ᠠᠯᠠᠱᠠ ᠵᠡᠬᠦᠨ ᠬᠤᠰᠢᠭᠤᠨ ᠤ ᠲᠦᠪ ᠪᠠᠶᠠᠨᠬᠤᠳᠠ ᠪᠠᠯᠭᠠᠰᠤ ᠶᠢᠨ ᠠᠯᠠᠱᠠ ᠬᠤᠱᠤᠳ ᠥᠨᠳᠤᠰᠤᠳᠠᠨ ᠤ ᠰᠤᠶᠤᠯ ᠤᠨ ᠵᠡᠬᠡᠯᠢ ᠳᠤ ︽ᠠᠯᠳᠠᠨ ᠪᠥᠷᠬᠦᠳ︾ ᠮᠤᠷᠢᠨ ᠬᠢᠯᠭᠠᠰᠤᠨ ᠤᠷᠢᠶᠠᠮᠠᠯ ᠮᠢᠨᠳᠠᠰᠤᠨ ᠤ ᠤᠷᠠᠯᠠᠯ ᠤᠨ ᠬᠢᠵᠠᠭᠠᠷᠳᠤ ᠺᠤᠮᠫᠠᠨᠢ ᠪᠠᠶᠢᠳᠠᠬ᠃ ᠡᠨᠡ ᠬᠦ ᠺᠤᠮᠫᠠᠨᠢ ᠶᠢᠨ ᠡᠵᠡᠨ ᠪᠤᠯ ᠲᠡᠯᠡᠨ ᠲᠠᠪᠤᠳᠠᠢ ᠭᠡᠷᠡᠯ ᠨᠠᠰᠤᠳᠠᠨ ᠶᠤᠮ᠃ ᠨᠠᠰᠤᠳᠠᠨ ᠭᠤᠸᠠᠢ 300 ᠭᠠᠷᠤᠢ ᠵᠢᠯ ᠤᠨ ᠲᠡᠤᠭᠡ ᠲᠠᠢ ᠠᠯᠠᠱᠠ ᠮᠤᠩᠭᠤᠯ ᠲᠠᠩᠺᠠ ᠶᠢᠨ ᠰᠤᠶᠤᠯ ᠢᠶᠠᠨ ᠤᠯᠠᠮᠵᠢᠯᠠᠨ᠂ ᠮᠤᠷᠢᠨ ᠬᠢᠯᠭᠠᠰᠤ ᠪᠠᠷ ᠲᠠᠩᠺᠠ ᠶᠢᠨ ᠪᠥᠳᠥᠭᠡᠯ ᠢ ᠤᠷᠠᠯᠠᠨ ᠵᠤᠬᠢᠶᠠᠵᠥ ᠲᠡᠯᠭᠡᠨ ᠪᠤᠷᠤᠯᠠᠭᠤᠯᠤᠭᠠᠳ ᠪᠠᠶᠠᠵᠢᠯᠳᠤ ᠠᠮᠢᠳᠤᠷᠠᠯ ᠤᠨ ᠲᠤᠤᠯᠢᠰ ᠢ ᠪᠢᠴᠢᠭᠯᠡᠨᠠ᠃
6 ᠰᠠᠷᠠ ᠶᠢᠨ 12 ᠤᠨ ᠦᠳᠡ ᠶᠢᠨ ᠬᠤᠶᠢᠨᠠ᠂ ᠪᠢᠳᠠ ᠬᠡᠷᠡᠯ ᠨᠠᠰᠤᠳᠠᠨ ᠤ ᠲᠡᠯᠬᠡᠬᠦᠷ ᠲᠤ ᠬᠥᠷᠬᠦ ᠳᠤ᠂ ᠨᠠᠰᠤᠳᠠᠨ ᠶᠠᠬ ᠰᠠᠶᠢᠬᠠᠨ ᠭᠡᠷᠡᠭᠯᠡᠭᠴᠢᠳ ᠤᠨ ᠵᠠᠬᠢᠶᠠᠯᠠᠬᠰᠠᠨ ᠰᠢᠨᠵᠢᠶᠠᠩ ᠤᠨ ᠲᠤᠳᠤ ᠮᠤᠩᠭᠤᠯ ᠥᠰᠥᠭ ᠤᠨ ᠪᠥᠳᠥᠭᠡᠯ ᠢᠶᠠᠨ ᠤᠷᠠᠯᠠᠨ ᠶᠠᠭᠠᠷᠠᠵᠥ ᠪᠠᠶᠢᠯᠠ᠃ ᠬᠡᠷᠡᠯ ᠨᠠᠰᠤᠳᠠᠨ ᠬᠡᠵᠥ ᠬᠥᠷᠥᠰᠦᠯᠢᠭ ᠪᠤᠷᠤ ᠴᠢᠷᠠᠢ ᠳᠠᠭᠠᠨ ᠢᠨᠢᠶᠡᠮᠰᠥᠭᠯᠡᠯ ᠲᠤᠳᠤᠷᠠᠭᠤᠯᠤᠬᠰᠠᠨ ᠶᠡᠷᠢᠶᠠ ᠬᠥᠭᠡᠷᠥᠭᠡ ᠲᠠᠢ ᠨᠠᠰᠤᠳᠠᠨ᠃ ᠨᠠᠰᠤᠳᠠᠨ ᠭᠤᠸᠠᠢ᠄ ︽ᠲᠠᠩᠺᠠ ᠪᠤᠯ ᠥᠪᠡᠷᠮᠢᠴᠠ ᠤᠨᠴᠠᠯᠢᠬ ᠪᠥᠬᠦᠢ ᠭᠠᠷ ᠤᠷᠠᠯᠠᠯ ᠤᠨ ᠪᠥᠳᠥᠭᠡᠯ ᠤᠨ ᠨᠢᠬᠡ ᠪᠤᠯᠬᠤ ᠶᠤᠮ᠃ ᠲᠠᠩᠺᠠ ᠳᠤ ᠠᠷᠢᠭᠤᠨ ᠤᠷᠤᠨ᠂ ᠪᠤᠷᠬᠠᠨ ᠰᠠᠬᠢᠭᠤᠯᠰᠤᠨ ᠲᠡᠷᠢᠬᠦᠳᠠᠨ ᠢ ᠤᠷᠠᠯᠠᠬᠰᠠᠨ ᠱᠠᠰᠢᠨ ᠤ ᠰᠤᠶᠤᠯ ᠤᠨ ᠤᠨᠴᠠᠯᠢᠬ ᠢᠯᠠ ᠲᠤᠳᠤ ᠪᠠᠶᠢᠬᠤ ᠠᠴᠠ ᠭᠠᠳᠠᠨᠠ ᠥᠨᠳᠤᠰᠤᠳᠠᠨ ᠤᠬᠰᠠᠭᠠᠳᠠᠨ ᠤ ᠲᠡᠤᠭᠡᠳᠤ ᠥᠢᠯᠡ ᠶᠠᠪᠤᠳᠠᠯ᠂ ᠤᠯᠤᠰ ᠲᠥᠷᠥ᠂ ᠴᠡᠷᠢᠭ ᠲᠠᠶᠢᠨ ᠤ ᠴᠢᠬᠤᠯᠠ ᠭᠡᠷᠡᠭ ᠲᠤ ᠬᠤᠯᠪᠤᠬᠳᠠᠬᠰᠠᠨ ᠵᠦᠢᠯ ᠴᠤ ᠶᠡᠭᠡ ᠪᠠᠶᠢᠳᠠᠬ ᠢᠶᠠᠷ ᠢᠶᠠᠨ ᠶᠡᠷᠥ ᠠᠴᠠ ᠬᠢᠵᠥ ᠤᠷᠠᠯᠠᠬᠤ ᠰᠤᠶᠤᠯ ᠰᠡᠳᠬᠢᠮᠵᠢ ᠶᠢᠨ ᠬᠤᠪᠢ ᠳᠤ ᠶᠡᠭᠡ ᠴᠢᠯᠥᠭᠡᠳᠠᠢ ᠮᠥᠷᠳᠡᠭᠡᠨ ᠥᠨᠳᠤᠷ ᠱᠠᠭᠠᠷᠳᠠᠯᠭᠠ ᠲᠠᠢ ᠤᠷᠠᠨ ᠨᠠᠷᠢᠯᠢᠬ ᠤᠷᠠᠯᠠᠯ ᠪᠤᠯᠬᠤ ᠶᠤᠮ᠃ ᠡᠬᠦᠨ ᠳᠤ ᠵᠢᠷᠤᠮᠠᠯ ᠲᠠᠩᠺᠠ᠂ ᠬᠠᠳᠬᠤᠮᠠᠯ ᠲᠠᠩᠺᠠ᠂ ᠨᠠᠭᠠᠮᠠᠯ ᠲᠠᠩᠺᠠ ᠬᠡᠬᠦᠴᠢᠯᠠᠨ ᠤᠯᠠᠨ ᠵᠦᠢᠯ ᠳᠤ ᠬᠤᠪᠢᠶᠠᠵᠥ ᠪᠤᠯᠬᠤ ᠮᠥᠷᠳᠡᠭᠡᠨ ᠤᠷᠠᠯᠠᠬᠤ ᠲᠠᠯᠠ ᠪᠠᠷ ᠬᠠᠳᠬᠤᠬᠤ᠂ ᠱᠠᠬᠯᠠᠬᠤ᠂ ᠵᠦᠢᠬᠦ ᠬᠡᠬᠦ ᠮᠡᠳᠤ ᠪᠠᠷ ᠤᠯᠠᠨ ᠶᠠᠩᠵᠥ ᠪᠠᠷ ᠬᠢᠵᠥ ᠪᠥᠳᠥᠬᠡᠵᠥ ᠪᠤᠯᠳᠠᠬ︾ ᠬᠡᠵᠥ ᠰᠤᠷᠪᠤᠯᠵᠢᠯᠠᠬᠴᠢ ᠳᠤ ᠲᠠᠨᠢᠯᠴᠠᠭᠤᠯᠵᠥ ᠭᠠᠷᠤᠯᠠ᠃
ᠮᠤᠷᠢᠨ ᠬᠢᠯᠭᠠᠰᠤ ᠪᠠᠷ ᠤᠷᠠᠯᠠᠨ ᠵᠤᠬᠢᠶᠠᠭᠰᠠᠨ ᠲᠠᠩᠺᠠ ᠶᠢᠨ ᠪᠦᠳᠦᠬᠡᠯ ᠪᠤᠯ ᠪᠤᠷᠬᠠᠨ ᠤ ᠨᠤᠮ ᠢᠶᠠᠷ ᠭᠤᠤᠯ ᠠᠭᠤᠯᠭᠠ ᠪᠤᠯᠭᠠᠭᠰᠠᠨ ᠬᠠᠳᠬᠤᠮᠠᠯ ᠤᠨ ᠤᠷᠠ ᠮᠡᠷᠭᠡᠰᠢᠯ ᠪᠤᠯᠤᠨ ᠤᠷᠠᠨ ᠵᠢᠷᠤᠬ ᠤᠨ ᠮᠡᠷᠭᠡᠵᠢᠯ ᠢ ᠤᠶᠠᠯᠳᠤᠭᠤᠯᠤᠬᠰᠠᠨ ᠭᠠᠷ ᠤᠷᠠᠯᠠᠯ ᠤᠨ ᠪᠥᠳᠥᠭᠡᠭᠳᠡᠬᠦᠨ ᠪᠤᠯᠬᠤ ᠶᠤᠮ᠃ ᠬᠡᠷᠡᠯ ᠨᠠᠰᠤᠳᠠᠨ ᠶᠠᠬ ᠡᠨᠡ ᠬᠦ ᠮᠤᠷᠢᠨ ᠬᠢᠯᠭᠠᠰᠤ ᠪᠠᠷ ᠲᠠᠩᠺᠠ ᠤᠶᠤᠬᠤ ᠮᠡᠷᠭᠡᠵᠢᠯ ᠳᠤ ᠴᠠᠭᠠᠷᠠᠬᠰᠠᠨ ᠬᠥᠮᠥᠨ ᠪᠤᠯᠬᠤ ᠶᠤᠮ᠃ ᠪᠢᠳᠠ ᠲᠡᠬᠦᠨ ᠤ ᠥᠷᠥᠭᠡ ᠲᠥᠬᠦᠷᠡᠩ ᠡᠯᠬᠦᠬᠡᠰᠤᠳᠠᠢ ᠤᠷᠠᠨ ᠬᠢᠴᠠᠳᠠᠢ ᠥᠡᠭᠭᠡ ᠢᠯᠭᠠᠷᠠᠮᠠ ᠲᠠᠩᠺᠠ ᠶᠢᠨ ᠪᠥᠳᠥᠭᠡᠯ ᠤᠳ ᠢ ᠪᠢᠰᠢᠷᠡᠨ ᠰᠤᠨᠢᠷᠬᠠᠬᠤ ᠵᠠᠭᠤᠷᠠ ᠨᠠᠰᠤᠳᠠᠨ᠄ ︽ᠲᠠᠩᠺᠠ ᠬᠢᠬᠦ ᠳᠤ ᠵᠢᠷᠤᠬ ᠢᠶᠠᠷ ᠵᠢᠷᠤᠬᠤ᠂ ᠬᠠᠶᠢᠴᠢᠯᠠᠵᠥ ᠨᠠᠭᠠᠬᠤ᠂ ᠤᠷᠠᠯᠠᠵᠥ ᠤᠶᠤᠬᠤ ᠬᠡᠬᠦ ᠤᠯᠠᠨ ᠶᠠᠪᠤᠴᠠ ᠲᠠᠢ ᠶᠤᠮ᠃ ᠲᠠᠩᠺᠠ ᠪᠠᠨ ᠤᠶᠤᠬᠤ ᠳᠤ ᠬᠢᠯᠭᠠᠰᠤ ᠪᠠᠨ ᠨᠢᠬᠡᠳ ᠨᠢᠬᠡ ᠪᠠᠷ ᠨᠢ ᠥᠡᠭᠭᠡ ᠪᠤᠳᠤᠬ ᠲᠠᠭᠠᠷᠠᠭᠤᠯᠤᠨ ᠤᠷᠢᠶᠠᠵᠥ ᠬᠠᠳᠬᠤᠬᠤ ᠳᠤ ᠲᠦᠢᠯ ᠤᠨ ᠨᠠᠷᠢᠯᠢᠬ ᠤᠷᠠ ᠮᠡᠷᠭᠡᠰᠢᠯ ᠱᠠᠭᠠᠷᠳᠠᠬᠳᠠᠵᠥ᠂ ᠡᠩ ᠤᠨ ᠲᠥᠬᠦᠮ ᠠᠪᠰᠠᠷᠬᠠᠨ ᠲᠠᠩᠺᠠ ᠬᠢᠬᠦ ᠳᠤ ᠴᠤ ᠨᠠᠭᠠᠳᠤ ᠵᠠᠬᠠ ᠳᠠᠭᠠᠨ ᠠᠷᠪᠠᠭᠠᠳ ᠡᠳᠤᠷ ᠤᠨ ᠴᠠᠬ ᠵᠠᠷᠤᠴᠠᠭᠤᠯᠳᠠᠬ︾ ᠬᠡᠵᠥ ᠲᠠᠨᠢᠯᠴᠠᠭᠤᠯᠬᠤ ᠶᠢᠨ ᠬᠠᠮᠳᠤ ︽ᠮᠤᠷᠢ ᠮᠤᠩᠭᠤᠯ ᠥᠨᠳᠤᠰᠤᠳᠠᠨ ᠳᠤ ᠪᠠᠯᠠᠷᠠᠰᠢ ᠥᠬᠡᠢ ᠭᠠᠪᠢᠶᠠ ᠵᠢᠳᠬᠦᠯ ᠥᠵᠡᠬᠦᠯᠥᠭᠰᠡᠨ ᠢᠶᠠᠷ ᠮᠤᠩᠭᠤᠯᠴᠤᠳ ᠮᠤᠷᠢ ᠪᠠᠨ ᠬᠠᠶᠢᠷᠠᠯᠠᠵᠥ ᠲᠡᠭᠡᠳᠤᠯᠠᠬᠦ ᠰᠠᠶᠢᠬᠠᠨ ᠵᠠᠩᠰᠢᠯ ᠲᠠᠢ ᠶᠤᠮ᠃ ᠮᠤᠷᠢᠨ ᠤ ᠲᠡᠯ ᠰᠡᠬᠦᠯ ᠢ ᠬᠠᠶᠢᠴᠢᠯᠠᠵᠥ ᠠᠪᠤᠭᠠᠳ ᠤᠳᠠᠰᠤ ᠪᠤᠯᠭᠠᠨ ᠲᠠᠩᠺᠠ ᠤᠶᠤᠵᠥ ᠪᠠᠶᠢᠬᠤ ᠨᠢ ᠮᠤᠷᠢ ᠪᠠᠨ ᠪᠤᠷᠬᠠᠨ ᠤ ᠤᠷᠤᠨ ᠳᠤ ᠶᠠᠪᠤᠵᠥ᠂ ᠲᠠᠬᠢᠨ ᠪᠢᠳᠡᠬᠡᠢ ᠮᠠᠯ ᠪᠤᠯᠵᠥ ᠲᠥᠷᠥᠭᠡᠰᠠᠢ ᠬᠡᠵᠥ ᠲᠠᠭᠠᠳᠬᠠᠵᠥ ᠪᠠᠶᠢᠭᠠ ᠶᠠᠪᠤᠳᠠᠯ ᠶᠤᠮ ᠬᠡᠵᠥ ᠪᠢ ᠪᠤᠳᠤᠳᠠᠬ᠃ ᠪᠠᠰᠠ ᠨᠢᠬᠡᠨ ᠲᠠᠯᠠ ᠪᠠᠷ ᠮᠤᠷᠢ ᠪᠠᠨ ᠬᠥᠨᠳᠤᠯᠠᠵᠥ᠂ ᠮᠤᠷᠢᠨ ᠤ ᠪᠠᠨ ᠠᠴᠢ ᠶᠢ ᠬᠠᠷᠢᠭᠤᠯᠬᠤ ᠶᠢᠨ ᠲᠥᠯᠥᠭᠡ ᠬᠠᠳᠬᠤᠮᠠᠯ ᠬᠠᠳᠬᠤᠵᠥ᠂ ᠥᠨᠢᠷ ᠪᠡᠶᠡᠨ ᠥᠰᠥᠨ ᠥᠷᠡᠵᠢᠳᠤᠭᠡᠢ ᠬᠡᠮᠡᠨ ᠵᠥᠡᠭᠨᠡᠭᠰᠡᠨ ᠤᠴᠢᠷ ᠶᠤᠮ︾ ᠬᠡᠵᠥ ᠮᠤᠷᠢᠨ ᠬᠢᠯᠭᠠᠰᠤ ᠪᠠᠷ ᠲᠠᠩᠺᠠ ᠤᠶᠤᠬᠰᠠᠨ ᠤᠴᠢᠷ ᠤᠬᠠᠭᠠᠨ ᠢᠶᠠᠨ ᠲᠡᠯᠬᠡᠷᠡᠬᠦᠯᠤᠨ ᠲᠤᠭᠠᠴᠢᠵᠦ ᠪᠢᠯᠠ᠃
ᠮᠤᠷᠢᠨ ᠬᠢᠯᠭᠠᠰᠤ ᠪᠠᠷ ᠲᠠᠩᠺᠠ ᠤᠶᠤᠬᠤ ᠠᠷᠭᠠ ᠮᠡᠷᠭᠡᠵᠢᠯ ᠠᠯᠠᠱᠠ ᠨᠤᠳᠤᠬ ᠲᠤ ᠨᠢᠬᠡᠨᠳᠠ 300 ᠵᠢᠯ ᠤᠨ ᠲᠡᠤᠭᠡ ᠲᠠᠢ ᠪᠤᠯᠤᠬᠰᠠᠨ ᠲᠤᠬᠠᠢ ᠡᠶᠢᠮᠥ ᠨᠢᠬᠡᠨ ᠲᠤᠮᠤᠬ ᠤᠯᠠᠮᠵᠢᠯᠠᠬᠳᠠᠵᠥ ᠪᠠᠶᠢᠳᠠᠬ᠃ ᠵᠢᠷᠭᠤᠳᠤᠭᠠᠷ ᠲᠦᠷᠢ ᠶᠢᠨ ᠲᠠᠯᠠᠢ ᠯᠠᠮᠠ ᠽᠠᠩᠶᠠᠩᠵᠠᠮᠰᠤ ᠠᠯᠠᠱᠠ ᠳᠤ ᠢᠷᠡᠭᠡᠳ ᠠᠩᠬᠠᠨ ᠤ ᠰᠥᠮᠠ ᠪᠠᠨ ᠤᠳᠤ ᠶᠢᠨ ᠠᠯᠠᠱᠠ ᠵᠡᠬᠦᠨ ᠬᠤᠰᠢᠭᠤᠨ ᠤ ᠴᠤᠬᠳᠤᠬᠦ᠋ᠷᠢᠶᠠ ᠨᠤᠳᠤᠬ ᠲᠤ ᠪᠠᠶᠢᠭᠤᠯᠬᠤ ᠪᠠᠷ ᠲᠤᠭᠠᠡᠭ ᠳᠤ ᠭᠡᠷᠡᠭᠯᠡᠬᠦ ᠲᠠᠩᠺᠠ ᠪᠠᠨ ᠪᠥᠷ ᠮᠤᠷᠢᠨ ᠬᠢᠯᠭᠠᠰᠤ ᠪᠠᠷ ᠤᠷᠠᠯᠠᠵᠥ ᠤᠶᠤᠬᠰᠠᠨ ᠭᠡᠳᠡᠭ᠃ ᠲᠡᠷᠡ ᠥᠶᠠ ᠠᠴᠠ ᠮᠤᠷᠢᠨ ᠬᠢᠯᠭᠠᠰᠤ ᠪᠠᠷ ᠲᠠᠩᠺᠠ ᠤᠶᠤᠬᠤ ᠮᠡᠷᠭᠡᠵᠢᠯ ᠠᠯᠠᠱᠠ ᠨᠤᠳᠤᠬ ᠲᠤ ᠠᠩᠬᠠ ᠡᠬᠢᠯᠡᠨ ᠤᠯᠠᠮᠵᠢᠯᠠᠬᠳᠠᠵᠥ᠂ ᠮᠥᠨ ᠠᠯᠠᠱᠠ ᠨᠤᠳᠤᠬ ᠲᠤ ᠯᠠ ᠪᠠᠶᠢᠳᠠᠬ ᠤᠨᠴᠠ ᠭᠠᠷ ᠤᠷᠠᠯᠠᠯ ᠤᠨ ᠵᠦᠢᠯᠡᠰ ᠪᠤᠯᠤᠬᠰᠠᠨ ᠪᠠᠶᠢᠨᠠ᠃ ᠮᠤᠷᠢᠨ ᠬᠢᠯᠭᠠᠰᠤ ᠪᠠᠷ ᠤᠷᠢᠶᠠᠵᠥ ᠤᠶᠤᠬᠰᠠᠨ ᠲᠠᠩᠺᠠ ᠨᠢ ᠬᠥᠮᠥᠨ ᠤ ᠲᠥᠷᠢ ᠶᠢ ᠪᠥᠳᠥᠭᠡᠬᠦ ᠳᠡᠭᠡᠨ ᠥᠭᠡᠷᠠ ᠪᠤᠰᠤᠳ ᠵᠢᠷᠤᠬᠰᠠᠨ᠂ ᠨᠠᠭᠠᠬᠰᠠᠨ ᠲᠠᠩᠺᠠ ᠲᠠᠢ ᠠᠳᠠᠯᠢᠳᠬᠠᠪᠠᠯ ᠨᠠᠩ ᠠᠮᠢᠳᠤᠯᠢᠬ ᠭᠤᠶᠤ ᠰᠠᠶᠢᠬᠠᠨ ᠮᠥᠷᠳᠡᠭᠡᠨ ᠥᠡᠭᠭᠡ ᠪᠤᠳᠤᠬ ᠨᠢ ᠤᠨᠠᠬᠤ ᠥᠬᠡᠢ ᠪᠠᠶᠢᠳᠠᠬ ᠢᠶᠠᠷ ᠢᠶᠠᠷ ᠤᠨᠴᠠᠯᠢᠭᠳᠠᠬᠤ ᠠᠵᠠᠢ᠃ ᠬᠡᠷᠡᠯ ᠨᠠᠰᠤᠳᠠᠨ ᠬᠠᠷᠠᠬᠠᠨ ᠪᠠᠭᠠ ᠠᠴᠠ ᠪᠠᠨ ᠤᠶᠤᠳᠠᠯ ᠳᠤ ᠲᠤᠷᠠ ᠪᠠᠬᠠ ᠲᠠᠢ᠂ ᠡᠵᠢ ᠠᠴᠠ ᠪᠠᠨ ᠤᠶᠤᠳᠠᠯ ᠤᠨ ᠲᠠᠯᠠ ᠪᠠᠷ ᠬᠢ ᠤᠯᠠᠨ ᠤᠷᠠ ᠤᠬᠠᠭᠠᠨ ᠢ ᠰᠤᠷᠴᠤ᠂ ᠠᠶᠢᠯ ᠭᠡᠷ ᠪᠤᠯᠤᠬᠰᠠᠨ ᠤ ᠬᠤᠶᠢᠨᠠ ᠬᠡᠤᠬᠡᠳ ᠤᠨ ᠢᠶᠠᠨ ᠬᠤᠪᠴᠠᠰᠤ ᠬᠤᠨᠠᠷ ᠢ ᠥᠪᠡᠷ ᠢᠶᠠᠨ ᠤᠶᠤᠵᠥ᠂ ᠲᠡᠭᠡᠷᠠ ᠨᠢ ᠴᠡᠴᠡᠭ ᠬᠤᠸᠠᠷ ᠬᠠᠳᠬᠤᠵᠥ ᠤᠷᠠᠯᠠᠳᠠᠬ ᠪᠠᠶᠢᠬᠰᠠᠨ ᠬᠡᠨᠠ᠃ ᠲᠠᠩᠺᠠ ᠶᠢᠨ ᠪᠥᠳᠥᠭᠡᠯ ᠢ ᠤᠷᠠᠯᠠᠬᠤ ᠳᠤ ᠲᠡᠤᠭᠡ᠂ ᠤᠯᠤᠰ ᠲᠥᠷᠥ᠂ ᠱᠠᠰᠢᠨ ᠰᠤᠷᠳᠠᠬᠤᠨ ᠵᠡᠷᠭᠡ ᠤᠯᠠᠨ ᠲᠠᠯᠠ ᠶᠢᠨ ᠮᠡᠳᠡᠯᠭᠡ ᠮᠡᠳᠡᠴᠡ ᠶᠢ ᠥᠢᠯᠠᠭᠠᠬᠰᠠᠨ ᠪᠠᠶᠢᠬᠤ ᠴᠢᠬᠤᠯᠠᠳᠠᠢ᠃ ᠬᠡᠷᠡᠯ ᠨᠠᠰᠤᠳᠠᠨ ᠰᠤᠷᠭᠠᠭᠤᠯᠢ ᠳᠤ ᠰᠠᠭᠤᠭᠰᠠᠨ ᠦᠬᠡᠢ ᠪᠤᠯᠪᠠᠴᠦ ᠤᠯᠠᠨ ᠵᠢᠯ ᠤᠨ ᠲᠤᠷᠰᠢ ᠲᠦᠪᠡᠳ᠂ ᠬᠥᠬᠡᠨᠡᠭᠤᠷ ᠵᠡᠷᠭᠡ ᠭᠠᠵᠠᠷ ᠤᠷᠤᠨ ᠢᠶᠠᠷ ᠶᠠᠪᠤᠵᠥ᠂ ᠰᠤᠳᠤᠯᠭᠠᠳᠠᠨ ᠮᠡᠷᠭᠡᠳ ᠠᠴᠠ ᠬᠢᠴᠢᠶᠠᠨ ᠰᠤᠷᠤᠯᠴᠠᠵᠥ᠂ ᠲᠡᠤᠭᠡ ᠱᠠᠰᠢᠨ ᠤ ᠲᠤᠬᠠᠢ ᠨᠤᠮ ᠰᠤᠳᠤᠷ ᠢᠶᠠᠷ ᠨᠠᠷᠢᠯᠢᠬ ᠰᠤᠷᠤᠯᠴᠠᠵᠠᠢ᠃ 2014 ᠤᠨ ᠳᠤ ᠥᠢᠷᠠ ᠬᠠᠪᠢ ᠶᠢᠨ ᠲᠤᠰᠬᠠᠢ ᠰᠤᠳᠤᠯᠭᠠᠳᠠᠳ ᠪᠠ ᠨᠤᠳᠤᠬ ᠤᠨ ᠢᠶᠠᠨ ᠠᠬᠠᠮᠠᠳ ᠨᠢᠬᠡ ᠥᠶᠠ ᠶᠢᠨ ᠭᠠᠷ ᠤᠷᠠᠴᠤᠳ ᠢ ᠴᠤᠬᠯᠠᠠᠭᠤᠯᠤᠨ ᠥᠪᠡᠷ ᠤᠨ ᠤᠷᠠᠯᠠᠨ ᠬᠢᠭᠰᠡᠨ ᠲᠠᠩᠺᠠ ᠪᠥᠳᠥᠭᠡᠯ ᠤᠨ ᠲᠤᠬᠠᠢ ᠲᠤᠰᠬᠠᠢ ᠰᠤᠳᠤᠯᠤᠨ ᠶᠡᠷᠢᠯᠴᠡᠬᠤ ᠬᠤᠷᠠᠯ ᠬᠢᠵᠤ᠂ ᠪᠥᠳᠥᠭᠡᠯ ᠤᠨ ᠢᠶᠠᠨ ᠥᠡᠭᠭᠡ ᠪᠤᠳᠤᠬ ᠢ ᠲᠤᠬᠢᠷᠠᠭᠤᠯᠤᠬᠰᠠᠨ ᠪᠠᠶᠢᠳᠠᠯ ᠵᠢᠴᠢ ᠢᠯᠡᠳᠭᠡᠭᠰᠡᠨ ᠠᠭᠤᠯᠭᠠ ᠬᠡᠯᠪᠡᠷᠢ ᠶᠢᠨ ᠲᠠᠯᠠ ᠪᠠᠷ ᠰᠠᠨᠠᠯ ᠰᠠᠨᠠᠭᠤᠯᠭᠠ ᠰᠤᠨᠤᠰᠴᠤ ᠪᠥᠳᠥᠭᠡᠯ ᠢᠶᠠᠨ ᠨᠡᠩ ᠴᠢᠨᠠᠷᠵᠢᠭᠤᠯᠪᠠ᠃ ᠮᠥᠨ ᠴᠤ ᠥᠪᠡᠷ ᠢᠶᠠᠨ ᠰᠤᠷᠴᠤ ᠰᠤᠳᠤᠯᠬᠤ ᠲᠤᠮᠳᠠ ᠲᠠᠩᠺᠠ ᠬᠢᠬᠦ ᠳᠤ ᠡᠷᠭᠡᠪᠰᠢ ᠤᠷᠠᠯᠠᠬᠤ ᠬᠡᠵᠥ ᠪᠠᠶᠢᠭᠠ ᠬᠥᠮᠥᠨ ᠤ ᠪᠠᠨ ᠲᠡᠤᠭᠡ ᠨᠠᠮᠳᠠᠷ ᠢ ᠠᠩᠬᠠᠷᠴᠤ᠂ ᠲᠥᠷᠢ ᠶᠢ ᠤᠷᠠᠯᠠᠵᠤ ᠪᠥᠳᠥᠭᠡᠨ ᠥᠡᠭᠭᠡ ᠲᠠᠭᠠᠷᠠᠭᠤᠯᠬᠤ ᠳᠠᠭᠠᠨ ᠴᠤ ᠲᠡᠰ ᠲᠠᠷᠠᠭᠠᠯᠠᠯ ᠲᠠᠢ ᠪᠠᠶᠢᠬᠤ ᠵᠡᠷᠭᠡ ᠥᠪᠡᠷ ᠤᠨ ᠬᠡᠰᠡᠨ ᠪᠠᠷᠢᠮᠳᠠᠯᠠᠯ ᠢ ᠪᠥᠷᠢᠯᠳᠥᠬᠦᠯᠪᠠ᠃ ᠨᠠᠰᠤᠳᠠᠨ ᠤ ᠮᠤᠩᠭᠤᠯ ᠤᠨ ᠲᠡᠤᠭᠡᠳᠤ ᠥᠢᠯᠡ ᠶᠠᠪᠤᠳᠠᠯ ᠪᠤᠶᠤ ᠲᠡᠤᠭᠡᠳᠤ ᠬᠥᠮᠥᠰ᠂ ᠠᠯᠠᠱᠠ ᠨᠤᠳᠤᠭ ᠤᠨ ᠤᠨᠴᠠᠯᠢᠬᠳᠦ ᠡᠪᠡᠰᠤ ᠤᠷᠭᠤᠮᠠᠯ ᠢᠶᠠᠷ ᠰᠡᠳᠦᠪᠯᠡᠭᠰᠡᠨ ᠲᠠᠩᠺᠠ ᠪᠤᠶᠤ ᠵᠢᠷᠤᠬ ᠬᠥᠷᠥᠭ ᠨᠢ ᠤᠷᠠᠨ ᠬᠠᠴᠢᠨ᠂ ᠠᠮᠢᠳᠤᠯᠢᠬ ᠪᠠᠶᠢᠳᠠᠭ ᠢᠶᠠᠷ ᠢᠶᠠᠨ ᠤᠯᠠᠨ ᠤ ᠬᠤᠷᠤᠬᠠᠢ ᠶᠢ ᠲᠠᠳᠠᠵᠥ᠂ ᠪᠤᠷᠤᠯᠠᠭᠤᠯᠭᠠ ᠶᠢᠨ ᠤᠷᠤᠯᠭᠠ ᠨᠢ ᠵᠢᠯ ᠠᠴᠠ ᠵᠢᠯ ᠨᠡᠮᠡᠭᠳᠡᠨ ᠨᠢᠳᠤᠨᠤᠨ 40 ᠭᠠᠷᠤᠢ ᠲᠥᠮᠡᠨ ᠲᠥᠬᠦᠷᠢᠭ ᠤᠨ ᠴᠡᠪᠡᠷ ᠤᠷᠤᠯᠭᠠ ᠤᠯᠤᠭᠰᠠᠨ ᠪᠢᠯᠡ᠃
︽ᠲᠠᠭᠤᠳᠠᠬᠤ ᠨᠡᠷᠠ ᠶᠢ ᠠᠪᠤ ᠡᠵᠢ ᠠᠴᠠ ᠥᠭᠴᠤ᠂ ᠲᠠᠭᠤᠷᠢᠰᠬᠤ ᠠᠯᠳᠠᠷ ᠢ ᠥᠪᠡᠷ ᠢᠶᠠᠨ ᠤᠯᠳᠠᠬ︾᠃ ᠬᠡᠷᠡᠯ ᠨᠠᠰᠤᠳᠠᠨ ᠥᠪᠡᠷᠮᠢᠴᠡ ᠤᠨᠴᠠᠯᠢᠬ ᠲᠠᠢ ᠤᠯᠠᠮᠵᠢᠯᠠᠯᠳᠤ ᠭᠠᠷ ᠤᠷᠠᠯᠠᠯ ᠤᠨ ᠪᠥᠳᠥᠭᠡᠯ ᠢᠶᠠᠷ ᠢᠶᠠᠨ ᠤᠯᠠᠨ ᠳᠤ ᠲᠠᠨᠢᠬᠳᠠᠵᠥ ᠶᠠᠪᠤᠬᠤ ᠳᠠᠭᠠᠨ᠂ 2016 ᠤᠨ ᠳᠤ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠤ ᠮᠤᠷᠢᠨ ᠬᠢᠯᠭᠠᠰᠤ ᠤᠷᠢᠶᠠᠮᠠᠯ ᠮᠢᠨᠳᠠᠰᠤᠨ ᠤ ᠤᠷᠠᠯᠠᠯ ᠤᠨ ᠲᠠᠩᠺᠠ ᠶᠢᠨ ᠬᠠᠳᠬᠤᠮᠠᠯ ᠤᠨ ᠪᠤᠳᠠᠰ ᠤᠨ ᠪᠤᠰᠤ ᠰᠤᠶᠤᠯ ᠤᠨ ᠥᠪ ᠤᠨ ᠤᠯᠠᠮᠵᠢᠯᠠᠬᠴᠢ ᠪᠠᠷ ᠦᠨᠡᠯᠡᠭᠳᠡᠵᠤ᠂ 2017 ᠤᠨ ᠳᠤ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠤ ᠥᠨᠳᠤᠰᠤᠳᠠᠨ ᠤ ᠬᠤᠪᠴᠠᠰᠤ ᠵᠠᠰᠠᠯ ᠤᠨ ᠭᠠᠷ ᠤᠷᠠᠯᠠᠯ ᠤᠨ ᠲᠠᠷᠬᠠᠨ ᠢᠶᠠᠷ ᠨᠡᠷᠡᠶᠢᠳᠥᠭᠳᠡᠵᠠᠢ᠃ ᠬᠡᠬᠦ ᠳᠤ ᠨᠠᠰᠤᠳᠠᠨ ᠭᠤᠸᠠᠢ ᠡᠳᠡᠭᠡᠷ ᠢᠷᠡᠭᠤ ᠠᠯᠳᠠᠷ ᠲᠤ ᠰᠡᠳᠬᠢᠯ ᠬᠠᠨᠤᠨ ᠵᠢᠷᠭᠠᠵᠥ ᠰᠠᠭᠤᠭᠠ ᠪᠢᠰᠢ᠂ ᠬᠠᠷᠢᠨ ᠥᠶᠠ ᠤᠯᠠᠮᠵᠢᠯᠠᠵᠥ ᠢᠷᠡᠭᠰᠡᠨ ᠤᠷᠠ ᠮᠡᠷᠭᠡᠰᠢᠯ ᠢᠶᠠᠨ ᠨᠤᠳᠤᠬ ᠤᠨ ᠮᠠᠯᠴᠢᠨ ᠲᠥᠮᠡᠨ ᠳᠡᠭᠡᠨ ᠤᠯᠠᠮᠵᠢᠯᠠᠬᠤ ᠪᠠᠷ ᠮᠤᠩᠭᠠᠨᠢᠵᠥ ᠶᠠᠪᠤᠨᠠ᠃ ᠨᠠᠰᠤᠳᠠᠨ ᠥᠢᠷᠠ ᠶᠢᠨ ᠵᠢᠯ ᠠᠴᠠ ᠨᠠᠰᠢ᠂ ᠲᠠᠩᠺᠠ ᠬᠢᠬᠦ ᠪᠤᠯᠪᠠᠰᠤᠷᠠᠯ ᠤᠨ ᠠᠩᠭᠢ ᠶᠢ ᠵᠢᠯ ᠪᠤᠯᠭᠠᠨ ᠨᠠᠭᠠᠳᠤ ᠵᠠᠬᠠ ᠳᠠᠭᠠᠨ ᠬᠤᠶᠡᠷ ᠠᠴᠠ ᠭᠤᠷᠪᠠᠨ ᠤᠳᠠᠭᠠ ᠡᠷᠬᠢᠯᠡᠵᠥ᠂ ᠨᠤᠳᠤᠬ ᠤᠨ ᠤᠯᠠᠨ ᠳᠠᠭᠠᠨ ᠲᠠᠩᠺᠠ ᠤᠶᠤᠬᠤ ᠭᠠᠷ ᠤᠷᠠᠯᠠᠯ ᠢᠶᠠᠨ ᠤᠬᠠᠭᠤᠯᠤᠨ ᠤᠯᠠᠮᠵᠢᠯᠠᠵᠤ ᠪᠤᠢ᠃ ᠨᠠᠰᠤᠳᠠᠨ᠄ ︽ᠪᠢ ᠨᠢᠬᠡᠨᠳᠠ ᠲᠠᠯᠠ ᠭᠠᠷᠴᠤ ᠲᠠᠶᠠᠭᠠᠷ ᠢ ᠲᠥᠰᠢᠬᠦ ᠨᠠᠰᠤᠨ ᠳᠤ ᠬᠥᠷᠥᠭᠰᠡᠨ ᠪᠤᠯᠬᠤᠷ ᠠᠯᠠᠱᠠ ᠨᠤᠳᠤᠬ ᠲᠤ ᠯᠡ ᠪᠠᠶᠢᠳᠠᠬ ᠮᠤᠷᠢᠨ ᠬᠢᠯᠭᠠᠰᠤ ᠪᠠᠷ ᠲᠠᠩᠺᠠ ᠬᠢᠬᠦ ᠤᠷᠠᠯᠠᠯ ᠢᠶᠠᠨ ᠨᠡᠩ ᠤᠯᠠᠨ ᠬᠥᠮᠥᠨ ᠳᠤ ᠲᠠᠨᠢᠭᠤᠯᠵᠥ᠂ ᠱᠠᠪᠢ ᠲᠠᠭᠠᠭᠤᠯᠤᠨ ᠵᠢᠭᠠᠵᠥ ᠤᠯᠠᠮᠵᠢᠯᠠᠬᠤ ᠪᠠᠷ ᠴᠢᠷᠮᠠᠶᠢᠨᠠ︾ ᠬᠡᠵᠥ ᠪᠤᠳᠤᠯ ᠰᠠᠨᠠᠯ ᠢᠶᠠᠨ ᠶᠡᠷᠢᠯᠠ᠃ ᠨᠡᠰᠤᠳᠠᠨ ᠭᠤᠸᠠᠢ ᠤᠷᠢᠳ ᠬᠤᠵᠢᠳ ᠥᠢᠷᠠ ᠬᠠᠪᠢ ᠶᠢᠨ ᠢᠶᠠᠨ 200 ᠭᠠᠷᠤᠢ ᠮᠠᠯᠴᠢᠨ ᠳᠤ ᠪᠤᠯᠪᠠᠰᠤᠷᠠᠯ ᠬᠥᠷᠳᠡᠭᠡᠵᠥ᠂ ᠲᠠᠩᠺᠡ ᠶᠢᠨ ᠲᠡᠤᠭᠡ ᠰᠤᠶᠤᠯ ᠢᠶᠠᠨ ᠤᠯᠠᠮᠵᠢᠯᠠᠵᠥ ᠦᠭᠬᠦᠭᠰᠡᠨ ᠪᠢᠯᠡ᠃ ᠠᠯᠳ᠋ᠬᠠᠠᠭᠤᠯᠠ ᠥᠷᠭᠡᠨ ᠬᠠᠢ ᠴᠢᠤᠸᠠᠨ