-
77432
ᠬᠠᠮᠲᠤ ᠶᠢᠨ ᠬᠠᠷᠢᠭᠤᠴᠠᠯᠭᠠ
2016-03-10 08:58
278
1
ᠬᠠᠮᠲᠤ ᠶᠢᠨ ᠬᠠᠷᠢᠭᠤᠴᠠᠯᠭᠠ
ᠨᠢᠭᠡ
ᠠᠯᠢᠶᠠ ᠪᠠᠭᠠ ᠶᠢᠨ ᠮᠢᠨᠢ ᠲᠡᠷᠡ ᠴᠠᠭ ᠲᠤ
ᠠᠶᠢᠯ ᠵᠡᠷᠭᠡᠯᠡᠳᠡᠭᠡ ᠠᠬᠢᠮᠠᠭ ᠨᠠᠰᠤᠲᠠᠳ
ᠠᠯᠢ ᠨᠢ ᠪᠤᠯᠪᠠᠴᠤ ᠰᠤᠷᠭᠠᠳᠠᠭ ᠪᠠᠶᠢᠭᠰᠠᠨ
ᠠᠶᠤᠵᠤ ᠪᠢᠳᠡ ᠦᠭᠡ ᠰᠤᠨᠤᠰᠳᠠᠭ ᠪᠠᠶᠢᠭᠰᠠᠨ
ᠬᠡᠷᠡᠮ ᠬᠠᠰᠢᠶᠠ ᠦᠰᠦᠷᠦᠨ ᠬᠠᠷᠠᠶᠢᠵᠤ
ᠬᠡᠷᠡᠭᠦᠯ ᠦᠢᠮᠡᠭᠡᠨ ᠲᠠᠲᠠᠳᠠᠭ ᠨᠢᠭᠡᠨ ᠢ
ᠬᠦᠭᠰᠢᠳ ᠨᠠᠰᠤᠲᠠᠳ ᠬᠡᠨ ᠨᠢ ᠴᠤ ᠭᠡᠰᠡᠨ
ᠬᠡᠯᠡᠵᠦ ᠰᠤᠷᠭᠠᠳᠠᠭ ᠨᠢ ᠦᠨᠡᠨ ᠪᠠᠶᠢᠭᠰᠠᠨ
ᠨᠤᠬᠠᠢ ᠭᠠᠬᠠᠢ ᠦᠢᠮᠡᠭᠦᠯᠦᠨ ᠬᠦᠭᠡᠭᠡᠵᠦ
ᠨᠤᠴᠤᠯᠳᠤᠨ ᠬᠠᠷᠢᠶᠠᠯᠴᠠᠵᠤ ᠠᠭᠠᠰᠢᠯᠠᠳᠠᠭ ᠨᠢᠭᠡᠨ ᠢ
ᠠᠶᠢᠯ ᠠᠶᠢᠮᠠᠭ ᠤᠨ ᠠᠬᠠᠮᠠᠳ ᠦᠵᠡᠪᠡᠯ
ᠠᠶᠤᠯᠭᠠᠵᠤ ᠵᠠᠩᠨᠠᠵᠤ ᠵᠠᠬᠢᠳᠠᠭ ᠪᠠᠶᠢᠭᠰᠠᠨ
ᠡᠷᠡᠭᠡ ᠦᠭᠡᠢ ᠵᠢᠭᠠᠭᠰᠠᠨ ᠦᠭᠡᠰ ᠢ ᠨᠢ
ᠡᠷᠬᠡ ᠦᠭᠡᠢ ᠪᠢᠳᠡ ᠠᠪᠳᠠᠭ ᠪᠠᠶᠢᠭᠰᠠᠨ
ᠡᠵᠢ ᠠᠪᠤ ᠶᠢᠨ ᠰᠤᠷᠭᠠᠯ ᠰᠢᠭ᠋ ᠢᠶᠡᠨ
ᠡᠷᠬᠢᠮᠨᠡᠨ ᠦᠵᠡᠵᠦ ᠲᠤᠭᠲᠠᠭᠠᠳᠠᠭ ᠪᠠᠶᠢᠭᠰᠠᠨ
ᠬᠤᠶᠠᠷ
ᠬᠡᠦᠬᠡᠳ ᠨᠤᠬᠠᠢ ᠪᠠᠨ ᠦᠮᠦᠭᠡᠷᠡᠳᠡᠭ ᠨᠢᠭᠡᠨ ᠢ
ᠬᠡᠨ ᠨᠢ ᠴᠤ ᠭᠡᠰᠡᠨ ᠵᠢᠭ᠌ᠰᠢᠳᠡᠭ ᠪᠠᠶᠢᠭᠰᠠᠨ
ᠬᠦᠮᠦᠨ ᠬᠦᠮᠦᠨ ᠲᠠᠢ ᠲᠠᠭᠠᠷᠠᠬᠤ ᠦᠭᠡᠢ ᠠᠮᠢᠲᠠᠨ ᠭᠡᠵᠦ
ᠬᠡᠴᠡᠭᠦᠦ ᠳᠤᠩᠭᠤᠳᠴᠤ ᠵᠢᠮᠡᠯᠡᠳᠡᠭ ᠪᠠᠶᠢᠭᠰᠠᠨ
ᠠᠮᠠᠨ ᠲᠠᠪᠠ ᠪᠠᠷ ᠢᠶᠠᠨ ᠬᠠᠷᠢᠶᠠᠯᠴᠠᠳᠠᠭ ᠬᠡᠦᠬᠡᠳ ᠢ
ᠠᠬᠠᠮᠠᠳ ᠤᠨ ᠶᠤᠰᠤ ᠪᠠᠷ ᠵᠠᠩᠨᠠᠳᠠᠭ ᠪᠠᠶᠢᠭᠰᠠᠨ
ᠠᠮᠠᠨ ᠳᠤ ᠪᠠᠨ ᠳᠠᠪᠠᠭᠠ ᠦᠭᠡᠢ ᠬᠡᠦᠬᠡᠳ ᠭᠡᠵᠦ
ᠠᠭᠰᠤᠷᠴᠤ ᠪᠤᠷᠤᠭᠤᠳᠬᠠᠵᠤ ᠬᠦᠮᠦᠵᠢᠭᠦᠯᠳᠡᠭ ᠪᠠᠶᠢᠭᠰᠠᠨ
ᠰᠤᠷᠲᠠᠯ ᠦᠭᠡᠢ ᠬᠡᠦᠬᠡᠳ ᠢ ᠦᠵᠡ ᠭᠡᠵᠦ
ᠰᠤᠷ ᠲᠠᠰᠢᠭᠤᠷ ᠴᠤ ᠦᠵᠡᠭᠦᠯᠳᠡᠭ ᠪᠠᠶᠢᠭᠰᠠᠨ
ᠳᠠᠷᠤᠩᠭᠤᠢ ᠦᠭᠡᠢ ᠬᠡᠦᠬᠡᠳ ᠢ ᠵᠦᠭᠡᠷ ᠭᠡᠵᠦ
ᠳᠠᠷᠤᠶᠢᠬᠠᠨ ᠬᠡᠯᠡᠵᠦ ᠰᠡᠷᠡᠮᠵᠢᠯᠡᠭᠦᠯᠳᠡᠭ ᠪᠠᠶᠢᠭᠰᠠᠨ
ᠪᠦᠭᠦᠳᠡ ᠪᠦᠭᠦᠳᠡᠭᠡᠷ ᠬᠠᠰᠢᠵᠤ ᠬᠤᠮᠢᠳᠠᠭ ᠠᠴᠠ
ᠪᠦᠲᠦᠨ ᠤᠬᠠᠭᠠ ᠲᠠᠢ ᠬᠡᠦᠬᠡᠳ ᠪᠤᠯᠳᠠᠭ
ᠰᠠᠭᠠᠬᠠᠯᠲᠠ ᠬᠦᠷᠰᠢ ᠪᠡᠷ ᠢᠶᠡᠨ ᠰᠠᠨᠠᠭᠠ ᠪᠤᠯᠳᠠᠭ ᠠᠴᠠ
ᠰᠠᠬᠢᠯᠭᠠ ᠵᠢᠷᠤᠮ ᠲᠠᠢ ᠬᠦᠮᠦᠨ ᠪᠤᠯᠳᠠᠭ
ᠭᠤᠷᠪᠠ
ᠨᠢᠭᠡ ᠬᠡᠦᠬᠡᠳ ᠢ ᠬᠦᠮᠦᠨ ᠪᠤᠯᠭᠠᠬᠤ ᠳᠤ
ᠨᠡᠶᠢᠭᠡᠮ ᠨᠡᠶᠢᠲᠡ ᠪᠡᠷ ᠢᠶᠡᠨ ᠬᠠᠷᠢᠭᠤᠴᠠᠳᠠᠭ ᠪᠠᠶᠢᠵᠠᠢ
ᠢᠩᠭᠢᠵᠦ ᠬᠦᠮᠦᠵᠢᠭᠦᠯᠦᠭᠰᠡᠨ ᠬᠡᠦᠬᠡᠳ ᠬᠤᠶᠢᠴᠢᠰ
ᠡᠪᠦᠭᠡᠨ ᠪᠤᠭᠤᠷᠤᠯᠴᠤᠳ ᠢᠶᠠᠨ ᠬᠦᠨᠳᠦᠳᠭᠡᠳᠡᠭ ᠪᠠᠶᠢᠵᠠᠢ
ᠬᠠᠮᠤᠭ ᠨᠠᠰᠤᠲᠠᠳ ᠤᠨ ᠰᠤᠷᠭᠠᠯ ᠰᠢᠭᠦᠮᠵᠢᠯᠡᠯ
ᠬᠠᠶᠢᠷᠠ ᠬᠦᠮᠦᠵᠢᠯ ᠦᠨ ᠦᠨᠳᠦᠰᠦ ᠪᠠᠶᠢᠵᠠᠢ
ᠬᠠᠷᠢᠨ ᠤᠳᠤ ᠲᠤᠩᠭᠠᠵᠤ ᠦᠵᠡᠪᠡᠯ
ᠬᠠᠮᠲᠤ ᠤᠯᠠᠨ ᠤ ᠬᠠᠷᠢᠭᠤᠴᠠᠯᠭᠠ ᠪᠠᠶᠢᠵᠠᠢ ᠁
