-
37808
2026-04-23 22:12
4
0
ᠮᠣᠩᠭᠣᠯ ᠭᠡᠷ
ᠮᠠᠨ ᠤ᠋ ᠮᠣᠩᠭᠣᠯᠴᠤᠳ ᠤ᠋ᠨ ᠠᠯᠢ ᠡᠷᠲᠡ ᠡᠴᠡ ᠢᠳᠡᠭᠡᠰᠢᠨ ᠳᠠᠰᠤᠭᠰᠠᠨ ᠣᠷᠣᠨ ᠰᠠᠭᠤᠴᠠ ᠪᠣᠯ《ᠮᠣᠩᠭᠣᠯ ᠭᠡᠷ》ᠪᠣᠯᠬᠤ ᠶᠤᠮ᠃ ᠮᠣᠩᠭᠣᠯ ᠭᠡᠷ ᠪᠣᠯ ᠳᠥᠷᠪᠡᠨ ᠴᠠᠭ ᠤ᠋ᠨ ᠠᠭᠤᠷ ᠠᠮᠢᠰᠬᠤᠯ ᠢ᠋ ᠳᠠᠭᠠᠨ ᠤᠰᠤᠨ ᠤ᠋ ᠲᠤᠩᠭᠠᠯᠠᠭ᠂ ᠤᠷᠭᠤᠮᠠᠯ ᠤ᠋ᠨ ᠰᠣᠷᠭᠣᠭ ᠢ᠋ ᠰᠣᠩᠭᠣᠨ ᠨᠡᠭᠦᠳᠡᠯᠯᠡᠵᠦ ᠠᠵᠤ ᠲᠥᠷᠥᠬᠦ ᠳ᠋ᠦ᠍ ᠲᠣᠬᠢᠷᠠᠭᠰᠠᠨ ᠪᠠᠷᠢᠵᠤ ᠪᠠᠭᠤᠯᠭᠠᠬᠤ᠂ ᠵᠥᠭᠡᠭᠡᠬᠦ ᠳ᠋ᠦ᠍ ᠬᠢᠯᠪᠠᠷ᠂ ᠰᠠᠯᠬᠢᠨ ᠳ᠋ᠤ᠌ ᠲᠣᠭᠲᠠᠪᠤᠷᠢᠲᠠᠢ᠂ᠠᠭᠠᠷ ᠤ᠋ᠨ ᠰᠣᠯᠢᠯᠴᠠᠭᠠ ᠰᠠᠢᠲᠠᠢ᠂ ᠡᠷᠡᠭᠦᠯ ᠠᠬᠤᠢ ᠶ᠋ᠢᠨ ᠱᠠᠭᠠᠷᠳᠠᠯᠭᠠ ᠳ᠋ᠤ᠌ ᠨᠡᠢᠴᠡᠭᠰᠡᠨ ᠮᠠᠰᠢ ᠣᠯᠠᠨ ᠳᠠᠪᠠᠭᠤᠯᠢᠭ ᠲᠠᠯᠠ ᠪᠦᠬᠦᠢ ᠣᠷᠣᠨ ᠰᠠᠭᠤᠴᠠ ᠮᠥᠨ᠃ ᠮᠣᠩᠭᠣᠯ ᠭᠡᠷ ᠦ᠋ᠨ ᠲᠣᠭᠣᠨᠣ ᠪᠠᠷ ᠨᠢ ᠠᠯᠲᠠᠨ ᠨᠠᠷᠠᠨ ᠤ᠋ ᠭᠡᠷᠡᠯ ᠲᠦᠭᠡᠮᠡᠯ ᠲᠣᠰᠴᠤ᠂ᠭᠡᠷ ᠳᠣᠲᠣᠷᠠ ᠭᠡᠷᠡᠯ ᠳᠦᠭᠦᠷᠡᠩ ᠪᠠᠢᠳᠠᠭ ᠪᠥᠭᠡᠳ ᠵᠤᠨ ᠨᠠᠮᠤᠷ ᠤ᠋ᠨ ᠨᠠᠢᠷᠲᠠᠢ ᠤᠯᠠᠷᠢᠯ ᠳ᠋ᠤ᠌ ᠭᠡᠷ ᠦ᠋ᠨ ᠬᠠᠶᠠᠭᠠ ᠪᠠᠷ ᠠᠭᠢ ᠭᠠᠩᠭᠠ ᠶ᠋ᠢᠨ ᠦᠨᠦᠷ ᠰᠡᠩᠭᠢᠨᠡᠭᠰᠡᠨ ᠠᠷᠢᠭᠤᠨ ᠰᠠᠯᠬᠢ ᠰᠡᠩᠭᠢᠨᠡᠵᠦ᠂ᠠᠭᠤᠰᠬᠢ ᠵᠢᠷᠦᠬᠡᠨ ᠳ᠋ᠦ᠍ ᠨᠡᠪᠲᠡᠷᠡᠵᠦ ᠪᠠᠢᠳᠠᠭ᠃ᠮᠣᠩᠭᠣᠯ ᠭᠡᠷ ᠢ᠋ ᠬᠢᠵᠦ ᠦᠢᠯᠡᠳᠬᠦ ᠳ᠋ᠦ᠍ ᠵᠥᠪᠬᠡᠨ ᠮᠣᠳᠣ ᠬᠢᠭᠡᠳ ᠢᠰᠡᠭᠡᠢ᠂ ᠬᠢᠯᠭᠠᠰᠤ ᠵᠡᠷᠭᠡ ᠶ᠋ᠢ ᠯᠡ ᠬᠡᠷᠡᠭᠯᠡᠳᠡᠭ ᠤᠴᠢᠷ ᠰᠢᠪᠠᠷ ᠰᠢᠷᠣᠢ ᠠᠪᠤᠨ ᠭᠠᠵᠠᠷ ᠨᠤᠲᠤᠭ ᠢ᠋ ᠡᠪᠳᠡᠬᠦ ᠶᠠᠪᠤᠳᠠᠯ ᠦᠭᠡᠢ᠂ ᠪᠠᠢᠭᠠᠯᠢ ᠶ᠋ᠢ ᠬᠠᠮᠠᠭᠠᠯᠠᠬᠤ ᠳ᠋ᠤ᠌ ᠮᠠᠰᠢ ᠠᠴᠢ ᠲᠤᠰᠠᠲᠠᠢ ᠪᠠᠢᠳᠠᠭ᠃
ᠮᠣᠩᠭᠣᠯ ᠭᠡᠷ ᠨᠢ ᠭᠡᠷ ᠦ᠋ᠨ ᠮᠣᠳᠣ᠂ ᠪᠦᠷᠢᠶᠡᠰᠦ ᠵᠡᠷᠭᠡ ᠬᠣᠶᠠᠷ ᠦᠨᠳᠦᠰᠦᠨ ᠵᠦᠢᠯ ᠢ᠋ᠶ᠋ᠡᠷ ᠪᠦᠷᠢᠯᠳᠦᠨᠡ᠃ ᠭᠡᠷ ᠦ᠋ᠨ ᠮᠣᠳᠣᠨ ᠳ᠋ᠤ᠌ ᠲᠣᠭᠣᠨᠣ᠂ ᠣᠨᠢ᠂ ᠬᠠᠭᠠᠯᠭᠠ᠂ ᠬᠠᠨᠠ᠂ ᠪᠠᠭᠠᠨᠠ᠂ ᠲᠤᠯᠭᠠᠭᠤᠷᠢ᠂ ᠬᠠᠶᠠᠭᠠᠪᠴᠢ ᠵᠡᠷᠭᠡ ᠪᠠᠢᠳᠠᠭ᠃ ᠢᠰᠡᠭᠡᠢ ᠪᠦᠷᠢᠶᠡᠰᠦ ᠳ᠋ᠦ᠍ ᠡᠷᠦᠬᠡ᠂ ᠬᠥᠯᠲᠥᠷᠭᠡ᠂ ᠴᠡᠷᠪᠠᠭ᠂ ᠳᠡᠭᠡᠪᠦᠷ᠂ ᠲᠤᠭᠤᠷᠭᠠ᠂ ᠡᠭᠦᠳᠡ᠂ ᠲᠣᠲᠣᠭᠣ᠂ ᠬᠠᠶᠠᠭᠠᠪᠴᠢ ᠵᠡᠷᠭᠡ ᠪᠠᠢᠨᠠ᠃ ᠪᠠᠰᠠ ᠮᠠᠯ ᠤ᠋ᠨ ᠬᠢᠯᠭᠠᠰᠤ ᠪᠠᠷ ᠲᠠᠮᠤᠭᠰᠠᠨ ᠳᠡᠭᠡᠰᠦ ᠪᠡᠷ ᠣᠭᠣᠰᠣᠷ ᠪᠦᠴᠡ᠂ ᠬᠣᠰᠢᠯᠠᠩ ᠬᠢᠳᠡᠭ᠃
ᠮᠣᠩᠭᠣᠯ ᠭᠡᠷ ᠶᠡᠬᠡ ᠪᠠᠭᠠ ᠪᠤᠶᠤ ᠪᠠᠭᠲᠠᠭᠠᠮᠵᠢ ᠬᠡᠮᠵᠢᠶᠡᠨ ᠦ᠌ ᠬᠤᠪᠢ ᠳ᠋ᠤ᠌ ᠶᠡᠬᠡ᠂ᠳᠤᠮᠳᠠ᠂ ᠪᠠᠭᠠ ᠠᠳᠠᠯᠢ ᠪᠤᠰᠤ ᠪᠠᠢᠳᠠᠭ ᠪᠠ ᠳᠥᠷᠪᠡᠨ ᠬᠠᠨᠠᠲᠤ᠂ ᠲᠠᠪᠤᠨ ᠬᠠᠨᠠᠲᠤ᠂ ᠵᠢᠷᠭᠤᠭᠠᠨ ᠬᠠᠨᠠᠲᠤ᠂ ᠨᠠᠢ᠍ᠮᠠᠨ ᠬᠠᠨᠠᠲᠤ ᠭᠡᠬᠦ ᠮᠡᠲᠦ ᠪᠡᠷ ᠬᠠᠨᠠ ᠶ᠋ᠢᠨ ᠲᠣᠭᠠ ᠪᠠᠷ ᠨᠢ ᠨᠡᠷᠡᠯᠡᠳᠡᠭ᠃ ᠪᠠᠰᠠ ᠲᠣᠭᠣᠨᠣ ᠶ᠋ᠢᠨ ᠪᠦᠲᠦᠴᠡ ᠪᠡᠷ ᠨᠢ ᠬᠡᠯᠬᠢᠶᠡ ᠲᠣᠭᠣᠨᠣᠲᠤ ᠭᠡᠷ᠂ ᠬᠠᠳᠬᠤᠭᠤᠷ ᠲᠣᠭᠣᠨᠣᠲᠤ ᠭᠡᠷ᠂ ᠮᠠᠨᠳᠤᠯ ᠲᠣᠭᠣᠨᠣᠲᠤ ᠭᠡᠷ ᠭᠡᠵᠦ ᠢᠯᠭᠠᠳᠠᠭ᠃ ᠬᠠᠳᠬᠤᠭᠤᠷ ᠲᠣᠭᠣᠨᠣ ᠲᠠᠢ ᠭᠡᠷ ᠢ᠋ ᠪᠠᠰᠠ ᠬᠠᠳᠬᠤᠭᠤᠷ ᠣᠨᠢ ᠲᠠᠢ ᠭᠡᠷ ᠭᠡᠵᠦ ᠬᠡᠯᠡᠳᠡᠭ ᠴᠦ᠍ ᠪᠣᠢ᠃ ᠡᠭᠦᠨ ᠦ᠌ ᠣᠨᠴᠠᠯᠢᠭ ᠭᠡᠪᠡᠯ ᠲᠣᠭᠣᠨᠣ ᠳ᠋ᠤ᠌ ᠪᠠᠨ ᠣᠨᠢ ᠪᠠᠨ ᠬᠢᠯᠭᠡᠬᠦ ᠪᠢᠰᠢ᠂ ᠬᠠᠷᠢᠨ ᠲᠣᠭᠣᠨᠣ ᠶ᠋ᠢᠨ ᠱᠠᠭᠠ ᠶ᠋ᠢᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠣᠨᠢ ᠪᠠᠨ ᠬᠠᠳᠬᠤᠵᠤ ᠪᠣᠰᠬᠠᠨᠠ᠃ ᠡᠨᠡᠬᠦ ᠭᠡᠷ ᠨᠢ ᠲᠡᠷᠭᠡ ᠬᠡᠷᠡᠭᠯᠡᠳᠡᠭ ᠦᠭᠡᠢ ᠲᠡᠮᠡᠭᠡᠨ ᠳ᠋ᠦ᠍ ᠠᠴᠢᠵᠤ ᠨᠡᠭᠦᠳᠡᠯᠯᠡᠳᠡᠭ ᠭᠠᠵᠠᠷ ᠣᠷᠣᠨ ᠳ᠋ᠤ᠌ ᠲᠤᠩ ᠲᠣᠬᠢᠷᠠᠮᠵᠢᠲᠠᠢ᠃
ᠮᠣᠩᠭᠣᠯ ᠭᠡᠷ ᠢ᠋ ᠪᠠᠷᠢᠬᠤ᠂ ᠪᠠᠭᠤᠯᠭᠠᠬᠤ ᠨᠢ ᠨᠠᠷᠢᠨ ᠳᠡᠰ ᠳᠠᠷᠠᠭᠠᠯᠠᠯ ᠲᠠᠢ᠃ ᠲᠤᠬᠠᠢᠯᠠᠪᠠᠯ ᠱᠠᠯᠠ ᠲᠠᠯᠪᠢᠬᠤ᠂ ᠬᠠᠭᠠᠯᠭᠠ ᠪᠤᠰᠬᠠᠬᠤ᠂ ᠬᠠᠨᠠ ᠳᠤᠭᠤᠢᠯᠠᠬᠤ᠂ ᠲᠣᠭᠣᠨᠣ ᠭᠠᠷᠭᠠᠬᠤ᠂ ᠣᠨᠢ ᠡᠯᠭᠦᠬᠦ᠂ ᠴᠠᠷᠪᠠᠭ ᠲᠤᠭᠤᠷᠭᠠ ᠨᠥᠮᠥᠷᠭᠡᠬᠦ᠂ ᠳᠡᠭᠡᠪᠦᠷ ᠨᠥᠮᠥᠷᠭᠡᠬᠦ᠂ ᠪᠦᠰᠡᠯᠡᠭᠦᠷ ᠲᠠᠲᠠᠬᠤ᠂ ᠡᠷᠦᠬᠡ ᠲᠠᠯᠪᠢᠬᠤ᠂ ᠣᠭᠣᠰᠣᠷ ᠪᠦᠴᠡ ᠪᠡᠬᠢᠯᠡᠬᠦ᠂ ᠲᠤᠯᠭᠠ ᠪᠠᠨ ᠵᠠᠯᠠᠬᠤ᠂ ᠡᠳ᠋ ᠪᠠᠷᠠᠭᠠ ᠣᠷᠣᠭᠤᠯᠬᠤ᠂ ᠡᠭᠦᠳᠡ ᠪᠡᠨ ᠪᠠᠷᠢᠬᠤ᠂ ᠲᠣᠲᠣᠭᠣ ᠪᠠᠨ ᠤᠶᠠᠬᠤ ᠵᠡᠷᠭᠡ ᠳᠠᠷᠠᠭᠠᠯᠠᠯ ᠲᠠᠢ᠃ ᠮᠣᠩᠭᠣᠯ ᠭᠡᠷ ᠦ᠋ᠨ ᠳᠣᠲᠣᠷᠠᠬᠢ ᠵᠢᠷᠤᠮ ᠶᠣᠰᠣᠨ ᠳ᠋ᠤ᠌ ᠭᠡᠷ ᠦ᠋ᠨ ᠳᠣᠲᠣᠭᠤᠷ ᠵᠠᠢ ᠶ᠋ᠢ ᠬᠣᠢᠮᠣᠷ ᠲᠠᠯᠠ᠂ ᠡᠭᠦᠳᠡᠨ ᠲᠠᠯᠠ᠂ ᠭᠡᠷ ᠦ᠋ᠨ ᠡᠵᠡᠭᠲᠡᠢ ᠶ᠋ᠢᠨ ᠲᠠᠯᠠ᠂ ᠭᠡᠷ ᠦ᠋ᠨ ᠡᠵᠡᠨ ᠦ᠌ ᠲᠠᠯᠠ ᠭᠡᠵᠦ ᠢᠯᠭᠠᠬᠤ ᠶᠣᠰᠣ ᠪᠠᠢᠳᠠᠭ᠃ ᠮᠣᠩᠭᠣᠯᠴᠤᠳ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠣᠣᠯ ᠳᠤᠮᠳᠠ ᠭᠠᠯ ᠭᠣᠯᠣᠮᠲᠠ ᠲᠤᠯᠭᠠ ᠪᠠᠨ ᠪᠠᠢᠷᠢᠯᠠᠭᠤᠯᠳᠠᠭ᠃ ᠲᠡᠭᠦᠨ ᠦ᠌ ᠲᠣᠭᠣᠷᠢᠭᠰᠠᠨ ᠣᠷᠣᠨ ᠵᠠᠢ ᠶ᠋ᠢᠨ ᠪᠠᠷᠠᠭᠤᠨ ᠲᠠᠯᠠ ᠨᠢ ᠡᠷᠡᠭᠲᠡᠢ ᠬᠥᠮᠦᠨ ᠦ᠌ ᠡᠳ᠋ ᠵᠦᠢᠯ᠂ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠡᠳ᠋ ᠵᠦᠢᠯ ᠢ᠋ ᠪᠠᠢᠷᠢᠯᠠᠭᠤᠯᠳᠠᠭ ᠵᠠᠩᠰᠢᠯ ᠲᠠᠢ᠃ ᠮᠥᠨ ᠮᠠᠯᠴᠢᠳ ᠦᠨᠢᠶᠡ ᠮᠠᠯ ᠢ᠋ᠶ᠋ᠠᠨ ᠰᠠᠭᠠᠬᠤ᠂ ᠬᠣᠨᠢ ᠪᠡᠯᠴᠢᠭᠡᠬᠦ᠂ ᠬᠣᠲᠠᠯᠠᠭᠤᠯᠬᠤ ᠵᠡᠷᠭᠡ ᠳ᠋ᠦ᠍ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠲᠣᠭᠣᠨᠣ ᠪᠠᠷ ᠲᠤᠰᠤᠭᠰᠠᠨ ᠨᠠᠷᠠᠨ ᠤ᠋ ᠲᠤᠰᠬᠠᠯ ᠢ᠋ᠶ᠋ᠠᠷ ᠴᠠᠭ ᠢ᠋ ᠪᠠᠷᠢᠮᠵᠢᠶᠠᠯᠠᠳᠠᠭ ᠨᠢ ᠭᠡᠷ ᠲᠡᠢ ᠬᠣᠯᠪᠣᠭᠠᠲᠠᠢ ᠠᠷᠠᠳ ᠤ᠋ᠨ ᠮᠡᠳᠡᠯᠭᠡ ᠶ᠋ᠢᠨ ᠨᠢᠭᠡᠨ ᠥᠪ ᠶᠦ᠍ᠮ᠃
ᠮᠣᠩᠭᠣᠯ ᠭᠡᠷ ᠲᠦ᠍ ᠮᠠᠨ ᠤ᠋ ᠮᠣᠩᠭᠣᠯ ᠤᠭᠰᠠᠭᠠᠲᠠᠨ ᠰᠣᠶᠣᠯ ᠪᠣᠯᠪᠠᠰᠤᠷᠠᠯ᠂ ᠬᠠᠢᠷᠠ ᠰᠡᠳᠬᠢᠯᠭᠡ᠂ ᠭᠤᠸᠠ ᠲᠠᠭᠠᠰᠢᠶᠠᠯ᠂ ᠬᠦᠰᠡᠯ ᠪᠡᠯᠭᠡᠳᠡᠯ᠂ ᠤᠷᠠ ᠳᠠᠮ ᠭᠦᠨ ᠰᠢᠩᠭᠡᠭᠡᠰᠦᠲᠡᠢ ᠪᠠᠢᠳᠠᠭ ᠪᠥᠭᠡᠳ ᠮᠣᠩᠭᠣᠯᠴᠤᠳ ᠤ᠋ᠨ ᠥᠪᠡᠷᠮᠢᠴᠡ ᠵᠠᠩ ᠠᠷᠠᠨᠰᠢᠨ᠂ ᠣᠢ ᠤᠬᠠᠭᠠᠨ ᠭᠦᠢᠴᠡᠳ ᠬᠠᠳᠠᠭᠠᠯᠠᠭᠳᠠᠵᠤ ᠪᠠᠢᠨᠠ᠃ᠡᠢᠮᠦ ᠡᠴᠡ ᠪᠢᠳᠡ ᠡᠨᠡᠬᠦ ᠦᠨᠳᠦᠰᠦᠲᠡᠨ ᠦ᠌ ᠪᠡᠨ ᠰᠣᠶᠣᠯ ᠤ᠋ᠨ ᠥᠪ ᠢ᠋ ᠤᠯᠠᠮ ᠴᠢᠨᠠᠭᠰᠢᠳᠠ ᠵᠠᠯᠭᠠᠮᠵᠢᠯᠠᠨ ᠬᠥᠭᠵᠢᠭᠦᠯᠵᠦ᠂ ᠤᠯᠠᠮ ᠥᠷᠭᠡᠨ ᠬᠡᠷᠡᠭᠴᠡᠭᠡ ᠲᠡᠢ ᠣᠷᠣᠨ ᠰᠠᠭᠤᠴᠠ ᠪᠣᠯᠭᠠᠬᠤ ᠨᠢ ᠵᠦᠢᠲᠡᠢ᠃
《ᠤᠩᠰᠢᠨ ᠣᠢᠯᠠᠭᠠᠬᠤᠢ》 ᠠ᠋ᠴᠠ ᠪᠠᠭᠤᠯᠭᠠᠪᠠ᠃
