠡᠭᠡᠷ ᠪᠠᠶᠢᠪᠠᠯ ᠠᠯᠳᠠᠷᠲᠠᠢ ᠲᠣᠭᠣᠭᠠᠴᠢ ᠨᠠᠷ ᠬᠣᠭᠣᠯᠠ ᠬᠢᠬᠦ ᠳᠦ ᠪᠡᠨ ᠬᠡᠵᠢᠶ᠎ᠡ ᠴᠤ ᠮᠢᠬ᠎ᠠ ᠪᠠᠨ ᠤᠭᠢᠶᠠᠬᠤ ᠦᠭᠡᠢ᠂ ᠬᠠᠷᠢᠨ ᠮᠢᠬ᠎ᠠ ᠲᠠᠢ ᠬᠠᠷᠢᠴᠠᠭᠰᠠᠨ ᠤ ᠳᠠᠷᠠᠭ᠎ᠠ ᠭᠠᠷ ᠢᠶᠠᠨ ᠵᠠᠪᠠᠯ ᠤᠭᠢᠶᠠᠳᠠᠭ ᠪᠠᠶᠢᠳᠠᠯ ᠢ ᠣᠯᠵᠤ ᠬᠠᠷᠠᠬᠤ ᠪᠢᠯᠡ᠃ 
 ᠮᠢᠬ᠎ᠠ ᠦᠭᠡᠢ ᠪᠠᠶᠢᠬᠤ ᠳᠤ ᠲᠠᠨ ᠢ ᠢᠲᠡᠭᠡᠭᠦᠯᠬᠦ ᠪᠠᠰᠠ ᠨᠢᠭᠡ ᠨᠥᠬᠥᠴᠡᠯ ᠪᠤᠢ᠄ ᠤᠰᠤᠨ ᠤ᠂ ᠢᠯᠠᠩᠭᠤᠶ᠎ᠠ ᠬᠠᠯᠠᠭᠤᠨ ᠤᠰᠤᠨ ᠤ ᠤᠷᠤᠰᠬᠠᠯ ᠨᠢ ᠮᠢᠬᠠᠨ ᠤ ᠭᠠᠳᠠᠨ᠎ᠠ ᠬᠡᠰᠡᠭ ᠦᠨ ᠮᠣᠯᠧᠺᠤᠯ ᠪᠦᠲᠦᠴᠡ ᠶᠢ ᠥᠭᠡᠷᠡᠴᠢᠯᠡᠵᠦ ᠮᠢᠬᠠᠨ ᠤ ᠠᠮᠲᠠ ᠶᠢ ᠮᠠᠭᠤᠳᠬᠠᠨ᠎ᠠ᠃ ᠥᠭᠡᠷ᠎ᠡ ᠪᠡᠷ ᠬᠡᠯᠡᠪᠡᠯ ᠤᠭᠢᠶᠠᠭᠰᠠᠨ ᠮᠢᠬ᠎ᠠ ᠥᠩᠭᠡ ᠣᠷᠣᠵᠤ᠂ ᠠᠮᠲᠠᠲᠠᠢ ᠪᠣᠯᠤᠨ᠎ᠠ ᠭᠡᠵᠦ ᠦᠭᠡᠢ ᠶᠤᠮ᠃ ᠨᠢᠭᠡ ᠶᠣᠰᠣᠨ ᠳᠤ ᠪᠠᠨ ᠶᠡᠷᠦ ᠳᠡᠭᠡᠨ ᠯᠠ ᠵᠢᠩᠨᠡᠭᠳᠡᠵᠦ ᠪᠠᠶᠢᠭᠠᠳ ᠬᠠᠮᠤᠭ ᠴᠢᠭᠢᠭ ᠠᠯᠠᠭ᠎ᠠ ᠪᠣᠯᠬᠤ ᠦᠶ᠎ᠡ ᠳᠦ ᠰᠢᠭᠦᠰᠦᠯᠢᠭ ᠰᠲ᠋ᠧᠢᠺ ᠪᠢᠰᠢ ᠬᠠᠮᠤᠭ ᠰᠢᠮ᠎ᠡ ᠰᠢᠭᠦᠰᠦ ᠪᠡᠨ ᠠᠯᠠᠳᠠᠭᠰᠠᠨ ᠵᠦᠢᠯ ᠯᠠ ᠦᠯᠡᠳᠡᠨ᠎ᠡ᠃ 

  ᠮᠡᠷᠭᠡᠵᠢᠯ ᠦᠨ ᠲᠣᠭᠣᠭᠠᠴᠢ ᠨᠠᠷ  ᠵᠥᠪᠯᠡᠳᠡᠭ ᠪᠤᠢ 
 1  ᠭᠠᠯ ᠲᠣᠭᠣᠭᠠᠨ ᠤ ᠥᠷᠥᠭᠡᠨ ᠦ ᠲᠧᠷᠮᠣᠮᠧᠲ᠋ᠷ ᠪᠣᠯ ᠲᠠᠨ ᠤ ᠭᠠᠯ ᠲᠣᠭᠣᠭᠠᠨ ᠤ ᠦᠨᠡᠨᠴᠢ ᠲᠤᠰᠠᠯᠠᠭᠴᠢ ᠶᠤᠮ᠃ ᠲᠠᠨ ᠤ ᠰᠢᠭᠦᠰᠦᠯᠢᠭ ᠮᠢᠬᠠᠨ ᠤ ᠭᠣᠣᠯ ᠬᠡᠰᠡᠭ 55 ᠬᠡᠮ ᠬᠦᠷᠬᠦ ᠦᠶ᠎ᠡ ᠳᠦ ᠲᠠᠨ ᠤ ᠡᠷᠡᠭᠦᠯ ᠮᠡᠨᠳᠦ ᠳᠦ ᠬᠣᠣᠷᠠᠲᠠᠢ ᠵᠦᠢᠯ ᠣᠭᠲᠣ ᠦᠯᠳᠡᠬᠦ ᠦᠭᠡᠢ᠃ ᠶᠠᠩᠵᠤ ᠪᠦᠷᠢ ᠶᠢᠨ ᠮᠢᠬ᠎ᠠ ᠶᠢ ᠬᠠᠯᠠᠭᠤᠨ ᠤ ᠦᠢᠯᠡᠴᠢᠯᠡᠯ ᠳᠦ ᠣᠷᠣᠭᠤᠯᠬᠤ ᠳᠤ ᠬᠣᠣᠷ ᠲᠠᠢ ᠪᠠᠺᠲ᠋ᠧᠷᠢ ᠨᠢ ᠦᠬᠦᠵᠦ ᠳᠠᠭᠤᠰᠬᠤ ᠳᠤᠯᠠᠭᠠᠨ ᠤ ᠬᠡᠮᠵᠢᠶ᠎ᠡ ᠢᠯᠭᠠᠭ᠎ᠠ ᠲᠠᠢ ᠪᠠᠶᠢᠳᠠᠭ ᠭᠡᠳᠡᠭ ᠢ ᠬᠡᠯᠡᠬᠦ ᠬᠡᠷᠡᠭᠲᠡᠢ᠃ ᠵᠢᠱᠢᠶ᠎ᠡ ᠨᠢ ᠦᠬᠡᠷ ᠦᠨ ᠮᠢᠬ᠎ᠠ 60 ᠬᠡᠮ ᠪᠣᠯ ᠲᠠᠬᠢᠶ᠎ᠠ 75-80 ᠬᠡᠮ ᠪᠠᠶᠢᠬᠤ ᠨᠢ᠃ 
2  ᠮᠢᠬ᠎ᠠ ᠬᠤᠳᠠᠯᠳᠤᠵᠤ ᠠᠪᠤᠭᠠᠳ   ᠣᠷᠣᠨ ᠳᠤ ᠲᠡᠭᠦᠨ ᠦ ᠭᠠᠳᠠᠨ᠎ᠠ ᠲᠠᠯ᠎ᠠ ᠶᠢ ᠴᠢᠭᠢᠭ ᠲᠡᠢ ᠴᠠᠭᠠᠰᠤᠨ ᠠᠯᠴᠢᠭᠤᠷ ᠢᠶᠠᠷ ᠠᠷᠴᠢᠭᠠᠳ ᠰᠢᠭᠤᠳ ᠯᠠ ᠬᠠᠯᠠᠭᠤᠨ ᠲᠣᠭᠣᠭᠠᠨ ᠳᠤ ᠬᠢᠨ᠎ᠡ᠃ ᠮᠢᠬ᠎ᠠ ᠠᠷᠴᠢᠭᠰᠠᠨ ᠠᠯᠴᠢᠭᠤᠷ ᠢᠶᠠᠨ ᠵᠠᠪᠠᠯ ᠬᠠᠶᠠᠭᠠᠳ ᠭᠠᠷ ᠢᠶᠠᠨ ᠬᠠᠯᠠᠭᠤᠨ ᠤᠰᠤᠨ ᠳᠤ ᠰᠠᠪᠤᠩᠳᠠᠵᠤ ᠤᠭᠢᠶᠠᠨ᠎ᠠ᠃ 

3  ᠬᠥᠯᠳᠡᠭᠡᠬᠦ ᠮᠢᠬ᠎ᠠ ᠶᠢ ᠴᠤ ᠭᠡᠰᠡᠨ ᠤᠭᠢᠶᠠᠵᠤ ᠪᠣᠯᠬᠤ ᠦᠭᠡᠢ᠃ ᠤᠬᠢᠶᠠᠬᠤ ᠨᠢ ᠪᠠᠺᠲ᠋ᠧᠷᠢ ᠤᠰᠠᠳᠬᠠᠬᠤ ᠦᠭᠡᠢ ᠡᠴᠡ ᠭᠠᠳᠠᠨ᠎ᠠ ᠬᠠᠳᠠᠭᠠᠯᠠᠬᠤ ᠬᠤᠭᠤᠴᠠᠭ᠎ᠠ ᠶᠢ ᠶᠡᠬᠡ ᠪᠡᠷ ᠪᠠᠭᠠᠰᠬᠠᠳᠠᠭ ᠪᠠᠶᠢᠨ᠎ᠠ᠃ ᠡᠮᠦᠨ᠎ᠡ ᠬᠡᠯᠡᠭᠰᠡᠨᠴᠢᠯᠡᠨ ᠠᠯᠴᠢᠭᠤᠷ ᠢᠶᠠᠷ ᠠᠷᠴᠢᠵᠤ ᠬᠠᠲᠠᠭᠠᠭᠠᠳ ᠬᠥᠷᠥᠭᠡᠭᠴᠢᠨ ᠳᠦ ᠬᠢᠵᠦ ᠬᠠᠳᠠᠭᠠᠯᠠᠨ᠎ᠠ᠃ 

4  ᠬᠠᠮᠤᠭ ᠤᠨ ᠭᠣᠣᠯ ᠨᠢ ᠮᠢᠬ᠎ᠠ ᠪᠠᠨ ᠰᠢᠯᠭᠠᠭᠳᠠᠵᠤ ᠲᠠᠨᠢᠭᠳᠠᠭᠰᠠᠨ ᠨᠡᠶᠢᠯᠡᠭᠦᠯᠦᠭᠴᠢ ᠡᠴᠡ ᠠᠪᠬᠤ ᠬᠡᠷᠡᠭᠲᠡᠢ᠃ ᠰᠠᠶᠢᠨ ᠮᠢᠬ᠎ᠠ ᠨᠢ ᠮᠢᠬᠠᠨ ᠤ ᠦᠨᠦᠷ ᠡᠴᠡ  ᠥᠭᠡᠷ᠎ᠡ ᠶᠠᠮᠠᠷ ᠨᠢᠭᠡ ᠦᠨᠦᠷ ᠭᠠᠷᠭᠠᠬᠤ ᠦᠭᠡᠢ᠃ ᠥᠭᠡᠬᠦ ᠨᠢ ᠴᠠᠭᠠᠨ᠂ ᠭᠠᠬᠠᠢ ᠶᠢᠨ ᠮᠢᠬ᠎ᠠ ᠶᠠᠭᠠᠪᠲᠤᠷ᠂ ᠦᠬᠡᠷ ᠦᠨ ᠮᠢᠬ᠎ᠠ ᠥᠳᠬᠡᠨ ᠤᠯᠠᠭᠠᠨ ᠪᠠᠶᠢᠨ᠎ᠠ᠃ ᠬᠦᠷᠡᠩᠲᠦᠭᠰᠡᠨ ᠥᠩᠭᠡ ᠨᠢ ᠮᠢᠬ᠎ᠠ  ᠡᠰᠡᠪᠡᠯ ᠬᠥᠭᠰᠢᠨ ᠮᠠᠯ ᠤᠨ ᠮᠢᠬ᠎ᠠ ᠭᠡᠳᠡᠭ ᠢ ᠬᠠᠷᠠᠭᠤᠯᠵᠤ ᠪᠠᠶᠢᠭ᠎ᠠ ᠬᠡᠷᠡᠭ ᠶᠤᠮ᠃ ᠮᠢᠬᠠᠨ ᠳᠤ ᠬᠦᠷᠴᠦ ᠦᠵᠡᠬᠦ ᠬᠡᠷᠡᠭᠲᠡᠢ ᠄ ᠮᠢᠬ᠎ᠠ ᠪᠠᠨ ᠲᠡᠭᠰᠢ ᠭᠠᠵᠠᠷ ᠲᠠᠯᠪᠢᠭᠠᠳ ᠬᠤᠷᠤᠭᠤ ᠪᠠᠷ ᠢᠶᠠᠨ ᠳᠠᠷᠤᠨ᠎ᠠ – ᠰᠢᠨ᠎ᠡ ᠮᠢᠬ᠎ᠠ ᠲᠡᠷᠡ ᠳᠣᠣᠷ᠎ᠠ ᠪᠠᠨ ᠬᠠᠭᠤᠴᠢᠨ  ᠳᠦ ᠪᠡᠨ ᠤᠷᠤᠬᠤ ᠪᠣᠯ ᠬᠠᠭᠤᠴᠢᠨ ᠮᠢᠬᠠᠨ ᠳᠤ ᠭᠠᠷᠤᠭᠰᠠᠨ ᠮᠥᠷ ᠤᠳᠠᠭᠠᠨ ᠬᠠᠳᠠᠭᠠᠯᠠᠭᠳᠠᠨ᠎ᠠ᠃ 

  ᠬᠡᠷᠪᠡ ᠮᠢᠬ᠎ᠠ ᠥᠭᠡᠷ᠎ᠡ ᠠᠷᠭ᠎ᠠ ᠦᠭᠡᠢ ᠪᠣᠯ ᠡᠭᠦᠨ ᠢ ᠪᠡᠨ ᠮᠠᠰᠢ ᠨᠢᠮᠪᠠᠢ᠂ ᠤᠰᠤ ᠦᠰᠦᠷᠭᠡᠬᠦ ᠦᠭᠡᠢ ᠪᠡᠷ ᠬᠢᠵᠦ᠂ ᠤᠭᠢᠶᠠᠭᠰᠠᠨ ᠤ ᠳᠠᠷᠠᠭ᠎ᠠ ᠤᠭᠠᠯᠲᠠᠭᠤᠷ᠂ ᠣᠶᠢᠷᠠᠬᠠᠨ ᠪᠠᠶᠢᠬᠤ ᠭᠠᠯ ᠲᠣᠭᠣᠭᠠᠨ ᠤ ᠪᠦᠬᠦ ᠯᠠ ᠬᠡᠷᠡᠭᠰᠡᠯ ᠢᠶᠡᠨ ᠰᠠᠶᠢᠲᠤᠷ ᠤᠭᠢᠶᠠᠭᠠᠷᠠᠢ᠃ ᠪᠢᠳᠡᠨ ᠦ ᠵᠥᠪᠯᠡᠭᠡ ᠶᠢ ᠳᠠᠭᠠᠪᠠᠯ ᠲᠠᠨ ᠳᠤ ᠶᠠᠮᠠᠷ ᠴᠤ ᠪᠠᠺᠲ᠋ᠧᠷᠢ ᠬᠣᠣᠷ ᠬᠦᠷᠭᠡᠵᠦ ᠴᠢᠳᠠᠬᠤ ᠦᠭᠡᠢ᠃