-
2112848
︽ᠰᠢᠷᠠ ᠮᠦᠷᠡᠨ︾ ᠰᠡᠳᠬᠦᠯ ᠤᠨ ᠶᠠᠷᠦᠩᠬᠡᠢ ᠨᠠᠶᠢᠢᠷᠠᠭᠤᠯᠤᠬᠴᠢ ᠤ᠊ · ᠴᠤᠯᠮᠤᠨ ᠯᠤᠭᠠ ᠶᠢᠨ ᠶᠠᠷᠢᠯᠴᠠᠭᠠ
2019-10-16 20:51
91
0
ᠤᠳᠬᠠ ᠤᠶᠠᠩᠭᠠ ᠶᠢᠨ ᠢᠷᠠᠭᠤ ᠤᠷᠤᠰᠬᠠᠯᠳᠤ — ︽ᠰᠢᠷᠠ ᠮᠦᠷᠡᠨ︾ ᠰᠡᠳᠬᠦᠯ ᠤᠨ ᠶᠠᠷᠦᠩᠬᠡᠢ ᠨᠠᠶᠢᠢᠷᠠᠭᠤᠯᠤᠬᠴᠢ ᠤ᠊ · ᠴᠤᠯᠮᠤᠨ ᠯᠤᠭᠠ ᠶᠢᠨ ᠶᠠᠷᠢᠯᠴᠠᠭᠠ
︽ᠰᠢᠷᠠ ᠮᠦᠷᠨᠨ︾ ᠰᠡᠳᠬᠦᠯ ᠪᠤᠯ ᠤᠯᠠᠭᠠᠨᠬᠠᠳᠠ ᠬᠤᠲᠠ ᠶᠢᠨ ᠤᠳᠬᠠ ᠤᠷᠠᠯᠢᠭ ᠤᠨ ᠬᠢᠨ ᠤ ᠬᠤᠯᠪᠤᠭᠠ ᠠᠴᠠ ᠡᠷᠬᠢᠯᠡᠵᠤ ᠪᠤᠢ ᠤᠷᠠᠨ ᠵᠤᠬᠢᠶᠠᠯ ᠤᠨ ᠬᠤᠤᠰ ᠰᠠᠷᠠ ᠶᠢᠨ ᠰᠡᠳᠭᠦᠯ᠃ ᠰᠡᠳᠭᠦᠯ ᠨᠢ ᠬᠡᠪᠯᠡᠯ ᠡᠬᠢᠯᠡᠭᠰᠡᠨ ᠠᠴᠠ ᠠᠪᠤᠭᠠᠳ ᠤᠳᠬᠠ ᠤᠷᠠᠯᠢᠭ ᠨᠡᠶᠢᠭᠡᠮ ᠵᠢᠷᠦᠮ ᠳᠤ ᠦᠢᠯᠡᠴᠢᠯᠡᠬᠦ᠂ ᠠᠷᠠᠳ ᠲᠦᠮᠡᠨ ᠳᠤ ᠦᠢᠯᠡᠴᠢᠯᠡᠬᠦ ᠴᠢᠭᠯᠡᠯ ᠢ ᠪᠠᠷᠢᠮᠲᠠᠯᠠᠨ᠂ ᠴᠡᠴᠡᠭ ᠪᠦᠬᠦᠨ ᠢ ᠵᠡᠷᠭᠡ ᠪᠠᠷ ᠳᠡᠯᠭᠡᠷᠡᠭᠦᠯᠵᠤ᠂ ᠡᠷᠳᠡᠮᠲᠡᠨ ᠪᠦᠬᠦᠨ ᠢ ᠴᠢᠯᠦᠭᠡᠲᠡᠢ ᠶᠠᠷᠢᠯᠴᠠᠭᠤᠯᠬᠤ ᠴᠢᠭᠯᠡᠯᠲᠡ ᠬᠢᠭᠡᠳ ᠦᠨᠳᠦᠰᠦᠲᠡᠨ ᠤ ᠲᠤᠬᠠᠢ ᠨᠠᠮ ᠤᠨ ᠳᠦᠷᠦ ᠶᠢᠨ ᠪᠤᠳᠤᠯᠭᠠ ᠶᠢ ᠲᠤᠭᠤᠰᠢᠯᠠᠭᠤᠯᠵᠤ᠂ ᠴᠠᠭ ᠦᠶᠡ ᠶᠢᠨ ᠭᠤᠤᠯ ᠬᠦᠭ ᠠᠶᠠᠰ ᠢ ᠴᠢᠪᠬᠠᠳᠠᠬᠰᠠᠭᠠᠷ ᠢᠷᠡᠭᠰᠡᠨ ᠶᠤᠮ᠃
ᠰᠤᠷᠪᠤᠯᠵᠢᠯᠠᠭᠴᠢ᠄ ︽ᠰᠢᠷᠠ ᠮᠦᠷᠡᠨ︾ ᠰᠡᠳᠭᠦᠯ ᠪᠤᠯ ᠮᠢᠨᠦ ᠳᠤᠮᠳᠠᠳᠦ ᠰᠤᠷᠭᠠᠭᠤᠯᠢ ᠠᠴᠠ ᠪᠠᠨ ᠪᠠᠭ᠋ᠠᠷᠬᠠᠨ ᠤᠩᠰᠢᠵᠤ ᠪᠠᠶᠢᠭᠰᠠᠨ ᠨᠤᠲᠤᠭ ᠤᠨ ᠰᠡᠳᠭᠦᠯ᠃ ᠡᠬᠢ ᠡᠬᠦᠰᠦᠯ ᠢ ᠨᠢ ᠶᠠᠷᠢᠪᠡᠯ︖
ᠤ · ᠴᠤᠯᠮᠤᠨ᠄ ︽ᠰᠢᠷᠠ ᠮᠦᠷᠡᠨ︾ ᠰᠡᠳᠭᠦᠯ ᠪᠤᠯ ᠤᠯᠠᠭᠠᠨᠬᠠᠳᠠ ᠬᠤᠲᠠ ︵ᠬᠡᠪᠯᠡᠯ ᠡᠬᠢᠯᠡᠬᠦ ᠦᠶᠡ ᠳᠤ ᠵᠤᠤ ᠤᠳᠠ ᠠᠶᠢᠮᠠᠭ ᠬᠡᠵᠤ ᠪᠠᠶᠢᠭᠰᠠᠨ︶ ᠶᠢᠨ ᠤᠳᠬᠠ ᠤᠷᠠᠯᠢᠭ ᠤᠨ ᠬᠢᠨ ᠤ ᠬᠤᠯᠪᠤᠭᠠ ᠠᠴᠠ ᠡᠷᠬᠢᠯᠡᠵᠤ ᠪᠤᠢ ᠤᠷᠠᠨ ᠵᠤᠬᠢᠶᠠᠯ ᠤᠨ ᠬᠤᠤᠰ ᠰᠠᠷᠠ ᠶᠢᠨ ᠰᠡᠳᠭᠦᠯ᠃ 1980 ᠤᠨ ᠳᠤ ᠬᠡᠪᠯᠡᠯ ᠡᠬᠢᠯᠡᠵᠣ᠂ 1981 ᠤᠨ ᠳᠤ ᠦᠪᠦᠷ ᠮᠤᠩᠭᠤᠯ ᠤᠨ ᠨᠠᠮ ᠤᠨ ᠬᠤᠷᠢᠶᠠᠨ ᠤ ᠲᠠᠷᠬᠠᠭᠠᠭᠰᠠᠨ ︵81︶ — 2 ᠳ᠋ᠤᠭᠠᠷ ᠲᠤᠭᠠᠲᠤ ᠠᠯᠪᠠᠨ ᠪᠢᠴᠢᠭ ᠤᠨ ᠵᠦᠪᠰᠢᠶᠡᠷᠡᠯ ᠲᠠᠢ ᠪᠠᠷ ᠤᠯᠤᠰ ᠤᠨ ᠲᠤᠲᠤᠭᠠᠲᠤ ᠭᠠᠳᠠᠭᠠᠲᠤ ᠳᠤ ᠢᠯᠡ ᠪᠠᠷ ᠲᠠᠷᠬᠠᠭᠠᠵᠤ᠂ ᠰᠢᠤᠳᠠᠨ ᠢᠶᠠᠷ ᠵᠠᠬᠢᠶᠠᠯᠠᠨ ᠤᠩᠰᠢᠬᠤ ᠰᠡᠳᠭᠦᠯ ᠪᠤᠯᠤᠭᠰᠠᠨ ᠪᠠᠶᠢᠨᠠ᠃ ᠠᠩᠬᠠ ᠬᠡᠪᠯᠡᠯ ᠡᠬᠢᠯᠡᠬᠦ ᠦᠶᠡ ᠳᠤ ᠬᠤᠭᠤᠴᠠᠭᠠ ᠪᠦᠷᠢ ᠠᠷᠪᠠᠨ ᠵᠢᠷᠭᠤᠭᠠᠨ ᠵᠢᠰᠦᠮ ᠤᠨ 88 ᠨᠢᠭᠤᠷ ᠲᠠᠢ ᠪᠠᠶᠢᠢᠬᠰᠠᠨ ᠶᠤᠮ᠃ ︽ᠲᠤᠭᠤᠵᠢᠰ ᠵᠤᠬᠢᠶᠠᠯ︾᠂ ︽ᠢᠷᠠᠭᠤ ᠨᠠᠶᠢᠷᠠᠭ︾᠂ ︽ᠤᠨᠤᠯ ᠰᠢᠭᠦᠮᠵᠢ︾ ᠵᠡᠷᠬᠡ ᠬᠡᠳᠦᠨ ᠪᠤᠯᠤᠩ ᠲᠠᠢ ᠠᠴᠠ ᠭᠠᠳᠠᠨᠠ ᠭᠠᠳᠠᠭᠠᠲᠤ ᠲᠤᠲᠤᠭᠠᠲᠤ ᠶᠢᠨ ᠰᠤᠳᠤᠨ ᠪᠦᠲᠦᠭᠡᠯ ᠢ ᠲᠠᠨᠢᠯᠴᠠᠭᠤᠯᠤᠭᠰᠠᠨ ︽ᠴᠡᠴᠡᠭᠲᠤ ᠡᠷᠭᠢ︾᠂ ᠤᠷᠠᠨ ᠵᠤᠬᠢᠶᠠᠯ ᠤᠨ ᠪᠢᠯᠢᠭ ᠲᠦᠷᠦᠵᠦ ᠤᠶᠠᠩᠭᠠ ᠶᠢᠨ ᠬᠦᠯᠦᠭ ᠲᠤ ᠳᠦᠷᠦᠭᠡ ᠭᠢᠰᠭᠢᠵᠤ ᠪᠠᠶᠢᠭᠠ ᠵᠠᠯᠠᠭᠤ ᠵᠤᠬᠢᠶᠠᠭᠴᠢᠳ ᠲᠤ ᠵᠤᠷᠢᠭᠤᠯᠤᠭᠰᠠ ︽ᠨᠤᠭᠤᠭᠠᠨ ᠲᠤᠬᠤᠢ︾᠂ ᠠᠷᠠᠳ ᠤᠨ ᠠᠮᠠᠨ ᠵᠤᠬᠢᠶᠠᠯ ᠤᠨ ᠠᠯᠲᠠᠨ ᠰᠠᠩ ᠠᠴᠠ ᠴᠤᠮᠨᠠᠭᠰᠠᠨ ︽ᠳᠤᠩ ᠯᠠᠪᠠᠢ︾ ᠵᠡᠷᠭᠡ ᠲᠤᠰᠬᠠᠢ ᠪᠤᠯᠤᠩ ᠤᠳ ᠲᠠᠢ ᠪᠠᠶᠢᠭᠰᠠᠨ ᠡ᠃
ᠰᠤᠷᠪᠤᠯᠵᠢᠯᠠᠭᠴᠢ᠄ ᠦᠪᠡᠷ ᠢᠶᠠᠷ ᠢᠶᠠᠨ ᠪᠠᠶᠢᠢᠨᠠ ᠬᠡᠳᠡᠭ ᠤᠷᠡᠨ ᠪᠦᠳᠦᠬᠡᠯᠴᠢᠳ ᠤᠨ ᠨᠢᠬᠡᠨ ᠳᠤᠳᠤᠷᠬᠠᠶᠢᠢᠯᠠᠯ᠃ ᠰᠡᠳᠭᠦᠯ ᠴᠤ ᠠᠳᠠᠯᠢᠬᠠᠨ᠃ ᠰᠡᠳᠬᠦᠯ ᠪᠦ᠋ᠬᠦᠨ ᠦᠪᠡᠷ ᠤᠨ ᠬᠡᠪ ᠨᠠᠮᠪᠠ᠂ ᠦᠪᠡᠷ ᠤᠨ ᠬᠢᠨᠢ ᠵᠤᠷᠢᠯᠲᠠ ᠲᠠᠢ ᠪᠠᠶᠢᠳᠠᠭ᠃ ᠳᠡᠶᠢᠢᠮᠦ ᠡ︖
ᠤ · ᠴᠤᠯᠮᠤᠨ᠄ ︽ᠰᠢᠷᠠ ᠮᠦᠷᠡᠨ︾ ᠰᠡᠳᠭᠦᠯ ᠨᠢ ᠬᠡᠪᠯᠡᠯ ᠡᠬᠢᠯᠡᠭᠰᠡᠨ ᠠᠴᠠ ᠠᠪᠤᠭᠠᠳ ᠬᠡᠳᠦᠨ ᠦᠶᠡ ᠶᠢᠨ ᠨᠠᠶᠢᠷᠠᠭᠤᠯᠤᠭᠴᠢ ᠰᠣᠯᠢᠭᠳᠠᠭᠰᠠᠨ ᠪᠤᠯᠪᠠᠴᠤ ᠰᠡᠳᠭᠦᠯ ᠠᠩᠬᠠ ᠡᠷᠬᠢᠯᠡᠬᠦ ᠦᠶᠡ ᠶᠢᠨ ᠤᠭ ᠰᠠᠨᠠᠭᠠ ᠪᠠᠨ ᠪᠠᠳᠤ ᠴᠡᠬᠡᠵᠢᠯᠡᠭᠰᠡᠭᠡᠷ᠂ ᠲᠠᠷᠤᠢ ᠤᠳᠬᠠ ᠤᠷᠠᠯᠢᠭ ᠨᠡᠶᠢᠭᠡᠮ ᠵᠢᠷᠦᠮ ᠳᠤ ᠦᠢᠯᠡᠴᠢᠯᠡᠬᠦ᠂ ᠠᠷᠠᠳ ᠲᠦᠮᠡᠨ ᠳᠤ ᠦᠢᠯᠡᠴᠢᠯᠡᠬᠦ ᠴᠢᠭᠯᠡᠯ ᠢ ᠢᠮᠠᠬᠳᠠ ᠪᠠᠷᠢᠮᠲᠠᠯᠠᠨ᠂ ᠴᠡᠴᠡᠭ ᠪᠦᠬᠦᠨ ᠢ ᠵᠡᠷᠭᠡ ᠪᠠᠷ ᠳᠡᠯᠭᠡᠷᠡᠭᠦᠯᠵᠤ᠂ ᠡᠷᠳᠡᠮᠲᠡᠨ ᠪᠦᠬᠦᠨ ᠢ ᠴᠢᠯᠦᠭᠡᠲᠡᠢ ᠶᠠᠷᠢᠯᠴᠠᠭᠤᠯᠬᠤ ᠴᠢᠭᠯᠡᠯᠲᠡ ᠬᠢᠭᠡᠳ ᠦᠨᠳᠦᠰᠦᠲᠡᠨ ᠤ ᠲᠤᠬᠠᠢ ᠨᠠᠮ ᠤᠨ ᠳᠦᠷᠦ ᠶᠢᠨ ᠪᠤᠳᠤᠯᠭᠠ ᠶᠢ ᠲᠤᠭᠤᠰᠢᠯᠠᠭᠤᠯᠵᠤ᠂ ᠴᠠᠭ ᠦᠶᠡ ᠶᠢᠨ ᠭᠤᠤᠯ ᠬᠦᠭ ᠠᠶᠠᠰ ᠢ ᠴᠢᠪᠬᠠᠳᠠᠨ᠂ ᠦᠨᠳᠦᠰᠦᠲᠡᠨ ᠤ ᠪᠠᠨ ᠰᠤᠶᠤᠯ ᠤᠨ ᠤᠭᠢ ᠱᠦᠯᠳᠤ ᠶᠢ ᠢᠳᠡᠭᠡᠰᠢᠯᠡᠬᠦᠯᠵᠤ᠂ ᠤᠷᠤᠨ ᠨᠤᠲᠤᠭ ᠤᠨ ᠤᠨᠴᠠᠯᠢᠭ ᠲᠠᠢ ᠮᠦᠷᠲᠡᠭᠡᠨ ᠪᠦᠬᠦ ᠲᠠᠯᠠ ᠶᠢ ᠬᠠᠷᠠᠭᠠᠯᠵᠠᠵᠤ᠂ ᠰᠡᠳᠭᠦᠯ ᠤᠨ ᠢᠶᠠᠨ ᠪᠤᠷᠤᠭᠵᠢᠭᠤᠨ ᠴᠢᠨᠠᠷ ᠢ ᠪᠠᠲᠤᠯᠠᠵᠦ᠂ ᠵᠤᠬᠢᠶᠠᠯ ᠤᠨ ᠰᠡᠳᠦᠪᠯᠡᠬᠦᠨ᠂ ᠠᠭᠤᠯᠭᠠ ᠶᠢᠨ ᠲᠠᠯᠠ ᠪᠠᠷ ᠦᠷᠭᠡᠨ ᠳᠡᠯᠭᠡᠷ ᠪᠠᠶᠢᠯᠭᠠᠬᠤ ᠪᠠ ᠬᠡᠯᠪᠡᠷᠢ ᠬᠡᠪ ᠨᠠᠮᠪᠠ᠂ ᠰᠲ᠋ᠢᠯᠢ ᠶᠢ ᠤᠯᠠᠨ ᠶᠠᠩᠵᠤ ᠶᠢᠨ ᠪᠤᠯᠭᠠᠬᠤ ᠶᠢ ᠪᠠᠷᠢᠮᠲᠠᠯᠠᠨ᠂ ᠰᠢᠨᠡ ᠬᠦᠴᠦᠨ ᠢ ᠪᠤᠶᠢᠢᠵᠢᠭᠤᠯᠤᠨ ᠬᠦᠮᠦᠵᠢᠭᠦᠯᠬᠦ ᠪᠡ ᠨᠡᠶᠢᠭᠡᠮ ᠵᠢᠷᠦᠮᠲᠤ ᠤᠶᠤᠨ ᠤ ᠪᠤᠯᠪᠠᠰᠤᠨ ᠤ ᠪᠦᠲᠦᠭᠡᠨ ᠪᠠᠶᠢᠭᠤᠯᠤᠯᠲᠠ ᠳᠤ ᠨᠡᠮᠡᠷᠢ ᠬᠠᠨᠳᠢᠪ ᠤᠷᠤᠭᠤᠯᠤᠨ᠂ ᠮᠤᠩᠭᠤᠯ ᠤᠳᠬᠠ ᠵᠤᠬᠢᠶᠠᠯ᠂ ᠤᠷᠠᠯᠢᠭ ᠤᠨ ᠤᠶᠢᠯᠡᠰ ᠢ ᠬᠦᠭᠵᠢᠭᠦᠯᠦᠨ ᠴᠡᠴᠡᠭᠯᠡᠬᠦᠯᠬᠦ ᠶᠢᠨ ᠲᠦᠯᠦᠬᠡ ᠴᠢᠷᠮᠠᠶᠢᠢᠬᠰᠠᠭᠠᠷ ᠢᠷᠠᠵᠠᠢ᠃
ᠰᠤᠷᠪᠤᠯᠵᠢᠯᠠᠭᠴᠢ᠄ ︽ᠰᠢᠷᠠ ᠮᠦᠷᠡᠨ︾ ᠢ ᠤᠩᠰᠢᠬᠤ ᠳᠤ ᠨᠠᠳᠠ ᠳᠤ ᠶᠠᠷᠤ ᠠᠮᠢᠳᠤᠯᠢᠭ᠂ ᠴᠤᠪᠤᠭᠤᠯᠢᠭ᠂ ᠰᠤᠨᠢᠷᠬᠠᠯᠲᠠᠢ ᠰᠠᠨᠠᠭᠳᠠᠭᠠᠳ ᠪᠠᠶᠢᠳᠠᠭ ᠶᠤᠮ ᠡ︖
ᠤ · ᠴᠤᠯᠮᠤᠨ᠄ ᠴᠠᠭ ᠡᠷᠢᠨ ᠤ ᠲᠠᠰᠤᠷᠠᠯᠲᠠ ᠦᠭᠡᠢ ᠬᠦᠭᠵᠢᠬᠦ ᠶᠢ ᠳᠠᠭᠠᠯᠲᠤᠨ ᠤᠩᠰᠢᠭᠴᠢᠳ ᠤᠨ ᠲᠠᠭᠠᠰᠢᠶᠠᠯ ᠴᠦ ᠤᠯᠠᠨ ᠡᠰᠢᠲᠤ ᠰᠤᠨᠢᠷᠬᠠᠯ ᠬᠦᠷᠲᠡᠮᠵᠢ ᠬᠦᠰᠡᠮᠵᠢᠯᠡᠳᠡᠭ ᠪᠤᠯᠵᠠᠢ᠃ ᠤᠩᠰᠢᠭᠴᠢᠳ ᠤᠨ ᠢᠶᠠᠨ ᠳᠤᠷᠠ ᠰᠤᠨᠢᠷᠬᠠᠯ ᠢ ᠬᠠᠩᠭᠠᠬᠤ ᠭᠡᠵᠤ ᠪᠢᠳᠡ ᠤᠯᠠᠨ ᠲᠤᠭᠲᠠᠮᠠᠯ ᠪᠤᠰᠤ ᠪᠤᠯᠤᠩ ᠡᠷᠬᠢᠯᠡᠳᠡᠭ᠃ ᠮᠤᠩᠭᠤᠯ ᠰᠣᠶᠤᠯ ᠳᠤ ᠵᠤᠷᠢᠭᠤᠯᠤᠭᠰᠠᠨ ᠰᠡᠭᠦᠯ ᠤᠨ ᠦᠶᠡ ᠶᠢᠨ ᠮᠡᠳᠡᠭᠡ ᠶᠢ ︽ᠰᠡᠳᠭᠦᠯ ᠲᠤᠳᠤᠷᠠᠬᠢ ᠰᠤᠨᠢᠨ︾ ᠪᠤᠯᠤᠩ ᠢᠶᠠᠷ ᠳᠡᠯᠬᠡᠵᠦ᠂ ᠡᠬᠡᠯᠴᠣᠳ ᠤᠨ ᠠᠮᠢᠳᠦᠷᠠᠯ ᠬᠠᠶᠢᠷᠠ ᠳᠤᠷᠠᠰᠤᠭᠳᠠᠳᠠᠭ ︽ᠬᠠᠭᠤᠴᠢᠨ ᠵᠢᠷᠤᠭ ᠤᠨ ᠦᠯᠢᠭᠡᠷ︾᠂ ᠬᠡᠴᠢᠨᠡᠨ ᠵᠢᠯ ᠳᠠᠷᠤᠭᠳᠠᠭᠰᠠᠨ ᠰᠡᠳᠬᠢᠯ ᠤᠨ ᠨᠢᠭᠤᠴᠠ ᠪᠠᠨ ᠳᠡᠶᠢᠢᠯᠬᠤ ︽ᠴᠠᠭᠠᠪᠤᠷᠯᠠᠯ︾᠂ ᠨᠡᠶᠢᠭᠡᠮ ᠤᠨ ᠲᠡᠭᠰᠢ ᠪᠤᠰᠤ ᠶᠢ ᠬᠢᠷᠠᠬᠠᠢ ᠬᠠᠷᠠᠴᠠ ᠪᠠᠷ ᠰᠢᠷᠪᠢᠳᠡᠭ ︽ᠤᠯᠠᠨ ᠤ ᠨᠢᠳᠦ︾᠂ ᠵᠤᠤ ᠤᠳᠠ ᠠᠷᠠᠳ ᠤᠨ ᠳᠠᠭᠤᠤ ᠳᠤ ᠬᠤᠯᠪᠤᠭᠳᠠᠭᠰᠠᠨ ᠪᠤᠳᠠᠳᠤ ᠬᠦᠮᠦᠨ ᠣᠴᠢᠷ ᠢ ᠲᠠᠶᠢᠯᠪᠤᠷᠢᠯᠠᠭᠰᠠᠨ ︽ᠦᠯᠢᠭᠡᠷ ᠳᠤᠮᠤᠭ ᠲᠠᠢ ᠵᠤᠤ ᠤᠳᠠ ᠠᠷᠠᠳ ᠤᠨ ᠳᠠᠭᠤᠤ︾᠂ ᠵᠤᠤ ᠤᠳᠠ ᠶᠢᠨ ᠠᠯᠳᠡᠷᠳᠦ ᠪᠦᠬᠡ ᠶᠢᠨ ᠳᠤᠮᠤᠭ ᠪᠦᠬᠦᠢ ︽ᠠᠯᠲᠠᠨ ᠲᠤᠪᠤᠷᠤᠤ︾᠂ ᠨᠤᠲᠤᠭ ᠤᠰᠤ ᠬᠦᠮᠦᠨ ᠠᠷᠠᠳ ᠤᠨ ᠢᠶᠠᠨ ᠬᠡᠢ ᠮᠤᠷᠢ ᠵᠤᠯᠪᠤᠭᠠ ᠶᠢ ᠬᠤᠷᠦ᠋ᠢᠯᠠᠭᠰᠠᠨ ︽ᠵᠤᠤ ᠤᠳᠠ ᠶᠢᠨ ᠠᠯᠲᠠᠨ ᠤᠪᠤᠭᠠᠳ︾᠂ ᠤᠶᠠᠩᠭᠠ ᠳᠠᠭᠤᠤ ᠪᠠᠷ ᠬᠦᠳᠡᠭᠡ ᠲᠠᠯᠠ ᠪᠠᠨ ᠪᠠᠶᠠᠰᠬᠠᠭᠰᠠᠨ ︽ᠤᠯᠠᠭᠠᠨᠮᠥ᠋ᠴᠢᠷᠴᠢᠨ︾ ᠵᠡᠷᠭᠡ ᠪᠤᠯᠤᠩ ᠤᠳ ᠢ ᠬᠤᠭᠤᠴᠠᠭᠠ ᠳᠠᠷᠠᠭᠠᠯᠠᠨ ᠡᠭᠡᠯᠵᠢᠯᠡᠨ ᠡᠷᠬᠢᠯᠡᠵᠤ ᠢᠷᠡᠯᠠ᠃
ᠰᠤᠷᠪᠤᠯᠵᠢᠯᠠᠭᠴᠢ᠄ ᠤᠷᠴᠢᠮ ᠤᠨ ᠬᠡᠳᠦᠨ ᠵᠢᠯ ᠠᠴᠠ ᠵᠢᠬᠢᠷᠢᠭ ᠨᠢᠭᠤᠷ ᠲᠠᠭᠠᠨ ᠮᠤᠩᠭᠤᠯ ᠦᠨᠳᠦᠰᠦᠲᠡᠨ ᠤ ᠠᠬᠠᠮᠠᠳ᠂ ᠢᠳᠡᠷ᠂ ᠵᠠᠯᠠᠭᠤ ᠭᠤᠷᠪᠠᠨ ᠦᠶᠡ ᠶᠢᠨ ᠰᠢᠯᠦᠭᠴᠢ ᠵᠤᠬᠢᠶᠠᠯᠴᠢ ᠶᠢ ᠲᠠᠨᠢᠯᠴᠠᠭᠤᠯᠵᠤ ︽ᠰᠢᠯᠦᠭᠴᠢ ᠵᠤᠬᠢᠶᠠᠯᠴᠢ ᠶᠢᠨ ᠨᠠᠷᠭᠢᠶᠠ︾ ᠭᠡᠮᠡᠬᠦ ᠲᠤᠰᠬᠠᠢ ᠰᠤᠷᠪᠤᠯᠵᠢᠯᠠᠭᠠ ᠨᠡᠶᠢᠳᠡᠯᠡᠳᠡᠭ ᠨᠢ ᠲᠠᠨ ᠤ ᠰᠡᠳᠭᠦᠯ ᠤᠨ ᠨᠢᠭᠡᠨ ᠦᠪᠡᠷᠮᠢᠴᠡ ᠤᠨᠴᠠᠯᠢᠭ ᠭᠡᠮᠡᠷ ᠰᠠᠨᠠᠭᠳᠠᠯᠠ᠂ ᠡᠨᠡ ᠲᠤᠬᠠᠢ ᠪᠠᠨ ᠶᠠᠷᠢᠨᠠ ᠤᠤ︖
ᠤ · ᠴᠤᠯᠮᠤᠨ᠄ ᠪᠢᠳᠡ ᠬᠡᠳᠤᠨ ᠵᠢᠯ ᠤᠨ ᠡᠮᠤᠨᠡ ᠠᠴᠠ ᠡᠬᠢᠯᠡᠵᠤ᠂ ᠦᠨᠳᠦᠰᠦᠲᠡᠨ ᠤ ᠪᠠᠨ ᠨᠡᠷᠡᠲᠦ ᠰᠢᠯᠦᠭᠴᠢ ᠵᠤᠬᠢᠶᠠᠯᠴᠢ ᠪᠠᠨ ᠭᠡᠭᠡᠨ ᠳᠦᠷᠬᠦ ᠶᠢ ᠨᠢ ᠬᠠᠷᠠᠬᠤ ᠠᠴᠠ ᠭᠡᠷᠡᠯ ᠵᠢᠷᠤᠭ ᠲᠠᠢ᠂ ᠲᠤᠷᠭᠠᠨ ᠮᠡᠳᠡᠷᠡᠮᠵᠢ ᠪᠠᠷ ᠠᠮᠲᠠᠷᠬᠠᠬᠤ ᠰᠤᠳᠤᠨ ᠪᠦᠲᠦᠭᠡᠯ ᠲᠠᠢ ᠨᠢ᠂ ᠠᠮᠢᠳᠤᠷᠠᠯ ᠤᠨ ᠲᠤᠬᠠᠢ᠂ ᠵᠤᠬᠢᠶᠠᠨ ᠪᠦᠲᠦᠭᠡᠯᠭᠡ ᠶᠢᠨ ᠬᠢᠨᠢ ᠲᠤᠬᠠᠢ᠂ ᠪᠤᠳᠤᠯ ᠰᠠᠨᠠᠭᠠ ᠲᠤᠲᠤᠭᠠᠲᠤ ᠰᠡᠳᠭᠢᠯᠭᠡ ᠶᠢ ᠨᠢ ᠤᠶᠢᠯᠠᠭᠠᠬᠤ ᠠᠴᠠ ᠲᠡᠳᠡᠨ ᠲᠠᠢ ᠬᠢᠭᠰᠡᠨ ᠨᠠᠷᠭᠢᠶᠠ ᠵᠤᠭᠤᠭ ᠲᠠᠢ ᠨᠢ᠂ ᠰᠡᠳᠭᠦᠯ ᠳᠡᠭᠡᠷᠡ ᠪᠠᠨ ᠭᠤᠷᠮᠤᠰᠤᠨ ᠴᠤᠭᠴᠠ ᠪᠤᠯᠭᠠᠵᠤ ᠲᠠᠨᠢᠯᠴᠠᠭᠤᠯᠵᠤ ᠡᠬᠢᠯᠡᠭᠰᠡᠨ ᠶᠤᠮ᠃ ᠨᠠ᠊ · ᠰᠠᠶᠢᠰᠢᠶᠠᠯᠲᠤ᠂ ᠰᠢ᠊ · ᠮᠦᠷᠡᠨ᠂ ᠠᠷᠲᠠᠢ᠂ ᠲ᠊ · ᠭᠤᠮᠪᠤᠵᠠᠪ᠂ ᠭᠠ᠊ · ᠰᠢᠷᠠᠪᠵᠠᠮᠰᠤ᠂ ᠤ · ᠪᠤᠶ᠋ᠬᠠᠦ᠋ᠯᠵᠡᠢ᠂ ᠲ᠊ · ᠰᠡᠴᠡᠨ᠂ ᠳᠤᠷᠤᠨᠠᠲ᠋ᠡᠭᠷᠢ᠂ ᠳᠣᠯᠠᠭᠠᠨ᠂ ᠬᠠᠶᠢᠷᠬᠠᠨ ᠵᠡᠷᠭᠡ ᠨᠠᠷᠠ ᠠᠯᠳᠠᠷ ᠲᠠᠢ ᠰᠢᠯᠢᠳᠡᠭ ᠤᠷᠡᠨ ᠪᠦᠳᠦᠬᠡᠯᠴᠢ ᠶᠢ ᠰᠢᠰᠲ᠋ᠧᠮ ᠲᠠᠢ ᠲᠠᠨᠢᠯᠴᠠᠭᠤᠯᠵᠤ ᠢᠷᠡᠪᠠ᠃ ᠡᠨᠡ ᠬᠦ ᠬᠡᠯᠪᠡᠷᠢ ᠨᠢ ᠵᠤᠬᠢᠶᠠᠯᠴᠢ ᠰᠢᠯᠦᠭᠴᠢ ᠪᠤᠯᠤᠨ ᠤᠩᠰᠢᠭᠴᠢᠳ ᠤᠨ ᠬᠤᠭᠤᠷᠤᠨᠳᠤᠬᠢ ᠤᠷᠤᠨ ᠵᠠᠢ ᠶᠢ ᠨᠡᠩ ᠤᠶᠢᠷᠠ ᠪᠤᠯᠭᠠᠯᠠ ᠭᠡᠵᠤ ᠪᠢ ᠦᠵᠡᠳᠡᠭ᠃
ᠰᠤᠷᠪᠤᠯᠵᠢᠯᠠᠭᠴᠢ᠄ ᠪᠢ ᠵᠤᠬᠢᠶᠠᠭᠴᠢ ᠤᠩᠰᠢᠭᠴᠢ ᠬᠤᠶᠠᠷ ᠢ ᠰᠡᠳᠭᠦᠯ ᠤᠨ ᠬᠤᠶᠠᠷ ᠳᠠᠯᠠᠪᠴᠢ ᠭᠡᠵᠤ ᠦᠵᠡᠳᠡᠭ᠂ ᠲᠠ ᠶᠡᠷᠦᠩᠬᠡᠢ ᠨᠠᠶᠢᠷᠠᠭᠤᠯᠤᠭᠴᠢ ᠪᠤᠯᠤᠬᠰᠠᠨ ᠬᠦᠮᠦᠨ ᠡᠨᠡ ᠬᠦ ᠬᠠᠷᠢᠴᠠᠭᠠ ᠶᠢ ᠬᠡᠷᠬᠢᠨ ᠵᠤᠬᠢᠴᠠᠭᠤᠯᠳᠠᠭ ᠪᠤᠢ︖
ᠤ · ᠴᠤᠯᠮᠤᠨ᠄ ᠵᠤᠬᠢᠶᠠᠭᠴᠢ ᠤᠩᠰᠢᠭᠴᠢ ᠬᠤᠶᠠᠷ ᠵᠢᠭᠠᠰᠤ ᠤᠰᠤᠨ ᠤ ᠬᠠᠷᠢᠴᠠᠭᠠ ᠲᠠᠢ᠃ ᠵᠤᠬᠢᠶᠠᠭᠴᠢ᠂ ᠣᠩᠰᠢᠭᠴᠢ᠂ ᠨᠠᠶᠢᠷᠠᠭᠤᠯᠤᠭᠴᠢ ᠭᠤᠷᠪᠠ ᠤᠴᠤᠭ ᠤᠨ ᠭᠤᠷᠪᠠᠨ ᠴᠢᠯᠠᠭᠤ᠂ ᠰᠡᠳᠭᠦᠯ ᠤᠨ ᠲᠤᠯᠭᠠ ᠶᠢ ᠲᠤᠯᠳᠠᠭ᠃ ᠨᠢᠭᠡ ᠤᠷᠠᠨ ᠪᠦᠲᠦᠭᠡᠯ ᠨᠡᠶᠢᠭᠡᠮ ᠤᠨ ᠪᠦᠲᠦᠭᠡᠭᠳᠡᠭᠦᠨ ᠪᠤᠯᠬᠤ ᠳᠠᠭᠠᠨ ᠡᠨᠡ ᠭᠤᠷᠪᠠᠨ ᠡᠯᠧᠮᠧᠨ᠋ᠲ ᠤᠨ ᠠᠯᠢ ᠨᠢᠭᠡᠨ ᠠᠴᠠ ᠴᠦ ᠰᠠᠯᠵᠤ ᠪᠤᠯᠬᠤ ᠦᠭᠡᠢ᠃ ᠵᠤᠬᠢᠶᠠᠭᠴᠢ ᠤᠩᠰᠢᠭᠴᠢ ᠨᠡᠶᠢᠯᠡᠮᠡᠨᠵᠢᠨ ᠰᠠᠶ᠋ᠢ ᠨᠢᠭᠡ ᠪᠦᠲᠦᠭᠡᠯ ᠢ ᠪᠦᠷᠢᠨ ᠪᠦᠲᠦᠨ ᠪᠤᠯᠭᠠᠳᠠᠭ᠂ ᠡᠨᠡ ᠬᠤᠶᠠᠷ ᠤᠨ ᠬᠤᠭᠤᠷᠤᠨᠳᠤ ᠵᠠᠭᠤᠴᠢ ᠪᠤᠶᠤ ᠬᠦᠭᠦᠷᠭᠡ ᠶᠢᠨ ᠦᠢᠯᠡᠳᠣᠯ ᠦᠵᠡᠭᠦᠯᠵᠤ ᠪᠠᠶᠢᠭᠠ ᠨᠢ ᠰᠡᠳᠭᠦᠯᠴᠢ ᠪᠤᠯᠤᠨᠠ᠃ ᠰᠢᠯᠢᠳᠡᠭ ᠪᠦᠳᠦᠭᠡᠯ ᠭᠠᠷᠭᠠᠬᠤ ᠪᠤᠯ ᠵᠤᠬᠢᠶᠠᠭᠴᠢ ᠶᠢᠨ ᠡᠭᠦᠷᠭᠡ᠂ ᠰᠤᠩᠭᠤᠯᠲᠠ ᠬᠢᠬᠦ ᠪᠤᠯ ᠤᠩᠰᠢᠭᠴᠢᠳ ᠤᠨ ᠡᠷᠬᠡ ᠴᠢᠯᠦᠬᠡ᠂ ᠬᠠᠷᠢᠨ ᠬᠡᠨ ᠳᠤ ᠵᠤᠷᠢᠭᠤᠯᠵᠤ ᠶᠠᠮᠠᠷ ᠪᠦᠲᠦᠭᠡᠯ ᠨᠡᠶᠢᠳᠡᠯᠡᠨᠡ ᠭᠡᠳᠡᠭ ᠪᠤᠯ ᠰᠡᠳᠭᠦᠯᠴᠤᠳ ᠤᠨ ᠬᠠᠷᠢᠭᠤᠴᠠᠯᠭᠠ ᠪᠠᠶᠢᠵᠤ ᠲᠠᠭᠠᠷᠠᠨᠠ᠃
ᠰᠤᠷᠪᠤᠯᠵᠢᠯᠠᠭᠴᠢ᠄ ᠳᠦᠴᠢᠨ ᠵᠢᠯ ᠬᠡᠳᠡᠭ ᠨᠢᠬᠡ ᠳᠠᠯᠠ ᠪᠠᠷ ᠢᠶᠠᠨ ᠴᠠᠭ ᠬᠤᠭᠤᠴᠠᠭᠠ᠂ ᠨᠦᠬᠦᠬᠡ ᠳᠠᠯᠠ ᠪᠠᠷ ᠢᠶᠠᠨ ᠠᠮᠢᠳᠦ ᠳᠡᠦᠬᠡ᠃ ︽ᠰᠢᠷᠠ ᠮᠦᠷᠡᠨ︾ ᠰᠡᠳᠭᠦᠯ ᠬᠡᠪᠯᠡᠯ ᠡᠬᠢᠯᠡᠭᠡᠳ ᠳᠦᠴᠢ ᠰᠢᠬᠠᠮ ᠵᠢᠯ ᠤᠨ ᠨᠢᠭᠤᠷ ᠢ ᠦᠵᠡᠯᠡ᠂ ᠡᠨᠡ ᠴᠢᠯᠦᠭᠡᠨ ᠳᠤ ᠬᠦᠷᠲᠡᠵᠤ ᠶᠠᠪᠤᠭᠰᠠᠨ ᠢᠷᠠᠭᠤ ᠠᠯᠳᠠᠷ ᠢᠶᠠᠨ ᠡᠷᠭᠢᠴᠡᠭᠦᠯᠵᠤ ᠦᠵᠡᠪᠡᠯ︖
ᠣ · ᠴᠤᠯᠮᠤᠨ᠄ ︽ᠰᠢᠷᠠ ᠮᠦᠷᠡᠨ︾ ᠰᠡᠳᠭᠦᠯ ᠨᠢ ᠬᠡᠳᠦᠨ ᠦᠶᠡ ᠶᠢᠨ ᠨᠠᠶᠢᠷᠠᠭᠤᠯᠤᠭᠴᠢᠳ ᠤᠨ ᠬᠦᠯᠦᠰᠤ ᠬᠦᠳᠡᠯᠮᠤᠷᠢ ᠪᠠᠷ ᠰᠢᠮᠠ ᠰᠢᠬᠦᠰᠦᠯᠡᠵᠦ᠂ ᠣᠳᠠᠯ ᠦᠭᠡᠢ ᠳᠦᠷᠦᠭᠡᠨ ᠳᠡᠭᠡᠷᠡ ᠦᠨᠳᠡᠶᠢᠭᠰᠡᠨ ᠳᠦᠴᠢᠨ ᠵᠢᠯ ᠢᠶᠠᠨ ᠤᠭᠲᠤᠬᠤ ᠪᠤᠯᠤᠨᠠ᠃ ᠰᠡᠳᠭᠦᠯ ᠨᠢ ᠤᠯᠠᠭᠠᠨᠬᠠᠳᠠ ᠳᠤ ᠪᠠᠶᠢᠷᠢᠯᠠᠵᠤ᠂ ᠨᠠᠶᠢᠮᠠᠨ ᠮᠤᠵᠢ ᠤᠷᠤᠨ ᠤ ᠵᠤᠬᠢᠶᠠᠭᠴᠢ ᠤᠩᠰᠢᠭᠴᠢ ᠳᠤ ᠬᠠᠨᠳᠤᠭᠰᠠᠨ ᠤᠷᠠᠨ ᠵᠤᠬᠢᠶᠠᠯ ᠤᠨ ᠲᠤᠷᠭᠠᠨ ᠪᠠᠭᠤᠴᠠ ᠶᠤᠮ᠃ ᠳᠦᠴᠢᠨ ᠵᠢᠯ ᠤᠨ ᠲᠤᠷᠰᠢ ᠡᠬᠡ ᠪᠢᠴᠢᠭ ᠨᠡᠶᠢᠳᠡᠯᠡᠬᠦ ᠳᠡᠭᠡᠨ ᠨᠤᠲᠤᠭ ᠤᠰᠤ ᠢᠯᠭᠠᠳᠠᠭ ᠦᠭᠡᠢ ᠵᠠᠷᠴᠢᠮ ᠢ ᠪᠠᠷᠢᠮᠲᠠᠯᠠᠭᠰᠠᠭᠠᠷ ᠢᠷᠡᠪᠡ᠃ ︽ᠰᠢᠷᠠ ᠮᠦᠷᠡᠨ︾ ᠰᠡᠳᠭᠦᠯ ᠳᠡᠭᠡᠷᠡ ᠠᠩᠬᠠᠨ ᠤ ᠵᠤᠬᠢᠶᠠᠯ ᠢᠶᠠᠨ ᠨᠡᠶᠢᠳᠡᠯᠡᠭᠦᠯᠵᠤ ᠤᠷᠠᠨ ᠵᠤᠬᠢᠶᠠᠯ ᠤᠨ ᠵᠠᠮ ᠡᠯᠭᠦᠭᠰᠡᠨ ᠵᠤᠬᠢᠶᠠᠭᠴᠢ ᠵᠠᠷᠢᠮ ᠨᠢ ᠤᠳᠤ ᠤᠯᠤᠰ ᠤᠷᠤᠨ ᠳᠠᠶᠠᠭᠠᠷ ᠠᠯᠳᠠᠷ ᠴᠣᠣᠲᠠᠢ ᠰᠢᠯᠦᠭᠴᠢ ᠵᠤᠬᠢᠶᠠᠯᠴᠢ ᠪᠤᠯᠤᠭᠠᠳ ᠭᠢᠯᠠᠷᠠᠵᠤ ᠪᠤᠢ᠂ ᠳᠦᠴᠢ ᠰᠢᠬᠠᠮ ᠵᠢᠯ ᠳᠤ ︽ᠰᠢᠷᠠ ᠮᠦᠷᠡᠨ︾ ᠰᠡᠳᠭᠦᠯ ᠳᠤ ᠨᠡᠶᠢᠳᠡᠯᠡᠭᠳᠡᠭᠰᠡᠨ ᠵᠤᠬᠢᠶᠠᠯ ᠪᠦᠲᠦᠭᠡᠯ ᠤᠨ ᠳᠤᠮᠳᠠ ᠠᠴᠠ ᠵᠠᠷᠢᠮ ᠪᠦᠲᠦᠭᠡᠯ ᠨᠢ ᠳᠤᠮᠳᠠᠳᠣ ᠪᠠᠭᠠ ᠰᠤᠷᠭᠠᠭᠤᠯᠢ ᠶᠢᠨ ᠮᠤᠩᠭᠤᠯ ᠬᠡᠯᠡ ᠪᠢᠴᠢᠭ ᠲᠤ ᠰᠤᠩᠭᠤᠭᠳᠠᠵᠤ᠂ ᠵᠠᠷᠢᠮ ᠨᠢ ︽ᠰᠤᠯᠤᠩᠭᠠ︾ ᠱᠠᠩᠨᠠᠯ ᠪᠤᠯᠤᠨ ᠪᠤᠰᠤᠳ ᠰᠢᠯᠭᠠᠷᠠᠭᠤᠯᠳᠠ ᠳᠤ ᠱᠠᠩᠨᠠᠯ ᠬᠦᠷᠲᠡᠵᠤ ᠦᠩᠭᠡᠷᠡᠪᠠ᠃ ︽ᠰᠢᠷᠠ ᠮᠦᠷᠡᠨ︾ ᠰᠡᠳᠭᠦᠯ ᠨᠢ ᠬᠤᠶᠠᠷ ᠤᠳᠠᠭᠠ ᠦᠪᠦᠷ ᠮᠤᠩᠭᠤᠯ ᠤᠨ ᠦᠪᠡᠷᠳᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠤ ᠮᠤᠩᠭᠤᠯ ᠬᠡᠯᠡ ᠪᠢᠴᠢᠭ ᠰᠣᠷᠴᠤ ᠬᠡᠷᠡᠭᠯᠡᠭᠰᠡᠨ ᠲᠡᠷᠢᠬᠦᠨ ᠤ ᠨᠢᠭᠡᠴᠢ ᠪᠠᠷ ᠬᠦᠬᠢᠭᠦᠯᠦᠭᠳᠡᠪᠡ᠃ ᠲᠤᠰ ᠰᠡᠳᠭᠦᠯ ᠤᠨ ᠨᠠᠶᠢᠷᠠᠭᠤᠯᠤᠭᠴᠢ ᠴᠦ ᠦᠪᠦᠷ ᠮᠤᠩᠭᠤᠯ ᠤᠨ ᠦᠪᠡᠷᠳᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠤ ︽ᠮᠤᠷᠠᠯ ᠡᠷᠳᠡᠮ ᠬᠤᠤᠰᠯᠠᠭᠰᠠᠨ ᠤᠳᠬᠠ ᠤᠷᠠᠯᠢᠭ ᠤᠨ ᠠᠵᠢᠯᠲᠠᠨ︾ ᠤ ᠢᠷᠠᠭᠤ ᠠᠯᠳᠠᠷ ᠢ ᠬᠦᠷᠲᠡᠵᠤ ᠦᠩᠭᠡᠷᠡᠭᠰᠡᠨ ᠶᠤᠮ᠃
ᠰᠤᠷᠪᠤᠯᠵᠢᠯᠠᠭᠴᠢ᠄ ︽ᠰᠢᠷᠠ ᠮᠦᠷᠡᠨ︾ ᠮᠦᠨ ᠬᠦ ︽ᠰᠢᠵᠢᠷᠳᠦᠨ ᠳᠤᠯᠬᠢᠶᠠᠯᠠᠵᠦ︾᠂ ᠤᠳᠬᠠ ᠤᠶᠠᠩᠭᠠ ᠶᠢᠨ ᠭᠠᠶᠢᠢᠬᠠᠮᠰᠢᠭ ᠢ ᠦᠬᠦᠯᠡᠨ ︽ᠤᠷᠤᠰᠤᠭᠰᠠᠭᠠᠷ︾ ᠪᠠᠶᠢᠢᠬᠤ ᠪᠤᠯᠤᠨᠠ᠃ ᠰᠡᠳᠭᠦᠯ ᠤᠨ ᠢᠶᠠᠨ ᠬᠦᠭᠵᠢᠯ ᠤᠨ ᠲᠤᠬᠠᠢ ᠶᠠᠷᠢᠨᠠ ᠤᠤ︖
ᠤ · ᠴᠤᠯᠮᠤᠨ᠄ ᠤᠷᠠᠨ ᠵᠤᠬᠢᠶᠠᠯ ᠤᠨ ᠤᠳᠤᠬᠢᠴᠢ ᠦᠩᠭᠡ ᠪᠤᠳᠤᠭ ᠢ ᠠᠩᠬᠠᠷᠴᠤ᠂ ᠠᠭᠤᠯᠭᠠ ᠪᠤᠯᠤᠨ ᠬᠡᠯᠪᠡᠷᠢ ᠶᠢᠨ ᠦᠪᠡᠷᠮᠢᠴᠡ ᠬᠡᠪ ᠨᠠᠮᠪᠠ ᠶᠢ ᠴᠤᠭᠴᠠᠯᠠᠨ᠂ ᠤᠷᠠᠨ ᠵᠤᠬᠢᠶᠠᠯ ᠤᠨ ᠴᠢᠨᠠᠷ᠂ ᠰᠤᠨᠢᠷᠬᠠᠯᠲᠤ ᠴᠢᠨᠠᠷ᠂ ᠤᠩᠰᠢᠪᠤᠷᠢᠲᠤ ᠴᠢᠨᠠᠷ ᠢ ᠨᠢᠭᠡ ᠴᠤᠭᠴᠠ ᠪᠤᠯᠭᠠᠵᠤ᠂ ᠦᠵᠡᠯ ᠰᠠᠨᠠᠭᠠ ᠤᠷᠠᠯᠢᠭ ᠬᠤᠶᠠᠷ ᠢ ᠨᠢᠭᠡᠳᠦᠭᠦᠯᠵᠤ᠂ ︽ᠠᠷᠠᠳ ᠲᠦᠮᠡᠨ ᠢᠶᠠᠷ ᠭᠤᠤᠯ ᠪᠤᠯᠭᠠᠬᠤ︾ ᠶᠢ ᠪᠠᠷᠢᠮᠲᠠᠯᠠᠨ᠂ ᠠᠷᠠᠳ ᠲᠦᠮᠡᠨ ᠤ ᠭᠤᠸᠠ ᠲᠠᠭᠠᠰᠢᠶᠠᠯ ᠳᠤ ᠨᠡᠶᠢᠴᠡᠭᠰᠡᠨ᠂ ᠨᠡᠶᠢᠭᠡᠮ ᠴᠠᠭ ᠦᠶᠡ ᠳᠤ ᠨᠡᠶᠢᠴᠡᠭᠰᠡᠨ ᠪᠦᠲᠦᠭᠡᠯ ᠭᠠᠷᠭᠠᠬᠤ ᠲᠤᠬᠠᠢ ᠤᠬᠠᠮᠰᠠᠷ ᠢ ᠲᠠᠰᠣᠷᠠᠯᠲᠠ ᠦᠭᠡᠢ ᠪᠤᠢ ᠪᠤᠯᠭᠠᠵᠤ᠂ ᠵᠤᠬᠢᠶᠠᠯ ᠪᠦᠲᠦᠭᠡᠯ ᠳᠤ ᠤᠬᠠᠮᠰᠠᠷᠲᠤ ᠰᠤᠩᠭᠤᠯᠲᠠ ᠬᠢᠵᠤ ᠤᠩᠰᠢᠭᠴᠢᠳ ᠲᠤ ᠤᠭᠢ ᠰᠢᠯᠢᠳᠡᠭ ᠤᠶᠤᠨ ᠤ ᠬᠦᠨᠡᠰᠦ ᠬᠠᠩᠭᠠᠬᠤ ᠪᠠᠷ ᠦᠷᠭᠦᠯᠵᠢᠯᠡᠨ ᠴᠢᠷᠮᠠᠶᠢᠨᠠ᠃ ᠵᠣᠬᠢᠶᠠᠭᠴᠢ᠄ ᠦᠨᠡᠨᠵᠢᠷᠭᠠᠯ