ᠡᠪᠬᠡᠨ ᠬᠤᠷᠢᠶᠠᠭᠰᠠᠨ ᠲᠠᠮᠠᠭᠢᠨ ᠤ ᠮᠢᠨᠢ ᠤᠲᠤᠭ᠎ᠠ ᠮᠡᠲᠦ ᠴᠠᠭ ᠮᠥᠴᠡ
ᠠᠰᠠᠷ ᠤᠨ ᠴᠣᠩᠬᠣ ᠪᠠᠷ ᠤᠷᠭᠤᠨ ᠬᠣᠶᠢᠯᠠᠷᠠᠭᠠᠳ ᠯᠠ ᠪᠠᠶᠢᠬᠤ ᠰᠢᠭ᠋
ᠵᠦᠳᠡᠭᠦᠬᠡᠨ ᠰᠢᠪᠡᠷᠡᠭᠰᠡᠨ ᠪᠣᠷᠣᠭᠠᠨ ᠤ ᠣᠯᠠᠨ ᠳᠤᠰᠤᠯ ᠤᠳ ᠮᠡᠳᠡᠴᠢᠬᠡᠵᠦ
ᠡᠪᠡᠳᠴᠢᠲᠡᠨ ᠦ ᠥᠷᠥᠭᠡ ᠲᠡᠰᠢ ᠴᠢᠬᠢᠭ ᠦᠨ ᠥᠨᠥᠷ ᠲᠠᠢ ᠲᠡᠮᠡᠦᠯᠡᠨ᠎ᠡ ᠪᠢᠯᠡ

ᠠᠯᠤᠰ ᠲᠤ ᠠᠨᠢᠪᠴᠢᠬᠤ ᠣᠳᠣᠳ ᠣᠯᠢᠶᠠᠷᠬᠠᠭ ᠦᠬᠢᠳ ᠦᠨ ᠵᠢᠰᠦᠯᠡᠵᠦ
ᠬᠣᠨᠣᠭ ᠤᠨ ᠡᠭᠦᠯᠡᠰ ᠲᠠᠢ ᠨᠢᠭᠤᠯᠴᠠᠨ ᠰᠦᠨᠢ ᠶᠢ ᠤᠷᠳᠤᠳᠬᠠᠴᠢᠮᠠᠷᠬᠠᠨ
ᠣᠢ ᠶᠢᠨ ᠴᠢᠯᠦᠭᠡᠨ ᠦ ᠰᠡᠷᠢᠭᠦᠨ ᠲᠠᠩᠬᠢᠮ ᠳᠠᠬᠢ ᠢᠨᠠᠭ ᠤᠨ ᠪᠠᠯᠲᠤ ᠤᠷᠤᠭᠤᠯ ᠮᠡᠲᠦ
ᠬᠣᠩᠭᠣᠷ ᠮᠥᠷᠥᠭᠡᠳᠦᠯ ᠰᠦᠨᠢ ᠳᠤᠮᠳᠠᠷᠯᠠᠭᠤᠯᠵᠤ ᠨᠣᠶᠢᠷ ᠢ ᠥᠷᠭᠦᠭᠡᠴᠢᠬᠡᠮᠡᠷᠬᠡᠨ

ᠬᠠᠷ᠎ᠠ ᠠᠷᠢᠬᠢ᠂ ᠭᠠᠰᠢᠭᠤᠨ ᠤᠲᠤᠭᠠᠨ ᠤ ᠬᠡᠨᠡᠭᠡ ᠬᠡᠰᠡᠭ ᠬᠥᠳᠡᠯᠬᠦ ᠰᠢᠭ
ᠬᠠᠪᠢᠷᠭ᠎ᠠ ᠰᠥᠪᠡᠭᠡ᠂ ᠶᠠᠰᠤ ᠰᠢᠷᠪᠣᠰᠣ ᠰᠢᠵᠢᠭᠢᠨᠡᠨ ᠰᠦᠢᠷᠡᠬᠦ ᠶᠢᠨ ᠮᠡᠲᠦ
ᠠᠲᠠᠭ᠎ᠠ ᠵᠢᠲᠥᠭᠡ ᠂ ᠠᠰᠢᠭ ᠮᠥᠩᠭᠥᠨ ᠦ ᠰᠢᠨᠤᠯ ᠨᠢᠭᠤᠴᠠᠭᠠᠢ ᠳᠦᠷᠡᠯᠵᠡᠵᠦ
ᠥᠴᠥᠭᠡᠳᠦᠷᠬᠡᠨ ᠱᠠᠭᠢᠭᠰᠠᠨ ᠲᠥᠭᠡᠮᠡᠯ ᠬᠤᠷ᠎ᠠ ᠤᠨᠲᠠᠷᠠᠭᠠᠵᠤ ᠲᠡᠶᠢᠯᠬᠦ ᠦᠭᠡᠢ ᠶᠢᠨ ᠮᠡᠲᠦ

ᠬᠤᠤᠯᠢᠨ ᠤ ᠡᠷᠭᠢ ᠶᠢ ᠥᠭᠰᠥᠨ ᠤᠷᠤᠭᠤᠳᠠᠵᠤ ᠲᠡᠮᠦᠷ ᠬᠦᠷᠳᠦ ᠲᠦᠴᠢᠭᠢᠨᠡᠬᠦᠶ᠎ᠡ
ᠬᠠᠶᠠ ᠨᠢᠭᠡ ᠥᠷᠲᠡᠭᠡ ᠲᠠᠰᠢᠶᠠᠷᠠᠭᠰᠠᠨ ᠬᠤᠨ ᠢᠶᠠᠨ ᠮᠡᠲᠦ ᠭᠤᠨᠢᠶᠠᠩᠭᠤᠢ
ᠰᠢᠯᠦᠭ ᠮᠢᠨᠢ ᠰᠦᠭ ᠢᠶᠡᠨ ᠠᠯᠳᠠᠵᠤ ᠲᠠᠴᠢᠶᠠᠯ ᠨᠤᠭᠤᠯᠤᠨ ᠰᠠᠭᠤᠲᠠᠯ᠎ᠠ
ᠰᠠᠷᠠᠨ ᠠᠪᠠᠬᠠᠢ ᠴᠤᠬᠤᠰ ᠴᠣᠬᠣᠰ ᠰᠢᠯᠦᠭᠴᠢ ᠶᠢ ᠪᠡᠨ ᠱᠤᠤᠯᠠᠬᠤ ᠶᠢᠨ ᠮᠡᠲᠦ

ᠬᠠᠪᠤᠷ ᠤᠨ ᠳᠤᠯᠠᠭᠠᠨ ᠠᠮᠢᠰᠬᠤᠭ᠎ᠠ ᠲᠥᠭᠡᠮᠡᠯ ᠬᠤᠷ᠎ᠠ ᠲᠠᠢ ᠪᠠᠨ ᠤᠶᠠᠩᠭᠠᠷᠠᠬᠤ ᠪᠠᠷ
ᠬᠠᠮᠤᠭ ᠪᠣᠳᠠᠰ ᠲᠦᠷᠬᠦᠮᠴᠢᠯᠡᠬᠦ ᠪᠦᠰᠡᠭᠦᠢ ᠶᠢ ᠬᠦᠯᠢᠶᠡᠭᠰᠡᠨ ᠠᠷᠠᠳ ᠤᠨ ᠳᠠᠭᠤᠤ ᠮᠡᠲᠦ
ᠲᠥᠯ ᠦᠨ ᠳᠠᠭᠤᠨ ᠲᠠᠷᠢᠶᠠᠨ ᠵᠠᠢ ᠪᠠᠷ ᠦᠨᠦᠴᠢᠷᠡᠩᠭᠦᠢ ᠠᠶ᠎ᠠ ᠴᠢᠪᠬᠠᠳᠠᠬᠤ ᠨᠢ
ᠲᠠᠯ᠎ᠠ ᠶᠢᠨ ᠵᠡᠭᠦᠳᠦ ᠪᠡᠷ ᠡᠷᠪᠡᠯᠵᠡᠭᠦᠷ ᠵᠡᠷᠭᠡᠯᠭᠡᠨ ᠨᠠᠭᠠᠳᠤᠩᠬᠠᠨ ᠦᠩᠭᠡᠷᠡᠬᠦᠢ ᠮᠡᠲᠦ

ᠣᠷᠣᠰᠢᠯ ᠠᠯᠳᠠᠭᠰᠠᠨ ᠭᠤᠯᠭᠤᠢ ᠴᠡᠴᠡᠭ ᠴᠡᠬᠢᠭ ᠦᠨ ᠴᠢᠮᠡᠭᠡ ᠪᠡᠷ ᠥᠨᠳᠡᠯᠵᠡᠬᠦ ᠨᠢ
ᠣᠲᠣᠷ ᠤᠨ ᠪᠠᠭᠤᠷᠢ ᠪᠠᠷ ᠬᠣᠨᠢᠳ ᠤᠨ ᠮᠠᠶᠢᠯᠠᠭ᠎ᠠ ᠮᠦᠰᠦᠳᠡᠨ ᠴᠠᠷᠴᠠᠬᠤ ᠶᠢᠨ ᠮᠡᠲᠦ
ᠴᠠᠭ ᠲᠤ ᠪᠠᠨ ᠳᠡᠯᠭᠡᠷᠡᠭᠰᠡᠨ ᠭᠦᠢᠯᠡᠰᠦᠨ ᠴᠡᠴᠡᠭ ᠵᠢᠮᠢᠰᠯᠡᠵᠦ ᠡᠬᠢᠯᠡᠬᠦ ᠶᠢ ᠠᠵᠢᠬᠤᠶ᠎ᠠ
ᠴᠠᠯᠢᠩ ᠥᠰᠬᠦ  ᠪᠡᠨ ᠬᠦᠯᠢᠶᠡᠨ ᠶᠠᠳᠠᠭᠰᠠᠨ ᠠᠵᠢᠯᠲᠠᠳ ᠢᠶᠠᠨ ᠰᠢᠭ᠋ ᠴᠥᠬᠥᠷᠡᠩᠭᠦᠢ

ᠲᠠᠴᠢᠭᠢᠨᠠᠭᠰᠠᠭᠠᠷ ᠬᠣᠯᠠᠳᠠᠬᠤ ᠠᠳᠤᠭᠤᠳ ᠤᠨ ᠲᠦᠪᠡᠷᠭᠡᠨ ᠲᠡᠭᠷᠢ ᠶᠢᠨ ᠬᠢᠵᠠᠭᠠᠷ ᠬᠦᠷᠴᠦ
ᠳᠠᠷᠬᠠᠨ ᠪᠠᠶᠢᠭᠠᠯᠠᠢ ᠠᠴᠠ ᠪᠠᠨ ᠲᠠᠰᠤᠷᠠᠨ ᠤᠨᠠᠭᠰᠠᠨ ᠵᠡᠭᠡᠷ᠎ᠡ ᠶᠢᠨ ᠰᠦᠷᠦᠭ ᠮᠡᠲᠦ
ᠨᠤᠲᠤᠭ ᠢᠶᠠᠨ ᠣᠷᠬᠢᠵᠤ᠂ ᠬᠣᠨᠢ ᠪᠠᠨ ᠬᠤᠳᠠᠯᠳᠤᠭᠠᠳ ᠬᠦᠯᠦᠰᠦᠨ ᠠᠵᠢᠯ ᠢᠶᠠᠷ ᠭᠦᠶᠦᠯᠳᠦᠵᠦ
ᠨᠣᠶᠠᠨ ᠰᠠᠷᠢᠳᠠᠭ ᠴᠢᠨ᠋ᠸ᠎ᠠ ᠪᠠᠨ ᠦᠭᠡᠶᠢᠯᠡᠨ ᠡᠪᠬᠡᠷᠡᠩᠬᠡᠨ ᠨᠢᠯᠪᠤᠰᠤᠷᠠᠬᠤᠢ ᠶᠢᠨ ᠮᠡᠲᠦ

ᠠᠭᠤᠯᠠ ᠲᠠᠯ᠎ᠠ ᠶᠢᠨ ᠪᠦᠲᠦᠨ ᠵᠢᠷᠤᠭ ᠢᠶᠠᠨ ᠪᠣᠳᠣᠯ ᠳᠤ ᠪᠠᠨ ᠨᠢᠭᠤᠴᠠᠯᠠᠨ ᠳᠡᠯᠭᠡᠬᠦᠶ᠎ᠡ
ᠭᠡᠨᠡᠳᠲᠡ ᠭᠡᠨᠡᠳᠲᠡ ᠰᠠᠯᠬᠢᠨ ᠪᠣᠷᠣᠭᠠᠨ ᠬᠠᠷᠠᠭ᠎ᠠ ᠶᠢ ᠮᠢᠨᠢ ᠪᠠᠯᠠᠷᠠᠭᠤᠯᠬᠤ ᠶᠢᠨ ᠮᠡᠲᠦ
ᠲᠠᠰᠤᠭ ᠪᠣᠰᠣᠭ ᠳᠤᠷᠠᠳᠬᠠᠯ ᠬᠡᠯᠬᠢᠵᠦ ᠨᠤᠶᠢᠷ ᠢᠶᠠᠨ ᠠᠷᠭᠠᠳᠠᠨ ᠰᠠᠭᠤᠬᠤ ᠳᠤ
ᠮᠡᠷ ᠰᠡᠷ ᠬᠠᠪᠤᠷ ᠤᠨ ᠴᠢᠮᠡᠭᠡ ᠭᠡᠭᠡᠪᠴᠢ ᠶᠢ ᠮᠢᠨᠢ ᠮᠦᠷᠭᠦᠭᠡᠳ ᠴᠢᠨᠠᠭᠰᠢᠯᠠᠬᠤ ᠶᠢᠨ ᠮᠡᠲᠦ