ᠮᠣᠩᠭᠣᠯ ᠬᠡᠯᠡ ᠮᠥᠬᠥᠭᠡ ᠦᠭᠡᠢ᠂ ᠬᠠᠷᠢᠨ ᠮᠣᠬᠣᠭᠰᠠᠨ
《ᠮᠣᠩᠭᠣᠯ ᠬᠡᠯᠡ ᠮᠥᠬᠦᠯᠡ︕ ᠭᠡᠵᠦ ᠦᠰᠦ ᠪᠡᠨ ᠵᠤᠯᠭᠠᠭᠠᠵᠤ᠂ ᠲᠣᠯᠣᠭᠠᠢ ᠪᠠᠨ ᠪᠠᠷᠢᠬᠤ ᠬᠦᠮᠦᠨ ᠣᠯᠠᠰᠢᠷᠠᠭᠰᠠᠨ᠃ ᠬᠠᠷᠢᠨ ᠪᠢ 《ᠮᠣᠬᠣᠯᠠ᠂ ᠶᠠᠮᠠᠷ ᠨᠢᠭᠡ ᠶᠠᠭᠤᠮᠠ ᠬᠢᠶᠡ᠂ ᠮᠣᠩᠭᠣᠯᠴᠤᠳ ᠡ︕》 ᠭᠡᠬᠦ ᠳᠤᠷᠠᠲᠠᠢ᠃ ᠶᠠᠭᠠᠬᠢᠭᠠᠳ ᠭᠡᠬᠦ ᠪᠡᠷ ᠵᠢᠷᠭᠤᠭᠠᠨ ᠰᠠᠶᠠ ᠬᠦᠮᠦᠨ ᠮᠣᠩᠭᠣᠯ ᠢᠶᠠᠷ ᠶᠠᠷᠢᠵᠤ᠂ ᠪᠢᠴᠢᠵᠦ᠂ ᠬᠥᠭᠰᠢᠨ ᠬᠥᠪᠡᠭᠡ ᠦᠭᠡᠢ ᠮᠣᠩᠭᠣᠯ ᠢᠶᠠᠷ ᠢᠶᠠᠨ ᠣᠶᠢᠯᠠᠭᠠᠯᠴᠠᠵᠤ ᠪᠠᠶᠢᠭᠠ ᠪᠣᠯᠬᠣᠷ ᠮᠥᠬᠥᠯ ᠦᠨ ᠢᠷᠮᠡᠭ ᠲᠦ ᠴᠤ ᠣᠴᠢᠭᠠ ᠦᠭᠡᠢ᠂ ᠮᠥᠬᠦᠬᠦ ᠳᠦ ᠴᠤ ᠣᠶᠢᠷᠠᠳᠤᠭᠠ ᠦᠭᠡᠢ᠃ ᠮᠣᠩᠭᠣᠯ ᠬᠡᠦᠬᠡᠳ ᠮᠣᠩᠭᠣᠯ ᠢᠶᠠᠷ ᠢᠶᠠᠨ ᠬᠡᠯᠡ ᠳᠦ ᠣᠷᠣᠵᠤ᠂ ᠭᠡᠷ ᠲᠦ ᠭᠠᠳᠠᠭᠠ ᠦᠭᠡᠢ ᠶᠠᠷᠢᠵᠤ ᠪᠠᠶᠢᠭᠠ ᠪᠣᠯᠬᠣᠷ ᠮᠥᠬᠦᠵᠦ ᠴᠤ ᠡᠬᠢᠯᠡᠭᠡ ᠦᠭᠡᠢ᠂ ᠬᠡᠪᠡᠷᠡᠭᠰᠢᠭᠡ ᠴᠤ ᠦᠭᠡᠢ᠃ United Nations Educational Scientific and Cultural Organization ᠭᠡᠳᠡᠭ ᠳᠡᠯᠡᠬᠡᠢ ᠶᠢᠨ ᠰᠣᠶᠣᠯ ᠤᠷᠠᠯᠢᠭ ᠤᠨ ᠶᠠᠮᠤᠨ ᠤ 《ᠮᠥᠬᠦᠵᠦ ᠪᠠᠶᠢᠭᠠ ᠬᠡᠯᠡ ᠶᠢ ᠲᠣᠭᠲᠠᠭᠠᠬᠤ ᠰᠢᠯᠭᠠᠭᠤᠷ》 ᠢᠶᠠᠷ ᠢᠩᠭᠢᠵᠦ ᠬᠡᠮᠵᠢᠭᠡᠳ᠂ ᠡᠶᠢᠮᠦ ᠥᠭᠡᠳᠡᠷᠡᠭ ᠪᠣᠳᠣᠯ ᠲᠠᠢ ᠶᠠᠪᠤᠭᠠ ᠬᠦᠮᠦᠨ ᠳ᠋ᠡ᠂ ᠪᠢ᠃
ᠮᠥᠬᠦᠯᠡ ᠭᠡᠵᠦ ᠬᠠᠯᠠᠭᠯᠠᠭᠠᠳ ᠪᠠᠶᠢᠭᠠ ᠬᠦᠮᠦᠰ ᠦᠨ ᠠᠮᠠ ᠨᠢᠭᠡᠲᠡᠢ ᠠᠪᠳᠠᠭ ᠵᠢᠱᠢᠶᠡ ᠨᠢ ᠭᠠᠳᠠᠭᠠᠳᠤ ᠦᠭᠡ᠂ ᠬᠠᠷᠢ ᠶᠢᠨ ᠬᠡᠯᠡᠨ ᠦ ᠨᠥᠯᠥᠭᠡ᠃ ᠬᠠᠷᠢ ᠶᠢᠨ ᠬᠡᠯᠡ ᠮᠣᠩᠭᠣᠯ ᠬᠡᠯᠡ ᠤᠷᠤᠭᠤ ᠭᠠᠭᠴᠠ ᠥᠨᠥᠳᠥᠷ ᠴᠤ ᠪᠢᠰᠢ᠂ ᠬᠡᠳᠦ ᠬᠡᠳᠦᠨ ᠤᠳᠠᠭᠠ ᠳᠣᠪᠲᠣᠯᠤᠭᠰᠠᠨ᠃ ᠵᠢᠱᠢᠶᠡᠯᠡᠪᠡᠯ᠂ 16᠂ 17 ᠳ᠋ᠤᠭᠠᠷ ᠵᠠᠭᠤᠨ ᠳᠤ ᠲᠥᠪᠡᠳ᠂ 18᠂ 19 ᠵᠠᠭᠤᠨ ᠳᠤ ᠮᠠᠨᠵᠤ ᠨᠠᠷ ᠢᠶᠠᠷ ᠳᠠᠮᠵᠢᠨ ᠬᠠᠨ ᠦᠨᠳᠦᠰᠦᠲᠡᠨ ᠦ ᠬᠡᠯᠡᠨ ᠳᠦ᠂ 20 ᠳ᠋ᠤᠭᠠᠷ ᠵᠠᠭᠤᠨ ᠳᠤ ᠮᠡᠳᠡᠭᠡᠵᠢ ᠣᠷᠣᠰ᠂ 21 ᠵᠠᠭᠤᠨ ᠳᠤ ᠮᠠᠷᠭᠤᠬᠤ ᠶᠢᠨ ᠠᠷᠭᠠ ᠦᠭᠡᠢ ᠠᠩᠭᠯᠢ ᠬᠡᠯᠡ᠃ ᠡᠭᠦᠨ ᠦ ᠭᠡᠷᠡᠴᠢ ᠨᠢ ᠠᠵᠠ᠂ ᠠᠶᠠᠨ᠂ ᠪᠠᠭᠰᠢ᠂ ᠪᠤᠤᠵᠠ᠂ ᠭᠠᠳᠢᠯ᠂ ᠭᠠᠴᠠᠭᠠ᠂ ᠳᠠᠪᠤᠤ᠂ ᠵᠢᠶᠠᠵᠠ᠂ ᠵᠠᠯᠢ᠂ ᠵᠠᠰᠠᠭ᠂ ᠮᠥᠭᠥ᠂ ᠮᠤᠤᠷ᠂ ᠨᠠᠮᠪᠠ᠂ ᠨᠠᠮᠲᠠᠷ᠂ ᠨᠣᠶᠠᠨ᠂ ᠲᠢᠲᠢᠮ᠂ ᠲᠣᠭ᠂ ᠲᠣᠭᠣᠰ᠂ ᠲᠣᠭᠣᠰᠣ᠂ ᠲᠤᠭ᠂ ᠴᠣᠣᠵᠢ᠂ ᠴᠤᠪᠠ᠂ ᠰᠢᠬᠢᠷ ᠭᠠᠳᠠᠭᠠᠳᠤ ᠭᠡᠬᠦ ᠶᠢᠨ ᠠᠷᠭᠠ ᠦᠭᠡᠢ ᠢᠵᠢᠯ ᠳᠠᠰᠤᠯ ᠪᠣᠯᠤᠭᠰᠠᠨ ᠡᠳᠡᠭᠡᠷ ᠦᠭᠡᠰ᠃ ᠡᠳᠡ ᠭᠠᠳᠠᠨᠠ ᠠᠴᠠ ᠢᠷᠡᠯᠡ ᠭᠡᠳ ᠭᠠᠢ ᠪᠣᠯᠤᠭᠠ ᠦᠭᠡᠢ᠂ ᠭᠠᠪᠢᠶᠠ ᠯᠠ ᠪᠠᠶᠢᠭᠤᠯᠤᠭᠰᠠᠨ᠂ ᠪᠢᠳᠡᠨ ᠳᠦ᠃
《ᠶᠦᠭᠡᠲᠡᠢ 99 ᠲᠠᠶᠢᠯᠪᠤᠷᠢ》 ᠨᠣᠮ ᠤᠨ 《ᠪᠣᠯᠤᠨᠠ ᠪᠣᠯᠤᠨᠠ᠂ ᠪᠣᠯᠬᠤ ᠦᠭᠡᠢ ᠶᠠᠭᠤᠮᠠ ᠪᠠᠶᠢᠬᠤ ᠦᠭᠡᠢ》 ᠦᠭᠦᠯᠡᠯ ᠦᠨ ᠬᠡᠰᠡᠭ ᠡᠴᠡ